13
1 Jopgo po ma weyu, te po wali, “Mu tama mu.
Tigidali po dagego pusali,
te da eno polobadu sulama, odai dao.
Te nai dabe tigidali eno polo konea silai dao.
2 Tigidali nai dabe dagego koneani da,
eno me eno koneai nai dabe da.
Dagego kolesagago eno kolesaga edelebeo.
3 Tama tiyu yaide, ena dage dali po wabo
hagela mu yali.
Eno homugo God Tigidali Bomo Elalubo Bidi dali
po wabo homu yali.
Eno homugo dadi si pogo hwįbo
tiwai eyu, eno sęgę dodolaiba.
4 Tiali goli, dagego ena aiyaba elalumainu,
ili po hauwa mu obao.
Dage te dokta bidi te gasi sai bidi mego
gasi dodolabo konesiąwai dokta bidi tiwai dao.
5 Tama tibaso yaide, po ma wagio,
pedauwali pania sao,
tama bidi dabego homugo dage dwagi yai
homu kolesaga elaluba homu yabo,” wali.
6 “Tama megi da, dage pedauwali pania selama,
eno po waboba olo munama, odao.
7 Dagego dwai po weyu, ili po dabe te obao.
Tama dagego homugo te tobage po
God tau somainogo homu ebawe?
8 Eno tonobo da, dagego homugo te tibo po walama,
God po tau selama,
tama te po tų ebode agai po mu omainu te ebao.
9 Te Godigo dage sulama,
dagego ebo kolesaga osola subo sogo,
teda dage bugagia bidaibawe?
Ma, dagego God ili po ola mawaibawe,
te bidi dabe ili po ola mabo gilama tiaibawe?
10 Ma, po tų ebode dagego God naga tau siyu,
tama eno nogi aiyaba ilabo homu
duga homude elalubaso da, teda eno koneani,
Godigo dage sesenaibao.
11 Tama tede dagego agai genuai bomo odama,
tama dage agade wi mu yaibao.
12 Te polo po dabe dagego pusali da,
teda te olo nai mu dao,
te isi nogobo sisi dulu tiwai dao.
Tama me te pu anilai tiwai dao.
Te augwali dili isąwai tiwai dao,”
Jopgo te po wali.
Tagala, God aga ela isilabo da, Jop agai po wabo wi me ebeo
13 Jop agai po genina mu ma weyu, e tama wali,
“Dage pedauwali pania selama,
enaduba deli naga po omainogo sula tagalao.
Tama tagala, magi sę ena tigide pedalu si da,
eno pedauwali pania sogobeo.
14 Ao. Ena wi meni. Eno God dali po wabo
usu selama elalubao.
Tama ena isimainogo, tama ena isimaina.
15 Eno gasa nai me tonalubeo.
Ma, tama Godigo ena elama, isiliyu da,
teda aga homugo naga dao.
Tama tiali goli, hasia eno agai gedu
e tama ola mawaibao, eno dwai sę me ebeo. * Bidi mebago homugo dago te vesde wali po begelama, e tiwai po wainao, te homu yali, “Tiali goli, te hasia bolo agai ena ela musiąbadi, eno te tiwai po agai gedude dolo ponama omainao, eno dwai sę ebeo. Tama te eno agai enabolo olo mu tau sabo homu kolesaga emainu tonaluaibao.”
16 Ma, eno God dali po wabo wi isąma eyu da,
eno homugo tibo ena dwai sę
isąwai bidi dao homu agai yaibao.
Tama agai ena hobede elama,
tama ena bugagia bidimainu sula tagalaibao.
Magi baso meni. Dwai sę ebo bidi dabego da,
God dali po wabo wi yaibao.
17 Tama megi da, te eno homude elalubo po pusaibao.
Tama eno homugo dagego olo saganama, eno po odao.
18 Godibolo pusabo po polo usu selama elalubao,
eno te bidigo po tų ebode po pusainu ebo gilama.
Eno koneani, eno dwai sę meni, tama tiyu,
eno te po tų ebode eno po ela holaibao.
19 Dego ena dali pogo hwįbo tiwai elama,
dego enade dwai sę yai bidi da po waibawe?
Ma, bidi me bidibaso da,
teda ena pedauwali paniasa bidama, isaibao,” wali.
20 “God, eno nagebolo hanalu waiba,
nago enade sę si emainu.
Ma, nago homugo eno te po si usu da homu eyu da,
teda usu dao, ena wi elama, nagede
wi me duala sogobeo.
21 Te hanalu wabo po si e tama dao.
Eno homugo nago ena tigide dene ma ilamo dao.
Tama me nago ena wi ilabo sę dabe
hauwa eno tigide ma elamo.
22 Ma, nago tama tiyu da, teda nago ena dali
po obaso da,
eno nago po wei ponoyu yaibao.
Ma, meniyu da, eno nagebolo po bolo waibao.
Tama nago enaba po wei ponoyu yagameo.
23 Eno mena dwai sę, me kolesaga
dwai, me sęgę yai sę dabe me yaliwe?
Eno homugo nago enabolo pusa mao.
24 Magi baso nago ena naga boi bidi gagalama,
ena tudi ola menama, edelebo dawe?
25 Ena da, olo ni yabe dali,
olo nosai sasi isila pabo tiwai dao,
te waligo subigila sąsąbo tiwai dao.
Tama tibaso, nago ena magi baso wi ilama,
magi baso dene ilama, tagalobawe?
26 Eno tonobo da,
nago eno polobadu gesi bidide yali
sęgę me konealubo ąǫ ebao.
Tama megi nago te sęgę wei ponoyu,
ena sęgę mabo ąǫ ebo.
27 Nago eno sągą haliga sengo gebelali,
tama ena biligobeo.
Tama tiali goli, ena biliyu da, nago ena wali asobo dao,
ena mena menaba pali.
Tama nago eno sągą pasalu bugagia tonalua asobo dao.
28 Da bidi dabe dobo da, te ni pago tulama,
damua pabo tiwai dao.
Tama te ugwa te asoba dabego tulama,
popodolo pai tiwai dao,”
Jopgo te po wali.
*13:15: Bidi mebago homugo dago te vesde wali po begelama, e tiwai po wainao, te homu yali, “Tiali goli, te hasia bolo agai ena ela musiąbadi, eno te tiwai po agai gedude dolo ponama omainao, eno dwai sę ebeo. Tama te eno agai enabolo olo mu tau sabo homu kolesaga emainu tonaluaibao.”