2
Genuai Bidigo Jerusalem dolama, dene mani
1 Hobede mu dao,
te wiegi yai taun Saion.
Genuai Bidigo aga dali sębę genuai mu yali.
Tama agai sębę da, te hulia sai haowago taun mesega
sai tiwai dao.
Polobadu da, te Jerusalem te kantri Israel bagego
gawe ebo wiegi yai taun elaluama, tama megi da,
agai te Jerusalem aiyaba elaluama,
aga olo pobele bage tiwai elalubao.
Mu tama Genuai Bidigo te taun Jerusalem dolobo sogo,
agai aga tempel be te taunde elalubao olama,
homu kone me ebeo.
Menio. Agai taun sese tama mu dolalio.
2 Genuai Bidi agai te Israel dabe hobede me ebeo.
Menio.
Agai augwaligo be nani sese tama dolali.
Agai augwali dali sębę elama,
tama agai wiegi yai kantri Judago
bomai taun dabe aluama, tagalalio.
Agai te kantri me, aga tobolu bidi dabe dali,
sese tama dolalio,
tama augwali hale dwai mu yalio.
3 Genuai Bidi aga sębę dwai mu elama,
tama agai Israel dabego bomo aluama, tagalali.
Tialima, te boi bidi dabe asali sogo,
agai te Israel dabe tau me sabeo. Menio.
Agai Israel mu dolalio, te isigo tigidali nai dabe dela
silibo tiwai yalio.
4 Agai te wiegi yai taun Saion dali boi bidi elama,
tama agai aga we bidi enainu enesigi balibiba
tulalubo tiwai yali.
Awe, aga bomogo aga digi te Jerusalemgo gawe yai
we bidi sese tama ela silalio.
Agai sębę te posolai isi tiwai elalu,
agai te isi te taun Jerusalemba muani, bidigo wę
gelebo tiwai yali.
5 Genuai Bidigo Israel dabe dali boi bidi homu elama,
tama augwaligo kantri mu dolama, tagalalio.
Awe, agai bomai taun dabe doliyu,
me augwaligo te wiegi yai bomai
be dabe aluama, tagaliyu yalio.
Te tigidali Juda bulu sese tamade agai te we bidi homu
sęgę emainu mu ilama,
tama augwali gela geninama mu uduali.
6 Genuai Bidigo aga tempel be mu dolama, mu tagalali,
te bidigo te gi be dolama, hųgila tagalabo tiwai tama
yalio.
Agai te Israel dabe augwali teba pelama,
tama agaba augwaligo lotu po wagi pabo digi
dolama, tagalalio.
Tama te tiali kolesagago te Genuai Bidigo te lotu po
wabo genuai sogo, me Sabat, si tama silalio.
Tama te we bidi, augwali te Jerusalemde bidali we bidi,
augwaligo agaba te lotu wabo sogo dabe ma lotu
weyu ebeo.
Genuai Bidigo te king me, pris dabe dali,
agai sębę genuai mu yalio,
tama agai augwali augwa sęde sela sąwanio.
7 Genuai Bidigo te aga tempel be,
me tede elaluali ofa maiabo altaba tudi mu ola mani.
Agai te boi bidi dabego te Jerusalem taun siyu,
me agai tempel be hųgiyu emainu sula tagalalio.
Tama me te boi bidi dabe augwali te Genuai Bidigo
tempel be tomoba pelama,
tama augwaligo te be tomode subigila hae me po
dabe wali.
Polobadu dago tede wiegi yai homu eyu,
Godiba lotu po wedu geai goli,
megi da, augwaligo hae bomonama wedu geai.
Magi baso meni, augwaligo te be sai dao.
8 Genuai Bidigo te genuai wiegi yai taun Saiongo
masigigo nigai boma pai obo aluama,
tagalabo homu yalio.
Agai te obo bugagia mu usu sai, te obo dolai hagede.
Tama agai te sę ebode gagamua sabeo.
Agai te tigidali badu te obo dabe dali,
te bobobage taua be dabe dali,
te sese tama mu dolama, tagalali,
tama sese tama mu dolama, mu elalubao.
9 Tama agai te obogo sunumi dabe hųginama, sąnama
tagaliyu,
me te sunumi palibo ain dili mimia sąnama,
tagaliyu yalio.
Tama te dolali nai dabe augwali tǫde munalubadi,
te dwai olo masigi hogomu dabego augwali
mesegelama elalubao.
Te boi bidi dabe augwaligo te king aga tobolu bidi dabe
dali selama,
tama augwali gasa kantriba kalabus elama, odasa
pali.
Te pris dabe augwaligo te we bidibolo te Godigo bomai
po me ola mabo meni.
Me te profet sibigo te nade subo nai tiwai ma susiąyu,
tama augwaligo Genuai Bidigo po ma sabo menio.
10 Te Saion monu dabe, augwali olo dali tǫde dulaluyu,
tama augwali pedauwali pania selama, bidalubao.
Augwaligo augwa tobolude tǫ hogomu munama,
tama augwaligo hobede side gudubo ugwa gudama
bidibao.
Tama te Jerusalemde gesi wegi mane augwali
homu sęgę mu elama,
tama augwaligo tobolu tǫba basi gulama, elalubao.
11 Eno te Jerusalemde pedelali nai dabe homu kone
palama,
tama ena gela waligo eno gedu dene mu ebao.
Eno te hobedai we bidi dolama elalubo sulama,
ena gasa homu dwai mu ebo dao.
Eno homu dene dwai mu yalio.
Magi baso meni, eno suali,
te nai tusiąwai wai puluba dali,
wai bǫų dabe dali suali.
Augwaligo bomo kimi meniama,
tama didibili elama,
te Jerusalem sunumi dabede tuloluama,
munalua pabo sualio.
12 Te wai bǫų dabe augwali nasi ebaso,
augwa idabolo nai me ąį momainu gela weyu ebao.
Augwali te taun sunumi dabede subigila tuloluama,
munalua pabo suali,
te ami bidi dabe te boide sili wąbi dolama,
munalua pabo tiwai elalualio.
Tama augwa ida dabego te wai bǫų dabe nogo daide
muna sabo si da,
te wai bǫų dabe augwaligo bidibo ula sia salio.
13 Jerusalem, eno nage hobede mu dwalio.
O Jerusalem, te meba taun dabe nago te sali dene tiwai
me sai menio.
Tialima, eno mena po mu olama,
nago homu dąų walaibawe?
Nage dolali, te ene genuai mu tomoba pali tiwai yalio,
te tamu ąį ge te aiyana mu dulali tiwai yalio.
Tama nage dego wiegi yai ma pedelemainu egowe?
Woo, bidi menio.
14 Te nago profet sibigo te nade subo nai tiwai suali
po olama,
tama augwaligo nage dali ili po naga walio.
Tama augwaligo nage ili po ola mayu,
augwaligo nago yali dwai sę hanilai menio.
Te nage tau selama, te dwai sę tagalama,
tama nage bugagia bidimainu tau me sabeo. Menio.
Augwaligo Godigo po pusubode ili po walio.
Tama augwaligo pogo nage kegasa bilama, mu tagalalio.
15 O Jerusalem, te Israel hani isąwai we bidi augwali
tedu ela soyu,
augwaligo nage dolali elalubao sualio.
Tama augwali noma siyu, nogo hogwayu,
tobolu pęyu, kęnę po ola mayu, e tama po obao,
“Te taun tama te bidi dabego te wiegi yai sawi yai taun
dao,” wali, “te taun te da, agawe?
Te taun tama te tigidali tǫ kantri we bidigo gawe yai
taun da, agawe?”
Augwaligo te tobage hale ilibo po wabo dao.
16 Te naga boi bidi dabego nagede kęnę po weyu,
posobo po wabo dao.
Augwali gisugu dwai mu weyu, e tama tiwai po obao,
“Dago bomogo mu dao, dago te taun mu dolama,
tagalali dao.
Te taun Jerusalem dolali dao, dago.
Tega! Dago te si tonaluali, megi da,
te si polo megi pedelali dao,”
boi bidi augwaligo te tobage po wabo.
17 Te Genuai Bidigo polobadu mu te yainogo yali
te sę polo megi yali dao.
Polobadu mu Genuai Bidigo te po wai dao,
te Israel dabego agai po sela sąbaso da,
teda agai Jerusalem dolaibao po wai dao.
Tama tialima, megi nage hobede me ebeo,
Jerusalem, agai nage aiyaba polo elaluali dao.
Agai nago boi bidi dabe bomo mu ilama,
tama augwaligo nage aiyaba elalumainu ilali dao.
Tama augwaligo nage dolalide wiegi yai
homu pemene elama, gana pali dao.
18 Te nago we bidi augwaligo Genuai Bidigo
augwali tau somainogo hwą te waiyąo.
Hobedai, Jerusalem,
nage hulide me giligade gela genina mu elama,
tama nago gela uga te ąį sabo tulubo tiwai emainao.
Nage hodo me doligio. Nage gela wabo sę naga idu
geao.
19 Hulide nage hauwa sogo mu hodalu,
tama Genuai Bidiba gela hwą wao.
Nago agabolo gedu haluasa po bomonama weyu,
te nago sęgę agabolo pusuyu,
me nago homu sęgę po agabolo pusao.
Magi baso menio, naga wai bǫų dabe
augwali nasi elama,
tama augwali bomo kimi isibaso,
augwali te naga sunumi dabe
sesegede te dedege pabo dao.
Tialima, nago nogo ugwaba selama,
tama Genuai Bidibolo augwali
hobede emainu hanalu wao.
20 Jerusalemgo e tama gedu haluasa po wali,
“Genuai Bidi, nago te naga hani digi muba
te yali te dene mabo sę suao.
Te we dabe sibi augwaligo augwa wai bǫų dabe
godolo mu eyu, negeyu yai dao.
Tiali goli, megi da, augwaligo augwa
te wai bǫų dabego tigi tubao.
Tama te boi bidi dabe augwali naga digi
tempel be tomoba pelama,
tama tede augwaligo naga pris dabe,
me profet bidi dabe, ela silali dao.
21 Te boi bidi dabego augwa moni ge hwągo
te gesi wegi ogwa me, monu dabe me, ela silalio.
Awe, augwaligo te we sasiąwai gesi
bidi dabe dali, te bidigo sasiąwai gesi
we dabe dali te ela muani.
Tama augwaligo tigi dabe eno sunumi
dabede subigila wilalua pabo.
Genuai Bidi, nago eno
te we bidi dabe dali sębę mu yalio.
Tama nago augwali dali hobede me ebeo. Menio.
Nago augwali elama, isilai dao.
22 Nage sębę mu elama, tama nago te boi bidi dabe
tigidali badu i olama, tama augwali aselama,
ena dali dwai sę yali dao.
Tama boi bidi dabe hauwa mu asai dao,
te we bidi dabe te lotu wabo
genuai sogo asobo tiwai yalio.
Tialima, boi bidi dabego eno we bidi sese ela silali,
tama eno we bidi me deli wi sana peyu,
te augwaliba pedelali sę po pusabo bidi mu menio.
Eno ena we bidi godolo mu yai dao,
tama eno augwali bugagia mu tonaluai dao.
Tiali goli, megi da,
te boi bidi dabego augwali megi mu silalio.”
Te Jerusalem hanugo te gedu haluasa po wali.