Pris Sę Ebo Bomai Po
Polasa wabo tau sabo po
Te bukude te Livai dabe sę ebo po wali, te hani bidigo digi te pris sę emainogo dąį ilama, te Israel hani dabe lotu wabo tonalumainogo yalio. Te bukude te haniani bomai po elalubao, te pris hani dabego te Israel dabe lotu wabo pedai badu bidibo page bugagia tonalubo kolesaga yabo po wali. Tialima, te po hauwa me elalubao, te we bidi dabe bidibo page dodoliyu, te augwali lotu wabo tau siyu, te genuai side lotu wabo bodolu muani bugagia wali pomainogo yai dao.
Te bomai po page dabe e tama dao. God te tedali gasa wiegi yai mu dao. Agai te wiegi yai doloba pai kolesaga naga yaibao, tama tibaso agai te Israel hani dodolobo sę eyu, te augwa bidibo page bugagia tonaluyu, te aga pąde bidimainogo yai. Te bukude te polasa mu wabo po te dao. Godigo digi te wiegi yai doloba pai kolesaga elalubaso, te da aga dali deliba sisinama, te agai homu godolo yabo kolesaga yagameo.
Te Israel hani gesi ogwa bidi dabego te Godigo po nedama koneainogo ebo sogo, te pris sę ebo buku te Dąį 16 tede gagalama, te Dąį 27 teba nedali. Te dąį saptade te we bidi dabe te doloba pai kolesaga dabe naga wali pomainogo dodolobo po hauwa elalubao. Nosali Jisasgo me te po me deli pedai badu ma pusali. Te bomo yai po elalubo Dąį 19:18, tede elalubao, “Nago te abagi dabe godolo mu yao, te naga digi naga godolo ebo tiwai yao.” Te po te we bidi dabe hauwa augwaligo koneai dao.
Te ofa ebo bomo yai po dabe
1
(Dąį 1–7)
Genuai Bidi aga Ugwa Be tomode bididu, te Moses asao olama i walima, te agabolo te po wai, “Te Israel we bidiba e tiwai po wao,” wali, “ ‘Te dage bidi me deligo te Genuai Bidiba ofa me deli selasa asainogo ebaso da, teda agai te kibu bulmakau me deli, ma kibu sipsip me deli, ma meme kibu me deli, te sela asobo usu dao,’ tama po wao,” wali.
Te isiba tigidali ulama dabo ofa dabe yabo po
Tama Genuai Bidigo Mosesbolo ma walama, te Israel dabebolo e tiwai po walao po wali, “ ‘Te bidi me deligo te isiba tigidali ulama dabo ofa ebo bulmakau sesebaso da, teda agai te bulmakau omai wiegi yai mu sao, te aga tigide keni keni pobolo meni yai sesao. Te bidigo homugo te Genuai Bidigo agaba bugai haliga emaina homu eyu da, teda agai te tiwai ofa tama yao. Agai te Godigo Ugwa Be sunumi badu te bulmakau selasa aselama, tama te bulmakau toboluba nogo muao, teda te bulmakau te bidi hasegelama tama te bidigo sęgę dabe sela sąyu, Godigo te ofade bugai haliga yaibao. Tama te Genuai Bidigo gedude, te bidigo te bulmakau elao, tama te pris dabe, te Arongo hani dabego, te bulmakau kaneme Genuai Bidiba ofa yao. Augwali te Ugwa Be sunumi pąbadu elalubo alta badu pelama, te kaneme te alta sabi dage me si me si te badu sąyao,’ ” wali. “ ‘Tama nosali te bidigo te bulmakau tigi wali dagalama, te aga mi dabe tologao. 7-9 Te kau aga haliga me sągą ąį bugagia tela yao. Te pris dabego te altaba isi dabe munama, te isi udulao. Te augwaligo te kau tobolu me, ili me tigidali mi dage te isiba muao, te isigo tigidali dela silimainogo ilama, te keli hogomu naga elalueibao. Tama Genuai Bidigo te ofa denami ebo odama, te aga godolo homu elama bugai haliga yaibao.’ ”
10 “ ‘Bidi me deligo te ofa yabo sipsip ma meme sesebaso, agai te omai sipsip ma omai meme wiegi yai mu sesemainao, te keni kenigo aga tigi dolisąwai sela pao. 11 Tama te Genuai Bidigo gedude agai te sipsip ma meme te not badu altade elao. Tama te pris dabego te sipsip ma meme kaneme selama, te alta dage me si me si pedai badu sąyao,’ ” po wai dao. 12-13 “ ‘Tialima te bidigo te kibu mi togolama, te kibu haliga me sągą bugagia ąį tedelama, te pris me deligo te tobolu me ili me te kibu pedai tigidali te alta siaba muao. Te prisgo Genuai Bidiba te ofa menama, te isigo tigidali dela silimainogo elama, te keli hogomu naga elalumainogo yao. Tama Genuai Bidigo te ofa ulubo denami ebo odama, te agai homu godolo elama, teba bugai haliga eyu yaibao.’ ”
14 “ ‘Te bidi me deligo te Genuai Bidiba ofa yabo ba me deli sesainogo eyu da, teda te tobage ba me deli sela asao, te ba nogi balus, ma ba hi te tobage ba prisba sela asao,’ ” wai dao. 15 “ ‘Tama prisgo te ba hi altaba sela pelama, te aga ba dogoni pobegelama isaibao. Te agai te ba hi tobolu togolama, te tobolu te alta saiba ulao. Te ba hi kaneme te alta bogo badu gegeli pao. 16 Agai te ba hi nisi poabadi, te ba dogoni nai mubo tibu me te selama, te giliga pedalu badu alta te keli mubo badu muao. 17 Nosali prisgo te ba hi bogode tola selama, te aga tigi togwao, tialima te bogo mu togwa sągio. Agai te isigo tigidali domainogo yao, te keli naga elalumainogo ilao. Agai te tiwai ebaso da, teda Genuai Bidigo te ba ofa yali denami ebo odama, te aga homu godolo elama, te bugai haliga eyu yaibao,’ ” wali.