5
Jisasgo te bidi dabe me badubolo ena wali asiąo wali
(Mat 4:18-22; Mak 1:16-20)
1 Te me sogo Jisas te Genesaret sigi ąį sesegede dolalubadi, Jisas aga pageba Godigo po odainu we bidigo mu odoga sagasalio. 2 Tama Jisasgo te geba si sigi ąį bogo badu gebeadubo suali. Tiali goli te sųgų sabo bagego geba osogo tagalama, augwa te agane togobo nai umben ąį teladualio. 3 Jisas aga Saimongo geba meba hola pali. Agai te Saimonbolo “Te geba sigi ąį tomoba ugwaba dwanu pogwa palao,” te po wali. Tama aga te geba daide duguladu, te we bidibolo Godigo po pusa mabo dage ma wadolali.
4 Agai te po pusa silama, Saimonbolo te po wali, “E geba sigi ąį tomoba ugwanu ma nogelama, duga sųgų sainu da, te agane togobo wa umben te ąįba tuliagameo.” 5 Saimongo wei ponoyu, te po wali, “Genuai Bidi, moni huli sesabi dago yabo sę iduali goli, te sųgų deli munu me sai menio. Tiali goli, nago po obaso da, eno agane wa te ąįba tuluaibao,” wali. 6 Tama augwaligo te agane togobo wa dabe ąįba tulama, sųgų umabo mu tualigo te agane wa pąde togwa pai sę yanio. 7 Tama tibaso, augwa gasa gebade bidali age dabe me badu ma augwali tau sagasomainu i wali. Tama augwali aselama, te geba si sųgųgo pągąnani. Tebadi yaide, te geba si te węba hoa sigulainu sę yanio. 8 Tama Saimon (me sogo Pita wabo bidi) agai te tebo sulama, Jisasgo sągą pagede aga kidu sugunama, Jisasbolo te po wali, “O Genuai Bidi, nago ena taga pao. Ena da, dwai sę ebo bidi dao,” te po wai. 9 Agai augwaligo te sali sųgų sulama, noma mu sali. Aga dali bidali bidi dabe me noma mu sali. 10 Bidi me nogi me Sebedigo ogwa si Jems dali Jon dali si me, Saimon aga age solo da. Augwali si me moni noma sali. Tama Jisasgo Saimonbolo te po wai, “Nage wi egio. Nosali nago we bidi siyu tama tiwaibao,” te po wali. 11 Tama te geba si ąį saniba ma nogelama, tigidali nai dabe tede tagalama, augwali tigidali Jisas wali pela sialio.
Jisasgo oiyabe bidi me deli geselali
(Mat 8:1-4; Mak 1:40-45)
12 Me sogo Jisas be nani me delide bidibadi yaide, oiyabe gasi sai bidi aga pageba asali. Te oiyabe gasigo aga tigi sibi tigidali mu usu nai bidi da. Te bidigo Jisas sulama, kidu sugunama, agai Jisasgo bomo gonobo po weyu, te po wali, “Genuai Bidi, nago homugo usu dao wida, teda nago ena wiegi yai ma ilama tama ena te meda meni yai tiwai ma bidaibao,” te bidigo te po wai. 13 Tama Jisasgo nogo debelama, te bidi tigiba diąyu, te po wali, “Awe, eno homugo nage gasi usu ilaibao. Tama nage wiegi yai pedalao, te meda meni yai bidi bidao,” Tama te sogo polo tama te bidi dwagi yai ma yali. 14 Tama Jisasgo te bidi aga dali te po wali, “Bugagia dua dao. Nago bidi me deli dali eno nagede yali sę po me wagio. Menio. Nage dolo pelama, tama nago tigi te pris bageba waseligi pelama, tama agai nago tigi osola sumainao. Te elama, tama nago te Godibolo te ofa mao, te bidi Mosesgo te kolesaga yao wali po tiwai gilama emainogo yao. Tama tiyu te bidi dabego koneyu, te nago gasi silali, nage te meda meni yai bidi tiwai megi ma bidibao, te homu augwaligo yaibao,” Jisasgo te po wai. * Prs 14:1-32 15 Jisasgo agade “Po pusulamuo” po wai goli, agai yali sę po pususu paligo ugwa genia palio. Tama umabo we bidi aselama, agai wabo po odagasali, agai augwaligo gasi dabe sela sąmainu yai. 16 Tiali goli, hauwa sogo agai te we bidi dabe bidalubadi pali. Aga te bidi meni yai sesawai digiba pelama, agai Godibolo gedu haluasa po wagi pidu geduai dao.
Jisasgo nogo sągą isai bidi dwagi yai ma ilali
(Mat 9:1-8; Mak 2:1-12)
17 Me sogo Jisas be me tomode bidai. Agai te we bidibolo aga po pusa mawai. Tama te Farisi hani sibi dabe me, te Godigo bomo yai po konebo bidi dabe me, augwali bidibadi, augwaligo aga tonaluali. Augwali te Galili bulu tǫ bulu tigidalidu asai, te Judia tǫdu me, te Jerusalem be nanidu me asai. Tama Genuai Bidigo te gasi dabe silabo bomo Jisasbolo mani. 18 Bidi mebago te nogo sągą dili kimi isai bidi te aga gologobe ni wade munama, tolasa asali. Te sela asali, te be tomoba sela pelama, te Jisas pageba muwainu yai. 19 Tiali goli, te we bidi hauwa mu te be tomode pągąna sai elaluali. Augwaligo sunumi gegali. Meni baso, be peduba te togobilidu holali. Te be asege be dao. Te be pedu haluali nai dagala munama, tama augwaligo te bidi aga te ni gologobe wa dali te we bidi bidibo tomoba, te Jisas bidibo digi gesabidi badu aiyaba tagalaluama mugulalio.
20 Jisas agai suali, te bidi dabe agai poba homu begi pai bidi dabe da. Sulama, agai te nogo sągą isai bidibolo te po wali, “Abagi, eno nago yali dwai sę sela sąyanio,” te po wali. 21 Tama Godigo bomo yai po page konebo bidi dabe dali, te Farisi hani sibi dabe dali, augwa hasi ugwa tono, eda tono eyu, te po wali, “E bidi magwai bidi yaliwe? E bidigo Godigo nogi dolobo po olamuo. God deligo naga bidigo dwai sę sela sąbo da.” Te po wai. 22 Tama Jisasgo augwaligo ebo homu koneama, agai augwalibolo po wei ponoyu, te po wali, “Dagego magi baso tama homu ebawe? 23-24 Eno po bomo elalubo dagebolo ola mawainu, te eno mena tama wagowe? Eno e bidibolo te po naga wabo si, ‘Nago dwai sę dabe sela sąyani,’ teda eno pogo bomo elalubo dagego hania konegobeo. Me ma, eno e bidibolo te po wabo si, ‘Nage hodaluama, bilao,’ tama aga hodaluama agai aga pibo somo selama hogodasa pobaso da, teda dagego eno pogo bomo elalubao waibao. Ena da, Godigo Bidi Mu da. Bidigo dwai sę e tǫde sela sąbo bomo elalubo dagego suyaganio,” wali. Tama agai te nogo sągą isai bidibolo te po wali, “Eno nagebolo obe dao, hodaluama, nago somo selama, beba pao.” 25 Polo tama, tigidali we bidigo tonalubadi yaide, te nogo sągą isai bidi hodaluama, agai odobe wa selama, beba pai. Aga beba peyu, Godigo nogi ugwaba sali. 26 Tama tigidali we bidi gegemani mu selama, Godigo nogi ugwaba sali. Augwali wi elama, te po wali, “Megi dago gasagi yai sę mu ebo sualio.”
Jisasgo bidi me nogi Livai i wali
(Mat 9:9-13; Mak 2:13-17)
27 Te nosali Jisas te be nani taga pobadi yaide, agai te maket takis sabo bidi me deli suali, aga ofis bede. Te bidi nogi Livai. Tama sulama, Jisasgo agabolo “Nage ena wali asao,” wali. 28 Livai hodaluama, agai ebo sę tagalama, Jisas wali pali. 29 Tama Jisas moni nogi elalubaso, Livaigo agai bede nai ulubaso, te takis sabo bidi hauwa mu dali, te gasagi yai bidi dabe me, augwali te nai tuagasali. 30 Tama te Farisi hani sibi bidi dabe me, te Godigo bomo yai po konebo bidi dabe me, augwaligo te sulama, Jisas wali pabo bidi dabebolo wado po weyu, te po hanalu wali, “Dage te takis sabo dwai bidi dabe me, te dwai sę ebo dabe me, te augwali dali hodobo magi baso nai tubawe?” 31 Jisasgo augwalibolo po wei ponai. Dwai dwai sę ebo bidi dabe te gasi bidi dabe ąǫ elalubaso, Jisasgo tama po digi sugunuyu te po wali, “Gasi meni yai bidi te dokta bidi pageba pabo menio. Gasi yai bidi naga te dokta bidi pageba pabo dao. 32 Ena te homu doloba pai bidibolo ‘Nage homu begalao’ po wagasobeo. Te meni. Ena te dwai sę ebo we bidibolo ‘Duga homu begeleąo’ po wagasali,” te po wali.
Tubo nai gisilibo sę
(Mat 9:14-17; Mak 2:18-22)
33 Te Farisi hani sibi me, te Godigo bomo yai po konebo hani bage dabe me, augwaligo Jisasbolo te po wali, “Te bidi Jon aga wali pabo bidi dabe augwaligo tubo nai gisilama, Godibolo po wabo dao. Tama te Farisi hani sibi wali pabo bidi dabe me, augwaligo me tebo sę gilalma ebo dao. Tiali goli, nago bidi dabe augwaligo te nai gisilibo sę ebo menio. Augwa nai me wę me tudubo dao,” wali. 34 Tama Jisas aga dali aga wali pabo bidi dabe me, tebadi agai te we sabo bidide po begelama, wai. “Te bidi mego we sabo sogode, dagego aga abagi solobolo ‘Nai osogo gisiliąo’ po wabo menio. Magi baso meni. Te we sabo bidi augwali dali bidibo sogo augwali bugai homu ebo dao. 35 Tama nosali me sogo te boi bidi dabego te we sabo bidi gasa buluba sela pelama, aga age solo homu dene ebaso, te sogo nai osogo gisilabo sogo pedelaibao,” Jisasgo te po wali.
36 E po begelai po digi po me Jisasgo augwalibolo pusa mayu, te po wali, “Bidi mego me gesi ugwa nami pisalama, pobidi badia pai ugwa nami me hobologobeo. Mego tama teyu da, aga te gesi ugwa pisawaiba, tama gesi ugwa te pobidi ugwa ma gagagobeo. 37 Ma mego me te gesi bomai wain wę te poloba sipsip tigiwaliba tabigobeo. Mego te eyu da, te gesi bomai wain węgo te sipsip wali aulua sanama, buluba gea paibao. Tama te sipsip wali aulua pelama, doaibao. 38 Gesi bomai wę te gesi sipsip waligo nigali botolba tabiao. 39 Te bidi mego te polobadu muai bomai ąį tulama, gesi bomai ąį ma tuabo homu ebo menio. ‘Polobadu muani bomai ąį da usu da,’ te po wabo da,” Jisasgo te po wali. Te po weyu, agai te Farisi bagebolo te po page wąį hagede, te poloba po dali, te gesi po dali te si augwaligo taluamuo.