14
Jisasgo te tigi bo dabo gasi yai bidi dwagi yai ma ilali
Me sogo Sabat Jisas pelama, te Farisi dabe augwa genuai tobolu bidigo beba nai tugi pai. Tama te bidi aga te Farisi sibigo genuai tobolu bidi bidibo dao. Agai bede me te Juda dabego bomo yai po mu koneai bidi dabe me, Farisi sibi dabe me, augwali bidiyu, augwaligo Jisas agai magi sę ebo weyu, tonaluali. Tama te bede me, nogo sągą tigi bo dae bidi me te Jisas pagede bidali. Jisasgo te bidi sulama, te Juda bagego bomo yai po mu koneai bidi dabe me, te Farisi sibi dabe me, te hanibolo te po hanalu wali, “Te Sabat sogode dago te gasi yai bidi dabe usu ma iliyu dodolobo sę ebaso da, usu yaibawe?” Tiali goli, augwaligo po wei ponebe. Tama Jisasgo te nogo sągą tigi bo dae bidi selama, dodolama, tagala palali. Te bidi dodolama, tagala palama, Jisasgo te tonalubo bidi dabebolo te po wali, “Te dage tomode bidi mego ogwa me, kau kibu me wę geba te Sabat sogode tulalueibaso, te bidi me agai sulama, te aga ogwa isidali weyu, polo peyu, saibawe, ma te meniwe? Te kibu kau me, te wę geba tulalubaso, page bidigo sulama, te aga pelama, te Sabat sogode agai saibawe?. Ma, te sogobewe?” wali. Tiali goli, augwaligo agai wali po wei ponogobeo. Augwaligo po me wabeo.
Te be page bidigo gasa bidi dabebolo nai tuagasiąo wai dao. Tama te bidi dabe augwali te be tomoba aselama, augwaligo te nogi elalubo bidi duga yabo madigiba polo pelama, tede bidali. Tama Jisasgo augwaligo te kolesaga ebo sulama, augwalibolo e po digi po wali. Agai te po wali, 8-9 “Bidi mego we sabo side, tama augwali nage nai tuagasao wabo side, nage pelama, te nogi elalubo bidi duga yabo madigiba dugwagi pigio. Magi basowe? Nage te nogi elalubo bidi duga yabo madigiba dugwagi pigi sogo da, te be page bidigo te genuai nogi yai bidi i olama, te bidi aselama, be page bidigo nagebolo e duga yabo madigi tagalao, e bidi ede dugwamainao, nage gasa be badu bidigi pao wagi da. Tama agai nagebolo te po wagi sogo da, nage hale eyu, te olo bidi duga yabo madigiba pigi da. 10 Te tiwai egimio. Augwaligo nage i wabo si, olo bidi duga yabo madigiba dugwagi pao. Tama tilama, te be page bidi aselama, sulama, agai nagebolo te po waibao, ‘Abagi, nage te nogi elalubo bidi bidibo madigiba asao, tede duga yao.’ Te wabo si yaide, te nai tuagasali we bidi tigidaligo gedude nago nogi ugwaba saibao. E po peni e dao. 11 Niwai bidi aga nogi ugwaba sobaso da, teda Godigo te bidi nogi aiyaba elaluaibao. Ma, aga nogi ugwaba sisąma bidali bidi, Godigo te bidigo nogi ugwa saibao,” Jisasgo te po wali.
12 Te Jisasgo te aga i wali bidibolo te po wali, “Naga nai hauwa te giligade uluyu, ma te piode uluyu elama, te naga abagi dede, ama dede, naga hani bidi me, kisalubo bidi dabe me, augwaligo nai hauwa elalubo bage, te tobage bidi dabe i wagio. Augwaligo nage nosali i olama, wei ponodali weyu, nago augwali i wagio. 13 Tiali goli, naga nai hauwa nogeainu ebaso, te nai meni yai bidi me, te nogo dwai bidi me, sągą dwai bidi me, gedu widai bidi me, te tobage we bidi i wao. 14 Te tobage we bidi nago i wabo si, Godigo nagebolo dwagi yai sę yaibao. Magi baso meni. Augwaligo nage ma wei mabo usu egobeo. Tama te doloba pai we bidi te gų pagede ma hodolobo sogode, Godigo nage ma wei ponaibao,” Jisasgo te po wali.
Tubo nai hauwa nogeai po digi po
(Mat 22:1-10)
15 Te nai tuabo saide duga yali bidi mego Jisasgo ola mani po odama, te bidigo Jisasbolo te po wali, “Te bidi me Godigo we bidi tonalubo madi tomoba pelama, tede nai tubaso da, teda dwagi yai homu pemene elama, tama bugagia bidada peyu, bidada paibao,” wali. 16 Bidi mego te po wali. Tialima, Jisasgo agabolo te po wali, “Te bidi mego tubo nai hauwa selama, nogeaiyu, we bidi hauwabolo agai po ola tolali, ‘Eno nai sisi ebo si, dage tuagasiąo,’ te po ola tolali. 17 Tama nosali te tubo nai sisi elama, te bidigo aga sę ebo bidi tagala palali, te polobadu i wali we bidibolo e po omainu, ‘Megi asiąo. Te tubo nai sisi ela munama, tue hagede, megi dage asiąo wali.’ 18 Tiali goli, augwali deli deligo ena hagelabo homu eyu, ili po wali. Bidi mego te sę ebo bidibolo te po wali, ‘Megi tama eno gi tǫ abelali. Tama te tǫ megi eno sugi paibao. Nago genuai bidibolo te po wao.’ 19 Bidi mego te po wali, ‘Eno sę ebo kibu kau nogo si megi tama abelali. Tama eno te kibu dabe bomo elama, sę bugagia ebowe weyu, sugi pobao. Nage pelama, nago genuai bidibolo te po pusao. Megi ena asogobeo.’ 20 Tama bidi mego e po wali, ‘Eno we tamadi kęwae dao. Tibaso, ena asogobeo,’ wali.
21 Tama tibaso, te sę ebo bidi aga genuai bidi pageba ma pelama, augwaligo wali po pusigi pali. Tama te genuai bidi sębę elama, dwai homu yali, te i wali bidi augwalibolo. Aga sę ebo bidibolo te po wali, ‘Polo pao. E moni taun genuai pabo tųde me, dwasianu pabo tųde me, tede bidibo nai meni yai we bidi oda sigi pelama, asao. Te tigi dwai we bidi me, gedu widai we bidi me, sągą dwai we bidi me, tigidali oda sigi pelama, eba asao,’ te po wali. 22 Tama te sę ebo bidi pelama, aga genuai bidigo yao wali sę elama, genuai bidi pageba ma aselama, te po wali, ‘Genuai bidi, nago enabolo wali sę eno yalio. Tialima, be pągąbeo, habuge yali,’ wali. 23 Te po odama, te genuai bidigo te po wali, ‘Moni taun taga pelama, te moni pabo tųde bidibo we bidi me, te dwasianu pabo tųde bidibo we bidi me gegegi pelama, eno beba asiąo po bomo elama wao, eno be pągąmainu, eno sisi yali nai augwaligo tumainu yao. 24 Eno nagebolo e po obao, eno hasia i wali bidi tigidali augwaligo eno sisi yali nai tugobeo,’ te po wali,” Jisasgo te po wai.
Bidi te Genuai Bidi Jisas wali peyu da, te bomo yai sę elalubao
(Mat 10:37-38)
25 Te bidi Jisas te Farisi hani bidigo be taga pelama, Jerusalem be naniba pabo ma gagalali. We bidi me hauwa aga dali wali pai. Tama Jisas hobolu begelama, augwalibolo po pusali, te po wai, 26 “Niwai bidi ena wali pai hagede homu ebaso da, te ena godolo mu tama eyu, ena wali pai hageda, te usu da. Tama agai aga ida aya dali, aga we wai puluba dali, aga ama dede, abe dede godolo mu eyu, tama agai ena dwasianu godolo homu eyu da, tea te tobage bidi ena wali pogobeo. Tama te agai aga digi aiyaba munama, agai ena ugwaba muyu, aga ena wali pabo, te usu dao. 27 Niwai bidi ena isibo hagelabo weyu tama aga ena wali pabo meni, te tobage bidi te eno hani bidi menio. Te ena wali pabo sę e tiwai dao. 28 Bidi mego sigi be sę yainu da, hasia aga digi aga homude homu kone palobo, ‘E be sę ebo ena usu egowe, usu egobewe? Eno mone ge usu egowe, usu egobewe?’ 29 Tama te bidi te homu hasia kone palisiąbadi, te sigi be ni bulali da, tama agai te be sę ebo sę ebaso, te be sę siligobeo. Tama gasa bidi dabego te sę yali sulama, te agade posobo po weyu, te bo wabo po gagalama, 30 te po waibao, ‘Te bidigo e sigi be sę ebo gagalali. Tiali goli, agai e sigi be sę yani simanobeo.’ Augwaligo te tobage po waidali weyu, agai hasia te be sę ebo bugagia koneama, usu baso, te be sę yao,” Jisasgo te po wali.
31 Jisasgo e po me wali, aga wali pabo sęde, “Te gasa bulude bidibo boi hwįbo genuai tuni bidi dali agai enesigi bidi dabe dali, augwali hwį yagasobo si, teda ede bidibo hwįbo tuni bidi hwįgi paibao, aga enesigi bidi dabe hodobo paibao. Tiali goli, hasia aga homude te po mobo waibao, ‘Te asobo boi bidi aga hwįbo bidi hauwa mu 20,000 elalubao. Tama eno hwįbo bidi hauwa mu menio, 10,000 naga elalubao. Sabi si menio. Te bidi eno aiyaba elalugowe, elalugobewe, te eno konebe,’ waibao. 32 Tama agai homude ena usu egobe wabo si, teda aga boi bidi digibulu bidibadi, agai po digi bidi tolaibao, boi pimainu yaibao. 33 Eno tamadi wali po deliba taluyu, tama te tiwai yaibao. Bidi mego aga doado bage tigidali tagalabo hagela baso, teda te bidi eno hani bidi menio,” Jisasgo te po wai.
Halea pali tamu po
(Mat 5:13; Mak 9:50)
34 Te Jisasgo te po wali, “Te tamu da, pusu ebo wiegi yai nai dao. Tialima, te tamu pusu ebo te mu halea pobaso da, mena tama ma pusu yaibawe? 35 Te mu halea pali tamu te olo nai tiwai dao, sę menio. Aga ili te tǫba magobeo. Te gide holobo nai tau sabo sę me egobeo. Te kibu bulmakau di dali taluama, te gide muainu ebaso, usu me egobeo. Te bidi dabe augwaligo te tobage tamu olo sela sąbo dao. Eno wabo po konebo bidi, agai eno po bugagia odao,” Jisasgo te po wali.