23
Juda dabe augwaligo Jisas augwa kiap tuni bidi gedude dodolama, po tų ela mawai
(Mat 27:1-2, 11-14; Mak 15:1-5; Jon 18:28-38)
1 Te genuai bidi dabe augwali tigidali hodalu, te po wai, “Jisas te kiap tuni bidi bidibo madi selasa pao,” wai. Te gavman tuni bidi nogi Pailat dao. 2 Augwaligo gagalama, Jisas tų ela mayu, te bidi Pailat gesabide. Augwaligo te po wai, “E bidigo da hanigo ebo kolesaga dolali. Jisasgo da dabe weyu, dago gavman tuni bidi Sisarbolo takis masigi magio homu ebo dao. Tama Jisasgo dabolo habu selebo po weyu, te po wai, ‘Ena da, Godigo sa muyu asaibao wali bidi Krais dao. Te ena tuni bidi dao,’ Jisasgo te po wai dao,” augwaligo te po wai. 3 Tama tuni bidi nogi Pailat agai Jisasbolo hanalu, te po wai, “Nage da, te Juda bagego tuni bidi dawe?” Jisasgo te tuni bidibolo po weyu, te po wai, “Naga digi te po obao, ena tama dao,” Jisasgo te po wai. 4 Tama te tuni bidi Pailat agai te pris tobolu bidi dabe me, te sisinai Juda we bidi me, augwalibolo weyu, te po wai, “E bidi agai dwai sę yali po page eno suali menio.” 5 Tiali goli, augwaligo po bomonama ma weyu, te po wai, “Agai po te Juda we bidibolo mobaso, tigidali we bidi dwai homu hogodolai. Agai te po Galili bulude gagalama, te sę megi eba me sela asalio,” augwaligo te po Jisasde wai, te bidi Pailatbolo.
Augwaligo Jisas Herot bidibo digi odasa pelama, tų ela mawai
6 Te kiap tuni bidi Pailatgo augwaligo wali po odama, augwalibolo hanalu wai, “Te bidi Jisas te Galili bulu bidi dawe?” 7 Augwaligo “Aga te bidi Herotgo tonalubo tǫde bidibo bidi dao,” wali. Tama te po odama, Pailatgo “Aga Herotba sela pao, agai te po tų odomainogo,” wali. Tama te sogo Herot te Jerusalem be nanide osogo bidibadi dao.
8 Te bidi Herotgo Jisas sulama, agai homu dwagi yai yali. Agai Jisasgo ebo sę po odai, tama agai Jisas polobadu suainogo yai, hauwa sogo. Agai homugo eno te bidi Jisas agai bomai sę ebo eno sueibao, te homu polobadu yai dao. 9 Tama tibaso, Herotgo Jisasbolo po hauwa hanalu wai. Tiali goli, Jisasgo agai po me wei ponebeo. 10 Tama te pris tuni bidi dabe dali, te Juda dabego bomo yai po mu koneai bidi dabe me, augwaligo pąba aselama, augwaligo Jisas po tų bomonama mu wai. 11 Tama Herot dali, aga enesigi bidi dabe dali, augwaligo Jisas dali dwai dwai haniani po olama, Jisas mu dolai. Augwaligo dwagi yai ugwa selama, Jisasbolo sabili mubo ąǫ yai. Tama te tiwai elama, augwaligo gisugu wai. Tama elama, Herot agai “Jisas te kiap tuni bidi Pailatba ma odasa pao,” te po wai, tama augwaligo aga odasa pai. 12 Polobadu Herotgo te kiap tuni bidi Pailat dali augwa si wado yai. Tialima, megi augwali si abagi gagawai.
Kiap tuni bidi Pailat agai Jisas te ni agede elao wai
(Mat 27:15-26; Mak 15:6-15; Jon 18:39–19:16)
13 Te kiap tuni bidi Pailat agai te pris tuni bidi dabe dali, te tobolu bidi dabe dali, te olo we bidi dali i wai, tama augwali sisinai. 14 Tama augwali sisinama, agai augwalibolo te po wai, “Dagego e bidi Jisas ena pageba sela asali dao. Dagego te po wai, ‘Jisasgo dago we bidigo ebo kolesaga dolai,’ te po wai. Eno aga te po hanalu wali, duga gesabide. Tama dagego odao. Eno Jisasgo yali magi sęgę agai me ebeo. Dagego aga tų ela mani te agai sęgę yali eno me subeo,” Pailatgo te po wai. 15 “Herot agai Jisas dabolo ma tagala palali, dago Jisasde po tų odomainogo. Tama tibaso, dago koneani, Herot me agai Jisas agai sęgę yali me subeo. Tama tibaso, dena Rom dabego bomo yai pode, e bidi dago elegobeo,” Pailatgo te po augwali dali wai. 16 “Tama tibaso da, eno e bidi bįgo naga elama, olo tagala palaibao,” te po wai. 17 [Te tigidali sogo te Pasova nai tuabo olo bidibo side te Pailatgo kalabus bidi me deli te we bidibolo olo tagala palobo dao. Pailatgo augwaligo po wali pelama, bidi me augwaligo saibao wabo bidi augwalibolo tagala palobo dao.] 18 Tama tigidali we bidigo moni i mu wai, “Te bidi elao, tama te bidi nogi Barabas dabolo olo tagala palao,” te we bidigo te po wai.
19 Te bidi Barabas agai gavman dali te hanu Jerusalem tomode wąbi hwįai, tama agai bidi me ela muai, tama augwaligo te bidi kalabus tomoba muai dao. 20 Tama Pailatgo te we bidi dali po ma wai, agai Jisas tagala palainogo yai. 21 Tialima, augwaligo i weyu, te po wai, “Te bidi ni nami agede elao, te bidi ni nami agade elao,” te po ma weyu, ma weyu yai, te Juda we bidigo. 22 Tama Pailatgo sela sogo te we bidibolo wai, “Magi basowe? Te e bidi Jisasgo mena dwai sę yaliwe? Eno agai dwai sę yali me subeo. Tama tibaso, dena Rom dabego bomo yai pode, e bidi dago elegobeo. Tama aga eno bįgo naga elama, olo tagala palaibao,” Pailatgo te po wai, te we bidi dali. 23 Tiali goli, augwaligo bomo mu yai, augwaligo moni i bomonama mu wai. Te Pailatgo Jisas elamuo po augwalibolo omainogo, te augwaligo i wabo elabo pogo Pailatgo po aiyaba elaluai. 24 Tama tibaso, Pailatgo po weyu, te po wai, “Te usu dao. 25 Eno dagego po naga odaibao.” Te bidi nogi Barabas te gavman dali wąbi hwįnama, bidi ela muai. Tama te bidi augwaligo kalabus tomoba muai dao. Te we bidigo te bidi Barabas ma augwaligo sainogo te po wai, tama Pailatgo te bidi augwalibolo tagala palai. Tama te Pailatgo te we bidigo homu wali peyu, tama Jisas augwaligo nogoba muai.
Augwaligo Jisas ni pedaide elai
(Mat 27:32-44; Mak 15:21-32; Jon 19:17-27)
26 Te enesigi bidi dabe augwaligo Jisasbolo aga elabo ni pedai tola olama, tama aga tolasa pai, te aga elabo pesageba. Tama augwali Jerusalem be nani taga sobadi, tomode te bidi me nogi Saimon augwaligo suali. Te bidi aga page bulu Sairini, tama megi aga Jerusalem tomoba painogo sobadi, tama te enesigi bidi dabego te bidigo Jisas tau selama, te ni pedai tolao wai. Tama geasa pelama, te bidigo te ni agai nagede tolama, Jisas wali pai.
27 Te hauwa we bidi augwali Jisas wali pai. Tama te wali pabo we dabe hauwago Jisas hagede augwaligo gela weyu, te hobede ebo didigi weyu yai. 28 Tialima, Jisas begelama, te we dabe dali te po wai, “Dage Jerusalem we dabe, dage ena hagede gela wagio. Tiali goli, duga hagede gela weyu, duga wai bǫų hagede gela weyu yao. 29 Odao. Nosali te sogo pedelaibao, tama augwaligo te po waibao,
‘We dabe augwali wai ame nisiąbo we dali, te wai
ame nisiąwai we dali, te we dabe augwali wai ame
masiąwai we dali, te augwali dwagi yai homu mu
yagameo.’
30 Tama tebo sogo da, augwaligo te bulu dubolo te po waibao, ‘Te bulu du, dage daba degasa dulao.’ Tama te dwasianu bulu dubolo me te po waibao, ‘Dagego da mesega sao,’ te po waibao. *Hos 10:8; Ped 6:16 31 Megi da dwagi yai si digi, augwaligo enabolo dwai sę ebao. Tama nosali te dwai si dageba asobo si, augwaligo dagebolo dwai sę mu yaibao,” Jisasgo te po wai.
32 Te ami enesigi bidi dabe augwaligo gasa bidi me si te sela asai. Te bidi sigo dwai sę yai, augwaligo te bidi si Jisas dali elainogo sela asai. 33 Augwali bulu meba sabolai, te bulu nogi diligo tobolu dao. Te bulu dude augwaligo Jisas ni nami pedaide neligo enama, te ni nami pedaide dąų dagana ulai, te ni tǫba bulai. Augwaligo te dwai sę yai bidi si me ni namide neligo enama, te ni pedai si tǫba bulai. Te bidi me Jisas dolo nogo badu muai, me bidi Jisasgo pobase nogo badu muai.
34 Te Jisasgo te po wai, “Aya, nago augwaligo dwai sę yali sęgę sela sąyao. Augwaligo enade ebo sę sęgę augwaligo konebeo.” Tama te ami bidi dabe augwaligo satu gagali elama, Jisasgo gudubo ugwa dabe augwa dobola sai. 35 Tama te Juda we bidi augwali dololaluyu, tigidali sę tonolaluyu bidai. Te tobolu bidi dabego Jisas dali dwai po haniani wai, “Jisasgo gasa bidi dabe naga tau salio. Aga Godigo mu sa muyu asaiba wali te bidi Krais mu da wida, te Jisas aga digi ma tau sao,” te tobolu bidi dabego te po Jisas dali wai. 36 Te ami enesigi bidi dabe augwaligo me Jisas dali dwai haniani po wai. Augwaligo pąba aselama, Jisas dwai ha ebo ąį mawainogo yai. 37 Augwaligo po weyu, te po wai, “Mu tama, nage te Juda we bidigo tuni bidi da wida, teda naga digi naga ma tau sao,” augwaligo Jisas dali te po wai.
38 Tama te dwasianu ni namide asęyu, te po wai, “Te bidi te Juda we bidi dabego tuni bidi dao,” tama olama asęai. Tama te dwasianu ni namide augwaligo asęani po te ni pedai ugwadu daide neligo enai.
39 Te dwai sę yali bidi me si augwaligo ni namide walai me bidi deligo Jisas dali dwai po wai, “Jisas, nage da we bidi tau sai hagede sa muani bidi Krais da wida, naga digi tau siyu, dadi si me tau sao,” Jisas dali ni namide walai bidi mego te po wai. 40 Tialima, me bidigo te po odama, te bidi dali wado po wai, “Nago God dali wi ebewe? Nago sęgę Jisasgo sęgę tiwai sali. 41 Augwaligo da si elali da, te augwaligo doloba pai kolesaga yalio. Da sigo sęgę sali da, te usu tama da si yali sęde tialio. Tiali goli, e bidi Jisas da, agai magi dwai sę deli ebeo,” Jisas dali elali bidi mego te po wai. 42 Tama te nosali po wali bidigo Jisasbolo te po wai, “Jisas, nosali nage tuni bidi pedelama bidibo side, nago te sogo ena kone palao,” te bidi mego Jisas dali te po wai. 43 Tama Jisasgo agabolo weyu, te po wai, “Eno nage dali mu po obao, megi tama nage ena dali bugagia bida bida pabo bulude bidaibao,” Jisas te po te bidi dali wai.
Jisas ni pedaide mu isai
(Mat 27:45-56; Mak 15:33-41; Jon 19:28-30)
44 Megi te sia tomode dao, tiali goli te sia ge isai, tama be hulia sabo ąǫ yai. Tigidali tǫ mu hulia siyu ebo tiwai elalubadi, sia ge pio mu egi pai yali. 45 Tama te genuai ugwa te Moni Lotu Be tempel tomode walaluali ugwa te tomode mu togwa pai, tama pedai si nigai. *Sai 26:31-33 46 Tama Jisasgo i bomonama mu wai, “Aya, ena mobo eno naga nogoba mubao,” Jisas te po tama olama, tama aga mu isai. 47 Te enesigi bidi dabego tuni bidigo te sę suai, tama agai Godigo nogi ugwaba siyu, agai te po wai, “Mu tamao, te bidi Jisas doloba pai bidi mu dao,” te bidigo te po wai. 48 Tama tigidali we bidi sisinama, te bidi sela elai hagede baso, tonaluai. Augwaligo te Jisas isibo suali. Tama homu dene eyu, augwa nogo pagasa, tama augwa beba pai. 49 Tiali goli, Jisas aga abagi dabe dali, te we dabe me Jisas wali Galili buludu asai, augwali digibulu gana dolaluai. Tama augwaligo te sę tigidali suai, te we bidi dabego.
Augwaligo Jisas tigi selama, masigi dedage tomoba muai
(Mat 27:57-61; Mak 15:42-47; Jon 19:38-42)
50 Te bidi me deli bidai, te bidi nogi Josep. Te bidi aga Judia tǫ hanu bidi dao, te hanu nogi Arimatea. 51 Aga dwagi yai doloba pai bidi bidai. Agai te Godigo we bidi tonalubo sogo asobo tonaluyu bidali. Tama aga te Juda dabego kaunsil digi, agai te meba kaunsil dabego Jisas elabo homude ao wabeo. 52 Te bidi Josep te gavman tuni bidi Pailat bidibo digi pelama, te po wai, “Eno Jisas tigi saio,” wai. 53 Tama Pailatgo “Sao,” wai. Tibaso, Josep pelama, Jisas tigi tǫba sela dulai. Tama Jisas wiegi yai tedela yai nami ugwago belai, tama Jisas gų page meba mugi pai. Te gų page augwaligo moni genuai masigi tomode nigai. Tama polobadu augwaligo bidi me musiąwai digi, gesi mu dao. 54 Te sogo Fraide dao, te Juda dabego Sabatde tuabo nai sisi ebo sogo dao. Tama te Sabat tamadi tama pedalainogo ebao.
55 Te we dabe augwali Galili buludu Jisas dali asai, augwali Josep wali pai. Tama augwaligo te gų page suai. Tama Josepgo Jisas tigi mena tama mubo, te me te we dabe augwaligo suai. 56 Augwaligo polo suai, tama te we dabe augwali augwa beba ma pai. Tama te we dabe augwaligo wel dabe me, denami yai dwagi yai nai me sisila muai, te Jisas tigide mumainogo, aga tigi daumua pidali weyu.
Te Sabat sogo gagalali. Tama tibaso, Godigo bomo yai po wali peyu, augwali olo bidiyu, toma tuali.