27
Augwaligo Jisas te Pailat bidibo madi odasa pai
(Mak 15:1; Luk 23:1-2; Jon 18:28-32)
Te be posa pabode, tama te tigidali Godibolo nai ula mabo pris genuai bidi dabe badi, te Juda hani tobolu bidi dabe dali, augwaligo po minama, Jisas elabo po olama, tama deli homu elama te po dąų wai. Augwaligo aga te aligabo bonogo kęnama, tama augwaligo aga selama, te polalubo genuai gavman bidi Pontius Pailat bidibolo magi pai.
Judas isalio
(Tpi 1:18-19)
Megi da Judas, te Jisas boi bidi dabego nogoba mani bidi, agai Jisas augwaligo po tų ebode aiyaba elaluama tama aga ela muabo homu ebo suai. Tama aga ge neyu, tama homu hasegeleyu yai, tama te sali mone ge bidi sese olama nogo si silva mone te pris genuai bidi dabe dali te Juda dabe tobolu bidi dabe augwalibolo te mone sela pelama, ma magi palio. Tama agai augwalibolo te po wai, “Eno dwai sę elama, sęgę salio. Eno te magi dwai sę me isąwai bidi te boi bidi dabego nogoba manigo, tama aga isaibao,” wali. Tiali goli augwaligo te po wai, “Te dago sę menio. Te naga sę tali dao.” Tama Judasgo te silva mone ge dabe te Moni Lotu Be tempel tomode sąnama, tama aga pelama, aga digi te ba bonoba waligi pelama isai.
Te genuai pris bidi dabe augwaligo te Judasgo sąwani mone ge selama, tama augwaligo augwa hasi te po wai, “Te e monede da, te bidi elai mone dao. Tama tibaso, dago te mone ge te Moni Lotu Be tempel mone dali muyu da, teda dago te bomai po bolaibao. Te dali me mugobeo,” wali. Tama tibaso, augwaligo po me dedeli minama dąų wali, tama nosali augwaligo te monego te bidi dabego te sene nigabo mama tǫ sabo madi te tǫ abelali. Augwaligo te homu yali, te digibulu bulu bidi dabe ede isiyu da, teda te tǫ augwali muabo gų page nigilama elalumainogo homu yali. Tama augwaligo te tǫ te bidi elai monego abelebaso, te we bidi augwaligo te tǫ nogi poali, te Kaneme Tǫ nogi wai. Tama megi tama me, te nogi me elalubo dao. Tama augwaligo te tǫ tama abeleyu, tama po me deli polobadu Godigo aga po pusali bidi profet Jeremaiago pedauwalide wali po te megi mu usu nanio. Agai te po polobadu wai,
“Te Israel dabe meba augwaligo te bidi me deli
abelabo mone ge noma dodolama tama te silva
mone ge bidi sese olama nogo si te tama po dąų
wali. 10 Tama augwaligo te mone ge selama,
tama augwaligo te sene nigabo mama tǫ sabo tǫ
abelali, te Genuai Bidigo enabolo wali po tiwai dao.”* Jer 19:1-13; Sek 11:12-13
“Nage te Juda dabego tuni bidi dawe?”
(Mak 15:2-5; Luk 23:3-5; Jon 18:33-38)
11 Te bidi Jisas te gavman polalubo bidi gedude te be tomode dodolai. Tama genuai polalubo gavman bidigo agabolo hanalu wali, “Nage Juda dabego tuni bidi dawe?” Tama Jisasgo te po wali, “Naga digi naga te po obao.” 12 Tama te genuai pris bidi dabe badi, te Juda bage tobolu bidi dabe dali, augwaligo aga po tų ilibo sę yali. Tiali goli agai po me deli wei me ponebeo. 13 Tama te gavman genuai bidi Pailatgo agabolo te po wali, “Ma, nago te tigidali po augwaligo nage po tų ilibo po te nago odobewe?” 14 Tiali goli Jisasgo po me deli te gavman bidi Pailatbolo wei me ponebeo. Tama tibaso, te polalubo gavman bidi aga homu hauwa eyu noma sali.
Pontius Pailatgo Jisas ni pedaide elabo po wai
(Mak 15:6-15; Luk 23:13-25; Jon 18:39–19:16)
15 Te tigidali kibu bede te Pasova side bodolu munama olo bidali sogo, te polalubo gavman bidigo te kalabus bidi me deli olo tagala palobo dao. Te we bidi augwa digi te bidi me deli tagala palomainogo aga nogi obaso, teda te tuni bidi Pailatgo augwaligo homu wali peyu, te bidi me deli te augwaliba tagala palobo dao. 16 Tama te sogo agai dwai sę yai dwai bidi mu me deli te kalabuside bidai, te aga nogi Jisas Barabas dao. 17-18 Tama megi da Pailat aga te be tagalama, buluba pelama, tama we bidi augwali sisinagasali. Agai koneani, te tobolu bidi dabe augwaligo Jisas dali naga dwai homu elama, tama augwaligo Jisas aga gesabidide po tų ilainogo eyu, odasa asai dao. Tama tibaso, Pailat agai te we bidibolo te po wai, “Dagego homugo eno de dageba tagala palagawe? Ma, eno te Jisas Barabas, ma eno te Jisas, augwaligo te Krais nogi ebo bidi te dageba tagala palagawe?” 19 Tama me, te bidi Pailat aga te po tų odobo bidi jas dugabo siade aga dualalubadi, tama aga wego po agabolo toliyu te po wai, “Nago magi sę me deli te doloba pai bidi dali me elamuo. Te eno hulide nade aga sulama, tama eno genuai homu elalubao.” Te po wai.
20 Te genuai pris bidi dabe badi, te Juda dabe tobolu bidi hani dali, augwaligo te we bidi homu hodolama, augwaligo te Pailatbolo i weyu, te bidi Barabas tagalama, te Jisas ela muao, te po omainogo yai. 21 Tama te genuai gavman bidigo po augwalibolo ma naga wali, “Dagego homugo eno te e bidi sigo te mena bidi dageba tagala palomainogo homu ebawe?” Augwaligo te po wai, “Barabas.” 22 Pailat agai augwalibolo te po wai, “Eno tama tiyu da, teda e bidi da Jisas, augwaligo Krais nogi ebo bidi, agabolo eno magi sę yagawe?” Tama augwali tigidaligo te po wai, “Aga ni pedaide elao.” 23 Tama Pailatgo te po wali, “Magi basowe? Agai magi dwai sę yaliwe?” Tiali goli augwaligo bomonama ma i wali, “Ni pedaide aga elao,” wali.
24 Tama megi da Pailatgo koneani, agai po usu ebeo. Menio. Tama wąbi genuai hwįainogo yai. Tama agai augwali ola momainogo agai wę te poude meba selama, tama aga nogo te we bidigo gedude wę telawai. Tama nogo wę teladubadi agai te po wai, “Te e bidi elibo da, te eno sęgę menio. Te duga sę naga dao.” 25 Tama tigidali we bidi augwaligo po wei ponoyu, te po wai, “Te aga elebo sęgę te daba me te dena wai dabeba asomainao,” wali. 26 Tama te sogo Pailatgo te bidi Barabas augwaliba olo tagala palali. Tama agai po olama, tama gasa bidigo Jisas te dwai bigo elidu gelama, tama te ami bidi dabe nogoba mani, te augwaligo aga te ni pedaide elimainogo yalio.
Ami bidi dabe augwaligo Jisasbolo posobo po wai
(Mak 15:16-20; Jon 19:2-3)
27 Tama megi da, te ami bidi dabego Jisas te gavman tuni bidigo be tomoba odasa pali, tama augwali tigidali aga pageba sisinagasai. 28 Tama augwaligo agai gudali ugwa pedela munama, tama augwaligo bobobage mama ugwa me deli aga tigiba muanio, te genuai polalubo bidigo ugwa tiwai dao. 29 Tama augwaligo sesani yai bonogo madi me deli nigilama, tama augwaligo Jisas toboluba muai. Tama elama, tama augwaligo te awi dili me deli agai dolo nogode muai. Tama augwaligo agaba kidu sugunama, tama augwaligo posobo po agabolo e tiwai wai, “Siade dao, Juda dabego tuni bidi dao.” 30 Tama olama, tama augwaligo agabolo pesa sąyani, tama augwaligo te awi dili ma dobola selama, aga toboluba elidu geai. 31 Augwaligo te dwai posobo po dabe agabolo ola silibo si, megi da agai te gudali mama ugwa te augwaligo peda sali, tama augwaligo aga ugwa ma tigiba muai. Tama augwaligo aga te ni pedaide elainogo sela palio.
Augwaligo Jisas ni pedaide daganama enani
(Mak 15:21-32; Luk 23:26-43; Jon 19:17-27)
32 Augwali te moni hanu buluba pobadi, tama augwaligo te Sairini bulu bidi me deli suali, aga nogi Saimon. Tama augwaligo bomonama agai te Jisasgo tolali ni pedai tolao wali, tama agai tolali. 33 Augwali pelama, dwasianu bulu du me deliba sabolali, aga nogi Golgota. Te bulu nogi page e tiwai dao, tobolu dili tiwai bulu du da wai. 34 Tama augwaligo te wain ąį meba te ha ebo dwai marasin dali gelama, Jisasgo tumainu manio. Tama agai tula suali, tiali goli agai tubeo.
35 Augwaligo Jisas aga te ni pedaide elama daganai madi, tama agai gudali ugwa dabe augwa dobola sainogo augwa hasi satu gagali bolo yalio. * Tib 22:18 36 Tama elama, tama augwali te bulude dualama, tama augwaligo aga tonaluyu bidalio. 37 Te aga tobolude ugwadu augwaligo aga te po tų ilali po asęai. Augwaligo e tiwai po asęanio: ‘Te e bidi Jisas, te Juda dabego tuni bidi dao.’ 38 Te Jisas pąde augwaligo te nai wi sai bidi me si te ni pedaide walali, me deli te dolo nogo badu waliyu, me te pobase nogo badu waliyu yalio.
39 Tama te we bidi augwali iba soyu, oba soyu eyu, augwaligo dwai posobo po agabolo walio. Tama augwaligo augwa tobolu bebegeliyu, * Tib 22:18 40 tama te po wai, “Nago te Moni Lotu Be tempel aluama, tama sela sogo naga ma sę yaiba po wali bidi, megi da, te naga digi naga tau sao. Tama nage te Godigo Ogwa da wida, teda nage te ni pedaide daganalubo tagalama, tama nage te tǫba aiya dulao,” augwaligo te tiwai posobo po wai.
41 Te genuai pris bidi dabego me, te bomo yai po page ola mabo bidi dabe dali, te Juda dabe tobolu bidi dabe badi, augwaligo me dwai posobo po weyu, bomonama te po augwa hasi wai, 42 “Agai gasa bidi dabe augwali naga tau sali, tiali goli aga digi aga tau sainogo ebo usu egobeo. Ma, aga da te da Israel bagego tuni bidi da wida, teda aga te nide daganani tagalama, aiyaba dulubaso, teda dago bomo yai homu agaba munama dąų waibao. 43 Agai homu Godiba tinama te po wali, ‘Ena Godigo Ogwa dao’ wai. Tialima, Godigo aga godolo eba wida, agai aga megi tau somainao.” Augwaligo te po wai. 44 Te nai wi sai bidi me si augwaligo te Jisas walali ni pedaide pąde ela daganai, te bidi sigo me te tiwai dwai posobo po naga agabolo walio.
Jisas isalio
(Mak 15:33-41; Luk 23:44-49; Jon 19:28-30)
45 Tama te sia ge tomode mu, te tigidali tǫ badu te be hulia sabo tiwai elama, te be hulia si mu elama, tama telalubadi te be pio yabo magaba usu nanio. 46 Tama be pio ebo pąde Jisasgo i bomonama weyu, te po wai, “Eli, eli, lama sabaktaniwe?” Te po page e tiwai dao: “Eno God, eno God, magi baso nago ena tagaluwe?”
47 Tialima meba te pąde dolaluali bidi, augwaligo te wabo po odama, tama augwaligo te po wai, “Te bidi agai te polobadu bidali bidi Elaija te i obao,” te po wai. 48 Tama polo te bidi dabe augwali me deli udada pelama, te tamu ąįde elalubo wawi yai nai me deli sigi pali, tama te nai te wain ąį dali taluama, tama te nai awi dili donode kęnama, tama te nai Jisasgo tumainogo manio. 49 Tiali goli gasa bidi dabe meba augwaligo te po wai, “Meo, dago bolo sueibao. Ma, te bidi Elaija aselama, aga tau sagasobowe, ma menigowe?” te po wai.
50 Te Jisasgo i bomonama ma olama, tama aga noma bidi mobo tagala palalio, te aga mu isalio.
51 Tama te sogo naga te Moni Lotu Be tempel tomode walaluali genuai bobage dąį ilali nami ugwa te ugwadu gagalasa aiyaba mu pedasa dulama, tama pedai si pedalali. Tama tǫ mali ebadi, tama genuai masigi dabe me pebeda palio. * Sai 26:31-33 52 Tama gų page palialuali tų dala pelama, tama Godigo we bidi hauwa, polobadu augwali isali, megi augwali tigi elalubadi tama ma hodalualio. 53 Augwaligo te gų page tagalali, tama nosali Jisas ma hodaloai madi, augwali te Godibolo hogea sali moni hanu tomoba palio. Tama bidi hauwago te sogo augwali suai dao.
54 Tama te enesigi bidi dabego tobolu bidi aga ami bidi dabe aga dali te Jisas tonaluali bage, augwaligo te tǫ mali ebo me te sę dabe pedalobo sulama, tama augwali moni wi mu yalio. Augwaligo te po wai, “Mu tamao, te bidi aga te Godigo Ogwa mu dao,” te po wai.
55 Tama we hauwa bidali, augwali te Galili tǫdu Jisas tau sainogo aga wali asai. Te we dabe augwali te dwasianu digibulu gana dolalu tononaluai. 56 Te we me deli augwali dali tomode bidali we te Maria aga bulu Makdaladu asai. Tama we me te aga Maria, te bidi si Jemsde Josep sigo ida. Tama we me deli te bidi Sebedigo we, te aga ogwa sigo ida dao.
Augwaligo Jisasgo tigi te masigi ola be dedageba muai
(Mak 15:42-47; Luk 23:50-56; Jon 19:38-42)
57 Te pio te Arimatea bulu bidi me deli te masigi hauwa elalubo bidi, aga nogi Josep, aga asai. Aga me te Jisas wali pali bidi dao. 58 Tama aga te gavman polalubo bidi Pailat pageba sabolama, te Jisasgo tigi sabo po hanalu wai. Tama te Pailatgo te ami bidi dabebolo olama, tama augwaligo te tigi Josepbolo sela mawai. 59 Tama Josepgo te Jisas tigi selama, tama aga te meda meni yai tedela yai gesi nami ugwade bebe pelama mesegelai. 60 Tama agai te Jisas tigi te aga digi nigai gų pageba mugi palio. Agai te genuai masigi tomode te ola be me deli tamadi nigai. Tama agai te tigi te ola be tomoba munama, tama agai te genuai masigi me deli hogogo bele pelama, te tigi muani gų page ola be sunumi te masigi mego paniani. Agai tama tilama, tama aga palio. 61 Maria te Makdala bulu we badi, te gasa we Maria dali, augwali si tede bidali. Augwali si te gų page dolo si pąde dualaluali, tama augwali sigo te gų pageba tononaluyu bidalio.
Te ami bidi dabe augwaligo te gų pagede tonaluai
62 Tama nosali sogode, te Sabatde nai sisi ebo sogo te silai madi, tama te genuai pris bidi dabe badi, te Farisi dabe dali, augwali te genuai gavman bidi Pailat pageba pelama, sisinigi palio. 63 Augwaligo te po wali, “Genuai bidi, dago po me deli te tibo po wali bidi aga bidali sogo wali po me deli megi ma koneani. Agai te po wai, ‘Nosali te sela sogo wabode te ena ma hodaluaibao’ wai dao. 64 Tama tibaso, nago po olama, tama augwaligo te gų page sela sogo bugagia tonalumainao. Tiyu yaide aga wali pali bidi dabego aga tigi geme wi sagaselama, gasaba mugi pidali weyu te bugagia tonaluao po wao. U bagego aga tigi selama, tama augwaligo tibo po te we bidi augwalibolo weyu, ‘Aga te gų pagede ma hodalualio’ waibao. Tama tiyu da, te nosali wabo tibo pogo te polobadu wali tibo po aiyaba elaluaibao,” augwaligo te po wai. 65 Tama Pailat agai augwalibolo te po wai, “Dagego te tonalubo bidi dabe meba elalubao. Tama dage pelama, te gų page bomonama tonaluao, te duga ebo tiwai gilama yao.” 66 Tama te po obaso, augwali pelama, te gų page panialugi pai. Augwaligo te gų page sunumi paniani masigi daide te habu selebo dąį me deli ilama, tama augwaligo ami bidi dabe mebago te gų page tonalumainogo muanio.

*27:10: Jer 19:1-13; Sek 11:12-13

*27:35: Tib 22:18

*27:39: Tib 22:18

*27:51: Sai 26:31-33