3
Maikago te Israel dabe tobolu bidi dabeba wado ilali
1 Te Jekop hani polalubo bidi dabe,
dage Israel tobolu bidi dabe, odiąo.
Dagego te doloba pai kolesaga
godolo elama, yabo sę elalubao,
2 tiali goli dagego te dwai kolesaga godolo mu elama,
te doloba pai kolesaga godolo homu me ebeo.
Dagego te kolesaga dabego te dagego eno we bidi dabe
bidibadi digi, te tigi wali dagala sabo tiwai ebao.
Te dagego augwaligo tigi mi togobo tiwai elama,
3 tama dagego te tigidali tualio.
Te dagego augwaligo tigi wali sela sąbo tiwai eyu,
te augwaligo dili togobo tiwai elama,
tama dagego te augwali mi te hwą gego todogolama,
te sene sospende bubo tiwai yalio.
4 Nosali me sogo si te pedalubo side tama,
dage te Genuai Bidiba gela waibao,
tiali goli agai te dagego gela wabo me odogobeo.
Agai te dagego gedu haluasa po wabo me
odisąwaibao, magi baso meni,
dagego te dwai kolesaga yalio.
5 Te tibo profet mebago te bidi dabego augwaligo
mone momainu, te dąų wabo po waibao,
te augwa wiegi yai sogo elalubaso tibo dao,
tiali goli te augwaligo te augwali tibo po ola mawai.
Tialima, te augwaligo augwali mone masiąbaso da,
teda te profet dabego augwali wi iliyu,
te boi bidi dabego augwali dali
hwįagasaibao po waibao.
Tama tibaso, Genuai Bidigo te tiwai po
te profet dabeba obao,
6 “Dagego eno we bidi dabe tibo po ola mobaso,
tialima megi da, dagego te profetgo te nade sabo po
tiwai munu me ma sogobeo,” wali,
“tama te nosali pedelaibao wabo nai po
te dagego me wagobeo.
Te dagego bodolu sogo megi silainu ebao.
Te giliga iba dega sigulama,
te be hulia sabogo dage mesega sabo
tiwai gilama ebao,” walio.
7 “Tama te mena sę dabe te nosali pedelaibao po pusali
profet dabe, te augwali hale elama,
te augwali dwai haliga yaibao, magi baso meni,
Godigo te augwaligo gedu haluasa po wabo me odisąma,
te pedelao wali nai dabe pedalumainu
me isąbaso, te tama tiai dao.”
Genuai Bidigo te po obao.
8 Tiali goli, ena Maika da,
te Genuai Bidigo Mobo Bidigo enabolo
te bomo mobaso,
tama eno homu kolesagade
te doloba pai kolesaga yali.
Te agai eno haliga dąų waliyu,
te Israel dabe augwaliba te augwa sęgę
tigidali pusa mabo po hanilibo dao.
9 Dage Israel tobolu bidi dabego odiąo.
Dagego te doloba pai kolesaga godolo homu meni isąwai.
Dagego te wiegi yai kolesaga
te dwai kolesaga pedalumainu ilibo dao.
10 Dagego te we bidi dabe elibo kolesaga,
me te tobage dolo isąwai kolesaga dabe yali,
tama te kolesagade dagego homugo
te Jerusalem we bidi dabe, te Godigo taunde,
te bomai hani pedalubao homu ebo dao.
11 Te taun bidi dabego
te tobolu bidi dabe homu bega sabo sę eyu,
te augwaliba mone mayu,
te augwa haniani dwai kolesaga emainu ebo dao.
Te pris dabego te mone naga sainogo
te Godigo bomai po page pusubo dao.
Tialima, te profet dabego te mone sabo homu eyu,
te geme dualali po pusali.
Tigidaligo te tiwai eyu, augwa te po wali,
“Genuai Bidi te da dali bidibao,” walio.
“Tialima, te magi nai me deligo da me
dologobeo,” wabo dao.
12 Tialima, te tobolu bidi dabe me, pris me profet,
te duga yali sęde naga
te Godigo Jerusalem dolaibao wali.
Te Jerusalem tigidali nai doado bage te dolama,
tama te pobele bage hogomu pesage
holobo tiwai yaibao wali.
Tama Saion te olo tǫ pedelama,
te bidi dabego tede te gi nai bulaibao wali.
Tama te bulu dude te dasu nosai pedelaibao,
te Godigo be elalubo madi tiaibao wai dao. *Jer 26:18