Godigo Nogi Ugwaba Sabo Tęąbi Po Wabo Buku Dabe
Hasia nedabo tau sabo po
Te e buku da, te Israel dabe augwaligo te lotu po wabo tęąbi buku elaluai dao. Me badu tęąbi po dabe e bukude elalubo, augwali te Godigo beba sisinibo sogo augwaligo te Jerusalemde lotu weyu, te tęąbi dabe wali. Te me badu po dabe te we bidi dabego te lotu wabo side te gedu haluasa po wabo tiwai yali, ma te deli deli we bidi augwade te sęgę elalubaso, te tiwai wali.
E tiwai homu ebao, te bidi hauwago te tęąbi po dabe asęyu, te gedu haluasa po wabo dabe asęyu yali, te haniani sogode asęani. Tama nosali, gasa bidi dabego te po dabe deliba sisinama, tama te buku me deli pedalubo tiwai ilali.
Te tęąbi po dabe me, gedu haluasa po wabo dabe me, te homu kolesaga page te haniani elalubao. Te Godigo nogi ugwaba sabo tęąbi po dabe me elalubao, tama me te sęgę po pusulama, te dwai sę sela sąbo gedu haluasa po wabo me elalubao. Tama me te mena usu sabo sęgę yai sęde te tau sabo gedu haluasa po wabo me elalubao, tama me te gesi king bidi nigiliyu, genuai side wabo tęąbi po elalubao. Tama te Godiba konealubo homu elalubo haninibo po wabo tęąbi po me elalubao, tama te Godiba buba hwi po wabo tęąbi po me elalubao, tama me te haliga sęgę ebo me homu hauwa ebode gedu haluasa po wabo me elalubao. Tama me te boi bidi dabe dolomainu te Godiba gedu haluasa po wabo me elalubao, tama te tęąbi po dabego te wiegi yai kolesaga te we bidi dabe augwaligo wali pomainogo ola mani po me wai dao.
Te tęąbi po dabe me gedu haluasa po dabe te deliba taluama wali pode, te da we bidigo bidibo ula te badu po olama walio. Dago wiegi yai homu pemene ebo sogo elalu, me haliga sęgę ebo me elalubao. Te da gesi we bidi bidiyu, te bomo elalubao, tama te monu dabe yabo sogo me elalubao. Me sogo da gasi siyu, te me sogo da wiegi yai bugai haliga eyu yaibao. Te tęąbi po wabo bukude te tobage sęgę dabe te da we bidi dabe e tǫde bidibo ulade bidibo sogo, te dabolo dolo pedalubo sę dabede po dolo pusalio, tama tialima polobadu digi gagalama, te sę ela asali, megi e sogoba usu nagasoyu, te tęąbi po wabo bukude wali pogo te dago konealubo po dąų waliyu, tama te Godigo we bidigo bidibo ula tau mu sabo po wai elalubao.
Buku 1
1
(Tib 1–41)
Doloba pai bidi dali, dwai bidi dali side po wai.
1 Niwai bidi agai
te dwai bidigo po wali pisiąbo bidi,
tama dwai sęgę sai bidigo tųde bilibo menio,
tama God dali posobo po wabo bidi
dali taluama, dulaluyu bidibo menio,
tama tiyu, te bidi aga
dwagi yai homu mu eyu bidaibao.
2 Magi baso meni, te bidigo Genuai Bidi Godigo
bomo yai po naga godolo mu eyu,
te po wali pabo dao.
Tama agai te bomo yai po siade dali, hulide dali nedeyu,
tede homugo kone paliyu ebo dao.
3 Te bidi te ni bidi mego ąį sesegede
bulai ni elalubo tiwai bidibao.
Te nigo nedudu walobo,
te sogo dolo naga waliyu ebo dao,
tama te ni yabe me sasia pabo menio.
Tama tigidali sę agai ebaso,
te bugagia pedalobo dao. * Jer 17:8
4 Tiali goli, dwai bidi dabe augwali
te tiwai gilama mu menio.
Augwali te tubo nai wit bo
te waligo selasa pabo tiwai ebo dao,
te yalala pai olo nai mu dao.
5 Tama tiyu, dwai bidi dabe augwaligo
Godigo po tų ebo aiyaba elalugobeo.
Awe, te dwai sęgę sai bidi dabe,
augwali doloba pai bidi bidibo hani
tomode bidigobeo.
6 Magi baso meni, Godigo te doloba pai bidi dabe
bugagia tonalubo dao,
tialima dwai kolesaga ebo bidi dabe,
augwali dwai dene ebo bulude
bidada peyu, bidada pabo elalubo.