41
Te Devitgo asęani balia po me deli dao.
Gasi yai bidigo te Godiba gedu haluasa po weyu, te Godigo aga usu ma ilimainu yai
1 Bidigo te magi doado bage meni yai bidiba
homu kone palama,
tama augwali tau sabo bidi da,
te bidigo homu wiegi yai pemene yao.
Te sęgę agaba pedalubo sogode,
te Genuai Bidigo aga tau saibao.
2 Godigo te aga tonalu,
tama aga bidibo ula dąų walaibao.
Tama Genuai Bidigo te aga pesagede
bugagia bidimainu ilaibao.
Tama te Genuai Bidigo te boi bidi dabego
aga dolomainu me iligobeo.
3 Te bidi aga gasi elalubo sogo,
te Genuai Bidigo aga tonalubao.
Agai te aga gasi usu ma ilama,
tama aga bomo ma somainu ebo dao.
4 Tiali goli, ena digi eno te po wali,
“Genuai Bidi, eno nageba dwai sę yali,” po wai.
“Tiali goli nago te olo tau sabo
wiegi yai kolesaga enaba eyu,
tama eno gasi silao,” wali.
5 Te eno boi bidi dabego enade dwai haliga eyu,
tama augwa te po wai,
“Te aga polo isibaso, te dago homu kone agade ebo
tagalaibao.”
6 Te bidi mebago ena suagasu,
tama augwa enade odolali po miani.
Augwaligo te ena gasi dwai ebo po odainu yali.
Tama nosali augwa buluba dią soyu,
tama augwaligo ena te gasi ebo po
te tigidali habude te po pusubo dao.
7 Tigidali bidigo ena wei me isąyu,
te augwaligo eno gasi po geme wabo dao.
Augwaligo homugo te dwai nai mugo
ena dolomainu homu ebo dao.
8 Augwa te tama po wai,
“Te dwai naigo aga salio,” wali.
“Te aga ma hodalubaso, te usu egobeo.
Te aga isaibao,” wai.
9 Eno abagi me deli elaluai,
aga te eno hai namu mu tama,
tama aga te ena dali nai tuyu yai.
Tiali goli, aga me te eno boi bidi pedelali.* Mat 26:23; Mak 14:20; Luk 22:21; Jon 13:18
10 Genuai Bidi, nago te olo tau sabo
wiegi yai kolesaga enaba eyu,
tama e gasi silimainu yao,
tama te eno te bidi dabe augwa yali
kolesaga wei ponaibao.
11 Te boi bidi dabego ena dolisąbaso da,
teda eno koneyu,
te nago ena godolo eba homu yaibao.
12 Nago suali, te ena dolo bilibaso,
tama nago ena tonaluali,
tama nago ena te naga pąde sesemane dolaluaibao.
13 Dago te Genuai Bidi nogi ugwaba sao,
aga te da Israel dabego God dao.
Tama te nosali pedalubo hani
augwa te tama naga tiaibao.
Te mu dao. * Tib 106:48