75
Godigo te dwai sę ebo bidi dabe aiyaba elaluama, te wiegi yai bidi dabe tau sabo dao
1 God, dago usu da olama,
tama nago nogi sesemane ugwaba sabo dao.
Tama dago nago genuai nogide po hanilama pusuyu,
tama augwaliba te nago haniani
wiegi yai sę ebo po pusubo dao.
2 Godigo te tama po wali, “Eno te po tų yabo sogo
bodolu me deli te dąį ilai elalubao.
Tama eno po tų te dolo mu paibao.
Te me kone tua pogobeo.
3 Tǫ dali tede bidalubo nai tigidali te hagawaibao.
Tiali goli, te tǫ page da,
te eno tolalu, tama bomo elalueibao.
4 Eno te hagoma ebo bidi dabebolo po walali,
‘Dagego te hagoma me igio,’ po wali.
Tama eno te dwai sę ebo bidi dabebolo walali,
‘Dagego te duga nogi ugwaba me sigio,’ po wai.
5 ‘Dagego duga bomogo digi
te wiegi yai pemene me igio,
tama dagego po dągą genuai weyu,
tama ena posoyu me elamu dao,’ wali.”
6 Te we bidigo kolesaga dagalubo sę
te giliga asobo badu, me te giliga dega sabo badu,
ma te not badu me, saut badu me
pedalubeo. Menio.
7 God agaduba deligo naga dago
kolesaga dagalaibao.
Agai te bidi me deli aiyaba elalu, tama te gasa bidi
ugwaba sagoa sabo dao.
8 Genuai Bidigo te bomo yai gesi wain wę te kap
me delide pągąwai tolaluai.
Agai gea palama, tama tigidali bidi dwaigo tulama,
tama mu siminanio.
Te tama tiwai naga te dwai sę yali we bidi dabe
te Godigo po tųba pedelama,
tama te augwali mu hagawaibao.
9 Tiali goli, eno te Jekopgo God po
te sesemane hanilama pusaibao,
tama eno agai nogide
te tęąbi umabo mu udubadi geaibao.
10 Te Godigo te dwai sę ebo bidi
dabego bomo silimainu yaibao,
tiali goli, agai te doloba pai bidi dabebolo
te genuai bomo mu mawaibao.