94
Godigo dwai sę ebo bidi tigidali aiyaba elaluama, dwagi yai bidi tigidali tau saibao
1 Genuai Bidi, nage da
te dwai sę ebo we bidi augwaliba wei ponobo
God dao.
Megi nago sębę ebo augwaligo sumainogo waselao.
2 Nage hogodama, nago po tųba tigidali
we bidi pedelaibao.
Megi nage aselama, hagoma eyu dwai sę ebo bidi
augwaligo ebo kolesaga wei ponao.
3 Nisu naga sogo dwai sę ebo bidi
augwaligo ebo kolesagade dwagi yai homu egowe?
Genuai Bidi, augwaligo bidabo sogo
nisu naga elalubawe?
4 Nisu naga sogo elaluai dwai sę ebo bidi dabe
augwaligo dwai kolesaga ebo dali dwagi yai homu
te dwai sę dali yaibawe?
5 Genuai bidi, augwaligo nago we bidi
aiyaba elaluama,
tama genuai sęge augwalibolo mabo dao.
6 Augwaligo te wilawe we dabe, augwali ela muyu,
tama te tiana wai dabe me ela muyu,
tama gasa bulu we bidi dago tǫde bidibadi,
augwaligo ela muyu ebo dao.
7 Tama augwaligo te po wabo,
“Genuai Bidi agai da subo menio.
Israel bidigo God, agai dago
te sę ebo agai tede homu palobo menio,”
augwaligo te po wabo dao.
8 Dage eno we bidi, magi baso dagego gegeda pobawe?
Dage kolesaga meni yai, nisu sogo dagego koneaibawe?
9 Godigo dago olo nigai. Tama agai odogobewe?
Tama God agai dago gedu me nigai.
Tialima, aga digi tonolo bilibo meniwe?
10 Agai te tigidali tǫde bidibo bidi hani tonalubo dao.
Tialima, agai augwali dodolobo meniwe?
Tama aga tigidali we bidigo po ola mabo bidi.
Agai konebewe?
11 Genuai Bidi agai tigidali we bidigo homu koneai.
Agai koneai, augwaligo homu kolesaga
te olo magi nai me tiwai yaibao. *1 Ko 3:20
12 Genuai Bidi, nago te bidi me deli
dodolomainu eyu, nago bomo yai po
te bidi ola mayu da, te bidi aga dwagi yai
homu emainao.
13 Nago te sę ebo aga olo bidimainogo tiwai,
tama sęgego aga gegeidali weyu,
tama te dwai bidi dabe isilama, gų pageba paboba
usu nigi pabo dao.
14 Magi basowe, Genuai Bidigo
aga we bidi augwali tagalobo menio.
Mu tama, aga sa muani we bidi augwali
tudiba me mugubeo.
15 Tama nosali bidi dabego po tų ebode,
augwaligo sę dolo naga yaibao,
tama dwagi yai doloba pai bidi
augwaligo usu dao po weyu,
te kolesaga wali paibao.
16 Niwai bidigo ena tau selama,
tama te dwai sę ebo bidi aiyaba elaluaibawe?
Niwai bidigo ena tau selama,
te dwai sę ebo bidi sela sąwaibawe?
17 God agai ena tau sigi menigi sogo da,
ena polobadu isai gų pagede
polo pila mugi dao.
18 Eno te homu yai, “Eno sągą kikila peyu,
ena tula muaibao,” wai.
Tiali goli, menio.
Genuai Bidi nago ena godolo mu eyu,
tama nago ena nogo tola selama,
ena te dwai sęgę ebo digi tulalubeo.
19 Tama eno homu sęgę yali sogo
tama eno homu nai hauwa dali yai,
nago eno homu dwagi yai eyu,
tama nagame elama bidai,
tama eno homu dwagi yai emainogo yai.
20 Te bomo yai po mubo bidi dabe
augwaligo te we bidibolo
augwaligo dwai sę emainao wai.
Nago te tobage dwai sę ebo tobolu bidi
dabe dali abagi homu ebo menio.
21 Augwaligo dwagi yai sę ebo bidi
dwai sęgo aga dolainogo sisinama, po mibo dao,
tama augwaligo dwai sę isąwai bidi
dabe dali po tų ebo dao, augwali elainogo tiwai.
22 Tiali goli, Genuai Bidi agai
bomo mu elama, ena tau sai.
Ena agaba pelama, eno God agai
ena bugagia tonalubo dao.
23 Augwaligo dwai kolesaga hauwa mu yai,
tama agai augwaligo dwai sę yali wei begelaibao.
Genuai Bidi dago God, megi agai
augwali tigidali dolaibao.