130
Bidigo gedu haluasa po Godiba weyu, te aga tau somainu yali
1 Genuai Bidi, ena haliga sęgę dwai mu
ebaso, tama eno nageba i obao.
2 Genuai Bidi, eno gela wabo odao.
Te nago ena tau sao olama, te eno nageba i wabo odao.
3 Te nago dago yali dwai sę tigidali nedebaso da,
teda dego nago te po tų ebo ugwaba
ela holobo usu egowe?
4 Tiali goli, nago dago dwai sęde sali sęgę sela sąbo da,
tama tiyu, dago nagede noma siyu, wi ebo dao.
5 Eno homugo te Genuai Bidigo
ena tau somainu homu elama,
tama eno aga tonalubao.
Tama eno konealubo homu agai poba dąų mu wabo dao.
6 Eno te Genuai Bidi tonalu, tama eno homugo
te agai ena tau somainu homu mu ebao.
Tama tego te be posobo tonalubo bidi
dabego wei ebo homu te aiyaba elalubao.
Te bagego hulide te taun bugagia tonalubo sę ebo dao,
tama augwaligo homugo te be posobo
polo asao homu ebo dao.
7 Da Israel dabe, dago konealubo homu
te Genuai Bidiba muiyąo, magi baso meni,
agai da sesemane wei mu idubao.
Tama sesemane sogo te agai da tau sabo homu eyu,
te da dolidali olama tebo dao.
8 Agai aga we bidi dabe te ma saibao, te da Israel,
tama dago yali dwai sęde sali sęgę
tigidali sela sąwaibao. *Mat 1:21; Tai 2:14