149
Te Genuai Bidiba wiegi yai pemene ebo balia po wao
1 Te Genuai Bidigo nogi ugwaba sao.
Te gesi balia Genuai Bidiba waiyąo.
Tama te we bidi dabego aga sesemane sogo wali peyu,
augwa te lotuba sisinibo sogo,
dago agai nogi ugwaba sao.
2 Dage Israel dabe, te Godigo dage nigalide
te dagego bugai haliga iyąo.
Awe, te Saion we bidi dabe,
te duga kingba wiegi yai pemene yao.
3 Dagego tęąbi weyu, aga nogi ugwaba sao.
Mu tama, te habidi dabe, me taborin,
me gita, te tama eliyu, te agai nogi ugwaba sao.
4 Magi baso meni, Genuai Bidigo aga
we bidi dabe wei eyu,
augwalide dwagi yai homu ebo dao.
Tama agai te augwa digi te augwa nogi
aiyaba elalubo bidi dabego nogi ugwaba siyu,
tama augwa te hwįbode ugwaba ela pabo dao.
5 Te Godigo we bidi dabe augwa te edelebaso,
te wiegi yai pemene emainao.
Tama augwa te nai tuainu sisinibo sogo,
augwa te wiegi yai pemene ebo tęąbi wagameo.
6 Augwa te i weyu, tama te Godiba pemene elama,
tama te poa pai bainat hwą mu tolalumainao.
7 Tama augwa te gasa hani dabe dali hwįnama,
tama augwaliba te dwai dene mu mayu,
te augwali aiyaba elalumainao.
8 Tama augwa te augwaligo king dabe,
me tobolu bidi dabe,
te augwa aingo nigali sen dabego
te kęnama, elalumainao.
9 Tama augwa te hani dabeba te Godigo
wali po tiwai gilama te dene mabo sę emainao.
Te Godigo we bidi dabego augwa te tiwai elama,
te augwa genuai nogi dali bomo dali si saibao.
Te Genuai Bidigo nogi ugwaba sao.