5
Jongo te buku me augwaligo dąų wai suai
1 Tama eno suai, te genuai tuni bidi duabo naide dulalubo bidigo dolo nogo ugwadu daide eno suali, te buku tiwai nai me munalubo. Te bukude asęani po te me tomode elaluyu, me bulu badu elaluyu yai. Tama augwaligo te a naga olama me badu nogo si te dąų wabo naigo te buku dąų walai. *Ese 2:9-10; Ais 29:11 2 Tama eno suali, Godigo bomai ensel mobo bidi me deli agai po dagą genuai weyu te po wali, “Niwai bidi aga te wiegi yai bidi da obaso, te bidi agai te bukude dąų wali nai dalama, tama te dąų wali buku dagabo usu egowe?” ensel bidigo te po wai. 3 Tiali goli mena bidi dagalude bidibo bidigo me, te tǫde bidigo me, te tǫ dologode bidibo isai bidigo me, te dąų wali buku dagalama, te tomoba suainogo ebo usu menio. 4 Tama eno suali, te buku dąų wali dagalama tomoba suabo bidi gegali te me sube. Tibaso, ena gela hauwa wali. 5 Tama tibaso, polalubo tobolu bidi me deli agai enabolo te po wali, “Nage gela wagio. Suao. Bomo elalubo tuni bidi te Juda hanibolo pedalai, aga bomo te moni hudigi ebo kibu laiongo bomo tiwai dao. Te bidi aga polobadu bidai Juda bidi Devitgo wąįgo hanide pedalali bidi. Aga te gelali ni pagede kulubi pedalobo tiwai gilama yai. Tama tiyu, agai te dwai kolesaga ebo aiyaba elalubaso, agai te a naga olama me badu nogo si te dąų wali nai togolama, agai te buku dagawaibao,” te tobolu bidigo enabolo te po wai. *Ais 11:1, 10
Jongo agai te kibu sipsip wai suai
6 Tama te sogo eno suali, te kibu sipsip wai dolalubo suai, te augwaligo aga hwągo ela muai subo tiwai homu yai. Tama aga te genuai tuni bidi duabo nai dali te bidibo ula elalubo hasa me si me si te pąde aga dolaluyu, tama te polalubo tobolu bidi dabe tomode bidai. Tama agai te bulmakaugo tobolude elalubo gąų tiwai te a naga olama me badu si badi, te agai gedu me te a naga olama me badu nogo si elalubo. Tama te gedu dabe augwali te Godigo mobo bidi a naga olama me badu nogo si dao. God agai augwali te tigidali tǫba tagala palai dao. 7 Tama te kibu sipsip wai aga pelama, tama te genuai tuni bidigo duabo nai pageba sabolama, tama tede dulalubo bidigo dolo nogo ugwadu daide elalubo buku agai sai. 8 Tama agai te buku sai digi, te aga genuai bidi mu bidibaso, te bidibo ula elalubo hasa me si me si badi, te bidi sese olama me badu nogo me si me si te polalubo tobolu bidi augwali te kibu sipsip wai pąba pelama, kidu sugunigi pai. Tama te tigidali tobolu bidi deli deli augwaligo te elebo nai gita tiwai badi, te wiegi yai kapa golgo nigai pou te tola sobadi yai. Tama me te pauda denami ebo nai te tigidali poude elalubo siago deyu, tama te holobo denami yai hano te Godigo we bidi augwaligo Godibolo wabo gedu haluasa po tiwai holobo eno suai. 9 Tama augwaligo gesi tęąbi me tama wai,
“Nago te buku selama, te dąų wali nai togobo usu
mu dao. Magi baso meni. Augwaligo nage ela muani,
tama nago isibo kanemego te bidi dabe augwali
ma abelai, te augwali Godibolo mayu tiai dao. Te
nago tigidali we bidi hanide we bidi meba abelali,
te tigidali haniani po wabo bulude me, te tigidali
haniani tigi yai bidi hanide me, te tigidali genuai
tǫde bidibo bagede me te nago we bidi meba
abelai. 10 Tama abelama, te bage nago augwali te
dago Godibolo lotu po weyu sesemane sogo aga sę
ebo pris bidi hani pedalumainogo yali, augwaligo
Godigo sę emainogo yai. Tama tiyu augwali tuni
bidi te tǫde bidaibao,”
augwaligo te tęąbi po tama wai. *Sai 19:6; Ped 1:6
Augwaligo te kibu sipsip wai nogi ugwaba sai
11 Tialima, eno tonolo ma bilibadi, tama eno te Godigo dagalude bidibo ensel mobo bidi augwaligo pedauwalide moni po wabo odai. Tama te ensel dabe augwali hauwa mu te handet milion bidibao, tama bidigo augwali nedebo usu me egobeo, te tausen tausen te kisu umabo mu bidai. Tama augwali dolaluyu, tama te genuai tuni bidi duabo nai me, te bidibo ula elalubo hasa me si me si me, te polalubo tobolu bidi dabe me, augwali tomode bidiyu, tama te ensel mobo bidi dabe augwaligo te bage bagulama dolaluali. *Dan 7:10 12 Tama dolaluyu, tama augwaligo i bomonama weyu, e tama balia wai,
“Te kibu sipsip wai polobadu augwaligo ela mubaso,
agai te tigidali nai tonalubo bomo mu sabo usu
eyu, tama te tigidali wiegi yai nai me, te wiegi yai
homu kolesaga me, tama te tigidali genuai bomo
agade usu elalubo dao. Tama aga nogi te tigidali
bidigo ugwaba sabo te usu da, tama ula yai bomo
agabolo mabo me, te usu dao, te agabolo genuai
nogi mabo me te usu dao.”
13 Tama tiyu, te Godigo nigali nai tigidaligo wabo po eno odali, te dagalude bidibo naigo me, te tǫde bidibo naigo me, tama te tǫ aiyadu dologode bidibo nai me, te tamu ąįde bidibo, te nai dabe tigidaligo te po wabo odai. Awe, te tigidali bulude bidibo Godigo nigali naigo po eno odali, augwaligo e po wai,
“God aga te wiegi yai duabo naide tuni bidi dulalubao,
tama te kibu sipsip wai me, augwali sigo nogi
dago ugwaba sao, augwali sibolo genuai nogi mu
mao, te ula yai bomo me mao, te genuai bomo
me dago mao, tama sesemane sogo bidada pabo
te usu mu yaibao.”
14 Tama te bidibo ula elalubo hasa me si me si augwaligo te pode te po wai, “Mu dao.” Tama te polalubo tobolu bidi dabe augwaligo basi gulama, lotu po God de Krais si dali wai.