9
Te nogo a wali ensel mobo bidigo te ona tiwai nai elai
1 Tama te nogo a wali ensel mobo bidigo te aga ona tiwai nai elali, tama tebode eno suali te hǫ me deligo te dagalu tagalama, e tǫba tulalubo suai. Tama augwaligo agabolo te tǫ dedage aba mu yai te aga page meni yai, te ki mawai. 2 Tama agai te tǫ dedage dabode, tama te dedagedu te genuai sia hano tiwai pedalai. Tama te tǫ dedagede pedalali moni hano agai te giliga de te dagalu si te haluai, tama augwali si te hulia sai. 3 Tama te kuli mano tiwai nai dabe umabo augwali te hano ebo tagaliyu, tama augwali e tǫba dulai. Tama augwaligo bomo te nai hwą, te bidi gąų kelebo nai hwągo bomo tiwai sali. 4 Tama augwaligo te kuli mano nai dabebolo te po wai, “Dagego te noswai dabe me, te ni me deli me, te tǫde pedalobo haniani nai dabe me, te nai dabe tigidali dologio. Dagego te bidi dabe augwaligo gebode te Godigo sa muani nai musiąwai bidi augwalibolo naga dene mao. * Ese 9:4 5 Dagego te tiwai bidi dabe augwalibolo dene mayu, tama polua a naga silibo si te dene mabo tagalao. Tiali goli dene mobadi dagego augwali ela mugio,” te po wai. Tama te kuli mano nai dabe augwaligo te bidi dabe augwalibolo dwai dene mabo, te nai nogi hwą agai te bidi gąų keleyu dene mabo tiwai ebo dao. 6 Te tama tebo sogo, polua a naga sogo, te bidi dabe augwali te isabo tų gegebo sę ebadi, tiali goli augwaligo sugobeo. Awe, te augwaligo homugo te isabo homu godolo yai, tiali goli te isibo augwali suyu wi paibao. * Jop 3:21; Jer 8:3
7 Tama eno suali, te kuli mano augwaligo hwįainogo sisi elalubo te hwįbo bidigo duabo kibu hosgo ebo tiwai gilama tigi palibo nai elaluali. Augwaligo tobolude te kapa nogi gol tego nigai wiegi yai madi tiwai nai elaluai, te tuni bidigo tobolu madi tiwai. Tama augwaligo gesabidi te bidi gesabidi tiwai dao. * Jol 2:4 8 Tama augwaligo tobolu nisi bobobage, te we dabego tobolu nisi tiwai. Tama augwaligo kele te moni hudigi ebo kibu laiongo nai gąų kelebo genuai kele tiwai elaluai. 9 Tama augwaligo hagawiade te kapago nigai holobo ugwa muai elaluai, tama augwaligo bogo te saba saba ebogo u wabo te hwįbo bidi duabo nai te kibu hosgo kegasa peyu udabo tiwai eyu te nai kidagalo wabo tiwai ebo dao. 10 Augwaligo danu te nai hwągo danu tiwai elalubo, te danude te bidibolo dwai dene mabo marasin te elalubao. Tama augwaligo danu dabego bomogo te bidi dabe dolobo sę elaluyu, tama te polua a nagade te sę ela bilibo. 11 Tama augwa te sę ebo tuni bidi me deli aga te tobolu bidi bidai. Te tuni bidi aga te tǫ dedage aiyanu mu yai digi te tǫ page meni yai digi tonalubo ensel mobo bidi dao. Tama augwaligo Hibru pogo te ensel mobo bidi nogi Abadon wai. Tama te Grik pogo te bidi nogi augwaligo te Apolyon wai. Te Grik po nogi begelama tama dago pogo te bidi nogi augwaligo te Tigidali Nai Dolobo Bidi da wabo.
12 Tama te hasia yali genuai sęgę da, te silai dao. Odao. Sęgę si digi te me elalubao, tama te nosali pedalaibao.
Te nogo me badu deli wali ensel mobo bidigo te ona tiwai nai elali
13 Tama te a olama me badu nogo deli wali te ensel mobo bidi agai te aga ona tiwai nai elali, tama eno po me wabo odali. Te Godigo gesabidide te kapa golgo nigai sai elalubo, te Godibolo maiabo nai ulubo sai dao. Tama te saide elalubo gąų yai nai me si me si tomodu te po me wabo eno odali. 14 Agai te a olama me badu nogo deli wali te ensel mobo bidi dali te po wali, “Te ensel mobo bidi me si me si olama augwali te genuai pabo ąį nogi Yufretisde kalabus elalubo da wali, tama nago augwali olo tagala palao,” te po wai. 15 Te po obaso, agai te ensel bidi me si me si augwali tagala palali. Tama te ensel mobo bidi me si me si augwali sisi elama, te we bidi ela mubo sę ebo sogo tonaluali. Te sę ebo bodolu mani kibu be me, te bodolu mani polua me, te bodolu mani sogo me, te we bidi ela mubo bodolu mani aua me augwali tonaluyu bidaluali. Tama te bodolu mani aua asama, tama agai augwali tagala palama, tama augwaligo te we bidi hani tigidali dąį sela muani, tama me hani deli ela muai. 16 Tama te kibu hosde duawali ami bidi dabe hauwa mu, te bidi sese hauwa mu da wali, te 200 milion. Te tama nogi ebo eno odai. 17 Tama eno te na ebo tiwai eyu, tama te kibu hos dabe me te hosde duawali bidi dabe augwali suali, tama augwali e tama bidibo eno suali. Bidi dabe augwaligo te kapago nigai hagawia polibo nai muai, te holobo ugwa tiwai muai, tama te muani nai meba mama yai, te sia bogoli tiwai mama yai, me sisi yai, me sewa yai, te masigi nogi salfa te tiwai sewa yai. Tama te kibu hos dabe augwaligo tobolu te moni hudigi ebo kibu laiongo tobolu tiwai yai. Tama sia me, hano me, te dwai kugumini ebo masigi salfa te sewa yai masigi te sia deyu augwaligo pedauwalidu te hamena tiwai sia deyu, tama te sia bogoli buluba pedalai. 18 Augwaligo tigidali we bidi hani dąį sela ilali, tama augwaligo te we bidi hani me deli te dwai nai selago augwali ela muani. Te sia badi, me hano, me te masigi salfa sia deyu, te tama nai sela te kibu hos dabe pedauwalidu pedalama, te we bidi hani deli ela muani. 19 Magi baso meni. Te hos dabe augwaligo te we bidi ela muabo bomo te augwa pedauwalide me te augwa danude me elalubo dao. Tama augwaligo danu te hasamani dabego danu tiwai, tama tobolu me elaluai. Tama bidi augwaligo te naigo dolobo dao.
20 Tama tigidali gasa bidi dabe augwali te dwai nai selago ebo sęde isisąwai bage, augwali homu begelesiąma tama augwa nogogo nigali nai tagalama tudiba musiąyu me bidaluali. Tama tiyu augwaligo te dwai haubo noma bidi dabebolo lotu po wabo tagalobe. Augwaligo te tibo god dabe te kapa golgo dali silva dali te bras me, te masigi me, te nigo me, tama naigo nigai tibo god dabebolo augwaligo lotu po wabo tagalobeo. Te nogogo nigali tibo god augwaligo gedugo sugobeo, ma ologo odogobeo, ma biligobeo. Tiali goli augwalibolo te bidi dabego lotu po weyu bidaluali. * Tib 115:4-7; 135:15-17; Dan 5:23 21 Te bidi dabe augwaligo bidi meba ela muyu, tama bidi dolobo pobi wabo sę eyu, tama augwaligo penani ebo kolesaga wali peyu, tama nai wi sesa bilibo sę eyu bidaluali. Tama tiyu, augwali homu begelama, te dwai kolesaga ebo augwaligo tudiba me mubeo.