1 Yon
Yone futan olo mikiktemo dolanebuotabe.
Tekein kemin wengobe.
Yesuse atdimo kaanea imin hananea ulanea abilim unebua bifolo 60 ese mak blimanota Yone futan olo dolaneta Yesuse bainobo galin nakaia unangai omfubenebiobe. Yon ele Yesuse okok aleyemin naka etabe. E nakaia unangai baabenea Ibo Gode kla goba blib inaniba naka mak unang maki kla gobe nine ge baabenea eka weng mak ole naka maki obianiba Dabalim naka ile hengmin gam kesoa Yesuse mo dabalim naka moton aim blimobo ge obiam blib kesota Yone bainobo galin nakaia unanga eli baabeneta I weng olo dim obiobo ge baabe nanebiobe.
1:1-4 Mikiktem wengobe.
1:5–2:29 Ayal esa mililanamin osa o wengobe.
3:1-24 Gode meme isa eka Gululame meme isa i wengobe.
4:1-6 Gode Hob esa hob misiam isa i wengobe.
4:7-21 Gode gobenin kukubo mitmakamobe.
5:1-21 Kukub misiamo gaisonamin wengobe.
1
Yone futan olo dolanea Yesuse bainobo galin nakaia unangai bib mak bib mak ye blibi omfubesebe.
Sinanggwano dabale mo klaim blimo dimo Klaiste binebiobe. E niniin afeto Afen Smik Omkayemin Wengobe. Ni e wengo kla wentenoba eka nini kino atenanobbiobe. Ae, ni e kla ateme bianoba eka ni kweilono melebananobbio kesoa ni e weng sango ibo dola omfubenomabbiobe. Naka ele afen smiko mitmakamobe. E Aye Gode tena binabibbua tlea ni atemobbio kesoa ni e afen smiko amit nino weng sango ibo baabenomabbiobe. Ni inamin namino wateme binobbu osa eka wente binobbu osa o weng sango memalo ibo baabenomabbiobe. Nisa eka Aye God esa eka e miine Yesus Klaist esa ni bobol temo makob ambiob kesoa ibsa inaniba ib bobol temo makob aine getabe. Ni weng olo ibo dola omfubenomabbio kesoa nib seinino sum anoko!
Nibo ayale dim nomo!
Gode ayalobe. Esuo mililanamino blimobe. Weng olo Gode miine ni baabenebua eka nisak ibo baabenomabbiobe. Nibo kukub misiam wafunob mole nibo makob mililambio tem tab biob inaminobe. Eka nibo kukub ayam wafunob mole nibo makob ayale dim biob inaminobe. Nibo baanoba Nite God ete nanoba ni bobol temo makob ambiobobo genomob otane nibo sma mililambio tem tab nob mole nib wengo dimobe. Nibo kukubo moloto mo wafubiobbabe. Ina otane Gode ayal dim bie inanoba nibsa ayal dim nob mole nibtem bainobo galin nakaia unangai mak item nanoba nib bobol temo makob anoba e miine Yesuse ilemo nib hengmino fubabenoa omtlabenoa nibo kining anomabbiobe.
Nibo baanoba Ni hengmino blimobo genob mole ninib bobol tem funin ota dim obuobe. Weng motono nib bobol temo blimobe. Eka nibo nib hengmino omkeimanob mole Gode weng moton omin kesoa e kukub moloto nanea nib hengmin osa eka nib kukub misiam osa alukum omtlabenea kining klayam anomabbiobe. 10 Gode baanea Nakaia unangai alukum hengmin gamobo genebio kesoa nibo baanoba Ni hengmino blimobo genob mole weng olo mitmakamo makob nibo baanoba Gode dim omin nakabo ge baabanomabbio kesoa e wengo nib bobol temo mo bibe biobabe.