1 Tesalonaika
Fole Tesalonaika bib seli futano mikiktemo dola omfubenebiobe.
Tekein kemin wengobe.
Yesuse atdimo kaanea imin hananea ulanea abilim unebua bifolo 20 ese mak blimanota Fole Kolin bib ye bianeta futan olo dolaneta Yesuse bainobo galin nakaia unangai Tesalonaika bibo blibi omfubenebiobe. Sino Fole monea Tesalonaika bib ye bianea Yesuse wengo omkeimabea nakaia unangai maki Yesuse bainobo geiba o dafa ota Yuda naka maki bainobo galin nakaia unanga eli kukub misiam omkayemib kesoa Fole deibenea bebianea okok kem wat okok kem wat binea monea Kolin bib ye bieta Timotie monea esu unanea Yudai teniba Yesuse bainobo galin nakaia unanga eli kukub misiamo omkayebibo weng sango baabasea wenteneta i futan olo dola omfubenea dosbal mana bianeta eka Yesuse imin tlamabeo weng sang osa baabe nanebiobe.
1:1 Mikiktem wengobe.
1:2–3:13 Gode gangobo galin osa eka e niniino dobtouleb nin osa o wengobe.
4:1-12 Yesuse bainobo galin nakaia unangai namino wengobe.
4:13–5:11 Klaiste imin tlamabeo wengobe.
5:12-22 Yesuse bainobo galin nakaia unangai namino wengobe.
5:23-28 Mubiang wengobe.
1
Ae bainobo galin nakaia unangai Tesalonaika bib ye blib ibo Fol nesa Sailas esa Timoti esa nita ib futan olo dola omfubenomabbiobe. Ibo nib Aye God esa nib Sume Yesus Klaist esa i meletanobe. Gode ibo daabenea bobol tem ayamo omyeko!
Tesalonaika bib seli bainobo galino sbalma binibbiobe.
Ni amitie Gode nganha bianoba God kobo bainobo galin nakaia unangai Tesalonaika bib seli daabeneba i bainobo galino sbal maine ge oha bianoba Gode gangobo gabuobe. Ni amitie Aye Gode oha bianoba Tesalonaika bib seli bainobo galino sbal maniba Yesus esa eka nakaia unangai e bainobo gabib isa gobe bianiba bainobo galin naka mak unang maki daaye bianiba i bobol temo fumbianiba Sume Yesus Klaiste imin tlamabebo ge fumbianiba waisa bliobo ge ohabuobe. 4-5 Nekwal ibo ni Yesuse dowan weng ayamo ibo omkaye binobbuo weng olo besababe. Weng olo titilsa kesoa ibo kla wentibbiobe. Gode Hob eta weng olo ib bobol temo omabbebeneta ibo baaniba Weng olo motonobo geibbiobe. Ibo inaibbuo nibo tekein kebuobe, Gode ibo gobenea funanea I ne meletan aine ge baanea dlakanebiobe. Ibo tekein kebiobe, ni okok olo nabianoba ibo daayebobo watemibbiobe.
Ibo ni Sume kukubo nabobo yateniba ibsa makob nini nabob inabiobe. Ibo Gode wengo wenteniba Yesuse bainobo gabib o dafa ota naka maki tenibta ibo enin sumo omkaye binabib otane ibo Gode wengo wentebib kesoa Gode Hobe daabenea seinin bobol temo omkayebebe. Ibo ina bianiba Yesuse bainobo galin nakaia unangai Masedonia betan ye blib isa eka Glik betan ye blib isa kukub ayamo aleye bianiba eka Gode wengo omkaye biam bliba i wentiba eka bib mak betan mako blib isa i alukum ibo Yesuse bainobo gabibo weng sango alukum wentibbio kesoa ni ib bainobo galino wengo imino mo baabenomabbiobabe. Niminbabe, sino ni ib bibamo biob dimo ni kukub ayam nabeiba nakaia unanga eli wateniba baaniba Bainobo galin nakaia unangai Tesalonaika bibo blibi i god dim omino deiboniba i bobol temo Gode oman bianiba Gode okoko klabianiba Gode moton amit ninobo gabianiba 10 e miine abilim danea imin tlamabeo waisa binabiobo gabiba ni wentebuobe. Gode miine Yesuse kaanea e imin dofaanea hananebue nibo daabenea sinanomo Gode nakaia unangai kukub misiamo wafu binib biamuei dosuananea enin sumo omyamabe otane nibo mo dosuananamabebabe. Niminbabe, Yesuse nibo daayebebe.