1 Timoti
Fole futano mikiktemo dolanea Timotie omfubasebe.
Tekein kemin wengobe.
Yesuse atdimo kaanea imin hananea ulanea abilim unebua bifolo 35 ese mak blimanota Fole Timotie futan olo dola omfubanebiobe. Timotie awoko Yuda unangobe, eka e aaleb ele Glikobe. Yo dimo e Yesuse bainobo galin nakaia unangai Efesas bibo blibi kima bie kesota Fole futan olo dola omfubaneta Kukub misiamo tam tlebo yo inanebta bainobo galin nakaia unangai kimanale ge baabanebiobe.
1:1-2 Mikiktem wengobe.
1:3–3:16 Yesuse bainobo galin nakaia unangai kukubo namin osa eka i kimanin nakai kukubo namin osa o wengobe.
4:1–6:21 Fole Timotie baabanea Kobo Sume okoko inanebta okok kemale ge baabaseo wengobe.
1
1-2 Ae Timoti kobo Ne Yesus Klaiste wengo kobo aleke bia tekein keneba bainobo gabeb kesoa kobo makob ne miin motonobe. Ne Fol neta futan olo dola omfubkenamabibe. Ne Yesus Klaiste okok namasanin naka netabe. Niminbabe, Gode nibo hengmino temo biobo dotlanebio esa eka Yesus Klaiste imin tlamabe waisa biob naka esa i baatneniba Ni kobo kemanoba moneba bib mak bib mako haabianeba ni wengo omkeimamale ge baatneibbio naka neta keb futan olo dola omfubkenamabibe. Nib Aye God esa eka nib Sume Yesus Klaist esa i dumo kobo kemhalilaniba daabkeniba bobol ayam omkakemine!
Dim omin nakai teniba ibo dim oyemibo i wengo mo wentaibe!
Weng olo ne sino tenia Masedonia bib ele tlang genia tebiania baabke tlibio yota imin dola omfubkenang genitabe. Ne bobol temo fumbio Kobo imin Efesas bib ye bianeba naka maki nakaia unangai dim omin wengo oyebibi baabeneba Ibo naka mak unang maki dim wengo mo oyemibe ge oyemale! Kobo i baabeneba Ibo i faninwali weng sang afeto mo obianibta i inaminobo gabianibta i niniino mo dotouleb nimibe ge baabenale! I faninwali wengo wentaibo baase baase binabib otane weng olo i bobol temo mo daabenota i Gode bainobo genomabibbabe. Olo besa wengobe. Ina otane ne funania I kukubo afet ota nabianiba i bobol temo kining aniba fiab bianiba Gode bobolo fumbianiba bainobo geine! I inamib mole i Gode goba bianiba eka i nakaia unanga isa gobeniba daayemomabiobo ge funaiobe. Eka mak ile kukub ayam olo ne kobo baabkeibio deiboniba besa weng ota wafu bianiba obiobe. I Gode hekmel wengo Mosese dolanebuo aleyemin naka nomo gabianiba baaniba Ni wengo motonobo gabib otane i Gode weng osa ili weng osa mitmakamo klao mo tekein kebianibta obibbabe.
Nibo tekein kebuobe, Gode hekmel wengo Mosese dolanebuo nakaia unangai tekein keniba kla wafueib mole hekmel weng olo ayamobe. Gode hekmel wengo naka ayam unang ayami mo omkayemebabe. E nakaia unangai enamin kukubo wafu blib ita omkayebebe. I e hekmel wengo omdibi bianiba eka e wengo mo wente biam blibbabe. I Gode kukubo mo wafueim blim bianiba hengmino henga bianiba e weng dobo weng oha bianiba eka e wengo aben giwe biam bliobe. I awok aalok isa eka naka mak unang mak isa yenaiba kulila biam bliobe. 10 I unang taman henga bianiba eka naka maki teniba naka maki taman henga biam eka bib mak seli moniba bib mak seli naka maki ayok doise moniba naka maki waloniba monio boka biam eka dim wengo obiam bliobe. I kukub olo ina bianiba eka kukub misiamo afet osa nabianiba Gode weng ayamo mo wafu nim blim blib kesota Gode hekmel wengo nakaia unanga eli omkayebebe. 11 Gode hekmel weng olosa eka Klaiste dowan weng ayamo Gode dot naka ayame ne omnea omonia nakaia unangai omkayebi osa o mitmakamo makobobe. Weng olo nibo kukub ayamo aleyebo kesoa nibo ayam anoba makob Gode ulab anomo! Weng olo dot ayamobe.
Gode Fole daabane kesoa e Gode gangobo gesebe.
12 Ne nib Sume Yesus Klaiste titilo omnenea ne e okoko okok kebibe. E funanea Fole okok olo sbal manea kla okok kemabebo gene kesoa e ne nemfakanea okok olo omnebio kesoa ne gangobo gabibe. 13 Sino ne Yesuse niniino weng dobo weng owe biania eka bainobo galin nakaia unangai kukub misiam omkaye biam biania weng omdibi binibu otane Gode nemhalilanea daatnenebiobe. Niminbabe, o dimo ne Gode kukubo tobtlin bianea Klaiste mo bainobo geim blim biania funania Ne Gode okoko okok kebibo gabi kesota o mitmakam ota Gode nemhalilanea daatnenebiobe. 14 Eka Sume Yesus Klaiste kukub ayamo omnenea daatnene kesoa ne e bainobo genia e kla gobania ne bobol temo omam blibe.
15 Yesus Klaiste funanea Ne daatnia nakaia unangai hengmin tem tab blibo dotlanano ge funaneta daak tlebiobe. Weng olo bainobe. Nakaia unangai weng olo wenteniba bainobo geine! Ne hengmino henga binibuo kukub olo naka mak unang maki hengamin kukubo gaisenobiobe. 16 Yesus Klaiste funanea Nakaia unangai kukub misiamo deibueine ge funanea dohalilanea daabenebio kesoa e hengmin homono henga binabi naka ne nemhalilanea daatnenea ne e kukubo wafu blia naka mak unang maki nateniba funaniba Sino Fole naka misiam binebio otane memalo Klaiste daabanea e naka ayam biebo, Klaiste makob e Fole daabanebio inanea nisa daabenea ni hengmin osa omtlabenamabebo genomabiobe. I inaniba e wengo wente bianiba e bainobo genib mole i afen smike doboniba amit nomabiobe. 17 E ina binabe kesoa nibo Gode niniino amitie dobtouleb nomo! E komok sum amit ninobe. Nakaia unangai i kino e mo atemin blim otane e kintalinobe. Elekiem eleta God motonobe. Nibo amitie obianoba E ayam, nib Sumobo ge ohamomo! Bainobe.
Fole Timotie baabanea Kobo okoko kla okok kemale ge baabasebe.
18 Ne miin Timoti kobo ne weng mako baabkenamabibe. Sino Gode e wengo naka maki omkayebea i kobo baabkeniba Timotie Gode okoko kla okok kemabebo ge baabkeibbiobe. Nesa inangge baabkenamabibe. Kobo weng olo fumbianeba Gode okoko sbalma okok kemale! 19 Kobo ina bianeba keb bainobo galino sbalma bianeba Gode bobolo funale! Naka mak unang mak ile Gode bobolo mo fumbibbabe. I kukub ayam olo abuk wawem blib kesoa i bainobo galino watwat dabebiobe. 20 Haimenias esa Aleksanda esa i inaniba kukub misiam olo nabib kesoa ne Klaiste baabaia Gululame baabanea e i enino omyenea tekein keniba Ni Gode niniino weng dobo weng ohamin olo kukub misiamobo geine genia baabaibiobe.