2 Yon
Yone futan olo omito dolanebuotabe.
Tekein kemin wengobe.
Yesuse atdimo kaanea imin hananea ulanea abilim unebua bifolo 60 ese mak blimanota Yone futan olo dolaneta Yesuse bainobo galin nakaia unangai omfubenebiobe. Naka maki funaniba Yone futan olo dolanea unang mak ota omfubonebiobo ge obinabib otane naka homon ile funaniba E futan olo Yesuse bainobo galin nakaia unangai bib olokiemo blib ita omfubenebiobo ge obinabiobe. Yone enangge baabenea Ibo naka mak unang maki gobesese bianiba dim omin wengo aleyemin nakai kukubo klaine! Ibo i wengo mo wentubenimibe ge baabenebiobe.
1-3 Mikiktem wengobe.
4-6 Gobenin kukubo wengobe.
7-11 Dim omin wengo mo wentaibe!
12-13 Mubiang wengobe.
1
Ae unang obo God emi kemfakanebio obsa eka ob meme isa ibo ne bainobo galin nakaia unangai kimanin naka neta futan olo dola omfubenamabibe. Ne ibo kla gobe blio nenekiembabe. Nakaia unangai alukum Gode moton wengo tekein kebib isa ibo kla gobe bliobe. Niminbabe, Gode moton wengo nib bobol temo bibe bio amitie bibenamabobe. Aye God esa eka e miine Yesus Klaist esa i bain ye nibo gobeniba dohalila daabeniba bobol tem ayamo omyine getabe.
Nibo gobenin kukub ota wafunomo!
Ne sino wentia i baaniba Ob memei maki Aye baanea Ne moton wengo kla wafueine genebio i kla wafu bliobo gesiba wentenia ne kla seimbinibiobe. Ne unang obo ne weng mako baabkenamabio obo mo funanebta E hekmel weng olo mema weng baatnenebo ge funanemebe! Yeye nibo Klaiste mema bainobo gebanob dimo weng olo tekein kenobbiobe. Weng olo inaminobe. Nibo gobesese nomo getabe. Gobenin kukubo mitmakamo enaminobe. Nibo Gode hekmel wengo kla wafunomo! Eka ibo Gode hekmel weng olo sino wente binibbu osa memalo wentebib osa o enaminobe. Ibo naka maka unang maki gobeine getabe.
Ibo dim omin wengo mo wentaibe!
Dim omin nakaia unangai homoni moniba bib mak bib mak olo unebibi nakaia unangai mo oye bianibta Yesus Klaiste daak tenea dabalim olo naka nebiobo galin wengo mo omkayebibba kesoa naka eli Ni Gode dlakamin Nakabo ge obianiba dim obib itabe. I inabib kesoa ibo klaine! Ibo melek klabiam binibta sinanota inamin namin ayamo dlom gaibo alukum dline! Ibo dim omin naka eli weng ota wenteye biniba sinanoa ibo inamin namin ayam olo dlomabibo deibonimiobe. Nakae waneta nakai wengo wentenea Klaiste wengo deiboneme naka ele Gode e bobol temo mo biba biebabe. Otane nakae waneta Klaiste aleyebeo wengo kla wafu bie mole Aye God esa e miin esa i e bobol temo biba bliobe. 10 Naka make Klaiste aleyebeo wengo mo wafueim blim bianea ibo aleyemang genea tenea ib am ele tle mole ibo mo baabanibta Kobo ye tlebo genibta debeb tam ta ib am tamo mo danimibe! 11 Ibo inaib mole e okok misiam olo daabanomabiobe.
Mubiang wengobe.
12 Ne wengo homono ye bua baabenamabi otane memalo ne futan temo mo dola omfubenimibabe. Ne funania Ne monia ibsu na tlia toula bianoba weng obianoba baabeia wentibta kla seinomo gabibe. 13 Ob dab tlemino God emi omfakanebio o memei Obo klayam biebte ge baabkeibobe. Ne wengo bayotabe. Yon neta ib futan olo dola omfubenamabibe.