2 Tesalonaika
Fole Tesalonaika bib seli futano mubiango imin dola omfubesebe.
Tekein kemin wengobe.
Yesuse atdimo kaanea imin hananea ulanea abilim unebua bifolo 20 ese mak blimanota Fole Kolin bib ye bianeta futan olo dolaneta Yesuse bainobo galin nakaia unangai Tesalonaika bibo blibi omfubenebiobe. E wentea naka maki obianiba Tesalonaika bib seli Ni Yesuse tlamabeo mo tekein kebobbabo ge obianiba bobol tem hekhek fumbiobo gesiba wenteneta futan olo dolaneta Yesuse imin daakenea i dletnea abilim unamabeo wengo alebenebiobe.
1:1-2 Mikiktem wengobe.
1:3-12 Fole Tesalonaika bib seli Ib kukubo ayamobo ge baabeseo wengobe.
2:1-17 Klaiste imin tlamabeo wengobe.
3:1-15 Yesuse bainobo galin nakaia unangai namino wengobe.
3:16-18 Mubiang wengobe.
1
Ae bainobo galin nakaia unangai Tesalonaika bib ye blib ibo Fol nesa Sailas esa Timoti esa nita ib futan olo dola omfubenomabbiobe. Ibo nib Aye God esa nib Sume Yesus Klaist esa i meletanobe. Nib Aye God esa eka Sume Yesus Klaist esa i dumo ibo daabeniba bobol ayam omkayemine!
Fole Gode gangobo gesebe.
Am mak bomanomo am mak bomanomo ni Gode baabanoba Kobo Tesalonaika bib seli bainobo galin nakaia unangai daayebeba i bainobo galino sbalma blib kesoa God kobo ayamobo gabobo, kukub olo ayamobe. Niminbabe, ibo bainobo galino sbal maniba naka mak unang maki kla gobe blib kesoa ib gobenin kukub olo sum anyebobe. Ibo inabib kesoa ni bainobo galin nakaia unangai bib mak bib mako blibi ib kukubo nabibo weng sango oye bianoba ib niniino omfufu yebianoba baabenoba Tesalonaika bib seli kukubo inaminobo, naka maki teniba enin sumo omkayebib otane i bainobo galino sbal mabianiba i bobolo ayam fumbiobo ge oyebuobe.
Gode nib kukubo klanamabebe.
Naka mak unang maki ibo enin kino omkayebib otane ib bainobo galino sbal mablib kesoa naka mak unang maki ib kukubo yateniba baaniba Gode i bekebe biebo ge oye biobe. Gode nakaia unangai kukubo klabeo molot kesoa e ibo baabenea Ibo ne okoko okok kebib o dafa ota naka maki tenibta enin kino omkayebib otane sinanomo ne dletnia utnoba ne bib ut unanoba kimaia amit nomabiobo genebiobe. E inang genebuo e ibo kla kima bie kesoa e meletan ibo enin kino omkayebib nakai e yang kenea enin sumo omyenea eka ib enin sumo omtlabenea enin sum blimubenamabobe. Yesus Sum esa eka abiseli titilsa isa i abilim ut daniba tlaibo Gode inanamabebe. I ayal tem te daak tliba nakaia unangai yatenabiba Gode nakaia unangai e wengo mo wafueim blim blib isa eka nakaia unangai Sume Yesuse dowan wengo omdibihabib isa kukub misiamo omyenea 9-10 dlanea moniba bib mak unomabiobe. Yesuse imin tlameo dim ota Gode inanea dlanea moniba bib mak unomabiobe. I inaniba moniba skeim ye unaniba e titilo ayal inamin osa mo watemomabibbabe. I alukum sasalanomabiobe. Yesuse imin tlea Gode meletani tenabiba eka e bainobo gabib nakaia unangai tenaniba e niniino dobtouleb bianiba seinom gaibo ibsa i bakaniba seinomabiobe. Niminbabe, ni Gode wengo ibo omkayeboba wente bianiba bainobo geibbio kesota ibo inanomabiobe.
Fole Tesalonaika bib seli beteno daayebisebe.
11 Ibo inanomabib kesoa am mak bomanomo am mak bomanomo ni Gode oha bianoba Kobo Tesalonaika bib seli Ne kukub ayamo wafueine ge baaneba dlakanebbuei daabeneba i keb bobolo funine I funaniba Ni bainobo genoba kukubo ayam wafunoba bobol ayam funomo gabib kesoa daabeneba keb titilo omyeba i amitie inamine ge ohabuobe. 12 Inamin kesoa ibo nib Sume Yesus Klaiste niniino dobtouleb niba esak ib niniino dotouleb naneko! Niminbabe, nib Sume Yesus Klaiste Gode i dumo ibo daabeibbio kesoa ayam bliobe.