Abosel
Yesuse okok dlasanin nakai i weng sangobe.
Tekein kemin wengobe.
Yesuse daakenea atdimo kaanea imin hananea ulanea abilim unebua bifolo 33 ese mak blimanota Luke Yesuse okok dlasanin nakai okoko nabinibbuo weng sango dolanebiobe. E mikiktemo Yesuse dowan wengo dolaneta omit ole Yesuse okok dlasanin nakai okoko nabinibo weng sang olo dola nanebiobe. Weng olo Gode Hobe Yesuse okok aleyemin nakai daabenea moniba Yesuse dowan wengo bib sumo Yelusalemo omkeima bianiba eka moniba Yudia betan osa Samelia betan osa eka betan mak osa omkeimam haabinibbuotabe. Fitae okoko nabinebuo weng sang ole sabta 1-12 o tem ota biobe. Eka Fole okoko nabinebuo weng sang ole sabta 13-28 o tem ota biobe.
1:1-26 Mikiktem wengobe.
a 1:1-14 Yesuse imin ulanea abilim onseo wengobe.
b 1:15-26 Yudas Iskeliote alango naka make imin dofasibe wengobe.
2:1–8:3 Yesuse okok dlasanin nakai Yelusalem bibo binibbuo weng otabe.
8:4–12:25 Yesuse okok dlasanin nakai Yudia betan osa Samelia betan osa binibbuo weng otabe.
13:1–28:31 Fole okoko weng sangobe.
a 13:1–14:28 Fole bib mak bib mako haabianea Yesuse dowan wengo omkaye binebuo wengobe.
b 15:1-35 Bainobo galin nakaia unangai Yelusalem bibo mina bianiba weng obinibbuo weng otabe.
c 15:36–18:22 Fole bib mak bib mako haabianea Yesuse dowan wengo omkaye binebuo wengobe.
d 18:23–21:16 Fole bib mak bib mako haabianea Yesuse dowan wengo omkaye binebuo wengobe.
e 21:17–28:31 Fole klabuto ge debetniba haa monsibo weng sangobe.
1
1-2 Ae Tiofilas ne keb futano dola omfubkenamabibe. Sino Yesuse inamin namin okoko klabianea inamin namino nakaia unangai aleye biam bianea e okok dlasanin nakai dlakanea Gode Hobe titilo e omalea Yesuse titil olo omonea e okok dlasanin nakai inamin namin okoko alukum alebenea Gode imin debeb ulanea abilim onsebe. Ne sino buk mako inangge baania dolaibiota memalo imin inangge baanita buk olo dolanamabibe.
Yesuse imin ula abilim onsebe.
Sino Yesuse enin kino watenea kaanea imin hana bianea e ulanea abilim unamabeo amo 40 o sma ye bio kesoa e bia e okok dlasanin nakai ateme bianiba e bain Gode dofaanebiota biebo gabiba e tenea Gode kimanin kukubo e okok dlasanin nakai aleye biam binebiobe. E inanea i tena bianiba baabenea Ibo Yelusalem bibo mo deibonimibe! Ne sino baabenia Gode Hobe dobyamabebo ge baabeibue waisa bliba tleta mitdata onon tlaine! Sino Yone nakaia unangai aaye fuelabenebu otane ibo Gode Hob ele mo blibta sinanamobabo memalo dabanea daakenea ib bobol temo onon tlanamabebo ge baabesebe. Yesuse e okok dlasanin nakai tena bianiba baabaniba Sum kobo memalota Lom bib seli mo dlabeneba uniba Islel naka ni nini dabale nimaye imin kimanoba Islel ni niniino sumu benamabuo? gesiba Yesuse baabenea Islel ib dabale ibma kimanomabib dimo ibo mo tekein kebibbabe. Ne ay eta am olo omfakanebua elekiem eleta tekein kebebe. Ina otane Ne Gode Hobe dabai tenea ibo bekebe bianea e titilo omkayebea ibo moniba Yelusalem bib sel isa Yudia betano bib mak bib mak sel isa eka Samelia bib sel isa eka bib mak betan mako blib isa alukum ne wengo omkayemomabiobo ge baabenea deibe ulanea abilim unang genea bebea atemebiba utnea isak ye une monea ayungo ge waisanoa i mo atemim blim kesiobe. 10 E inanea unea e okok dlasanin nakai abilim uto sma ye teme monsiba abiseli youm namao dlusaibbuei asuke teniba Yesuse okok dlasanin nakai isu ye tlaniba baabeniba 11 Galili naka ibo mo mabianibta abilim uto tememibe! Yesus ele unea atemibo sinanomo tlang game osa makob memale unea atemib inamin ye tlea imin atemomabiobo ge baabesiba 12 i amgolime Olibe golim ut blibo deiboniba moniba Yelusalem bib onsiobe. Amgolim ele meb Yelusalem bibo kikib ye malane biotabe.
Yudase alango naka make dofasiobe.
13 I inaniba moniba Yelusalem bib ye unaniba utniba biino asal uto aala binabibo tem ut onsiobe. Biin olo temo ut onsibi i niniino elitabe. Fita esa Yon esa Yems esa Endlu esa Filib esa Tomas esa Batolomyu esa Matyu esa Yemse niniin aseke Alfiase miin esa Saimone Lom seli kimanin kukubo mo gobe binabeba naka esa Yemse afete miine Yudase niniin asek esa itabe. I inaniba minabiba 14 Maliao Yesuse biem osa eka unang mak isa eka Yesuse ningwal isa i tetemnaniba mibianiba Gode amitie nganha binibbiobe. 15 Am olo dim ota bainobo galini nakaia unangai 120 ese mak miniba Fitae hana manea baabenea 16-17 Nekwal ibo wentine! Yudase ni sinwalo Yesuse dlakanebua nitem Yudas etem nabioba Yesuse okoko ni aleyebea klabob otane Yudase monea Yesuse komokwali baabenea teniba Yesuse afu debeb moniba klabutam unibbiobe. Sinanggwano Gode Hobe nib fanine Debite weng olo omalea e naka ele weng sango Gode buk temo dolanebuo weng sang olo bain inanoa tam tlobe. 18 Yudase inanea kukub misiam olo nanea Yesuse ananomabib nakai monio olaliba oleb monea dabale walonea monsanea ablabu daak blelanea ananoa ale gobiaba tlea kaanebiobe. 19 E inanea kaanea Yelusalem bib seli weng sango wenteniba dabal ye niniino Akeldama ge nganhabiobe. Niniin olo mitmakamo dabal ele ilem dimobe. 20 Sinanggwano nib fanine Debite anso buko Samo temo dolanea baanea
E amo besa noko! Nakai o temo mo nimibe gena bianea
 
eka ans mako tem osa dola baanea
Naka mak eta e alango dokoneko genanebio kesoa
 
21-22 nibo memalo nakai e alango mo dofanomo! Nibo inanoba dofanom gaobo bibilib ile mo dlanomobe! Sino Yone aa fuayemin nakae okoko okok kebe dimo ni Yesus etem nabioba nakai ni bekebe haabianiba inamin namin okoko Yesuse nabeo watemebiba kaanea ula abilim une naka ita mo dofanoba e tena bianoba Yesuse kaanea imin hana uneo wengo omkeimameko gesea 23 i nakai asu dlakasiobe. Naka eli dlakasibi make niniino asumatnabe. Mako Yoseb eka mak ole Basabas Yastas etabe. E dofa nabianiba eka mak ele Mataiase dofa nasiobe. 24 I inaniba dlakaniba Gode baabaniba Sum kobo naka eli bobol temo alukum tekein kebeb kesoa kobo funaneba Nakae yeta dofaine gabeb mole alebeneba 25 e Yudase alango dokonea e okoko deiboneo okok kemeko! Yudase Yesuse okok dlasanin okoko deibonea monea aseinin bib unebo ge oha bianiba beten keniba 26 bianiba tomo olo tlan habianiba wane tom eta molot daake blelane mole dofanomo geniba ina biniba Mataiase tom eta molot daak tle kesoa eta dofaiba Yesuse okok dlasanin nakai 11 i tena haabinibbiobe.