Yems
Futan olo Yems eta dolanebiobe.
Tekein kemin wengobe.
Yesuse atdimo kaanea imin hananea ulanea abilim unebua bifolo 20 e 30 e mak blimanota Yesuse ninge Yemse futan olo dolanebiobe. E Yelusalem bibo Yesuse bainobo galin nakaia unangai kima bianeta Yesuse bainobo galin nakaia unangai skilaniba bib mak bib mako onon tlaibbuei kukub ayamo wafunino weng sango baabenebiobe.
1:1 Mikiktem wengobe.
1:2-8 Nakaia unangai bobol tem funin ayamo blim biaibo Gode nganabaiba omyenamino wengobe.
1:9-11 Nakaia unangai inamin namin blim isa eka inamin naminsa isa i wengobe.
1:12-18 Bainobo galino naatememin wengobe.
1:19-27 Gode wengo wente bianiba e kukubo namin wengobe.
2:1-13 Nakaia unangai kukubo makob kimin omyenamin wengobe.
2:14-26 Nakaia unangai bainobo geniba kukub ayamo wafunino wengobe.
3:1-18 Bainobo galin nakaia unangai sital dimo weng misiamo klaine!
4:1–5:6 Yesuse bainobo galin nakaia unangai kukubo namino wengobe.
5:7-20 Tekein kemin wengobe.
1
Ae Yuda nakai mito 12 i bib mak bib mak ye blib ibo Yems ne God esa Yesus Klaist Sum esa i okok naka neta ib futano dola omfubenamabibe.
Kukub misiamo ibsu ye tam tlamo ib bainobo galino sbal maine!
Ne nekwal ibo wentine! Inamin namin kukub misiamo ibsuo tam tlamabuo ibo ye seimbibte! Niminbabe, ibo tekein kebiobe, kukub misiamo ibsu ye tam tlanoa ib bainobo galino dlamanamabo dimo ibo bainobo galino sbalma wafueib mole ibo sbal manomabiobe. Ibo sbal maniba Gode bainobo galino amitie wafueib mole ib bainobo galino sum anoa Gode kukub ayamo amit bibenamabobe.
Nakai bobol funino ayamo blimubenang go mole Gode nganabaine!
Elekiem olokiem ibo ib bobol tem funin ayamo blimubeno mole Gode baabaniba Keb bobol tem funin ayamo ni omyene ge baabaine! E daayemin naka kesoa e mo dosuananemebabe. E omyamabebe. Ibo inangge baabaib mole funaniba Gode bobol tem funin ayamo omyamabebo ge funaine! Ibo mo funanibta Gode bain omyamabe bleka deibenamabeso ge funanimibe! Ibo bobol tem asuo mo funanimibe! Ibo bobol tem asuo funaib mole ibo makob aso glole olasambea oleb une tlebuo ulabobe. 7-8 Inamin naka ibo mo funanibta Gode ni inamin namin ayamo doyamabebo ge funanimibe! Niminbabe, ib bobol temo amitie asusu fumbib kesoa Gode inamin namin ayamo mo doyamebabe.
Nakai afobeing blim isa afobeingsa isa seinine!
Ne nekwal afobeingo blim ibo Gode kla gobe bianea ib niniino dotouleb bie kesoa ibo kla seinine! 10-11 Eka ne nekwal ibo afobeing homono bibebio ibo Gode ibsa kla gobenea ib niniino omabbubenamabe kesoa ibsa seinine! Ibo makob aketo ulabobe. Aketo bamtoufanomo afoko tubunoa glole tlebianea gatanoa ayamo blimanabo inaniba nakai afobeing homoni kaaniba i afobeingo blimubenamabobe.
Omomom kukub misiamo ibsuo tlamabo wengobe.
12 Eka omomom kukub misiamo ibsuo tloa ibo Gode kukubo sbalma wafueib mole ibo seinomabiobe. Sino Gode e goba biob naka nibo moton wengo baabenea Omomom kukub misiamo ibsuo tlamo ibo sbal maniba ne bobolo funib mole afen smike doboniba amit nomabiobo genebuo ibo inaniba afen smike doboniba amit nomabib kesoa ibo seinine! 13 Kukub misiamo ib bobol temo tlak unubenoa hengmino hengaib mole ibo mo baanibta God eta nemab maneta hengaiobo genimibe! Hengmino Gode mo dababmanomobabe. Eka God esa nakai mo dlabmaneta hengmino henganimibbabe. 14 Ina otane elekiem olokiem nibo bobol tem misiamo funanoba Ni kukub olo nanobtabo ge fumbob ota dlabmanota hengmino hengabuobe. 15 Nib bobol temo kukub misiamo telaak unubenoa omomom kukub misiamo nabobo, kukub olo beselibu benobua sinanoa nibo kaanomobo Gode bibo mo unomabbiobabe.
16 Ne nekwal ibo mo funanibta God eta inabenebo ge funanimibe! Ibo inangge funaib mole ib bobol tem funin olo misiamobe. 17 Nibo inamin namin ayamo bokabob osa eka inamin namin ayamo afet osa o abilim da ta tlebobe. Gode abilimo ayalo klanebu eta nibo omabeneta daak tlebobe. Gode amit ninobe. E afet anamino blimobe. E makob inamin ye biebe. 18 Gode emaye ele bobol tem funanea Ne weng ayamo i bobol temo omabbebeia i bainobo geine ge funanea inanea nibo e melel ananobbuo makob imen sano dolmanobbua mikiktemo elekiem elekiem damanoa omito alukum damanabo inaminobe. Nibo sin e bainobo genobta mitdata naka mak unang mak isak bainobo genomabiobe.
Ibo ne weng olo kla wenteniba funaine!
19 Ne nekwal ibo ne kla gobe blibe. Ibo ne weng olo kla wenteniba funaine! Ibo weng ole hebmamsab wentine! Otane weng ole hebmamsabo mo baaniba eka alo hebmamsabo mo tliaubenanomone! 20 Nakae atliaubano mole e kukubo Gode kin dimo molotbabe. E Gode bobol tem funino mo wafueim blim keneta nanamabebe. 21 Ibo bobol tem funin misiam osa kukub misiam osa deibueine! Ibo ilib bobol tem funino mo wafunimibe! Ibo Gode weng ota wente bianiba bainobo galine! E weng olo nibo hengmin temo biobo dotlanamabe kukubo alebenamabobe.
22 Ibo weng olo wentaibo mo dokobenota deibonimibe! Ibo wengo wenteniba dokobenoa deiboniba ib bobol temo funaniba Ne ayamobo geib mole ib bobol tem funin olo molotbabe. Ibo Gode ele wengo baabeneme iwat namine! 23-24 Ibo Gode wengo wenteniba mo wafueim blim keib mole ibo makob ib kibio aakikite dofaniba kibio wateniba ni kibio inaminobe gebiam deniba aakikite deiba haanimibo hebmamsab dokobenoa ni kibio fatnamin eso? ge funanabib inaniba Gode bobolo funino hebmamsab dokobenamabobe. 25 Ina otane Gode weng ayamo nakaia unangai daabenoa titilo omkayebuo ibo weng olo wente bianiba ibo mo dokobenomoba amitie fumbianiba inamib mole Gode daabenea ibo bobol tem funin ayamo omyamabebe.
26 Ibo amitie teniba lotu kebianiba Gode niniino dobtouleb biobobo gabib otane weng misiamo omino ib sitalo klao mo kimaim blim keib mole ib bobol tem funino molotba kesoa ibo Gode niniino dobtouleb blib osa molotbabe. 27 Nibo kukub ayamo nanoba nib Aye Gode funanea I kukubo ayamobo genamabeo inaminobe. Nibo meme maki awok aaloki kulilubeibbua aban biaib isa eka unangi imakwali kaabeibbua soson biaib isa kla kima bianoba kukub misiamo takabonoba Gode niniino dobtouleb nomob ota Gode funaneta Ib kukubo molotobo genamabebe.