Leta Houwan Diyon I Leli
Baaba Houwan
Leta ya ana toleleli heiya Diyon, Sebedi natuna. Iya Yeisu wana apostolo etega ge iya al buki Diyon ana toleleli.
Diyon leta ya i ginol kaiwena topankite kakakawel enuna hi gan ekelesiya elana. Heliya hi ba tage panayawi bugulina toto bosowaina ta pihikan heliya nak ana labi, yaa yayaluwa bugulina toto nige bosowaina ta pihikan heliya waisi ana labi. Inoke hi ba Yeisu i getoga, Keliso i getoga. Hi ba Yeisu iya gamagal—he panayawi bugulina to, nak ana labi. Ge hi ba Keliso iya yayaluwa—he yayaluwa bugulina to, waisi ana labi. Hi ba Keliso i neem Yehoba elana ge i tuk i holaviya gamagal Yeisu elana. Yaka hi ba Yeisu nige Yehoba Natuna i oola, nige Keliso o ebo ta ba Mesaiya i oola. Nuwatu gegegena o kaiwena, inoke Diyon leta ya i ginol ge toekelesiya i ba pagasisel panpankiti toto abatelipuna elana hi hago nihi kukuhikan (ololana 2:24). Ge i ba Yeisu iya Mesaiya, Yehoba Natuna, toto i nem panayawi ge i tabwa gamagal (2:22; 4:2, 14-15; 5:1,6).
Topankite kakakawel enuna hi ba tage Yeisu wana babitaiso elana yayaluwa Keliso i nem i miminaa gamagal Yeisu elana, ge tage yayaluwa Keliso gamagal Yeisu i eguluwai ga mulaa abwe i yaomal. Inoke awalehina 5 puna 6 elana Diyon wali nuwatu i ba pasapu i ba, “Yeisu Keliso iya gamagal hot, i babitaiso ge wana tuwalali i ginol i na ana siga i yaomal. Iya maisena ya ge tuwana hot elana i yaomal wala gegi kaiwena.”
Topankite kakakawel hi ba al hauna ginol ta giginol nige ana nuwatu i nonoek yayaluwala ana pwamwal elana, kaiwena ginol ta ginol iya panayawi bugulina, yaa pwamwal iya yayaluwa bugulina. Yaa Diyon toekelesiya i ba pagasisel bahi gegi paganina nihi giginol (ololana 2:1; 3:7-8), yaa Yehoba wana logugui nihi henapuan (2:3-4).
Etega al, topankite kakakawel hi ba heliya wali aatena misusumena etega i gan ge i teli pagetoga-agil wali pan Kelisitiyani gegewel al elal. Yaka heliya hi pihigelgel avaliyau al elal. He nuwatu bwabwatana etega Diyon i leli leta ya gamwanaa, heiya toabulilek taliliyau ge nuliyau nihi nunuwana-agil (ololana 3:14; 4:20-21).
1
Baaba toto Yawalila I Pem Bana
1 Baaba toto yawalila i pem ha wasawasa-an eliyamiu. Mulaa abwe bugul gegewel hi gan, iya iyoho i gan. He ama anana ha hago, ha kiteya matameya, ha gayawaan ge ha pihikana nimameya. 2 Gamagal toto yawalila i pem i masal. He toto yawal mihomihotina i gana elana ha kite, inoke ha wasawasa-an ge ha papaatena-an eliyamiu. He valila alona Tamana hi mina, yaa abwe i masal eliyama. 3 Gamagal toto ha kite ge anana ha hago, iya te ha wasawasa-an eliyamiu, kaiwena nuwama alomeyau komiu ta heliheliyam pamaisena avalau Tamala ge Natuna Yeisu Keliso. 4 Ge leta ya ha leleli eliyamiu, kaiwena nuwama alomeyau komiu yaliyaya ta kalaopopwi.
Ta Nanawaa Mwananala
5 Wasa toto ha hagowa Yeisu Keliso elana ge ha wasawasa-an eliyamiu i ola hiwe: Yehoba iya mwananal ge nige gogou etega i gagana elana. 6 Inoke ebo ta ba, “Aloma ha heliheliyam,” ge ta nanawaa gogouwa, he wala baaba ge wala ginol elana kila tokakawi. 7 Yaa ebo ta nanawaa mwananala ni ola iya iyoho mwananala, inoke avala iya ta heliheliyam, yaka avalau ge avalau ta heliheliyam ge Natuna Yeisu saliyana wala gegi gegewena i ulul yoho ge ta yanayana.
8 Ebo ta ba, “Nige no gegi i gagan,” he totola ta kakawela ge nige baaba tutunahotina i gagana eliyala. 9 Yaa ebo wala gegi ta pamasal Yehoba elana, iya wana pagan i sapu, ge bosowaina ana mel ta teli, inoke wala gegi ni nuwayoho, ge wala pagan nanakina gegewena ni ul yoho ge ta yanayana.
10 Ebo ta ba, “Nige gegi etega ya giginol,” he Yehoba ta awa tokakawi-an to,*Yehoba iyaka i ba haba gamagalau gegewel gegi hi giginol, ololana Aiseya 53:6 ge 64:6. ge wana baaba nige ta aahe i miminaa eliyala.