1 Yabowaine i ba i ola hiwe, 2 “Nau Yehoba wami Yabowaine, ya ahemiwa Itipita wami abaloloyowana.

3 “Bahi yabowaine etega al nuku kukululuek elana, nau maiseu ya.

4 Tota 34:17; Lib 19:4; 26:1; Log 4:15-18; 27:15 “Bahi gogoginol etega nuku giginol kaiwemiu, ebo labulabum bugulina kakanunina, ebo panayawi bugulina kakanunina, o ebo hoga bugulina kakanunina. 5 Tota 34:6-7; AlGe 14:18; Log 7:9-10 Bahi nuku kukululuek gogoginol etega elana o ebo nuku tatapwaloloek elana, kaiwena nau Yehoba wami Yabowaine nige ya tatalam o toawalaka ni gan. Lahi na pek o topihigelgel elal. Lahi ya ni kalapapanet natuliyau, tubuliyau ge tubuliyau natuliyau elal. 6 Yaa bolo hi nunuwana-agau ge no logugui hi henapuan, na nunuwana-agil heyan ge heyan nige ni momowasi.

7 Lib 19:12 “Bahi nau Yehoba wami Yabowaine alau nuku lulumen bwabwage, kaiwena ebo etega alau ni lumen bwabwage abwe na lahe.

8 Tota 16:23-30; - 31:12-14 “Lan Sabwata nuku nuwahikan ge nuku teli ni bwabwalena. 9 Tota 23:12; 31:15; 34:21; 35:2; Lib 23:3 Wami tuwalali nuku ginol lan sikis gamwanaa, 10 yaa lan seben-ina elana lan veyaho i bwabwalena elau. Lan yaka bahi etega ni tutuwalali, ebo komiu, ebo natumiyau, ebo wami totuwalali, ebo wami bwasumu, o ebo bwabwali bolo hi miminaa wami panuwaa. 11 Aba 2:1-3; Tota 31:17 Nau Yehoba, panayawi, labulabum, hoga, ge buguliliyau gegewel ya ginolil lan sikis gamwanaa, yaa lan seben-ina ya veyaho. Heiya te kaiwena lan Sabwata ya ba muloluan ge ya teli i bwabwalena.

12 Log 27:16; Mat 15:4; 19:19; Mak 7:10; 10:19; Luke 18:20; Epe 6:2-3 “Tamwam ge hinam nu awatauwagil, inoke yawalim ana minamina ni yapu panuwa toto na pewa elana.

13 Aba 9:6; Lib 24:17; Mat 5:21; 19:18; Mak 10:19; Luke 18:20; Loma 13:9; Yem 2:11 “Bahi taulol.

14 Lib 20:10; Mat 5:27; 19:18; Mak 10:19; Luke 18:20; Loma 13:9; Yem 2:11 “Bahi ganawal.

15 Lib 19:11; Mat 19:18; Mak 10:19; Luke 18:20; Loma 13:9 “Bahi kaoma.

16 Tota 23:1; Mat 19:18; Mak 10:19; Luke 18:20 “Bahi woliwoli kakakawi.

17 Loma 7:7; 13:9 “Alom wana limi, ebo lagona, ebo wana totuwalali bolau ge yowau, ebo wana bulumwakau, wana donki ge wana bugul gegewena, bahi etega matam ni momomoni-an.”

18 Hib 12:18-19 He gamagalau gulumwawa ge bwagigi anana hi hago, i ola al pinamal ge oya i kasukasu hi kite, yaka lovakun kaiwena hi ginuginu. Inoke hi talmililek laha, 19 ge hi baek Mosese elana hi ba, “Owa nu baaba eliyama ge naha laegan elam. Yaa bahi Yabowaine totona ni baaba eliyama, eba naha aliga.”

20 Analiya Mosese i lahe i ba, “Bahi lovakun. Yabowaine i nem wana gasisi amnana nuku anbose, inoke iya ana lovakun ni minaa eliyamiu ge bahi nuku gegegi eliyana.” 21 Yaa gamagalau iyoho ya hi milimilil laha, inoke Mosese maisena i noha yaluyalu babalona elana, toto Yabowaine i miminaa.