Hibilu wali Leta
Baaba Houwan
Leta ya Yudiya gamagaliliyau bolo hi abulilek Yeisu elana wali leta. Yudiya analiya te pana Hibilu inoke bosowaina al ta ba heliya Hibilu gamagaliliyau. He nige ta aatena henala leta ya i ginol ge i patuna elal, ge nige ta aatena bubun hapanuwa toabulilek o hi miminaa. Ana awa i ola toleleli leta ya i ginol baliman 60 ge 70 ali hawawala, mulaa abwe Loma Limi Bwabwalena Yelusalema hi pasamwalekaleka.
Toabulilek Yudiya palopalomwan hi pwawa wali abulilek kaiwena ge enuna kelaubwa nihi sikal Yudiya wali tapwalolo eliyana. Inoke toleleli i pankitel Yeisu aneloseyau i bwata lakel iya Yehoba Natuna (awalehina 1), yaa iya i tabwa gamagal kila kaiwela (awalehina 2). I ola al Mosese ge Yosuwa i bwata lakel (3:1–4:13). I liwan te Yeisu iya topowon i ola Melkisedek ge wana tuwalali topowon houhouwel wali tuwalali i waisi lake. Yeisu iya bateli vavaluna i pamilil. He bateli houhouwena nige bosowaina gamagalau ni abubunil nihi sapu Yehoba matanaa, yaa Yeisu totona saliyana elana i abubunila. (4:14–5:10 ge 7:1–10:18) Inoke nuwatu bolo ya kaiweliya i ba pagasisel bahi nihi sisikalek eliyaa, yaa nihi palahikan aloliya wali atimatuwa nihi matamatan waisi toto Yehoba i bateli kaiweliya (6:11-12; 10:35-36, 39). I ba wala abulilek ta pihikan momol kaiwena bosowaina Yehoba ana mel ta teli (10:23), ge matala ta lihikanek Yeisu elana ge ta patalelu bubun (12:1-3).
1
Yeisu Aneloseyau I Bwata Lakel kaiwena Iya Yehoba Natuna
Valila sauga tomaha ge tomaha ge kamwasa tomaha ge tomaha elal, tubulau Yehoba wana baaba hi hagowa palopitau elal, yaa sauga ya elana, iya sauga mowamowasena, Yehoba wana baaba ta hagowa Natuna elana. Iya eliyana Yehoba panayawi ge labulabum i ginolil, ge iya Yehoba i hile abwe bugul gegewena ni minek elana ge ni logugui-an. Iya Yehoba wana wasawasa mwananalina ge iya i ola hot Yehoba. Iya wana baaba ana gasisi i gan inoke baaba o eliyana bugul gegewel bolo hi gan i pagasisi-agil ge hi gangan ya. Iya i yaomal gamagalau wali gegi ni ul yoho, yaka i na labulabumwa ge i misiyowa Yehoba Tobwabwatana Hot labena awonaa. Inoke sauga ya iya aneloseyau i bwata lakel, i ola te alan mihahaina toto Yehoba i tun pwatanek elana aneloseyau alaliya i lake.
Iya alana i miha, kaiwena Yehoba iyaka i baek elana i ba:
“Owa natu; lan ebe ya awa natunagiwa.”
Ge iya bana Yehoba i ba:
“Nau na ola Tamana, ge iya ni ola Natu.”
Yaa nige sauga etega Yehoba i babaa ola to aneloseyau kaiweliya. I ola al, sauga Yehoba Natuna gamaun i patuna i nem panayawiya, inoke i ba, “No aneloseyau gegewel nihi kululu elana.”
He aneloseyau baliya Yehoba i ba:
“No aneloseyau ya ginolil nihi ola mana,
heliya no totuwalali nihi ola ginaha memena.”
Yaa Natuna bana i ba:
Yabowaine owa, wam abalogugui i mihot nige ni momowasi;
alom ge wam pagan sasapona wam gamagalau u logugui pasapol.
Pagan sasapona u yaliyaya-an ge pagan nanakina u towani,
inoke ginebi ge wam yaliyaya bwabwatana, nau wam Yabowaine
enonu ya ligin kokowamwa
ge ya telewa alomwau nu logugui-agil.
10 I ola al Yehoba i baek Natuna elana i ba:
Babala, abatelipuna elana owa panayawi u ginol,
ge labulabum iya nimwam mulina.
11 Panayawi ge labulabum nihi mowasi, yaa owa nu mihot.
Heliya nihi nak ni ola kaliko i beyaunana ge i nak.
12 Abwe nu ginol ola-agil ni ola holahola hi gagabom,
abwe nu pil getogaagil ni ola gamagalau ali kaliko hi sesensi.
Yaa owa nige u gegetoga,
ge yawalim nige ana abamowasi i gagan.
13 He Yehoba i baek Natuna elana i ba:
“U misiyowa labeu awowa ana siga am topihigelgel na teli lowagil aem gabulanaa.”
Yaa nige sauga etega i babaa ola to anelose etega elana. 14 He aneloseyau henalau? Heliya yayaluwa hi totuwalali Yehoba elana ge i papatunal gamagalau bolo abwe pwamwal hi aahe hi lalabel.