Yeisu Keliso wana Pankite
Diyon elana
Baaba Houwan
Diyon toto apostolo, Sebedi natuna, iya buki ya i leli ge i patuna ekelesiya ali gewi seben elal bolo hi minaa polobins Eisiya elana. Saugena o Loma wali logugui i gasisi panayawi labena o elana, ge toabulilek hi palomwanagil. Kin etegana Kelisitiyani i palomwanagil heiya Sisa Nilo, iya wana sauga logugui baliman 54 i na ana siga baliman 68. Kin etega al ge Kelisitiyani i palomwanagil heiya Domitiyan, iya wana sauga logugui baliman 81 i na ana siga baliman 96. Puna bwabwatana ge Kelisitiyani hi palomwanagil i ola hiwe. Loma hi ba wali kin i ola yabowaine etega inoke gamagalau nihi kululu eliyana. Yaa Kelisitiyani hi towa hi ba, “Keliso iya wama Babala ge iya ya te eliyana naha kululu.” Inoke Loma wali tologugui Kelisitiyani hi pihigelgel-agil ge enuna hi lolil (2:10; 2:13; 3:10; 6:9).
Loma Diyon al ge hi padibula taval Patmos elana (1:9). Buki ana toatena hi gewi hi ba kin Domitiyan wana sauga elana te, tabam baliman 95 elana. Diyon iya iyoho Patmos ge ana pankite elana Yeisu bugul enuna i pankite ge ni wasaan.
Diyon Kelisitiyani wali wasa i pek Seitani wana palopalomwan toekelesiya elal ni bwatabwata, yaa heliya nihi talmilil gagasisi bwagana ebo yaomal nihi pwawa (12:11). Nuwatu bwabwatana etega heiya nihi palahikan (2:7; 13:10; 14:12). Diyon i pamasal Keliso ni sikalim inoke ana topihigelgel ni pakokovel. Bolo wali pagan nanakina ali lahi ni pek, yaa toabulilek nihi ulutuk panayawi vavaluna ge labulabum vavaluna ana waisi elana (21:7-8).
1
Buki ya Yeisu Keliso wana pankite liwanina. Yehoba bugul bolo ya i pek eliyana inoke ni pamasal kilau wana totuwalali eliyala hauna gun abwe sauga kekeisi ni gan. Yaka Keliso wana anelose i patuna i nem nau wana totuwalali Diyon eliyau ge o pankite elana bugul bolo ya i pankiteyau. Inoke bugul gegewena bolo ya kitel na wasaan al eliyamiu. Yehoba wana baaba ge Yeisu Keliso wana pamasal wasana na wasaan. Henala ebo Yehoba wana baaba palopisai ana buki ya gamwanaa ni vasili gamagalau elal, Yehoba gamagal o ni muloluan, ge bolo buki ana baaba nihi hago ge nihi henapuan Yehoba ni muloluagil. He nige sauga ni yayapu inoke bugul bolo ya nihi masal.
Diyon I Ba Mulolu Ekelesiya Seben elal
Nau Diyon, leta ya ya leli ge ya patuna i nowa ekelesiya seben eliyamiu bolo ku minaa labi Eisiya elana.
Ya awanun Yabowaine toto i gan sauga ya, sauga houhouwena, ge sauga i nenem elal, ni muloluagimiu ge wana nuwa laumwal atemiu ni pakalaopop. I ola al Yayaluwa Bwabwalena, iya i ola yayaluwa seben i miminaa Yehoba wana abamisiyo wawasana awonaa, alona ge Yeisu Keliso nihi muloluagimiu ge wali nuwa laumwal atemiu ni pakalaopop. Yeisu iya Yehoba wana baaba ana towasa sasapona, iya lut al i gamauni, ge iya panayawi ana kin ona wali tobwabwatana.
Yeisu iya i nunuwana-agila, wana yaomal elana i sokalila ge wala gegi i ul yoho, inoke i telela wana abalogugui ana gamagalau, kila ta totuwalali bwabwalena wana Yabowaine ge Tamana kaiwena. Yeisu iya ta awa wasawasa-an ge ta awa togasisi-an sauga gegewena nige ni momowasi. Ibwe. I ola.
Ku kite! Iya i nenem yaluyalu pwatanaa,
yaka gamagalau gegewel mataliya ni nok nihi kite,
ge bolo valila hi howa ge i yaomal heliya al nihi kite.
Gamagalau gegewel panayawiya nihi kahin
iya kaiwena. Tunahot! Ibwe. I ola.
Yehoba Yabowaine Togasisi Hot, iya i gan sauga ya, sauga houhouwena, ge sauga i nenem elal, i ba, “Nau Alepa ge Omega,* Alepa heiya Gilik wali buki matana ana leta houhouwena, ge Omega heiya ana leta mowamowasena. Kila eliyala leta houhouwena heiya A ge leta mowamowasena heiya Z. nau Abatelipuna ge Abapwamowasi.”
Diyon Yeisu I Kite
Nau talimiu Diyon, Yeisu eliyana alowau komiu lomwan ta pwawa toyawe, alowau komiu ala pulowan ta palahikan, ge alowau komiu kila Yeisu wana abalogugui ana gamagalau. Yehoba wana baaba ge Yeisu wana panpankiti tutunahotina ya papaatena-an gamagalau elal, inoke toto o kaiwena hi yowanau ge hi teleyau ya miminaa taval Patmos elana. 10 Wala Babala wana lan elana Yayaluwa Bwabwalena wana gasisi i aheyau, inoke anan bwabwatana etega ya hagoek ewa i ola bwagigi anana. 11 I ba i ola hiwe, “Bugul bolo nasi abwe nu kitel nu leli lowagil buki elana, inoke nu patuna ni nok ekelesiya bolo hi minaa panuwa seben elal ge nihi vasili. Panuwa bolo o heliya Epeso, Simeina, Pegamam, Tayataila, Sadis, Piladelpiya ge Leodisiya.”
12 Inoke ya tagena sikal nuwau na kite henala ge i baaba eliyau, yaka odam ginebi abaliya gold ali gewi seben ya kitel. 13 Gamwaliyaa, awa etega ya kite “i ola gamagal natuna,”* He i olaolaek Daniyela ana pankite Daniyela 7:13 elana. He Yeisu bana. holahola yayapona i galoi i na ana siga aenaa, ge babagalina ana nuwalabwalabwa gold elana hi ginoliya i pahavala painan. 14 Kokowana i wawakeki i ola apwayowa pupunoliya o ebo yaluyalu wakewakekena, ge matana i ola ginaha memena. 15 Aena i namanamal i ola kopa hi ton namanamalina ge anana ana hago i ola banata i sani loem hivana butuna. 16 Nimana labi awonaa putum ali gewi seben i pihikagil, ge haveyan kilepana imomona matana labui i tagilem awanaa. Maninina i namanamal i ola alalati sabwelona.
17 Sauga gamagal o ya kite, inoke ya soguwa aenaa ya ola toyaomal etega. Yaka nimana awona i teliya tuwau elana ge i ba, “Bahi lovakun! Nau Abatelipuna ge Abapwamowasi. 18 Nau Gamagal toto Yawalina Gaganina, valila ya yaomal, he iyaka yawaliu i gan ge ya mihot sauga gegewena. Yaomal ge Tuma ali ki ya logugui-an. 19 He bugul bolo nu kitel, bolo hi gan sauga ya ge bolo abwe nihi masal sauga i nenem, wasaliya nu leli lowan. 20 Putum seben bolo u kikitel nimwau labeu awowa ge odam ginebi abaliya gold ali gewi seben ali sapu i ola hiwe: putum ali gewi seben heliya aneloseyau bolo ekelesiya ali gewi seben ali tomatahikan, ge odam ginebi abaliya gold ali gewi seben heliya ekelesiya bolo ali gewi seben.”

*1:8: Alepa heiya Gilik wali buki matana ana leta houhouwena, ge Omega heiya ana leta mowamowasena. Kila eliyala leta houhouwena heiya A ge leta mowamowasena heiya Z.

*1:13: He i olaolaek Daniyela ana pankite Daniyela 7:13 elana. He Yeisu bana.