Kapenduanna sura'na
Yohanes
Pungngu' tannunna
Inde sura'e nauki' Yohanes, mesa “Perepi'na to mangngorean” napopebaa lako “to digente' Indo' to napile Puang Allata'alla sola anakna.”
Dua kara-kara napelau to ummuki' inde sura'e. Bunga'na, angganna to umbacai la sikamase-mase. Kapenduanna, la undagai to ussewangan pepa'guruan la umpapusa tau, tae'na situru' pepa'guruanna Kristus.
Lesoanna issinna
1. Su'bakan kada (1-3)
2. Pa'kamase lako padanta (4-6)
3. La ungkatangkinniki' pepa'guruan sala (7-11)
4. Bubungna sura' (12-13)
1
Su'bakan kada
1 Iate sura'e lu dio mai kaleku to digente' Perepi'na to mangngorean, kupalulako Indo' to napile Puang Allata'alla sola anakna.*Illaan basa Yunani nakua: Indo' ... sola anakna, umbai kombonganna to mangngorean nakuaan. Kukamasei tongan-tongangkoa'. Tangkao mandi ungkamaseikoa', sapo angganna to ungkalesomo pepa'guruan tongan, 2 annu inde pepa'guruan tonganne mengngala angngenammi illaan kaleta, anna la tontong liu illaan kaleta sae lako-lakona.
3 Anna Puang Allata'allamora Ambeta anna Yesus Kristus Anakna la untamba'kia' anna ungkamaseiki' anna tandoikia' kamasakkean. Angganna tee la dipalulako kaleta to ungkalesomo pepa'guruan tongan anna ma'kamase.
La tontongkoa' sikamase-mase ammu pasikambela kalemua' to ussewangan pepa'guruan sala
4 Ta'mo dengan la nasusian kadoresangku angku issananni kumua dengan anakmu ma'palako situru' pepa'guruan tongan, susi mangka napa'parentaan Puang Allata'alla Ambeta lako kaleta. 5 O indo', kupelau matin temo: Kenamala sikamase-mase liukia'. Tangngia te parenta bakaru kuukisangkoa'e, sapo mangkamikia' dipokadaan anta mane mangngorean langngan Puang Yesus.
6 Ma'kamase, kalembasanna unturu' angganna parentana Puang Allata'alla. Inde parentae iamo la tontongkoa' sikamase-mase susi murangngi mengkalao dio mai.
7 Budami kendek to ma'papusa anna lao ussambai padang ma'patudu. Inde mai taue tae' naakui kumua mangka sae Yesus Kristus merrupa tau. Tau susi too to ma'papusa anna ewalinna Kristus. 8 Dadi la undagai manappakoa' kalemu indamu pesalai pengkarangki, ammu malara untarima aka mangka napatokangkoa' Puang Allata'alla. 9 Benna-benna tae' ummanda'i pepatudunna Kristus, sapo lempang lakomia pa'pikki' kalena, tau iatoo tae' dengan kasilombunganna Puang Allata'alla. Sapo benna-benna ummanda'i manappai pepatudunna, la dengan ia kasilombunganna Puang Allata'alla Ambe' sola Anakna. 10 Maka' dengan sae tau umpellambi'ikoa' la umpalanda' pepa'guruan senga' salianna pepa'guruanna Kristus, daua' palangnganni banuammu, tae' toia' la mupelauan tamba'. 11 Aka benna-benna umpelauanni tamba', ussolaan ia inde taue umpogau' kakadakean.
Bubungna sura'
12 Sitonganna budapi la kutulasangkoa', sapo mokana' umpaillaanni sura', annu morai siamo' la matin anta sipantula'-tula', anna malara sumpu kadoresanta.
13 Salama'na angganna anakna siulu'mu to napile duka' Puang Allata'alla.†Illaan basa Yunani nakua: anakna siulu'mu umbai kombonganna to mangngorean nangei Yohanes ummuki' sura'.