Sura'na Paulus lako
Filemon
Pungngu' tannunna
Filemon mesa to Sarani kaissanan anna umbai tama kombonganna to mangngorean dio Kolose. Dengan sabua'na disanga Onesimus, sapo le'ba umpellei Filemon. Sapo tae' diissanan battu umba nakua anna siissanan Paulus anna illalan tarungkun. Naparundukmi Paulus diona lalan kasalamasan napolalan mangngorean Onesimus.
Inde Sura'na Paulus lako Filemon-e iamo pelaunna Paulus kenamala sikapia sule Onesimus sabua'na, annu' nasuami Paulus ma'pasule lako. Napelau tongan-tongan Paulus lako Filemon kenamala untarima manappa sule Onesimus. Anna tae' angga la nagarri'i anna la natarima sule mendadi sabua'na, sapo la naala sa'do'dorammi annu mesa kapangngoreanammi lako Kristus. Sitonganna narannuan Paulus kela napellambi'i sule Onesimus nasua Filemon (20, 21).
Lesoanna issinna
1. Su'bakan kada (1-3)
2. Pa'kamasena anna kapangngoreananna Filemon (4-7)
3. Pelaunna Paulus lako Filemon (8-22)
4. Bubungna sura' (23-25)
1
Su'bakan kada
1 Kaomo Paulus, to ditarungkun annu unturu'na' Kristus Yesus, ummuki' inde sura'e sola Timotius, sa'do'doranta, kipalulako Filemon satappaan lentekki to kikamasei. 2 Anna kipalulako duka' Apfia sa'do'dorangki sola lako Arkhipus to kisolaan ma'kadua-dua illalan pengkarangangki, anna lako kombonganna to mangngorean to sima'rempun illalan banuammu.
3 Anna Puang Allata'allamora Ambeta anna Puang Yesus Kristus untamba'koa' anna tandoikoa' kamasakkean.
Kadoresanna Paulus ura'na kamamaseanna anna kapangngoreananna Filemon
4 Sima'kurru' sumanga' liuna' langngan Puang Allata'alla to kupenombai ke kukilalaiko illalan sambayangku, 5 annu kukarebami umba nakua pa'kamasemu lako angganna to nasarakki Puang Allata'alla napopendadi petauanna anna kapangngoreanammu langngan Puang Yesus. 6 Kupa'sambayangan kenamala kamesaanta illalan kapangngoreanan lako Kristus la umpabuttu kapaissanan tapolalan ungkaleso manappa angganna kamapiaan talambi'mo annu mesa kappa'mikia' Kristus. 7 O sa'do'dorangku Filemon, pa'kamasemu lako solata to mangngorean umpatiala penawangku anna umpakamai penawangku, annu inde pa'kamasemue umpakaranga angganna to nasarakki Puang Allata'alla napopendadi petauanna.
Pelaunna Paulus lako Filemon
8 Sitonganna la malako kuparenta diona la parallunna mukarang annu rasulnana' Kristus. 9 Sapo anggami kupelau matin annu kuissanammi pa'kamasemu. Kaomo te Paulus-e, mesa to matua anna ditarungkun polepa' temo annu unturu'na' Kristus Yesus. 10 Dengan pelaungku matin la mupogau' lako Onesimus*Onesimus kalembasanna ma'guna. to kuala anak dadian angku illalan tarungkun. 11 Yolona mala dikua tae' dengan gunana Onesimus lako kalemu. Sapo temo ma'gunami. Tae' angga lako kalemu, sapo ma'guna duka' lako kaleku.
12 Inde Onesimus to kukamaseie, kusua sule matin. 13 Sitonganna moraina' la umpatorroi inde la ussondako ungkandapana' illalan tarungkun annu umpalanda'na' Kareba Kadoresan. 14 Sapo mokana' tokke' umpalakoi ke tae' mukua, anna malara mengkalao dio penawammu umpogau' kamapiaan tae'ko susi to dipassa.
15 Umbai iamo dingei umpasisarak salako sappai', ammu malara sola liua' sae lako-lakona ke ma'pasulemi matin. 16 Ta'mo angga la muposabua', sapo la muala sa'do'dorammi ammu kamaseii. Annu kao anna kukamasei, la ikopa susi melalan ma'rupa tau tenni melalan sa'do'doran illalan sanganna Puang Yesus.
17 Ianna muangga'na' satappaan lentekmu, la untarima manappako Onesimus, susi kaleku. 18 Ianna dengan kasalaanna battu' indannaraka matin, kao la muita. 19 Kaomo te Paulus-e melolo ummuki'i: la kulendu'i asan. Ta'moko parallu kupakilala kumua sitonganna kaindanangko lako kaleku annu kupaitaimoko lalan kasalamasan napolalan ullambi'ko katuoan bakaru. 20 O sa'do'dorangku, kurannuan kenamala pa'kamasemu la ma'guna lako kaleku annu mesa kappa'miki' Puang Yesus. La mupatialanna' penawangku annu napamesamiki' Kristus.
21 Kuukisangko inde sura'e sitonda kaparannuan kumua la mupalako pelaungku. Anna kuissanan kumua la marru budapa mupogau' anna inde pelaungkue. 22 Mesa polepi pelaungku: la mupatokanna' angngenan illalan banuammu annu kurannuan kumua la natarima sambayangmua' Puang Allata'alla kupolalan nalappasan illalan mai tarungkun angku malara matin umpellambi'iko.
Bubungna sura'
23 Salama'na Epafras matin, solaku ditarungkun annu unturu' Kristus Yesus. 24 Kupalandasan duka' salama'na Markus, Aristarkhus, Demas, anna Lukas, to ussolanna' illalan pengkarangangku.
25 Anna Puang Yesus Kristusmora untamba'ko.