1 इंजेके पेन-बोमानेनाह्‌क वाटटव अविना लोप्पा ताल्ह्‌किस मतिर. इद पोल्‍लोता लोप्पा माट बेस-नेह्‌ना पुतोम इनजि उच्‍वुरिर इह्‌निर. अद निटमे मति माट पका पुतोरोम इनवालोर माट बेरोरोम इनजि पोंगसोर तिरियिह्‌तोर. जीवा केवालोर बारा दुस्रोरा पाय्दातुन ऊळिह्‌तोर. 2 माट सबे पुतोम इनजोर बोर-बोर इतेकतेला, देवुळता मुनेह ओर इंका वने बेदे पोल्‍लोतुन पुनोर. 3 बोर बारा जीवा कीसोर मन्ह्‌तोर, देवुळता विचरते ओरगाने निटमता पुनदनद बुद मन्ह्‌ता.*8:3 वेल्‍लाङे मोदुल काग्देह्‌कने “देवुळतुन जीवा केवालोरिन बारा देवुळि बेस-नेह्‌ना पुन्ह्‌ता,” इनजोर रासतद मन्ह्‌ता.

4 इंजेके बोमानेनाह्‌क वाटटव अविङ तिनदनदिना लोप्पा इद्रम इह्‌निर इतेके: दुनियातगा मनदनव बोमाङ बाताङे आयोङ, अव उगसताङे. निटम देवुळि उंदिय मन्ह्‌ता, तान विळ्सिसि दुस्रा देवुळि इले इनजोर मीट इह्‌निर. 5 पोग़ोटा बूमतगा इलवेके इळ्ता बूमतगा, निटम वेल्‍लाङे देवुळ्कु ओसो वेल्‍लाटोर सामिर मन्ह्‌तोर इनजोर मन्कलोर इन्ह्‌तोर. 6 अह इतेकाय माट विस्वसिरेनाह्‌क उंदिय देवुळ मन्ह्‌ता - इतेके मावा देवुळबाबाले. ओग़े सबेटविन पुटिह कीतोग़. माट ओनेनाह्‌के पिसिह्‌नल. अद्रमलेह्‌काने माक ओर्वोग़े सामि मन्ह्‌तोग़. ओग़ आंदोग़ येसु किर्स्तु! देवुळि ओना कयदे सबेटविन पुटिह कीता. देवुळि ओनाय कयदे माक पिसिह कीता.

7 मति सबेटोर विस्वसिर इद पोल्‍लोतुन पुनोर. उच्वुर मन्कलोर मुने पेन-बोमातुन मोळ्किस मताह्‌कु, नेटा दिया एवनाह पेन-बोमानेनाह्‌क मोळ्कतव अविङ तिनदह्‌पा, अव पेन-बोमानाङ इनजोर सीता कीस तिन्ह्‌तोर. ओरा नेह्‌ना-लाग्वा पुनदनद बुद बेर्सवा मताह्‌कु, इव तिनदनद पोलिह्‌ताया, पोलो इनजोर पुनोर. अदिनेनाह्‌क अद्रमताङ अविङ तिताह्‌कु कळ्‍वोग़ आतोम इनजोर ओरा जीवा चुहेम आयो. 8 इंजेके तिनदनद तिंडि माक देवुळतुह्‌क ओप्पनाह केवो इनजोर पुन्ह्‌टु. माट अदिन नोमतेके बाताले नुस्कन आयो, ओसो नोमवेक वने बाताले पाय्दा आयो. 9 उंद पोल्‍लोतुन सीताते तासाट: मीट विस्वसते बेस मेग़्कताह्‌कु मीवा विचरते सबे पोलिह्‌ताङ. मति इद पोल्‍लोता मेटे पोलिह्‌ताया पोलो इनजोर विस्वसते मेग़्कवोरिन पापमते अरनाह कीयनद आयो. 10 अद इद्रमि: पेन-बोमाङ निटम देवुळ्क आयोङ इनजोर पुतन इनवानिन, निमा बोमाना मंदिरतगा गाटो तिनदकिन. अस्के विस्वसते मेग़्कवोग़ मन्कल नीक ऊळनोग़. नीक ऊळतस्के ओग़ वने बोमानेनाह्‌क मोक ईतविस्कनाङ अविङ तिनदलाह रेयोग़ आयनोग़ बहे; बेद कबळतुन ओग़ पापम कबळ इन्ह्‌तोग़, अदिने कीयलाह ओन्क दीरा वास्ता. 11 अद्रम पुतोनिन, निमा कीतद कबळतेनाह्‌कु, विस्वसते मेग़्कवोग़ नीवा ऐंगेटोग़ विस्वसि देवुळताहि पूरा जेक आयनोग़. निमा अद्रम अग़ एमा. ओनेनाह्‌क वने किर्स्तु डोलतोग़ कोनि. 12 इद्रम विस्वसते मेग़्कवोर ऐंगेटोर विस्वसिर, बेदिन पोलो इनजोर इन्ह्‌तोर, तान ओर कीयनाह कीसि, ओरा विरुद पापम कीय्ह्‌निर. अह कीतेके किर्स्तुना विरुद वने अद पापम आस्ता. 13 अदिनेनाह्‌क नना तिनदनद तिंडटा मेटे नावा ऐंगेटोग़ विस्वसि पापमते अरतेके, ओग़ पापमते अरमाकेग़ इनजोर नना जीवात मनाह मुर्तिय अविङ तिनोन आयकन. मीट वने इदे विचर कीम्ह्‌टु.