1 मावोर विस्वसिरिर! मावा तादोर-बाबोरा पोल्‍लोतुन वने मीक सीता कीसीकन: ओर मिसर देसेमताहि पेसतापया, देवुळता मोयुल ओरिन मुळ्हचि सबेटोरिन राका कींदु. ओर सबेटोर नेत्रल सम्दुरता नडुमतुह्‌क अतोर.✡10:1 निर्गमन 13:21; 14:21-22 2 मोयुल सबेटोरिन मुळ्हच मता ओसो देवुळि सम्दुरतग्डाहि अग़ कीसीताह्‌के, सम्दुरता नडुमतुह्‌क ताकतोर. इद्रमि देवुळि ओर सबेटोरिन मोसा मुय्तोना अदिकरते ताकवालोर कीता. 3 देवुळि ओरेनाह्‌क पोग़ोटाहि अर्ह्‌चीतद मना इनदनद तिंडि ओर सबेटोर तिनजि पिसतोर.✡10:3 निर्गमन 16:13-15 4 देवुळि ओर सबेटोर मन्कलोरेनाह्‌क बंडातग्डाहि एग़ पेसिह कीसीस मता. सबेटोर अद एतुन उटोर. अद बंडा, निटम किर्स्तुन तोहतनद सीना आंदु. ओग़े ओरा ऐंगे-ऐंगे अंदोग़. 5 मति ओर सबेटोर देवुळि ईतद तिंडि तिंजाय, अद ईतद एग़ उंजाय, ओर पापम कीताह्‌कु, देवुळि ओरग्डाह वेल्‍लाटोर मन्कलोरिन ओङ आता. ओराङ सेताङ अद पेळ्ह्‌कल बूमतगा चेग़्पबटिङ आनाह देवुळि ओरिन बूळे कीता.✡10:5 गिनती 14:26-35 6 ओर लाग्वव पोल्‍लोन लालुस कीताह्‌कु बूळेम आतोर. ओर कीतप लेह्‌का माट वने कीयनद आयो इनजोर माक काग़्हतलाहि अव पोल्‍लोङ आताङ. 7 “ओरग्डाहि उच्‍वुर पेन-बोमान मोळ्कतोर, ताना मुनेह गाटो तितोर, ओसो ओचतोर, अहे लजालेवा कग़्सलाहि तेदतोर,” ✡10:7 निर्गमन 32:6 इनजोर वने देवुळता सास्त्रमतगा रासतद मन्ह्‌ता. माट ओरा लेह्‌कान पेन-बोमान मोळ्कनद आयो इनजोर इव पोल्‍लोङ रासतव मन्ह्‌ताङ. 8 उच्‍वुर मोवब देसेमतविस्कना संगे साट्याल कबळ कींदुर.✡10:8 गिनती 25:1-9 अदिनेनाह्‌क उंदिय दियाते वीसा मूंड अजर्क मन्कलोर डोलतोर. ओर कीतप लेह्‌का माट साट्याल कबळ कीयनद आयो. 9 इस्रयेलतोर उच्‍वुर पापम कीसोर मतोर, ओसो देवुळि बेचानाह केमेन मन्ह्‌ता इनजोर ताना पट ऊळिंदुर. अदिनेनाह्‌क देवुळि ओरिन तरस्क कस्किह कीसि बूळे कीता.✡10:9 गिनती 21:5-9 माट ओरा लेह्‌कान देवुळता पट ऊळनद आयो. 10 ओसो उच्‍वुर देवुळता लोप्पा मुयोग़-मुयोग़ आंदुर. अदिनेनाह्‌क बूळे कीयनद देवतुलता कयदे बूळेम आतोर.✡10:10 गिनती 16:41-50 माट वने अद्रम मुयोग़-मुयोग़ आयनद आयो. 11 दुस्रोरिह्‌क तेळियिह कीयनेनाह्‌क इव पोल्‍लोङ मावा तादोर-बाबोरिह्‌क आताङ. माट इंजेके बूमता आक्रिता वेलाते पिसलाह आतल, अदिह्‌क माक बुद काग़्हतलाहि इव पोल्‍लोङ रासतव मन्ह्‌ताङ.

12 अदिनेनाह्‌क नना बेस-नेह्‌ना विस्वसते मेग़्किस मह्‌नन इनवालोर मन्कलोर, अद्रमलेह्‌काने तमा विस्वसताहि अरयनद आयो इनजि उसरते मनिर. 13 बेस्के मियगा पापमताङ विचर्क पुटिह कीयनव तिपल्क वास्ताङ, अस्के इवे तिपल्कु सबेटोर मन्कलोरिह्‌क वास्ताङ इनजोर सीता कीम्ह्‌टु. मति देवुळि बर्वस लायकता आंदु. मीट बेचोन आप पग़यह्‌निर, तान्काय एक्वा तिपलतुन लोहो. अद्रमताङ तिपल्क वातस्के मीक पापमते अरवाह अग़ तोहतग़ा, अस्के दीरा पोयता पग़यकिर.

14 गोततोरिर! अदिनेनाह्‌क नना वेहतह्‌नन, मावा तादोर-बाबोरा लेह्‌कान आयवा, पेन-बोमान मोळ्कनग्डाहि जेक मन्ह्‌टु. 15 मीट बुद पुतोर मन्कलोरिर इनजोर पुनजि नना वेहतलाह आतन. नना वेहतनव पोल्‍लोन मीटे बेस-नेह्‌ना विचर कीस ऊळाट. 16 सामिना कुळ्पि तिनदह्‌पा माट उंदिय बट्‌किताहि अंगुर जोमा उह्‌नल. तानेनाह्‌क सामिन जोहर कीय्ह्‌नल. माट उंदिय बट्‌किताहि उनडह्‌पा, ओना नेतुरता मेटे माट ओना संगे जोळेम आतल इनजोर तोहतह्‌नल. अहे माट उंदिय आरताङ किळ्केन तिनदह्‌पा, ओना मेंदुलता मेटे माट ओना संगे जोळेम आतल इनजोर तोहतह्‌नल. 17 माट वेल्‍लाटोर मन्कलोरल मह्‌नल, मति उंदिय आरताहि तिनाह्‌कु, माट उंदिय मेंदुलता लेह्‌का आतल.

18 इंजेके इस्रयेल मन्कलोरिन सीता कीस ऊळाट! मोळ्कनद जागातगा मोक ईतविन तिन्ह्‌तोर. तिनाह्‌कु ओर सबेटोर अगा गरियातगा मोळ्कनदिनगा कलियिह्‌तोर. 19 नना बह इह्‌नन इतेके: बोमानेनाह्‌क मोक ईयनव अविङ वेट अविङे मन्ह्‌ताङ, बोमानगा वने बेदे जीवा इले. 20 मति बोमानेनाह्‌क मोळ्कवालोर मन्कलोर, निटम ऊळतेके देयह्‌किह्‌क मोक ईस्तोर, देवुळतुह्‌क आयो. अदिनेनाह्‌क मीट अविस्‍किन तिंजि, देयह्‌कना संगे कलियमाट इह्‌नन. अद नाक ओप्पो. 21 सामिना कुळ्पतस्के वने तिनदना-उनडनगा कलियना, ओसो देयह्‌कनेनाह्‌क मोळ्कतस्के वने तिनदना-उनडनगा कलियना, अद्रम मनदनद मीक पोलो. 22 अद्रम कीस सामिनु ओङ वानाह कीय्ह्‌निर! सामि ईयनद सिक्साताहि बह पिह्‌ट अरयकिर? बह माट ओन्काय एक्वा लावतोरल इनजोर इह्‌निरा? 23 मीट वेहतह्‌निर, “माक सबे कीयलाह पोलिह्‌ता” इह्‌निर, मति नना वेहतह्‌नन, “सबे कीयलाह पोलिह्‌ता, मति सबे कबळतुह्‌क अरवोङ” इह्‌नन. सबे कीयलाह पोलिह्‌ताये, मति विस्वसिरा मुडोरिर मीक विस्वसते बेर्सलाहि सबे कबळतुह्‌क अरवोङ. 24 विस्वसि मन्कल तनाय पाय्दा ऊळमाकेग़, मति ऐंगेटोना पाय्दा वने ऊळेग़. 25-26 देवुळता सास्त्रमतगा रासतदिन सीता कीम्ह्‌टु: “इद बूमि देवुळताय आंदु, इग्डा सबे मालु तानाय आंदु.” ✡10:25-26 देवुळताङ पाटाङ 24:1 अदिनेनाह्‌क आटुमते वमनव अविङ असिस तिन्ह्‌टु. अव बेग्डाङ इनजोर ताल्ह्‌कमाट. कतम सामिनाये आंदु इतेके अगा पोलनद-पोलवद पोल्‍लो पेसो. 27 विस्वस केवोग़ मन्कल मीक गाटो तिनदलाह तना लोन केयतेके, मीक दायलाह विचर वातेक अन्ह्‌ट. ओग़ मीक बेद तिनदलाह ईतेके, इद पेन-बोमातुह्‌क वाटटद आंदुया इनजोर ताल्ह्‌कमाटु. पोलनद-पोलवद पोल्‍लो पेसमाकि. 28-30 मति तिनवालोरगा बोग़ाय, “इद पेन-बोमानेनाह्‌क वाटटदु” इनजोर वेहतेक अचोन, तान तिनमाट. मीट इद्रम इनेरिर, “दुस्रोन्क पोलिह्‌ताया पोलो इनजोर माट बाराह्‌क तिनोम आयकोम? माट बातालाय तिनदा पग़यह्‌नोम, माट देवुळतुन जोहर कीसि, तान तितेक अचोन मावा पोग़ोन तिपल बाराह्‌क वास्ता?” इनेरिर. इद सामिनाहि वाता, तितेके बाताल आयो इनजि मीट पुतिरे. मति मीक वेहवाल मन्कल पोलिह्‌ताया पोलो इनजोर पुनोग़, पुनवाह्‌कु मीट तिनदनदिन ऊळिसि ओग़ विस्वसताहि लेसनोग़ बहे. 31 नना बह इह्‌नन, मीट बाताल तितेकाय, उटेकाय, बाताल कीतेकाय, मन्कलोरग्डाह देवुळतुह्‌क मान दोर्कनाह सबेटविन कीम्ह्‌टु. 32 यहुदिरा, यहुदिर आयवोरा, ओसो देवुळता विस्वसि मुडोरा बेस्केन अडम आयवालेवा पिसाट. 33 नना वने ओर पिसिर इनजोरे, नावाय पाय्दा ऊळवा, सबे पोल्‍लोने वेल्‍लाटोर मन्कलोरा पाय्दा ऊळिह्‌नन. अहे सबेटोर मन्कलोरिह्‌क बेस गिर्दा वानाह पिसिह्‌नन.