1 कोताङ अर्हतनद पोल्‍लोतुन ताल्ह्‌किस मतिर, अदिन वेहतह्‌नन: येरुसलेम सहरतोर देवुळता मन्कलोरेनाह्‌क, कोताङ अर्हतनद पोल्‍लोता लोप्पा, गलाति पटटोर विस्वसिरा मुडुन नना बह वेहतन, अद्रम मीट वने कीम्ह्‌टु. 2 नना मियगा वानाह्‌जोम केपमाटु, मति मीट ओर्वोग़-ओर्वोग़ मन्कल आपुना-आपुना कमयता इसबते, ऐतारम दिया उचुक कोताङ मुनेन अलग कीस तासिस मन्ह्‌टु. 3 पया मियगा वातस्के, मीवा दान लोहतलाह बोर मन्कलोरिन आचिह्‌निर, ओर मन्कलोरिन कोताङ अग़्के येरुसलेम लोहतकन. ओर बेस गूनमतोर विस्वसिर इनजि येरुसलेमतोर विस्वसिरिह्‌क वेहचि सीटि रासिस ओरा कयदे लोहतकन. 4 इलवेक ननाय येरुसलेम दायना इतेके, ओर नावा संगे वायनुर.

5 नाक मकिदुनिया पटटगाह्‌क दायना मन्ह्‌ता. अग्डाह पया मियगा वायकन. 6 आया पग़तेके मियगा वासि मीवा संगे गळ्क मनदकन. इलवेके इर्ङम मारनाह मियगा मनदकन, ताना पया नना बेके दाकन, अके नाक गर्ज अरयनद ईसि लोहतकिर. 7 इद मल्का वासोरेन अनोन. सामिना विचर मतेक अचोन, मीवा संगे गळ्क मनदकन इनजोर आसा कीयलाह आतन. 8 मति पंटाता पोल्वा*16:8 बळयिराङ कबस्क 2:1 वचनता कालनोट ऊळाट. एवनाह इगा इपिसुस सहरतेन मनदकन. 9 बाराह्‌क इतेके, इगा वेल्‍लाटोरा पाय्दा आनाह सेवा कीयलाह बेस-नेह्‌ना अग़ दोर्कता, मति विरुद केवालोर मन्कलोर वने वेल्‍लाटोर मन्ह्‌तोर.

10 ओसो उंद पोल्‍लो: तिमोति मियगा वातेके, ओन रेयपिह केवालेवा तासाट. ओग़ वने नावा लेह्‌कान सामिना कबळ केवाल आंदोग़. 11 अदिनेनाह्‌क मियगा बोग़े ओन पास्कमाकेग़, मति ओन सुकमते नयगा लोहचीम्ह्‌टु. ऐंगेटोर विस्वसिरा संगे ओग़ इगा वायनोग़ इनजोर केपतन.

12 मावा ऐंगेटोग़ विस्वसि अपुलोसना पोल्‍लो इद्रमि: “दुस्रोर विस्वसिरा संगे कुरिंत सहरते अन” इनजोर नना ओन पकाय वेहच ऊळतन, मति इंजेके मियगा वायलाह ओन्क मुर्तिय विचर इले. पया मोका दोर्कतेक वायनोग़.

13 इंजेके मीट उसरते मन्ह्‌टु. विस्वसते मेग़्किस मन्ह्‌टु. दीरा पोस मन्ह्‌टु. आरेम आयमाटु. 14 बाताल कीतेकाय, गूनमते कीम्ह्‌टु.

15-16 मावोर विस्वसिरिर! मीवा अकाया पटटे, मुनेतोर विस्वसिर इतेके इस्तिपनना लोतोर विस्वस कीतोर, ओर देवुळता मन्कलोरा सेवा कीयनद कबळतेने मन्ह्‌तोर इनजोर पुतिर. ओरा लेह्‌काडोर मन्कलोरा पोल्‍लोतुन केंजिसि मन्ह्‌टु इनजोर नना मीक अर्जि कीय्ह्‌नन. अहे ओसो सामिना कबळते तोळ आसि, कह्‌टेम केवालोर सबेटोर मन्कलोरा पोल्‍लोतुन केंजिस मन्ह्‌टु. 17 मियग्डाहि इस्तिपन, पुरतुनातुस, अकयकुस, वेर मुवुर आसि इगा वाताह्‌कु नना गिर्दा आतन. जेक मनाह्‌क मीट इगा वाया पग़विर, मति वेर वाताह्‌कु मीटे वातप लेह्‌का आता. 18 वेर वाताह्‌कु नावा जीवा ओसो मीवा जीवा वने सितुर आता. अदिनेनाह्‌क वेरा लेह्‌काडोर मन्कलोरिन मान ईम्ह्‌टु.

19 इगा आसिया पटटे मनवालोर विस्वसिरा मुलु मीक जय येसु इन्ह्‌तोर. अक्विला ओसो तना मुते पिरिस्किलाना लोतगा जमा आयवालोर विस्वसिर सबेटोर वने मीक जय येसु इन्ह्‌तोर. 20 इग्डोर मावोर विस्वसिर सबेटोर मीक जय येसु इन्ह्‌तोर. मीट ओर्विह्‌क-ओर्वोग़ जीवा वाटसोरे जोहर कीम्ह्‌टु.

21 इचानाह नना वेहचोर वातन, ओर्वोग़ राससोर अतोग़, इंजेके नना पोलुनन, नावा कयदे जय येसु इनजोर रासिसि इद सीटटुन मारिह कीय्ह्‌नन: 22 बोग़ाय येसुसामिन जीवा केवेके, ओन्क सरप दल्गि!

ए सामि, वाय!

23 येसुसामि मीक देय्वा ईयेग़. 24 किर्स्तु येसुना संगे माट जोळेम आताह्‌कु, नना मीट सबेटोरिन जीवा कीय्ह्‌नन. आमेन.