1 ऊळाट, मावा देवुळबाबाल माकु नावाङ मग़्क-मयास्क इन्ह्‌तोग़, अचोन ओग़ माक जीवा कीस्तोग़! इंजेक माट निटमे देवुळताङ पिलाङ-पेकोरल आंदल. मति इद पोल्‍लो दुनियातोरिह्‌क एर्का इले, बाराह्‌क इतेके ओर देवुळतुन वने पुनोर. 2 ए गोततोरिर, इंजेके माट देवुळताङ पेकोरल मह्‌नल निटमे, मति पया वायना कालमते माट बेद्रमतोर आयकल इद पोल्‍लोतुन पुनवल. तेला मति माक इद पोल्‍लो एर्का मन्ह्‌ता इतेके, किर्स्तु देवुळदीपताहि बेस्के मल्स वायनोग़ अस्के किर्स्तु बह मन्ह्‌तोग़, अद्रमे ओग़ माक दिसनोग़, दिसिसि माट वने ओना लेह्‌का मनदकल. 3 बोर ओना पोग़ोन निटम इद्रमता आसा तासिह्‌तोर, ओर सबेटोरु मावा किर्स्तु बेद्रम पवित्र मन्ह्‌तोग़, अद्रमे ओर वने पापम कीयनदिन विळ्सिसि पवित्र आस्तोर.

4 बोर पापम कीसोर मन्ह्‌तोर ओर देवुळताङ अडोना विरुद आस्तोर. पापम कीयना इतेके देवुळताङ अडोना विरुद आयनदे. 5 मति मावा पापमता सिक्सातुन तेहच ओयलाह किर्स्तु वास मतोग़ इनजोर मीट पुतिर.✡3:5 योहन 1:29 ओसो ओग़ पापमलेवोग़ आंदोग़, इद पोल्‍लो वने मीक एर्काय मन्ह्‌ता. 6 अदिनेनाह्‌क बोर किर्स्तुना संगे तुंडिस मन्ह्‌तोर, ओर पापम कीसोर मनोर. ओसो बोर पापम कीसोर मन्ह्‌तोर, ओरु किर्स्तुन बेस्केन ऊळोर ओसो किर्स्तु बोग़ आंदोग़ इनजोर वने पुनोर.

7 ए पेकोरिर! बोरिने मीक नाळेह कीयलाह एमाटु. बोग़ु सेतेमताङ कबस्क कीसोर ताकिह्‌तोग़, ओग़ु किर्स्तुना लेह्‌का सेतेमतोग़ आंदोग़. 8 मति बोर पापम कीसोर मन्ह्‌तोर, ओर देयह्‌कना मुक्याना लोकुर आंदुर. बह इतेक अदु सुरुमुनेताहिये पापम कीसोर वायलाह आता. तानाङ कबस्किन बूळे कीयलाहिये देवुळता मग़ि वातोग़. 9 बोरु देवुळताङ मग़्क-मयास्क आतोर, ओर पापम कीसोर मनोर. बाराह्‌क इतेके ताना जीवा ओरगा मन्ह्‌ता; ओर पापम कीया पग़वोर, बह इतेके ओर देवुळताङ मग़्क-मयास्क आतोर. 10 इद्रमलेह्‌का देवुळता पेकोर बोरु ओसो देयह्‌कना मुक्याना पेकोर बोरु इनजोर पुनमुळ आस्ता. बोरु सेतेमते ताकोर ओसो तमा ऐंगेटोर विस्वसिरिन जीवा केवोर, ओर देवुळता लोकुर आयोर.

11 माटु ओर्विह्‌क-ओर्वोग़ जीवा कीसोर मनदना, इद पोल्‍लो इतेके मीट सबेटोरिर विस्वसते वातग्डाह केंजतिर. 12 मीट काय्नुना*3:12 काय्नु ओसो आबेल वेर आदम-अवानाङ इर्वुर मग़्क मतोर. वेरग्डाह बेरोग़ दादाल काय्नुना जीवा तमिन ऊळिसि कर्विंदु, अदिनेनाह्‌क काय्नु तनतमिनु हव्कतोग़. पुटमुळि 4:8 लेह्‌का मनमाटु. ओग़ देयह्‌कना बुदलेह्‌का लाग्वा बुदतोग़ मतोग़, ओसो तना तमिन हव्कतोग़. बाराह्‌क हव्कतोग़? बह इतेके वेनाङ कबस्क लाग्वाङ मताङ, मति तना तमनाङ कबस्क बार सेतेमताङ मताङ, अदिनेनाह्‌क तनतमिन हव्कतोग़.

13 मावोरिर! इद दुनियाता लोकुर मीक ओङ कीस्तोर अस्के मीट बाममाटु. 14 माट इंजेके हामुरता लावताहि पेसिसि देवुळता पिसमुळतुन दोर्किह कीतल इनजोर माक एर्का मन्ह्‌ता, बाराह्‌क इतेके माट ऐंगेटोर विस्वसिरिन जीवा कीय्ह्‌नल. मति बोर अद्रम जीवा केवोर, ओर हातप लेह्‌काने मन्ह्‌तोर. 15 बोग़ मन्कल तना ऐंगेटोर विस्वसिरिन जीवा केवोग़, ओग़ मन्कना बुदि हव्के मन्कना बुदता लेह्‌का मन्ह्‌ता. हव्के मन्कना जीवातगा अमेसाता पिसमुळ इले, इदिन मीट पुतिरे.

16 येसुसामि मयेनाह्‌क तना जीवा ईतोग़. अस्केडाहिये जीवा कीयनद पोल्‍लोतुन माट पुतल. अदिनेनाह्‌क माट वने मावा ऐंगेटोर विस्वसिरासाटि गर्ज अरतेके जीवा वने ईयलाह तयर मनदना गावले. 17 बोर विस्वसिरगा तम्क पिसलाह बेचोनो मालसोम मन्ह्‌ता, मति मालसोम लेवोर विस्वसि पका तिपल आस्तोग़. लेवोरा तिपलतुन ऊळिसि मता मन्कलोरा जीवा उचुन वने नोयो, इतेके अद्रमतोर मन्कलोर मयगा देवुळता गूनम मन्ह्‌ता इनजि बेद्रम इंदा पग़यनुर? 18 अदिनेनाह्‌क पेकोरिर! माट सिरप तोडटा पोल्‍लो वळ्ह्‌किस जीवा कीयनद आयो, मति देवुळता सेतेम पोल्‍लोतुन नमिसि, दुस्रोरेनाह्‌क बेसताङ कबस्क कीयना गावले.

19-20 इद्रमलेह्‌का ओर्विह्‌क-ओर्वोग़ जीवा कीतेकेने, माट देवुळता सेतेम अग़दे ताकिह्‌नल इनजोर माक एर्का आयग़ा ओसो माट देवुळता मुनेह दीराते रेयवालेवा मनदकल. अस्के मावा बुदि माक कसुर तोहतेकाय, मावा बुदतुह्‌काय वीळिसि देवुळता बुद एक्वा मन्ह्‌ता, अद मावा लोप्पा पूरा पुनजि माक गूनम तोहतह्‌ता.

21 मावोरिर! मावा बुदि माक कसुर तोहवेके, देवुळतुन दीराते वळ्ह्‌कलाह निटमे माक अग़ दोर्कग़ा. 22 अस्‍के माटु देवुळतुह्‌क विचर वातप कीय्ह्‌नल ओसो तानाङ अडोङ माळसोर ताकिह्‌नल, अदिह्‌क माक गर्ज मतद तान ताल्ह्‌कतेके अद माक दोर्किह्‌ता. 23 अद्रमे तना मग़ि येसु किर्स्तुना पोग़ोन माट विस्वस कीयना इनजोर बार देवुळबाबाल उकुम ईतोग़. अद्रमे माट ओर्विह्‌क-ओर्वोग़ जीवा कीयना इनजोर बार किर्स्तु उकुम ईतोग़. 24 ओसो बोग़ देवुळता उकुमतुन केंजिस ताकिह्‌तोग़, ओग़ ताना संगे जोळेम आस मन्ह्‌तोग़, अहे अद वने ओना जीवातगा जागा आस्‍ता. इद्रमलेह्‌का देवुळि मावा जीवातगा जागा आस्‍ता इनजोर माक ईतद ताना पवित्र जीवाते माट पुनदा पग़यह्‌नल.