1 नना बुदलेवोना लेह्‌कान वेहचोर मनाह्‌क, ओङ आयमाटु, गळ्क आपिस केंजाट. मुर्बत कीसि केंजसोर मन्ह्‌टु. 2 ओर्वोग़ मन्कल तना मयान मुदा कर्सा कीयना लेह्‌कान, इंजेके मीट किर्स्‍तुनाये मुडोरिर इनजोर ओना संगे नना मीवा मुदा कर्सा कीसीतप लेह्‌का आतन. अदिनेनाह्‌क मीट ओना तपलेवद मर्मपिलातिन मनदना इनजोर देवुळि उसरते मतप लेह्‌का नना अचोने उसरते मह्‌नन. 3 मति बेद्रम एदेन वाळुमते तरस वासि, मुनेता आंचाळ अवान तना सत्रल बुदते एग़्किह कीता,✡11:3 पुटमुळि 3:1-7 अद्रमलेह्‌कान बोराय वासि, मीक पवित्रते, उंद विचरते मनजि किर्स्तुन मोळ्कवाह लेसिह कीयनुर बहा इनजोर रेयतन. 4 अद बह इतेके, माट मीक येसुना पोल्‍लोतुन पोकुर कीतोम, मति पूनोर मन्कलोर वासि, माट वेहतदिन विळ्सिसि, ओना लोप्पा दुस्राङ पोल्‍लोन पोकुर कीयह्‌पा बेस केंजतिर! मीट मुने देवुळता जीवातुन दोर्किह कीतिर, मति ओर दुस्रा जीवाता पोल्‍लोतुन वेहनेके, मीट अदे पोल्‍लोतुन नमतिर. माट मीक वेहतद बेसता कबुरतुन विळ्सिसि, ओर वेहतद दुस्रा कबुरतुन बेस केंजतिर! अदिनेनाह्‌क मीट लेसतिरा बहु इनजोर रेयतन.

5 किर्स्तुना बळयिरगाह्‌क माट सबेटोरिह्‌क बेरोरोम इनजोर ओर तम्क इन्ह्‌तोर, मति नना इतेके ओरिह्‌काय ओसोय उड्‌लोनन इनजोर इनोन. 6 नाक वळ्ह्‌कलाह कोनि तेळियो, मति सेतेम पोल्‍लोता लोप्पा नना बुद पुनवोनन आयोन. इदिन माट सबे पोल्‍लोने, सबे रीतिने, मीक पोळ्क्ने तोहतोम.

7 मियग्डाहि कोताङ एनवा, पुनेमते देवुळता बेसता कबुरतुन मियगा पोकुर कीतन; मीट बेरोर आयना इनजोर नाके उड्लोनन कीतन; इद बह पापम आताया? 8 मियगा सेवा कीयलाह, नना दुस्राङ नाह्‌कनोर विस्वसिरा मुडोरग्डाहि दान एतन, पुतिरा? 9 नना मियगा मतन अस्के नाक कोताना गर्ज अरस मताये! मति नना बोनाय पोग़ोन मोता वाटोन. मकिदुनिया पटटाहि वास मतोर विस्वसिर नावा गर्जतेनाह्‌क पूरा तोळ ईतोर. इचानाह नना मियग्डोग़ बोनाय पोग़ोन मोता वाटोन, इंजेक मुनेह वने अद्रमलेह्‌कान मोता वाटोन. 10 इद पोल्‍लोतुन नना पोंगसोर तिरियिह्‌नने; किर्स्तु नाक ईतद सेतेमते वेहतह्‌नन रा: मीवा अकाया पटटोग़ बोग़े नाक पोंगवाह कीया पग़वोग़. 11 नना मियगा बोनाय पोग़ोन मोता वाटोन इनजोर मीक जीवा केवाह्‌क इह्‌नना? अद्रम आयो! मीक जीवा कीय्ह्‌नन इनजि देवुळिये पुन्ह्‌ता.

12 “पोलुना ओसो ओना गोततोरा लेह्‌कान माट वने कबळ कीतोम,” इनजोर पोंगलाह जोल पोल्‍लोङ काग़्हवालोर अग़ ऊळिह्‌तोर. अद्रम पोंगलाह नना ओरिह्‌क अग़ एवोन. अदिनेनाह्‌क बेद्रम इचानाह बोनाङे कोताङ तिनवा मतन, अद्रमलेह्‌काने मुनेह वने मनदकन. मति ओर अद्रम मनदा पग़वोर; बह इतेके ओर लोकुराङ कोताङ तिंजिये पिसिह्‌तोर. 13 ओर येसु किर्स्तुना बळयिरोम इनजोर नाळेह कीस्‍तोर. किर्स्तुना बळयिर आयनद सोङ कीसोर दुस्रोरिन लेसिह केवालोर आंदुर. 14 इद बामना लेह्‌काडा पोल्‍लो आयो, बह इतेके देयह्‌कना मुक्याल वने देवुळता दींचनद देवतुलता लेह्‌कान मारियिस नाळेह कीस्ता. 15 अदिनेनाह्‌क ताना सेवातोर वने सेतेमते ताकवालोर सेवातोरा लेह्‌कान मारियिह्‌तोर, इतेके इद बेरा पोल्‍लो आयो! मति आक्रिते ओरिह्‌क तमा कीयनद कबळता इसबते सिक्सा दोर्कग़ाये.

16 ओसो वेहतह्‌नन: नाक बुदलेवोग़ इनजोर बोग़े विचर केमाकेग़. अद्रम विचर कीतेक वने बार आयो, अहे तेला विचर कीम्‍ह्‌टु; कीतेके नाक इंका उचुन एक्वा पोंगलाह अग़ दोर्कि! 17 इंजेक नना वेहतलाह आतन अद पोल्‍लो सामिना विचर मतप आयो, ओर्वोग़ बुदलेवोना लेह्‌कान पोमाडेङते इनदलाह आतन. 18 वेल्‍लाटोर मन्कलोर तमा कीतव कबस्कना लोप्पा मन्कना बुदते पोंगिह्‌तोर, इतेके नना वने पोंगकन. 19 बाराह्‌क इतेके, मीट बुद मतोरोम इह्‌निर; मति बुदलेवोराङ पोल्‍लोन ओङ आयवा आपिस बेस केंजिह्‌निर. 20 इतेके ओर मीक ओर्युलतोरा लेह्‌का ऊळतेक तेला, रेयपिह कीस तितेके तेला, नाळेह कीस तितेक तेला केमेन मह्‌निर. तम्क बेरोरोम इन्ह्‌तोर, लजा वानाह मीक चापुळ ईस्तोर, अस्के वने बाताले इनविर, केमेन मह्‌निर. 21 (माट मीक अद्रम केवोम, अचोन अदिकर तोहोम, नाक लजा वानाह इनदलाह आतन!) मति जोल मन्कलोर पोंगलाह दीरा कीस्‍तोर, नना वने दीरा कीस पोंगिह्‌नन. (इंगो! बुदलेवोना लेह्‌कान इनदलाह आतन!)

22 ओर तम्क इब्रि जाततोर मन्कलोरोम इनजोर इन्ह्‌तोर, नना वने इब्रि मन्कनने. ओर, “इस्रयेल मन्कलोरोम” इन्ह्‌तोर, नना वने इस्रयेल मन्कनने. ओर, “अब्रहमना कूळतोरोम” इन्ह्‌तोर, नना वने अब्रहमना कूळतोनने. 23 ओर तम्क किर्स्तुना सेवकिरोम इन्ह्‌तोर, (नना पिसाङ आतप लेह्‌कान इह्‌नन,) नना कोनि ओरिह्‌काय एक्वा मह्‌नन! नना एक्वा कह्‌टेम कीतन, एक्वा जेलते मतन, एक्वा देबाङ तितन, ऊक-ऊके हामुर एवतप लेह्‌कान आस मतन; 24 यहुदिर नाक उंद कमि रेंड वीसाङ देबाङ जूटटे रोमवालेवा एयुङ मल्काङ नल्हतोर. 25 रोमि मन्कलोर मूंड मल्काङ नाक बळ्गाते नल्हतोर. उंद मल्का लोकुर नाक बंडाङ उकिस हव्कसोर मतोर.✡11:25 बळयिर 14:19 नना ओडाने पय्नम अनेके मूंड मल्काङ ओडाङ विरियताङ. अस्के उंद मल्का नग़्का-पिळ्‍विळ पियल-पोळ्‍द सम्दुरतगान एग़्किस मतन. 26 अमेसा नाह्‌क-नाह्‌क तिरियिंदन, अनेके बेरेह्‌क वने ओसोर मताङ, कलेरा रेय मंदु, नावाय यहुदि जाततोर ओसो यहुदि आयवोर मन्कलोर वने नाक कोटुल कींदुर, सहर्कनगा वने तिपल आंदन, पेळ्ह्‌कल बूमतुह्‌क अनेक वने तिपल आंदन, सम्दुर वेंडिस अनेक वने तिपल आंदन, विस्वसिरोम इनजोर नाळेह केवालोर मन्कलोर वने नाक तिपल कींदुर. 27 बेसता कबुरतुन पोकुर कीयनदिना लोप्पा तिपल आसि एपुर पेसनाह कह्‌टेम कीतन, वेल्‍लाङे मल्काङ निद्रलेवा तिपल आस मतन, जावा-एग़ दोर्कवा तिपल आंदन, वेल्‍लाङे मल्काङ सेवा कीसोर गाटो तिनदलाह पुर्सत दोर्को, इर्ङमते मुचलाह वेल्‍लाङे मल्काङ गेंदेङ आलोङ. 28 इंका ओसो बाताङ वेहतकन, सबे विस्वसिरा मुडा लोप्पा वने दिनम नाक आल्सुळ वासोर मन्ह्‌ता. 29 बोग़ाय विस्वसि मन्कल कमजोर आतेके नना वने अद्रमे आतप लेह्‌का आय्ह्‌नन, ओर्वोग़ विस्वसि मन्कन बोराय पापमतके लेसिह कीतेके, नावा जीवा चुहेम आयो.

30 नना पोंगिह्‌नन इतेके, नावा लावते कीया पग़वव कबस्कना लोप्‍पा पोंगिह्‌नन. 31 येसुसामिना बाबाल (ओन्क अमेसातुह्‌क जोहर आयि!), मावा देवुळबाबाना किरिया रा, नना जोल वळ्ह्‌कोन! 32 दमिस्‍क सहरतगा मतन अस्के, अरितास राजाना गुमसि बह कीतोग़, नना पेसतस्के नाक पोयतना इनजोर सहरता अग़दगा सीपय्किन निल्पिह कीस मतोग़. 33 मति विस्वसिर नाक बेरा कुचातगा उदिह कीसि, सहरता किले गूरेता किळ्किताहि पलते रेहतोर. इद्रमलेह्‌का नना गुमसिना कयदाहि पिसतन.