4
पत्रुन, योहनिन पंचता मुनेह निल्पिह कीस्तोर
1 पत्रु, योहन लोकुरा संगे वळ्ह्कसोर मतोर, अस्के बूमयाल, मंदिरता दरोगाल ओसो सदुकिरा तुंगातोर उय्तुर ओरगा वातोर. (सदुकिर इतेके यहुदिराङ पेदल्कना उंद तुंगातोर आंदुर, वेर सदुकिर हामुरताहि जीवा अरयह्तोर इनजि नमोर आंदुर.) 2 ओर इर्वुर लोकुरिन येसुनाङ पोल्लोङ काग़्हचोर मतोर, लोकुर येसुना लेह्का डोलिसि जीवा अरयनुर इनजोर पोकुर कीसोर मतोर, इद पोल्लोतेनाह्क यहुदिराङ पेदल्क पकाय ओङ आतोर. 3 ओङ आसि पत्रुन, योहनिन पोयतोर. पोळ्द अंज मता अदिह्क इमा दिया नेयम कीकल इनजोर ओरिन जेलते वाटटोर. 4 मति पत्रुनाङ पोल्लोङ केंतोर वेल्लाटोर लोकुर येसुन विस्वस कीतोर. अद्रम विस्वस कीतोरु वेट कोय्तोरे कोनि एयुङ अजर्क मतोर.
5 इमा दिया यहुदिरा पेर्मालोर, सास्त्रमगूरुर, ओसो दुस्रोर पेदल्क पंच उदतोर. 6 ओसो ओरा संगे मोदुल पेर्माल अनाल, तना अने कयपाल ओसो पेर्माना सटमतोर, ओरगा योहन ओसो सिकंदर वेर इर्वुर वने मतोर. 7 पया ओर पत्रुन, योहनिन नडुम निल्पिह कीस ताल्ह्कतोर “मीट वेग़ कूटानु बेद लावते, बोना अदिकरते ताकनाह कीतिर?” इतोर.
8 पया पत्रु देवुळता पवित्र जीवाते निंदतोग़, निंदतस्के इद्रम वेहतोग़, “ए मावा पेर्मालोरिर, पेदल्कनिर! 9 रोगमतोनेनाह्क माट बेसता कबळ कीतोम, अदिन वेग़ बह आस बेस आतोग़, इनजि मीट नेंड माक पर्ह्किस ऊळिह्निर. 10 मीट ओसो मावा सबे इस्रयेलतोर बेस पुनटु, नासरेत नाटेनोग़ येसु किर्स्तुन हव्कनागुटातगा हव्कनाह कीतिर, मति देवुळि ओन जीवा अर्हचीता. ओग़े येसु किर्स्तुना अदिकरते वेग़ मन्कल सव्रेम आसि मीवा मुनेह नितोग़. 11 ‘बेद बंडातुन मुने बेल्दर्कु पोहचीतुर, अदे बंडा इंजेके आदरता मूला बंडा आता,’ इनजि देवुळताङ पाटानगा वेहतद मन्ह्ता.✡4:11 देवुळताङ पाटाङ 118:22 अद बंडा इतेके येसुये, बेल्दार्क इतेके मीटु, ओन पोहचीतप ऊळतिर. 12 वेग़ येसुन विळ्सिस बोग़े, मावा पापमता सिक्साताहि, पिसिह कीया पग़वोग़. बाराह्क इतेके माट पापमताह पिसलाहि, इद बूमतगा ओन विळ्सिस दुस्रोग़ पिसिह केवान देवुळि मन्कलोरिह्क एवो,” इतोग़.
13 पत्रु, योहन वेर इर्वुर कग़यवोर केनकेनेतोर मतेक तेला दीराते वळ्ह्किंदुर. वेरा दीरातुन ऊळिसि तग्वाङ केवालोर बयल आतोर. पया वेर इर्वुर येसुना संगतोर, अदिह्क इद्रमता दीरा वेरिह्क वाता इनजोर पुतोर. 14 मति सव्रेम आतोग़ मन्कल वेरा संगे नितदिन ऊळिसि, वेरा अडम बातय वळ्ह्क पग़वोर. 15 पया बाताल कीतोर इतेके, पत्रुन, योहनिन, सव्रेम आतोग़ कूटान, पंचताहि पलते ओम्ह्टु इनजोर इतोर, इनजि तमतमाय विचर कीयलाह बोटटोर. 16 “इंजेके वेरिन माट बाताल कीकल? वेर इद्रम बेरा सीना तोहतोर इनजोर पूरा येरुसलेम सहरतोर पुतोरे, अदिन वेर केवोर इनजोर माट बह इनदा पग़यकल? 17 आयो रा! इद्रम कीकल, ओरिह्क सिक्सा एवल, मति इद पोल्लो आबुर आयना आयो इनजोर, इंजेटग्डाहि वेग़ येसुना पोल्लोतुन बेगान वेहमाट इनजोर रेयपिह कीसि विळ्सिसीकल,” इतोर. 18 पया ओरिन लोप्पा केयिसि “मीट इंजेके येसुना पोल्लोतुन बेगान वेहमाट, बेगान काग़्हमाट,” इनजोर इतोर. 19 मति पत्रु, योहन वेर इद्रम इतोर, “देवुळता पोल्लोतुन विळ्सिस मीवा पोल्लोतुन केंजना देवुळतुह्क ओपग़ाया? मीटे विचर कीस ऊळाट! 20 माट ऊळतव, केंतव पोल्लोन वेहवालेवा केमेन मनदा पग़वोम,” इनजोर इतोर.
21-22 इंजेके देवुळता लावते सव्रेम आतोग़ पुट कूटाल रेंड वीसाङ वर्साह्काय एक्वा वय्सतोग़ आंदोग़, इनजोरे सबेटोर लोकुर देवुळतुन जोहर कींदुर. अदिह्के लोकुर माक विरुद आयनुर इनजि लोकुरिह्क रेयिस तग्वाङ केवालोर ओरिन पका रेयपिह कीस विळ्सिस ईतोर.
विस्वसिर देवुळतुन केयिह्तोर
23 पया पंचताहि पत्रु, योहन पेसिसि, ओर तमा तोळतोरगा अतोर. पेर्मालोर, ओसो दुस्रोर पेदल्क बाताङ-बाताङ इतोर, अव सबे पोल्लोङ विस्वसिरिन वेहतोर. 24 अदिन केंजिसि विस्वसिर उंदिय एकाते जोरते, देवुळतुन इद्रम वळ्ह्कतोर, “जोहर सामि! पोग़ोटा बूमतुन, इळ्ता बूमतुन, सम्दुरतुन, ओसो अविस्कनगा मंदनव सबेटविन निमान पुटिह कीतिन. 25 नीवा सेवक मावा पेदामुय्तोग़ दाविद राजाल नीवा पवित्र जीवाता बुदते इद्रम वेहतोग़ इतेके
‘यहुदिर आयवोर बाराह्क विरुद आस्तोर?
यहुदिर, बाराह्क उगसताङ आय्डाङ कीस्तोर?
26 देवुळता संगे, अद निल्पिह कीतोग़ राजाल किर्स्तुना संगे अडम आयलाह,
इद दुनियाताङ राजालोर ओसो मुक्यालोर जमा आतोर,’✡4:25-26 देवुळताङ पाटाङ 2:1-2
इनजि वेहतोग़. 27-28 ओग़ वेहतद पोल्लो निटम करल आता. एरोद अंतिपस राजाल, पिलाति गुमसि, वेरु इदे येरुसलेम सहरतगा, यहुदिर आयवोरा संगे यहुदिर कलियिसि, निमा निल्पिह कीतिन ओग़ पवित्र सेवक येसुन अडम आतोर. मति निमा अचोन लावतोनिन इतेके बेद नीवा मुनेताहि विचर मता, अचोने ओर कीया पग़तोर. 29 इंजेके, देवुळबाबा, तग्वाङ केवालोर माक रेयपिह कीयनदिन सीता कीम, कीसि माट नीवा सेवकिरोम पका दीराते नीवा पोल्लोतुन वेहतलाह ईम, 30 माट वेहतह्पा, दुकतोरिन सव्रे कीसि नीवा पवित्र सेवक येसुना पेदिरते, नीवाङ बामनाह लेह्काडाङ सीनाङ तोहचीम,” इनजि देवुळतुन ताल्ह्कतोर. 31 ताल्ह्कतस्के, ओर जमा आस मतद लोन मेलियता. ओर कतमतोर पवित्र जीवाते निंदिसि, देवुळता पोल्लोतुन रेयवालेवा कतमतोरिह्क वेहता बोटटोर.
विस्वसिर ओर्विना-ओर्वोग़ साय्ता कीस्तोर
32 सबे विस्वसिर उंदिय एकाते मतोर. आपुना-आपुना मादुन बोरे नावा इनजोर इनोर आंदुर, मति सबे मन्कलोर तमा सामनतुन ओर्विना-ओर्वोग़ काळ्ङसोर पिसिंदुर. 33 किर्स्तु येसु जीवा अरतोग़, इनजि बळयिर साक्सि वेहन्दुर, वेहतनस्के देवुळता लाव ओरगा दिसिंदु. देवुळता दया सबे विस्वसिरगा बेस मता. 34 बोन्के बातय कमि इलवा मता. जागा-बूमि बोरगा मता ओर बेस्के-बेस्के वमिसि, 35 अव कोताङ तचि बळयिरा कयदे तूसलाह ईन्दुर. बोन्काय गर्ज अरतेके अव कोताङ पया तूसिस ईन्दुर. अदिह्के बोन्क बेदे कमि इलवा मता. 36-37 अद्रमे योसेप पेदिरतोग़ ओर्वोग़ मतोग़. ओग़ कुपरुस इनदनद देसेमतोग़ लेविना पुळ्गतोग़ (इतेके देवुळवडे) आंदोग़. ओग़ बाताल कीतोग़ इतेके तना बूमतुन वमिसि कतम कोताङ बळयिरगा तचि ईतोग़. किर्स्तुना बळयिर ओन बार्नबस (इतेके आसा एवाल) इंदुर.