Hill Madia बळयिर 11

येरुसलेमतोर विस्वसिर पत्रुना तप तोहतह्‌तोर

1 अद्रमे पया, यहुदि आयवोर वने देवुळता पोल्‍लोतुन विस्वस कीतोर इन्जि, येसुनाङ बळयिर ओसो पूरा यहुदा पटटा विस्वसिर केंजतोर. 2 पत्रु केसरिया सहरताहि येरुसलेम अतस्के, उय्तुर यहुदि विस्वसिर ओना संगे, पोल्‍लोने उचुन गिटोगटो आसि. 3 देवुळ माक ईतव अडोन वेग़ माळोग़ इन्जि, “निमा डायना रिवज केवोरगा अन्ज मतिन, ओसो ओरा संगे तिनदना-उनडना वने कीतिन✡ अय?” इतोर.

पत्रु तना कबळतुन तेळियिह कीस्तोग़

(10:9-32)

4 अस्के पत्रु मुनेताहि सुरु कीसि, मारनाहि बाताल बाताल आता, अदिन ओरिह्‌क तेळियिह कीतोग़. 5 कीसि ओग़ इद्रम इतोग़, “नना यापा नाटे मतन अस्के, उंद दिया पार्तना कीसोर मतन. अस्के नना इद्रम देवुळ तोहतनद लेकातुन ऊळतन इतेके, बेरा गेंदेता लेह्‌का बातालो मता. बोग़ो तानाङ नालुङ कोङिन पोसि, पोग़ोटा बूमतग्डाहि दोम्ह्‌क्ने नावा मुनेह रेहतोग़. 6 अस्के तान नना बेस ऊळतन, ऊळतस्के अगा नाटेनाङ जन्वर्क, गेळाताङ जन्वर्क, बूमतगा कोरियनाङ-बेङनाङ जन्वर्क, ओसो पिटेङ इंका मताङ. 7 अस्के उंद आल्का इद्रम नाक केंज वाता इतेके, ‘अले पत्रु तेदा, इविस्किन हव्किस तिन,’ इता. 8 मति नना इतन, ‘आयो सामि, मोसानाङ अडोङ वेहतपु पोल्वविन, कळ्‍वोग़ कीयनविन, बेस्केन तिनोन,’ इतन. 9 इतस्के दुस्रा मल्का पोग़ोटाहि ओसो आल्का केंज वाता इतेके, ‘देवुळि पोलनाह कीतविन, निमा पोलोङ इनजोर इनमा,’ इता. 10 इद्रम मूंड मल्काङ आता अस्के, अद गेंदेतुन बातालो चट्‌ने पोग़ोन ओता.

11 “अस्केने मुवुर मन्कलोर माट मतद लोतगा वासि नितोर. ओरिन केसरिया सहरतग्डाहि नयगा लोहच मतोर. 12 पया देवुळता जीवा नाक इता, ‘ओर यहुदिर आयोर इन्जि, उन्क-मन्क आयवा, ओरा संगे अन,’ इनजोर इता.✡ पया नावा संगे वेर आग़वुर यापा नाटेनोर विस्वसिर वने, केसरिया सहरते वातोर. पया माट कुरनेलिना लोन अतोम. 13 अतस्के कुरनेलि इतोग़, ‘उंद देवतुलि नावा लोतगा वासि, नाक इद्रम वेहता इतेके, “यापा नाटे कबुर लोहचि, सिमोन पत्रु पेदिरतोग़ मन्कन मियगा केया. 14 ओग़ वासि मीक देवुळता पोल्‍लोतुन वेहतनोग़, अद पोल्‍लोते देवुळि नीकु, नीवा लोते मनवालोर सबेटोरिन पिसिह कीयग़ा,✡” इनजोर वेहता,’ इतोग़. 15 अद्रमे पया नना वेहता बोटटन अस्के, देवुळता पवित्र जीवा मुने मावा पोग़ोन बेद्रम रेगता, अद्रमे ओरा पोग़ोन वने रेगता.✡ 16 रेगतस्के, येसु इतद इद पोल्‍लो नाक सीता वाता, ‘देवुळता पेदिरते मीहवाल योहन लोकुरिन एते मीहन्दोग़. मति देवुळि मीकु पवित्र जीवाते मीहतग़ा,’✡ इनजोर इतोग़. 17 माट किर्स्तु येसुसामिन विस्वस कीतस्के, बेद्रम देवुळि पवित्र जीवातुन मावा पोग़ोन उदिह कीता, अद्रमे ओरा पोग़ोन वने उदिह कीता. कीताह्‌कु इंजेक नना बोनन आंदन, देवुळतुन रोमिह केवानन?✡” इनजोर इतोग़.

18 पया पत्रुना संगे गिटोगटो आसोर मतोर मन्कलोर, इद पोल्‍लोतुन केंजिसि, केमेन आतोर. आसि ओर इतोर, “पापमता अग़दाहि मल्सि, तना पिसमुळ दोर्किह कीयलाहि,✡ यहुदि आयवोरिह्‌क इंका, देवुळि अग़ ईता,” इनजोर देवुळतुन जोहर कीतोर.

अंताकिया सहरता विस्वसिरा मुलु

19 इद्रम आनेके इस्तिपनिन हव्कतापया, विस्वसिरिन तिपल कीतस्के, बिरोबटो आतोरु,✡ उय्तुर पिनिके पटटे,✡ उय्तुर कुपरुस देसेम,✡ उय्तुर सुरिया पटटा अंताकिया सहर*✡ एवनाह वितिस, बिरोबटो आतोर. ओर येसु किर्स्तुना पोल्‍लोतुन, यहुदिरिन विळ्सिस बोरिह्‌के वेहोर. 20 मति ओरा संगे उय्तुर कुपरुस देसेमतोर विस्वसिर मतोर, उय्तुर कुरेने सहरतोर✡ मतोर, ओर अंताकिया सहरते वासि, यहुदि आयवोरिह्‌क† वने येसुसामिना बेसता कबुरतुन वेहतोर.✡ 21 देवुळता लाव बेसता कबुरतुन वेहवालोरगा मता. अदिह्‌क वेल्‍लाटोर यहुदि आयवोर, येसुसामिन विस्वस कीसि, येसुना अग़दे ताकलाह आतोर.✡

22 पया इद पोल्‍लो येरुसलेमता विस्वसिरा मुडुह्‌क एर्का आता, आतस्के ओर बार्नबसिन✡ अंताकिया सहरते लोहतोर. 23-24 बार्नबस अगा एवतोग़ अस्के, देवुळि अग्डोर विस्वसिरिह्‌क बेद्रम देय्वा ईता✡ इनजोर, ओग़ ऊळिसि, पका गिर्दा आतोग़. ओग़ इतेके सेतेमतोग़ मन्कल, पका विस्वस केवाल, ओसो देवुळता जीवाते निंदिस मनवाल✡. “मीवा पूरा जीवाताहि येसुन विळ्सवालेवा निच मन्ह्‌टु” इन्जि, ओर विस्वसिरिन वेहतोग़. पया बार्नबस अगा मनदह्‌पा, वेल्‍लाटोर येसुन विस्वस कीतोर.✡ 25 पया बार्नबस सोलुन पर्ह्‌कलाहि, तरसुस सहरते अतोग़.‡ 26 अस्के ओन अगा दोर्किह कीसि, (येसुना सेवाते तना तोळ आयलाह,) ओन अंताकिया सहरते ततोग़. पया वर्सामेंड ओर इर्वुर, विस्वसिरा मुडा संगे मन्जि, वेल्‍लाटोरिन येसुना पोल्‍लोतुन काग़्हन्दुर. अस्के मुने-मुने अंताकिया सहरतगान, विस्वसिरिन किर्स्तुनोर✡ इन्जि, लोकुर पेदिर तासतोर.

27 अवे दियाने देवुळता कबुरतोर उय्तुर, येरुसलेमताहि अंताकिया सहरते वातोर. 28 ओरग्डाहि अगबुस इनवाल मन्कल मतोग़.✡(उंद दिया विस्वसिर जमा आतस्के,) ओग़ तेदिसि “रोम राजाल ताकिह कीयनव सबे देसेह्‌कनगा, पका दुकळ अरयग़ा” इनजोर, ओग़ देवुळता जीवाता बुदते वेहतलाह आतोग़. (पया अद दुकळ कलोदियुस इनवाल✡ रोम राजगादेतगा उदतस्के आता.) 29 इदिन केंजिसि, अंताकिया सहरतोर विस्वसिर, वग़ोग़-वग़ोग़ मन्कल बेचोक कोताङ ईया पग़यह्‌तोग़, अचोक अर्हचि, यहुदा पटटोर विस्वसिरिह्‌क लोहतकल इनजोर, विचर कीतोर. 30 पया अद्रमे कोताङ अर्हचि, अव कोतानु बार्नबसना, सोलुना कयदे ईसि, येरुसलेम मतोर विस्वसिराङ पेदल्कनगा लोहतोर.✡

✡11:3 11:3 योहन 4:40; 18:28; बळयिर 10:28,48; गलातितोर 2:12

✡11:12 11:12 10:28,34; 15:9

✡11:14 11:14 योहन 4:53; बळयिर 10:2; 16:15,31-34; 18:8; 1 कुरिंततोर 1:16

✡11:15 11:15 2:4; 10:44

✡11:16 11:16 मत्याल 3:11; मार्कल 1:8; लूकाल 3:16; योहन 1:33; बळयिर 1:4-5

✡11:17 11:17 5:39

✡11:18 11:18 2 कुरिंततोर 7:10

✡11:19 11:19 8:1,4

✡11:19 11:19 15:3; 21:2

✡11:19 11:19 4:36-37; 13:4; 21:3; 27:4

*11:19 11:19 अंताकिया सहर अंताकिया इद सहर सुरिया पटटा मोदुल सहर मता. पूरा रोम राजेमते, रोम ओसो सिकंदरिया इव सहर्किन विळ्सिसि, अंताकिया सबेट्क बेरा सहर आंदु.

✡11:19 11:19 6:5; 11:20-27; 13:1; 14:26; 15:22-23,30,35; 18:22; गलातितोर 2:11

✡11:20 11:20 मत्याल 27:32; बळयिर 13:1

†11:20 11:20 यहुदि आयवोरिह्‌क मोदुल कागिदते “युनानिरिह्‌कु”.

✡11:20 11:20 5:42; 8:35; 9:22; 17:3; 18:5,28

✡11:21 11:21 2:47; 4:4; 5:14; 6:1,7; 9:31,42; 11:24; 14:1,21; 16:5; 17:12

✡11:22 11:22 4:36-37

✡11:23-24 11:23-24 14:26; 15:40

✡11:23-24 11:23-24 लूकाल 1:15,67; 4:1; बळयिर 4:8; 6:5; 7:55; 13:9

✡11:23-24 11:23-24 2:41,47; 4:4; 5:14; 6:1,7; 9:31,42; 11:21; 14:1,21; 16:5; 17:12

‡11:25 11:25 सोलु तरसुस सहरतोग़ आंदोग़; 9:30 ऊळाट.

✡11:26 11:26 26:28; 1 पत्रु 4:16

✡11:28 11:28 21:10

✡11:28 11:28 18:2

✡11:30 11:30 12:25; गलातितोर 2:1