14
पोलु, बार्नबस, वेरा इकुनियुमते कीतद सेवा
1 इकुनियुम सहरतगा
✡ इद्रम आता इतेके, पोलु, बार्नबस, मुनेता लेह्का यहुदिरा पार्तनाता लोन अतोर.
✡ अगा वेल्लाटोरा जीवातगा गडनाह, येसुना बेसता कबुरतुन वेहतोर. अदिह्क यहुदिर ओसो दुस्राङ जातिनोर वेल्लाटोरे लोकुर, येसुन विस्वस कीतोर.
✡ 2 मति येसुन विस्वस केवोर यहुदिर
✡ बाताल कीतोर इतेके, विस्वसिरिन जग्ळम कीयलाहि, यहुदि आयवोरगा अन्जि, ओरिन ओङ तग़्हचीतोर.
3 अस्के पोलु, बार्नबस, वेर इर्वुर बळयिर
✡ वेल्लाङे दियाङ अगान मतोर. येसुसामिना पोग़ोन विस्वस कीसि रेयवालेवा,
✡ ओना दयाता पोल्लोतुन पोकुर कीसोर मतोर.
✡ पोकुर कीनेके, येसु ओरा कयदे तना लावताङ वेल्लाङे बामिह कीयनाङ सीनाङ तोहचि, ओर वेहतनाङ पोल्लोङ सेतेमे इनजोर तोहतोग़.
4 मति सहरतोर लोकुर रेंड तुंगाङ आसि, उय्तुर बार बळयिरक्के आतोर, उय्तुर बार यहुदिरक्के आतोर.
5 पया यहुदि आयवोर ओसो उय्तुर यहुदिर, तमा मुक्यालोरा संगे कलियिसि, पोलुना, बार्नबसिना कदर रेहचि, बंडाङ उकिस हव्कलाह तयर आतोर.
✡ 6-7 इद पोल्लो पोलुह्क, बार्नबसिह्कु, एर्का आता. अदिनेनाह्क ओर इकुनियुमताहि पेसिस, गलाति पटटा लुकावनिया जिलाते
✡ विततोर. अद जिलाता लुस्त्रा सहरते,
✡ दिरबे सहरते,
✡ ओसो एरे-गूरेताङ नाह्कनगा अन्जि, बेसता कबुरतुन पोकुर कींदुर.
पोलु, बार्नबस, वेरु लुस्त्रा सहरतगा कीतद सेवा
8 अद्रमे लुस्त्रा सहरतगा
✡ ओर्वोग़ काल्क वावोग़ पुटकूटाल मतोग़, ओग़ पुटटग्डाहि बेस्केन ताकवाय मतोग़.
9 उंद दिया पोलु वेहतनाङ पोल्लोङ, ओग़ कूटाल उदिसि बेस केंजलाह आस मतोग़. अस्के पोलु ओन कोंडा मिळ्हवा ऊळतोग़, ऊळिसि वेग़ कूटाल सव्रेम आयलाह, येसुन विस्वस कीस्तोग़
✡ इन्जि पुतोग़.
10 अदिनेनाह्क जोरते इतोग़, “अले कूटा, तेदिस दिग निल्म!” इतोग़. इतस्के ओग़ कूटाल डेह्किस ताक बोटटोग़.
✡ 11 लोकुर पोलु कीतदिन ऊळिसि, तमा लुकावनिया पोल्लोते
✡, “पेन्के मन्कल मारियिस, मावा नडुम वाताङ रा!”
✡ इनजोर जोरते केयतोर.
12 पया बार्नबसिन तमा मोदुल पेन जेयुस आंदोग़ इनजोर इंदुर, पोलु पका वळ्ह्किंदोग़, अदिह्क ओन तमाङ पेन्कना कबुर वेहवाल इरमेस आंदोग़ इनजोर इंदुर.
13 जेयुस पेनता मंदिर सहरता पलते मता. अद मंदिरतगा मोळ्कवाल बूमयाल बाताल कीतोग़ इतेके, सहरतगा नेङनद अग़दगा, कोंदाङ ओसो नूदे काचताङ पुंगेह्किन तचि, सहरता लोकुरा संगे कलियिसि, बळयिरिह्क मोक ईयलाह तयर कीसोर मतोर.
✡ 14 ओर इद्रम कीस्तोर इनजोर बार्नबस, पोलु केंजतोर, केंजतस्के पकाय नारज आसि, तमाङ जगान अग़्हचि,
✡ लोकुरा नडुम वितिसि इद्रम इतोर,
15 “ए लुस्त्रा सहरतोरिर, मीट इद्रम बह कीय्ह्निर? अद्रम केमाटु! माटु बेवे पेन्कनोम आयोम, माट वने मीवाय लेह्कान मन्कलोरोमे.
✡ मीट इव अङ्ळमताङ पोल्लोन
✡ विळ्सिसि, जीवात मनदनद देवुळतके मलयना इन्जि,
✡ मीक बेसता कबुर वेहतह्नोम. अदे देवुळि
पोग़ोटा बूमतुन, इळ्ता बूमतुन, सम्दुरतुन, ओसो अविस्कनगा मनदनव सबेटविन पुटिह कीता.✡ 16 देवुळि मुने, मीट यहुदि आयवोर दुस्राङ जातिनोरिह्क, विचर वातविन मोळ्कलाह ईस मता.
✡ 17 ईसाय मति, नना सेतेम देवुळतन आंदन इनजोर, देवुळि अमेसा तनाङ बेसताङ कबस्कने, लोकुरिह्क तोहचीता.
✡ मीकु पोग़ोटाहि पेग़ु अर्हचीता, अद्रमे बराबर कगोते अनम पुटिह कीसि, तिनदलाह गाटो ईसि, मीकु गिर्दाते तासता,
✡” इनजोर वेहतोर.
18 अचोन वेहतोर तेला मति, लोकुर ओरेनाह्क मोकिङ ईयलाह वातोरे. मति पोलु, बार्नबस, पकाय मुस्किलते ओरिन रोमिह कीतोर.
19 (उचुक दियाना पया) पिसिदियाता अंताकिया सहरताहि
✡ उय्तुर यहुदिर, इकुनियुम सहरताहि
✡ उय्तुर यहुदिर, लुस्त्रा सहरते वातोर. वासि लुस्त्रातोर मन्कलोरगा कलियिसि, ओरिन तमा बाजेतेके कीतोर.
✡ कीसि पोलुना विरुद आसि, ओन बंडाङ उकतोर.
✡ उकतस्के वेग़ इंजेके डोलतोग़ इन्जि, ओन सहरता पलते ईळ्सिस ओतोर.
✡ 20 पया लुस्त्रातोर पूनोर विस्वसिर, ओनगा वासि सर्ने नितोर. अस्के पोलु तेदिसि, ओरा संगे सहरतगा अतोग़. पया इमा दिया बार्नबस बार, दिरबे सहरते
✡ अतोर.
पोलु, बार्नबस, सुरिया पटटा अंताकिया सहरते मलयह्तोर
21 पया पोलु, बार्नबस, वेर दिरबे सहरतोर लोकुरिह्क, येसुना बेसता कबुरतुन वेहतोर. वेरा पोल्लोतुन केंजिस, वेल्लाटोर येसुन विस्वस कीतोर. ताना पया वेर दिरबे सहरताहि लुस्त्रा सहरते
✡ मलतोर, अग्डाहि पया इकुनियुम सहरते
✡ वातोर, इकुनियुमताहि पिसिदिया एरियाता अंताकिया सहरते
✡ अतोर.
22 (ओर बेद-बेद सहरते मलतोर,) अग्डोर विस्वसिरिन “बेचोन तिपल वातेक तेला, येसुन विळ्सवा विस्वसते मन्ह्टु. देवुळदीपता राजेमते दायनामुने, माकु ऊक-ऊके विरुदतुन आप पोयग़ाये”
✡ इनजोर, पका विस्वस कीयलाह वेहचि, ओरिह्क दीरा ईतोर.
23 ओसो अव मूंड सहर्कनगा, अग्डा विस्वसिरा मुडुन ताकिह कीयलाहि, मुक्यालोरिन निल्पिह कीतोर.
✡ उपस-पार्तना कीसि,
✡ विस्वसिर बोन नमिस मतोर, ओग़े येसुसामिना कयदे, सबेटोर विस्वसिरिन विळ्सिस ईतोर.
✡ 24 पया पिसिदिया एरियाताहि पंपूलिया पटटे अतोर.
✡ 25 अन्जि अग्डा पिरगा सहरतगा
✡ येसुना पोल्लोतुन वेहचि, सम्दुरकचुल मतद अतलिया सहरते अतोर.
26 अग्डाहि ओडातगा उदिसि, सुरिया पटटा अंताकिया सहरते
✡ मल्स वातोर. अद सहरता विस्वसि लोकुर, पोलुन, बार्नबसिन, देवुळता कबुरतुन पोकुर कीयलाह, देवुळता देय्वा ओरगा मनि इनजोर, पार्तना कीसि लोहच मतोर.
✡ अदे कबळतुन मारिह कीस, ओर इर्वुर मल्स वास मतोर.
27 वातस्के विस्वसिरा मुडुन जमा कीतोर. जमा कीसि, देवुळि ओरा कयदे कीतव बेराङ-बेराङ कबस्किन वेहतोर. ओसो यहुदि आयवोरेनाह्क वने, येसुन विस्वस कीयलाहि, देवुळि बेद्रम अग़दुन तेग़यिस ईता,
✡ इन्जि वने वेहतोर.
✡ 28 अद्रमे पया पोलु, बार्नबस, विस्वसिरा संगे वेल्लाङे दियाङ अगान मतोर.