12
देवुळि तनाङ पिलाङ-पेकोरिन सुद्रे कीस्ता
1 अदिनेनाह्क माट बह कीयना इनजोर तेळियिह कीसीकन: विस्वसिरा इचोटा बेरा मुडा साक्सि मावा सर्ने निच मतप लेह्कान माक दीरा ईसोरेन मन्ह्ता. देवुळि मयेनाह्क बेद अग़ तयर कीता अद अग़दे वितिङ. बेस वितना इनजि रोमिह कीयनव पुहतव गेंदेना लेह्काडाङ सबे पोल्लोन तेंडकल, माक ऊर्सतद पापमतुन लेहतकल. ओसो आरेम आयवा मावा मुनेह मनदनद अग़ पोसि सीदा वितकल. 2 वितिह्पा येसुनगाने कोंडा वाटिङ. मावा विस्वसतुन पुटिह केवाल ओग़े; मावा विस्वसतुन तपवाह कीसेवाल ओग़े. इद बूमते मनदह्पा देवुळि ओनेनाह्क तासिस मतद गिर्दातुने सीता कीतोग़; अदिनेनाह्क हव्कनागुटाता सिक्साता लजाता सीता केवा, ओग़ तान आपतोग़. इंजेके देवुळता तिनळ बाजे राजेम ताकिह कीयलाहि उदतोग़.✡12:2 देवुळताङ पाटाङ 110:1
3 ओग़ बूमते मनदह्पा पापि मन्कलोर ओन पकाय विरुद कीस मतोर, अस्के वने केमेन आपतोग़. मीट वने विस्वसता लोप्पा बागिसि आरेम आयमाट, येसुन सीता कीम्ह्टु. 4 पापि मन्कलोर मीक तिपल कीयनस्के,*12:4 पापि मन्कलोर मीक तिपल कीयनस्के, “पापमता विरुद मीट लळेम आयनस्के” इद वने आया पग़यह्ता. येसुह्क आतप लेह्का, मीक इंका मीवा जीवा ईयनाह पप्ळेम आया पोयो. 5-6 तनाङ पिलाङ-पेकोर इनजोर मीवा जीवातुन दीरा ईयलाहि देवुळि मीवा बाबाल इनजि तना सास्त्रमतगा इतद पोल्लोतुन माग़्ङतिरा? अद इद्रम मन्ह्ता:
“नावा मग़निन! सामि तना बोरिन-बोरिन जीवा कीस्ता ओरिन सुद्रे कीस्ताये.
बोरिन-बोरिन तनाङ पिलाङ-पेकोर इनजोर मानेम आस्ता ओर सबेटोरिन सिक्सा ईस्ताये.
अदिनेनाह्क अद नीक सुद्रे कीयह्पा पास्कमा;
अद नीक तेर्हतह्पा निमा आरेम आयमा,”✡12:5-6 अय्यूब 5:17; बुदताङ पोल्लोङ 3:11-12
इनजोर रासतद मन्ह्ता.
7 देवुळि मीक तनाङ पिलाङ-पेकोर इनजोर सुद्रे कीस्ता. अदिनेनाह्क तिपल वायह्पा, देवुळि मीक सुद्रे कीस्ता इनजोर पुनजि आपसोर मन्ह्टु. तना पेकान सुद्रे केवोग़ तपे बोग़ मन्ह्तोग़ा? 8 देवुळि तनाङ सबेटोर पिलाङ-पेकोरिन सुद्रे कीस्ताये. मीक सुद्रे केवेक, मीट पया तानाङ निटमताङ पिलाङ-पेकोरिर आयविर. पोर्ह्का†12:8 सिड्रि-साट्याल आसि पुटिह कीतोरिन पोर्ह्का पिलाङ-पेकोर इन्ह्तोर. पिलाङ-पेकोरा लेह्काडोरिर. 9 मावा लोतगा मावाङ तपेर माक सुद्रे कीतोरे. अस्के माट ओरिन मान ईन्दल. ओरिने अचोन मान ईन्दल इतेके, मावा पोग़ोटोग़ देवुळबाबाल माक सुद्रे कीयह्पा, ओनग्डा पिसमुळ दोर्किह कीयलाहि, ओना पोल्लोते ओसोय वग़्ङिस मनदना गावले. 10 मावाङ तपेर तम्क बेद्रम तेळियिस मता, अद्रम माक गळ्कनेनाह्क सुद्रे कीतोर, मति देवुळबाबाल माट वने तना लेह्कान पवित्र आयना इनजि, मावा पाय्दातेनाह्क सुद्रे कीस्तोग़. 11 देवुळि माक सुद्रे कीयह्पा, माक इंजेके गिर्दा वास्ताया? आयो. माट दुकम आय्ह्नल; मति तान मर्सतोरिह्क, पेग़्के पाय्दा दोर्किह्ता. आल्सुळलेवा पिसनाह आस्ता; सेतेमते पिसनाह आस्ता.
12 देवुळता अग़दे वितनेके मीट कमजोर आतव दंडा कय्कना लेह्कान, कमजोर आतव मिंडाना लेह्कान आतोरिर! मीट दीरा पोसि जिदते विताटु.✡12:12 यशायाह 35:3 13 इके-अके आयवा विस्वसता सीदा दायनद अग़दे ताकसोर मन्ह्टु.✡12:13 बुदताङ पोल्लोङ 4:26 अस्के मियगा विस्वसते कूटटप मनवालोर, लेसिस अनवा तमा विस्वसते मेग़्किस मनदनुर.
देवुळतुन पास्कनद आयो
14 दुस्रोर मन्कलोरा संगे कलियिस मनदलाह ऊळाट. देवुळतेनाह्क पवित्रते पिसलाह ऊळाट. अद्रम पिसवोग़ बोग़े देवुळता एरे दाया पग़वोग़. 15 मियगा बोग़े देवुळि दया कीयनद अग़दाहि लेसमाकेग़. अद्रमतोग़ लेसतोग़ मन्कना विस्वस केवद वीसम वेल्लाटोरिन तिपल कीसि कळ्वोग़ कीस्ता.✡12:15 व्यवस्थाविवरण 29:18 16 इसकना मग़ि एसाना लेह्कान बोग़े साट्याल कबळ केमाकेग़, अहे देवुळतुन मुर्तिय सीता केवप मनमाकेग़. ओग़ तनगा मनदनद माळा मग़ना अदिकरतुन सीता केवा, उंद पूटाता गाटोतेनाह्क अद अदिकरतुन तनतमिह्क वमिसीतोग़.✡12:16 पुटमुळि 25:27-34 17 ताना पेग़्के बह आता, अदिन मीट इतेक पुतिरे: तना तपे तन्क बर्कत ईयेग़ इनजोर ओनगा अतोग़; मति तना तपे वीस्रा पेकाह्क बर्कत ईस मताह्कु, माळा पेकाह्क ईया पग़वोग़. एसाल पकाय अळ्स ऊळतोग़, मति तना चुकतदिन मिळ्हतलाहि ओन्क अग़ दोर्को.✡12:17 पुटमुळि 27:36-38
18-21 इस्रयेल मन्कलोरिह्क देवुळताङ अडोङ दोर्कतस्के ओर सीनय मेटातगा जमा आस मतोर; अदु इद बूमते मनदनद कय बोयनद मेटा आंदु. मेटातगा ओरिह्क पका मळ्गनद किसु, ईकळ-गंगा, दूंद-मुर्गम दिसता. पका जोरते अकुम ऊरनद, देवुळता बेरा लेङ ओरिह्क केंज वाता. अद लेङतुन केंजिसि, ओर पका रेयते देवुळ इद्रम माक वळ्ह्कमाकि इनजि मोसान कालगडेम अरतोर. “मन्कल आयेग़, जन्वर आयि, अद मेटातुन इटटेके बंडाङ उकिस हव्कनद सिक्सा ईयनदे,”✡12:18-21 निर्गमन 19:12-13 इनजोर देवुळि उकुम ईस मता. पकाय रेयिस मताह्कु, अद उकुमतुन केंजलाह पग़वोर आस मतोर. सीनय मेटातगा आतद सबे, निटम अचोन रेयनद मता इतेके मोसाल वने, “नना रेयतुह्क साङलाह आतन,”✡12:21 व्यवस्थाविवरण 9:19 इनजोर इतोग़. मति मीट इतेके इद बूमते मनदनद मेटातगा वाविर.
22 मति मीट सियोन मेटातगा, इतेके देवुळदीपता येरुसलेमतगा वातिर. अद जीवात मनदनद देवुळता सहर आंदु, अगा लेक पग़वप मनदनव देवतुल्क गिर्दाते जमा आताङ. 23 अग्डा सेतेमतोर मन्कलोराङ जीवाना मुडगा मीट कलियतिर. अद मुडगा देवुळि सबेटोरिह्क माळा मग़ना अदिकर ईता, सबेटोराङ पेदिर्क देवुळता पुस्तकतगा रासतव मन्ह्ताङ, सबेटोर किर्स्तुना मोकतेनाह्कु मुर्तिय पापमलेवोर आसि मन्ह्तोर✡12:23 10:14. मीट सबेटोरा, सबेटविना नेयम कीयनद देवुळतगाने वातिर. 24 ओसो देवुळता पूना करलते माक कलियिह केवाल येसुनगा वातिर. आदमना मग़ि हाबेल मायतोना नेतुर इतेके, तमदादान बद्ला एतलाह देवुळतुन केयना लेह्कान आस मता;✡12:24 पुटमुळि 4:10 मति पूना करलते मीवा पोग़ोन इल्ह्कतप मतदु येसुना नेतुर बारा ओसोय बेसतलि; अद मीवा पापमतुन मापि कीम इनजोर केयना लेह्कान आता.
25 अदिनेनाह्क उसरते मन्ह्टु! देवुळ वेहतनदिन पास्कमाट. इद बूमते मतोग़ तना कबुरतोग़ मोसाना कयदे देवुळि कबुर वेहतस्के केंजोम इनजोर इस्रयेल मन्कलोर कैंगम आतोर. ओर अद्रम कीताह्कु, सिक्साताहि पिस पग़वोर. इतेके अद इंजेके देवुळदीपते मनवाल ताना मग़ना मेटे माक वेहतह्पा, केंजोम इनजोर कैंगम आतेके, माट सिक्साताहि बह पिस पग़यकल? मुर्तिय पग़वल! 26 अद सीनय मेटाताहि वळ्ह्किह्पा, ताना लेङते बूम गल्जता;✡12:26 निर्गमन 19:18 मति इंजेके, अद इद्रम पोल्लो विळ्सता: “ओसो उंद मल्का नना गल्जिह कीकन, इद मल्का सिरप इळ्ता बूमतुने आयो, मति पोग़ोटा बूमते मनदनव सबेटविन वने गल्जिह कीकन,”✡12:26 हाग्गै 2:6 इनजोर वेहता. 27 “ओसो उंद मल्का” इनजोर इता. इद पोल्लोताहि, देवुळि तना पुटिह कीतव सबेटविन गल्जिह कीसि तेंडग़ा; मति ताना पोग़ोटा राजेम गल्जो; अद मेलियवा मनदग़ा, इनजोर बेस-नेह्ना पुनाह आस्ता.
28 माट इद गल्जवद राजेमतोर मन्कलोरल आतल. अदिनेनाह्क देवुळतुन जोहर कीसि तान रेयसोर, मान ईसोर, तान्क विचर वातप लेह्का मोळ्ककल. 29 बह इतेके मावा देवुळि दुमोग़-दुमोग़ कर्विह कीयनद किसलेह्काडा आंदु.✡12:29 व्यवस्थाविवरण 4:24; 9:3
✡12:2 12:2 देवुळताङ पाटाङ 110:1
*12:4 12:4 पापि मन्कलोर मीक तिपल कीयनस्के, “पापमता विरुद मीट लळेम आयनस्के” इद वने आया पग़यह्ता.
✡12:5-6 12:5-6 अय्यूब 5:17; बुदताङ पोल्लोङ 3:11-12
†12:8 12:8 सिड्रि-साट्याल आसि पुटिह कीतोरिन पोर्ह्का पिलाङ-पेकोर इन्ह्तोर.
✡12:12 12:12 यशायाह 35:3
✡12:13 12:13 बुदताङ पोल्लोङ 4:26
✡12:15 12:15 व्यवस्थाविवरण 29:18
✡12:16 12:16 पुटमुळि 25:27-34
✡12:17 12:17 पुटमुळि 27:36-38
✡12:18-21 12:18-21 निर्गमन 19:12-13
✡12:18-21 12:21 व्यवस्थाविवरण 9:19
✡12:23 12:23 10:14
✡12:24 12:24 पुटमुळि 4:10
✡12:26 12:26 निर्गमन 19:18
✡12:26 12:26 हाग्गै 2:6
✡12:29 12:29 व्यवस्थाविवरण 4:24; 9:3