योहन रासतदु बेसता कबुरि
1
देवुळता पोल्लो मन्कना रूपते वास्ता
1 जीवाते मनदनद देवुळता पोल्लो बोग़ आंदोग़, ओग़ सुरुमुनेताह मंदोग़, ओग़ देवुळता ऐंगे मंदोग़, ओग़ देवुळिये आंदोग़. 2 ओग़ सुरुमुनेताह देवुळता ऐंगे मतोग़. 3 दुनियाते मंदनव कतमतविन देवुळि ओनाये संगे पुटिह कीता. ओना मेटे पुटो इनाह बेदे इले. 4 ओनग्डाहे माकु देवुळ ईयनद जीवा दोर्किह्ता. बेद्रम ईकळते मनदनदिन वेह्च आसि पुनाह कीस्ता, अद्रमे ओग़ माकु देवुळता सेतेमतुन पुनाह कीतोग़. 5 अदे वेह्चि ईकळते मांजिह्ता. बेद्रम ईकळि वेह्चतुन पिहता पग़वो, अद्रमे ईकळलेह्काडोर लाग्वोरु ओन वेह्चलेह्काडोनु आरे कीया पग़वोर.
6 योहन इनवाल ओर्वोग़ मतोग़, वेन देवुळ लोहता. 7 सबेटोर वेना कबुरतुन विस्वस कीयना इनजि वेग़ु अद वेह्चलेह्का मनवानु पिंगम-पंगम वेहतलाहि वातोग़. 8 योहन इतेके वेह्चलेह्का मनवाल आयोग़, मति अदे वेह्चता लोप्पा वेहतलाह वास मतोग़. 9 बोन सेतेमता वेह्च इन्ह्तोर, ओग़े सबेटोरिह्क वेह्च एवल, ओग़ इद दुनियाते वेह्च तववाल आंदोग़. 10 ओग़ इद दुनियातेन वातोग़, ओनाय संगे देवुळि दुनियातुन पुटिह कीता, मति ओग़ बोग़ आंदोग़ इनजि दुनियातोर पुनोर. 11 ओग़ु तनाय पुटिह कीता बूमतगा वातोग़, मति तनाय लोकुर (यहुदि लोकुर) वेल्लाटोर ओनाङ केंजोर. 12 मति बोर ओन नमतोर, विस्वस कीतोर, ओर सबेटोरिह्क देवुळताङ मग़्क-मयस्क आयलाह ओग़ अदिकर ईतोग़. 13 देवुळताङ मग़्क-मयस्क आयना इतेके मन्कना पोटाते, मन्कना विचर मतप पुटनालेह्का आयो, मति विस्वस केवालोरिह्कु पूना पुटमुळि देवुळिये ईस्ता.
14 जीवाते मनदनद देवुळता पोल्लो मावा लेह्का कय-कादोग़ आसि, मन्कना रूपते मावा बूमतगा वातोग़. ओग़ु देवुळता पूरा देय्वातुनु, पूरा सेतेमतुनु पोसि मावा नडुम जागा आतोग़. ओग़ देवुळबाबाना वग़ोग़ मग़ मनजि, माट ओना डीसातुन ऊळतोम. ओग़े येसु किर्स्तु आंदोग़.
15 योहन ओना लोप्पा इद्रमता कबुर वेहन्दोग़, “नावा पया बोग़ वास्तोग़, ओग़ु नाकाय बेरोग़ बाराह्क इतेके ओग़ नाकाय वेल्ला सुरुमुनेताहि मतोग़,” इनजोर लोकुरिन केयसोर वेहन्दोग़. 16 ओग़ देवुळता पूरा देय्वातुन तताह्कु, ओनग्डाहि माकु देय्वा दोर्कसोरेन मन्ह्ता. 17 मोसाल इनवाल देवुळता कबुरतोना संगे वेट देवुळताङ अडोङ माकु वाताङ, देवुळ लोहतोग़ राजाल येसुना संगे देवुळता सेतेमि, ओसो दया मयगा एवता. 18 देवुळतुन बोग़े बेस्केन ऊळोग़. मति देवुळबाबाना संगे गट्ने मनवाल तना वग़ोग़ मग़ि, ओग़े माक बाबानु पुन्पिह कीतोग़.
देवुळता पेदिरते एते मीहवाल योहनिना गोटि
(मत्याल 3:1-12; मार्कल 1:1-8; लूकाल 3:1-9,15-17)
19 अस्के पया यहुदा पटटोराङ पेदल्क येरुसलेम सहरताहि देवुळता मंदिरतगा माळवालोर बूमयालोर, देवुळवडेरिन,* 1:19 मोदुल पोल्लोते लेवितोर इनजोर इन्ह्तोर. मुनेतोग़ पेदामुय्तोग़ इस्रयेलिह्कु बारा मांदि मग़्क पुटटोर, ओरग्डाहि वग़ोग़ लेवि इनवाल मतोग़. ओनाय कूळतोर मंदिरतगा देवुळवडेर आंदुर. योहनिन ऊळिस वायलाह लोहतोर. वेर योहनिनगा वासि “देवुळ किरिया कीस लोहवाल पिसिह केवाल राजाल वावाल मतोग़, ओग़ बह निमानेया?” इनजोर योहनिन ताल्ह्कतोर. 20 “आयो, नना देवुळ लोहवाल पिसिह केवानन आयोन,” इनजोर योहन कबुल आतोग़.† 1:20 देवुळ लोहवाल पिसिह केवाल राजाल वेन इब्रि पोल्लोते मसिहा इन्ह्तोर, युनानि पोल्लोते किर्स्त इन्ह्तोर. 21 अस्के वेर ओन ताल्ह्कतोर, “निमा बोनिन पया, पिसिह केवाल वायनामुने देवुळता कबुरतोग़एलियाल वायना मता, निमा ओनिना?” “आयो, नना एलियानन आयोन.” “पया मोसानलेह्का देवुळता कबुरतोग़ वायना मता, बह ओनिना?” “आयो, नना ओनन आयोन!” इनजोर योहन इतोग़. 22 अस्के ओसो वेर ओन ताल्ह्कतोर, “निम पया बाराह्क वातिन? माक वेहा! माक लोहतोरिन माट अनजि बाताल वेहतकोम? निमा नीवा सेवाता लोप्पा बाताल इह्निन?” 23 योहन इतोग़,
“यसयाल इनवाल देवुळता कबुरतोग़ मुने वेहतपु, नना पेळ्कल बूमते केयवाना आल्कालेह्काडोनन,
‘देवुळ मीवा जीवातगा वायना इनजि ताना अग़दुन तीर्ह्काटु,’ ”✡ 1:23 यशायाह 40:3
इनजोर इतोग़. 24-25 पया परुसिर इनवालोर लोकुर‡ 1:24-25 यहुदिराङ पेदल्कना उंद तुंगातुन परुसिर इनजोर इंदुर. लोकुरगा ओराय पोल्लो पका ताकिंदु, ओसो ओर वेल्लाङे अङ्ळमताङ अडोङ-उतुर्क पुटिह कींदुर. योहनिन कबुर लोहच ताल्ह्कतोर, “निमा देवुळ लोहवाल पिसिह केवानिन वने आयविन, कबुरतोग़ एलियानिन वने आयविन, मोसानलेह्का देवुळता कबुरतोग़ वायना मता ओनिन वने निमा आयविन, इतेके लोकुरिन देवुळता पेदिरते एग़ मीहतलाह नियगा बेद्रमता अदिकर मन्ह्ता?” 26 योहन ओरिन इतोग़, “नना लोकुरिन पापमताहि मिळ्न्दनद सीना इनजोरे देवुळता पेदिरते एग़ मिहतह्नन, मति मीट ओन पुनविर अद्रमतोग़ ओर्वोग़ मीवा नडुम निच मन्ह्तोग़. 27 ओग़ु नावा पया देवुळता पोल्लो वेहतलाह वायना मन्ह्ता, ओना कादुन इटलाह वने नना ओप्पोन, अचोन नना उड्लोनन!” 28 योर्दन बेरेटा अबरि, इतेके पोळ्द पेसना बाजे, बेतनि इनदनद नाटे योहन देवुळता पेदिरते एग़ मिहन्दोग़, अगा इव गोटिङ आताङ.
देवुळता गोरेपिला येसुये
29 इमा दियाते, योहन तनके येसु वायनदिन ऊळिसि लोकुरिन इतोग़, “वेग़ ऊळाटु, मोक आयवाल देवुळता गोरेपिलालेह्काडोग़, दुनियातोरा पापमता सिक्सातुन तेहच ओयवाल! 30 वेनाय लोप्पा मीकु वेहच मतन, ‘नावा पया ओर्वोग़ वास्तोग़, ओग़ु नाकाय बेह्रोग़ बाराह्क इतेके ओग़ नाकाय वेल्ला सुरुमुनेताह मतोग़.’ 31 ओग़ देवुळ लोहवाल पिसिह केवाल इनजि नना पुनोन आसि, मति मीक इस्रयेलतोरिह्कु वेन पुन्पिह कीयना इनजि नना देवुळता पेदिरते एतगा मीहतलाह वातन,” इनजि योहन इतोग़. 32-33 ओसो योहन येसुना लोप्पा इद्रमता साक्सि ईतोग़, “ओग़ देवुळ लोहवाल पिसिह केवाल इनजि नना पुनोन आसि, मति नाकु एते मीहतलाह लोहतनद देवुळि, अदे नाकु वेहच मता, ‘बोना पोग़ोन पवित्र जीवा वासि दळ्म अरतदिन ऊळकिन, ओग़े लोकुरिन पवित्र जीवाते मीहवाल आंदोग़.’ निटमे नना पवित्र जीवातुन परेवाता लेह्का देवुळदीपताहि दळ्म रेगिसि वेना पोग़ोन उदतदिन ऊळतन. 34 इह आतदिन नना कोंडामेंड ऊळतन, ऊळिसि वेग़ देवुळताय पेकाल आंदोग़ इनजि मीक साक्सि ईय्ह्नन,” इनजि योहन वेहतोग़.
मुने येसुनाङ कग़यवालोरु
35 इमा दियाते योहन तनाङ कग़यवालोरग्डाहि इर्वुरा संगे अदे जागाते वासि निच मतोर. 36 अस्के ओग़ येसुनु तना एरेटाहि दायह्पा ऊळिस इतोग़, “वेग़ ऊळाटु, मोक आयवल देवुळता गोरेपिलालेह्काडोग़!” इतोग़. 37 योहन इद्रम इताह्कु, वेर इर्वुर कग़यवालोर केंजिसि येसुना पयाह अतोर. 38 येसु पेग़्के मिळ्न्दिस ऊळतोग़ अस्के ओर इर्वुर ओना पयाह-पयाह वासोर मतोर. “मीकु बाताल गावले?” इनजि येसु ओरिन ताल्ह्कतोग़. “गूरु, नीवा मनदनद जागा बेगाडु?” इनजि ओर इतोर. 39 अस्के येसु ओरिन इतोग़, “नावा संग दट.” वेर पया वासि ओना मनदनद जागातुन ऊळतोर. नुल्पेडा वेलाते नालुङ एगिस मताह्कु वेर अगाने येसुना संगे निद्रा कीतोर.
40 योहननाङ केंजिस येसुना पयाह वावालोर ओर इर्वुरग्डाहि ओर्वोग़ आंद्रेयाल इनवाल मतोग़, ओग़े सिमोन पत्रु इनवाना तमोग़ आंदोग़. 41 अग्डाहि ओग़ मुने तमदादान सिमोनिन वास कलियतोग़, कलियिस इतोग़, “माक देवुळ लोहतोग़ पिसिह केवाल दोर्कतोग़, रा!” 42 पया आंद्रेयाल तनतमिन येसुनगा पोस वातोग़. येसु ओन ऊळिस इतोग़, “निमा योनाना मग़ि सिमोननिन, मति इंजेटाहि नीकु पत्रु (इतेके ‘आद बंडा’) इद पेदिर उदग़ा,” इन्ज वेहतोग़.
43 इमा दियाते येसु गालिल पटटे दायलाह तयर आतोग़. आतस्के पिलिप इनवान कलियिसि ओन इतोग़, “नावा संग वाय, नावाङ कग़या.” 44 वेग़ पिलिप इतेके गालिल पटटा बेत्सेदा नाटेनोग़, इतेके आंद्रेयाल, पत्रु, वेर तमोग़ इर्वुरा नाटेनोग़ मतोग़. 45 पिलिप पया अनजि नतन्यल इनवान कलियतोग़, कलियिस ओन इतोग़, “बोना लोप्पा मोसा मुय्तोग़ ओसो देवुळता कबुरतोर मुने सास्त्रमते रासिस मतोर, ओग़ माक दोर्कतोग़, रा! ओग़ नासरेत नाटेनोग़ योसेपिना मग़ि येसु आंदोग़,” इनजि पिलिप नतन्यान वेहतोग़. 46 “बह नासरेत नाटेनग्डाहि बेसताङ गोटिङ पुट पग़यनुङा?” इनजोर नतन्यल पिलिपिन इतोग़. “वास बह ऊळा, रा!” इनजि पिलिप इतोग़. 47 नतन्यल पया येसुनगा वातोग़, ओग़ वातदिन ऊळिसि येसु इतोग़, “वेग़ करल इस्रयेलतोग़, वेना पोटालोप्पा नाळेह कीयनद बुद इले.” 48 “नना बेद्रमतोनन मंदकन, तेन निमा बह पुह्निन?” इनजि नतन्यल येसुन इतोग़. “पिलिप नीक केयनामुनेन, निमा अंजिर मरा इळ्न मतिन अस्के नना देवुळता बुदते नीक ऊळतन,” इनजि येसु ओन इतोग़. 49 इद केंजिसि नतन्यल येसुन इतोग़, “ए गूरु, निमा देवुळता मग़निन, इस्रयेलतुन पिसिह केवानिन राजानिन आंदिन!” 50 “बोग़े ऊळवाय मतोग़ अस्के नीकु नना अंजिर मराता इळ्न ऊळतन, इद्रम इताह्कु नाक निमा विस्वस कीय्ह्निना? निमा तेन्काय ओसो बेह्रा डीसाताङ पोल्लोङ ऊळकिन. 51 इह केंजाट, नना वेहतह्नन, मीटु पोग़ोटा बूमि पङने आसि, अगाह्कु देवतुल्कु माने-मन्कना नडुम पुटटोना पोग़ोन तग़्ङनदिन-रेगनदिन ऊळकिर,” इनजोर येसु तनाय लोप्पा वेहचि, मुनेतोग़ पेदामुय्तोग़ याकुब कळ्स्कता कलाता सीता कीतोग़.
*1:19 1:19 मोदुल पोल्लोते लेवितोर इनजोर इन्ह्तोर. मुनेतोग़ पेदामुय्तोग़ इस्रयेलिह्कु बारा मांदि मग़्क पुटटोर, ओरग्डाहि वग़ोग़ लेवि इनवाल मतोग़. ओनाय कूळतोर मंदिरतगा देवुळवडेर आंदुर.
†1:20 1:20 देवुळ लोहवाल पिसिह केवाल राजाल वेन इब्रि पोल्लोते मसिहा इन्ह्तोर, युनानि पोल्लोते किर्स्त इन्ह्तोर.
✡1:23 1:23 यशायाह 40:3
‡1:24-25 1:24-25 यहुदिराङ पेदल्कना उंद तुंगातुन परुसिर इनजोर इंदुर. लोकुरगा ओराय पोल्लो पका ताकिंदु, ओसो ओर वेल्लाङे अङ्ळमताङ अडोङ-उतुर्क पुटिह कींदुर.