1 परुसिरा तुंगाताहि ओर्वोग़ मन्‍कल निकोदेमि इनवाल मतोग़, ओग़ यहुदिरा ओर्वोग़ बेरा सेह्‌ना मन्‍कल आंदोग़. 2 ओग़ उंद दिया नग़्‍का येसुन कलियलाह वातोग़, वासि, “गूरु, इव निमा कीयनव सीनाङ देवुळता तोळलेवा बोग़े कीया पग़वोग़. अदिह्‌के निमा देवुळताहे वातोनिन गूरुनिन इनजि माक एर्का आता,” इनजोर ओग़ येसुन इतोग़. 3 अस्‍के येसु ओन इतोग़, “इह केंजा, नना वेहतह्‌नन, नीकु देवुळताहि पूना पुटमुळ दोर्कवालेवा, देवुळ नीवा राजाल आया पग़वो” इनजि इतोग़. 4 इतस्‍के निकोदेमि बयल आसि ओन इतोग़, “बातालि? पूना पुटमुळ इतेके बाताल? मन्‍कल मुय्‍तोग़ आतस्के तना तलिना पोटातग्‍डाहि ओसो बह पुट पग़यनोग़?” इतोग़. 5 इतस्के “इह केंजा, नना वेहतह्‌नन, बोग़ाय एताहि ओसो देवुळता जीवाताहि पुटवालेवा, देवुळ ओना राजाल आया पग़वो. 6 मेंदुदा जीवा इसि तलोग़-तपेरा मेंदुस्‍कनाहि पुटिह्‌ता, इद पूना जीवा बारा दिसवेकाय देवुळता जीवाताहे पुटिह्‌ता. 7 अदिह्‌क मीक पूना पुट पोयतग़ा इनजोर वेहताह्‌कु निमा बयल आयमा. 8 इद केंजा, पूना पुटमुळ इह मन्ह्‌ता. वळ्‍यु बेक इतेक अके वास्‍ता. ताना नेकनदिन निमा केंजिह्‌‍निन, मति अद बेनाह वास्‍ता, बेके दास्‍ता, अद नीक तेळियो. अद्रमलेह्‌काने देवुळता जीवा वळ्‍यलेह्‌कान दिसो मति अदु बोनाय लोप्पा वातेके परक अरयग़ा,” इनजि येसु निकोदेमिन वेहतोग़. 9 “मति इद बेद्रम आया पग़यग़ा, गूरु?” इनजि निकोदेमि येसुन ताल्ह्‌कतोग़. 10 अस्‍के येसु ओन इतोग़, “निमा इस्रयेलतोरिन काग़्हवनिन बेरोग़ गूरुनिन आस तेला मति इव गोटिङ नीक तेळियोङा? 11 इह केंजा, नना वेहतह्‌नन, माक एर्का मनदनदु ओसो माटु कोंडामेंड ऊळतदु, इदिनलोप्पा साक्‍सि ईय्ह्‌नोम, मति मीट इतेके मावा साक्‍सितुन बर्वस केविर आय्ह्‌निर. 12 नना मीकु इद बूमताङ गोटिङ वेहतन तेला मति मीट बर्वस केविर इतेके देवुळदीपताङ गोटिङ वेहतेके अविन बह नमकिर? 13 माने-मन्‍कना नडुम पुटटोनन, नना देवुळदीपताहि रेगतन, नाक विळ्‍सिसि, देवुळदीपतगा अतोग़ु बोग़े इलेग़. अदिह्‌के देवुळदीपताङ गोटिङ वेहतलाह अदिकर नयगा मन्ह्‌ता. 14 बहलेह्‌का मोसा मुय्‍तोग़ पेळ्ह्‌कल बूमते इतुळता तरसतुनु लाटगुटातगा पोग़ोन वेळ्‍ह्‌च मतोग़, अद्रमलेह्‌का माने-मन्‍कना नडुम पुटटोन्‍कु, इतेके नाकु, लोकुर गुटातगा पोग़ोन वेळ्ह्‌तनुर. 15 बहलेह्‌का मोसा मुय्‍तोना कालमते तरस्‍क कस्‍कतोर लोकुर इतुळता तरसतुन ऊळिंदुर अस्के पिसिंदुर, अहलेह्‌का बोग़ नाकु नमनोग़, ओन्‍कु अमेसाता पिसमुळ दोर्कग़ा,” इनजि येसु इतोग़.

16 देवुळि दुनियातोरिन बेद्रम जीवा कीता इतेके तना वग़ोन मग़िन इद दुनियातोरेनाह्‌क मोक आयलाह ईता. बोर ओन नमनुर, ओर बूळेम आयोर, मति अमेसाता पिसमुळ ओरिह्‌क दोर्कग़ा. अदिनेनाह्‌कु देवुळि तना वग़ोन मग़िन दुनियाते लोहता. 17 देवुळि तना मग़िनु इद दुनियातोरिन सिक्‍सा ईयलाह लोहो, मति दुनियातोर ओना संगे पिसना इनजि देवुळता विचर मता. 18 बोर ओन नमिह्‌तोर, देवुळि ओरिनु कसुर ओपो. मति देवुळता वग़ोग़ मग़िन नमवोरा पोग़ोन कसुर ओपतदे मन्ह्‌ता. 19 देवुळता नेयमि इह मन्ह्‌ता. वेह्‌चलेह्‌काडोग़ देवुळदीपताहि इद बूमते वातोग़, मति मन्‍कलोर तमाङ कबस्‍क लाग्‍वाङ मन्ह्‌ताङ इनजोरे, वेह्‌चतुह्‌काय एक्‍वा ईकळतुन गिर्दा आस्‍तोर. 20 लाग्‍वाङ कबस्‍क केवालोर सबेटोर वेह्‌चतुनु गिर्दा आयवा ओराङ कबस्‍क दिसनदायो इनजोरे वेह्‌चलेह्‌काडोना एरे वावोर. 21 मति सेतेमते ताकवालोर मन्‍कलोर वेह्‌चलेह्‌काडोना एरे वास्‍तोर, वाताह्‌कु देवुळ वेहतपु ओर ताकनदु सबेटोरिह्‌क दिसिह्‌ता.

22 इव गोटिङ मारतस्‍के येसु ओसो माट कग़यवालोरोम येरुसलेम सहरतुन विळ्‍सिसि यहुदा पटटा दुस्रा जागाते अतोम. अगा ओना संगे मनजि माट लोकुरिन देवुळता पेदिरते एग़ मिह्‌न्‍दोम.

23 सालिम नाटेना कचुल अय्‍नोन इनदनद जागातगा, वेल्‍लाय एग़ मताह्‌कु, योहन वने अगान लोकुरिन देवुळता पेदिरते मिहन्‍दोग़. अगा लोकुरवने ओना कयदे मीयलाहि वासोरेन मंदुर. 24 (योहनिन जेलतगा वाटनामुनेने इव गोटिङ आताङ.) 25 अस्‍के यहुदिरा बोग़ो पेदा मन्‍कना संगे योहननाङ कग़यवालोर बार, एडनद रिवजता लोप्पा, रेंड-रेंड पोल्‍लोङ आतोर. 26 ओर कग़यवालोर योहनिनगा वासि इतोर, “गूरु, योर्दन बेरेटा अबरि नीवा संग मतोग़ु-ओग़े देवुळ लोहतोग़ पिसिह केवाल इनजि निमा साक्‍सि वेहतिन-ओग़ मन्‍कल इंजेके लोकुरिन देवुळता पेदिरते एग़ मीहतह्‌तोग़. सबेटोर माक विळ्‍सिसि मीयलाहि ओनकेन दायलाह आतोर,” इनजि इतोर. 27 योहन ओरिन इतोग़, “देवुळि देय्‍वा एवालेवा बोन्‍काय बातय दोर्को. अदिह्‌के सबेटोर ओनकेन दास्‍तोर इनजि मीवा जीवा कर्वतप आयमाकि. 28 नना देवुळ लोहतोग़ पिसिह केवाल ओनन आयोन. आयो, लोकुराङ जीवानगा ओना अग़ि तयर कीयलाह देवुळि नाक लोहता, इह इनजोर नना वेहतन, मीट इतेक केंजतिरे! 29 बेद्रम मर्मपिला मर्मपेकानकेन दास्‍ता, अद्रमे लोकुर ओनकेन दास्‍तोर. नना इतेके मर्मपेकाना कचुल निच मनवाल ओना गोततोनन, ओना वळ्ह्‌कनदिन नना केंजिह्‌नन, केंजिसि गिर्दाते मह्‌नन. लोकुर ओनकेन दास्‍तोर, इदिन ऊळिसि नावा गिर्दा पूरा मारता. 30 ओनगा एक्‍वा कग़यवालोर मनजि ओना कदर बार बेरा आयना, नावा कदर बार इळ्‍न अरयना, इह आयनाय गावले,” इनजि योहन इतोग़.

31 देवुळ लोहतोग़ राजाल पोग़ोटा बूमताह वास्‍तोग़ इतेके ओग़ु सबेटोरिह्‌काय बेरोग़. बोर नेदाह वास्‍तोर, ओरु इद बूमताङे गोटिङ वळ्ह्‌किह्‌तोर. बोग़ देवुळदीपताहि वास्‍तोग़, ओग़ सबेटोरिह्‌काय बेरोग़. 32 ओग़ु बेद-बेद गोटटुन देवुळताहि केंजतोग़, ऊळतोग़, अदिने वेहतह्‌तोग़. मति ओग़ वेहतदिन वेल्‍लाटोर सेतेम पोस नमिह्‌तोरा? 33 बोर ओन नमिह्‌तोर, ओरु देवुळबाबाल सेतेमतोग़ मन्ह्‌तोग़ इनजोर कबुल कीस्‍तोर. 34 बोनु देवुळि लोहता, ओग़ु देवुळताङे पोल्‍लोङ वेहतह्‌तोग़, बाराह्‌क इतेके देवुळि तना जीवाते ओन पूरा निहता इनजोरे.

35 देवुळबाबाल तनमग़िन जीवा कीसि ओना कयदे कतमे ईतोग़. 36 बोरु मग़िन नमिह्‌तोर, ओरिह्‌क अमेसाता पिसमुळ दोर्किह्‌ता. मति बोर मग़ना पोल्‍लोतुन केंजोर, ओरु अमेसाता पिसमुळतुन ऊळोर आयनुर, मति देवुळता ओङ ओरा पोग़ोन मन्ह्‌ता.