1 अग्डाहि पेसिस दायह्‌पा, येसुह्‌कु वग़ोग़ पुटगुडि कलियतोग़. 2 अस्के येसुनाङ कग़यवालोर ओन ताल्ह्‌कतोर, “गूरु, वेग़ निटम बोनायो पापमतेनाह्‌के गुड पुट वातोग़. इतेके वेनाये पापमतुह्‌क, बारा वेनाङ तलोग़-तपेर कीतद पापमतुह्‌क वेग़ गुड पुट वातोग़ा?✡9:2 पेसमुळि 20:5; योहन 9:34” इन्जि ताल्ह्‌कतोर.*9:2 उय्तुर यहुदिरा विचरते, मन्कल तलिना पोटाते वने पापम कीया पग़यह्‌तोग़. 3 अस्के येसु ओरिन इतोग़ “वेग़ पापम कीताह्‌कु आयो, ओसो वेनाङ तलोग़-तपेर पापम कीतोर इन्ज गुड पुट वावोग़, मति वेना मेंदुदगा देवुळता बेरा लाव दिसना इन्जि,✡9:3 11:4,40 वेग़ इद्रम पुट वातोग़. 4 नावा बाबाल बेव कबस्क कीयलाह नाक लोहतोग़, अविन नाकु वेह्‌च मनेकेने, इतेके इद बूमते मनेकेने, कीया पोयह्‌ता. बह इतेके उचुके दियाना पया ईकळ वायनद मन्ह्‌ता, अस्के बोन्के कबळ कीया वावो आयग़ा.✡9:4 11:9-10; 12:35-36 5 नना इद दुनियाते मनाह्‌जोम, इद दुनियाता वेह्‌चतन आंदन.✡9:5 1:4; 8:12; 12:46(इद्रमता गुडलेह्‌काडोरिन वेह्‌च ईया पग़यह्‌नन.)” 6 इचोन इन्जि, ओग़ नेदगा उस्कतोग़,✡9:6 मार्कल 7:33; 8:23 उस्कुलते तोळ्यो पिस्कतोग़. अह कीसि ओग़ पुटगुडिनाङ कोंडानगा अद तोळ्योतुन ओकिसीतोग़. 7 पया येसु ओन इतोग़, “अन, सीलो इनदनद वेच्‍चातगा अन्जि मोकम नोग़्म,✡9:7 नहेम्याल 8:15; यशायाह 8:6; योहन 9:11” इन्जि ओन लोहतोग़ (“सीलो” इद पेदिर इतेके लोहतोग़ु). पया ओग़ गुडि अन्जि कन्क ऊरतस्के, ओग़ तोवयलाह आतोग़, आसि लोन अतोग़.✡9:7 यशायाह 29:18; 35:5; 42:7; मत्याल 11:5

8 मुने बिचेम ताल्ह्‌किह्‌पा बोर ओन ऊळिस मतोर, ओसो ओनाङ एरेगूरेतोर ओन ऊळिस इंदुर, “उदिस बिचेम ताल्ह्‌किंदोग़, ओग़ वेग़ेया?” 9 बोर बोर इतोर, “इंगो, वेग़ बिचेम ताल्ह्‌कवाले!” ओसो उय्तुर इतोर, “आयो रा, वेग़ बिचेम ताल्ह्‌कवाल आयोग़, ओनाय लेह्‌का दिसवाल बोग़कोटे मनदनोग़, रा!” इनजोर इंदुर. अस्के वेग़ गुडि इनदलातोग़, “ननान रा, बिचेम ताल्ह्‌कवानन,” इतोग़. 10 “नीवाङ कोंडाङ पया बह बेस आताङ, डा?” इन्जि लोकुर ओन ताल्ह्‌कतोर. 11 ओग़ इतोग़, “येसु पेदिरतोग़ वग़ोग़ मन्कल तोळ्यो पिस्किसि, नावाङ कोंडाह्‌कु ओकिसि, ‘सीलो वेच्‍चातगा अन्जि कन्क ऊरा,’ इतोग़. अस्के पया नना अन्जि कन्क ऊरतन, कन्क ऊरताहे नना इंजेके तोवयह्‌नन,” इनजोर इतोग़. 12 लोकुर ओन ओसो ताल्ह्‌कतोर, “अह इतेके ओग़ येसु बेगाडोग़?” “बारायो, नना पुनोन,” इन्जि ओग़ इतोग़.

13 पया ओर लोकुर गुडि आस मतोनु परुसिरक्‍के पोस ततोर. 14 (बेद दिया येसु तोळ्यो पिस्किसि, ओकिसि, पुटगुडिन बेस कीतोग़, अद दिया वारमता पोल्वादिया आंदु.) 15 पोस ततापया, परुसिर वने “निमा बह तोवयह्‌निन?” इन्जि ओन ताल्ह्‌कतोर. ओग़ इतोग़, “नावाङ कोंडाह्‌कु ओग़ तोळ्यो ओकतोग़, अस्के नना अन्जि कन्क ऊरतन, कन्क ऊरताहे नना इंजेके तोवयह्‌नन,” इतोग़. 16 तेन केंजिस उय्तुर परुसिर इतोर, “ओग़ मन्कल देवुळताह इलेग़, मतेके ओग़ पोल्वादियाते इद सव्रे कीयना कबळ केवोग़ आवेग़.”✡9:16 मत्याल 12:2; लूकाल 6:7; 13:14; योहन 5:16; 7:23 ओसो उय्तुर इतोर, “इंगो मति बोग़ाय पापि मन्कल, इद्रमताङ बेह्‌राङ सीनान बह तोहता पग़यनोग़?✡9:16 3:2; 9:33; बळयिर 2:22” इद्रम तमतमाय वह्‌चिसि, ओर रेंड तुंगाङ आतोर.✡9:16 7:12,43; 10:19 17 अदिह्‌कु ओर ओसो उंद देबा ओन पुटगुडिन ताल्ह्‌कतोर, “ओग़ नीवाङे कोंडान बेस कीतोग़ इन्जि, ओग़ बेद्रमतोग़ मन्कल इनजोर निमा इह्‌निन?” इतोर. “एय, ओग़ देवुळता कबुरतोग़ मनदनोग़ इह्‌नन,” इन्जि ओग़ इतोग़.

18-19 ओग़ गुडि मतोग़, मति इंजेके तोवयलाह आतोग़ इनजोर, यहुदिराङ पेदल्क नम्का पोयवाये मतोर. अदिह्‌कु तोवयलाह आतोग़ गुडिना तलोग़-तपेन ओर केयतोर, केयिसि ताल्ह्‌कतोर, “बह, वेग़ मीवाये पेकाला? मीवाये पेकाल इनजोर इतेके, निटमे वेग़ गुड पुट वातोग़ा? अह इतेक पया वेग़ बह तोवयलाह आतोग़?” इन्जि ताल्ह्‌कतोर. 20 पया वेना तलोग़-तपेर इतोर, “एय, वेग़ मावाय पेकाल आंदोग़, ओसो वेग़ पुटिय तोववोग़ आस मतोग़, इद माक एर्काये. 21 मति इंजेके वेग़ बह तोवयह्‌तोग़ो, इदिन माट पुनोम. ओसो वेनाङ कोंडान बोग़ पङ्ने कीतोग़, अदिन वने माट पुनोम. वेने ताल्ह्‌काटे, वेग़ इंजेके लेयोग़े आतोग़. बह आतदिन तनाय वेहतनोग़,” इतोर. 22 यहुदिराङ पेदल्किन रेयिसि, वेना तलोग़-तपेर अह इतोर.✡9:22 7:13; 9:34; 12:42; 19:38; 20:19 बाराह्‌क इतेके देवुळ लोहवाल पिसिह केवाल येसु आंदोग़ इनजोर, बोग़ कबुल कीयनोग़, ओग़ मावा मोळ्कनगा वायनायो इन्जि, यहुदिराङ पेदल्क कतमतोर उकुम ईस मतोर.✡9:22 12:42; 16:2 23 अदे रेयतुह्‌कु गुडिना तलोग़-तपेर “वेग़ इंजेके लेयोग़े आतोग़, वेने ताल्ह्‌काट!” इनजोर इन्ज मतोर.

24 अदिह्‌क पुटगुडिन ओर परुसिर ओसो उंद मल्का केयिस इतोर, “देवुळता मुनेह किरिया कीसि, नीक बह आतदिन सेतेमते वेहा. बाराह्‌क इतेके वेग़ मन्कल पापमतोग़ इनजोर माट पुह्‌नोम,” इतोर. 25 “ओग़ पापमतोग़ो, बेद्रमतोग़ो, नना पुनोन. मति सिरप उंदिय पोल्‍लो नना पुह्‌नन, मुने नना तोवोन आसि, इंजेके नना तोवयह्‌नन,” इन्जि ओग़ इतोग़. 26 “अह इतेक ओग़ नीक बाताङ कीतोग़, नीक बह तोवनाह कीतोग़?” इन्जि परुसिर ओन ताल्ह्‌कतोर. 27 “इंजेकेन मीक वेहन्दन बहे, तेला मति मीट केंजविरा? मीक ओसो उंद मल्का बाराह्‌क केंजना मन्ह्‌ता? बह मीट वने ओनाङे कग़यवालोर आयना मन्ह्‌ताया?” इन्जि इतोग़. 28 अस्के ओर ओन सेरसेर वळ्ह्‌कतोर, “निमाने ओनाङ कग़यवानिन! माट इतेके मोसानाङ अडोङ नोमवालोरोम आंदोम, पुतिन!✡9:28 5:45 29 देवुळि मोसा मुय्तोनु वळ्ह्‌कता इन्जि, माक एर्काये. मति वेग़ मन्कल बेग्डोग़ो, इदिन माट पुनोम,”✡9:29 7:27-28; 8:14; इब्रितोर 1:1 इतोर. 30 अस्के पया पुटगुडि ओरिन इतोग़, “इदे कोनि बेरा बामनद पोल्‍लो! ओग़ बेग्डोग़, इदिन मीट पुनविर, मति ओग़ इतेके नाक तोवनाह कीतोग़. 31 देवुळि पापि मन्कलोरा ताल्ह्‌कनदिन केंजो इनजोर, माक एर्काये.✡9:31 अय्यूब 27:8-9; 35:12-13; देवुळताङ पाटाङ 66:18; बुदताङ पोल्‍लोङ 15:29; 28:9; यशायाह 1:15 मति बोर देवुळतुन मोळ्किसि ताना पोल्‍लोते तिरियिह्‌तोर, ओरा ताल्ह्‌कनदिन देवुळ केंजिह्‌ता.✡9:31 11:22,41; याकुब 5:16; 1 योहन 3:22 32 केंजाटु, पुटगुडिनु तोवनाह कीतोग़, इद्रमता गोटि बूम पटटग्डाह बेस्केन आयो! 33 ओग़ मन्कल देवुळतग्डाह वावेके, वेन्क इद्रमलेह्‌का बातय कीया वावो आवालि,✡9:33 3:2; 9:16” इन्जि परुसिरिन पुटगुडि इतोग़. 34 अस्के ओर ओन गुडिन इतोर, “नीक इतेके पुटटाहे पापमता सिक्सा दल्गता,✡9:34 9:2 माक निमा काग़्हतह्‌निन?” अह इनजोर ओन पलत पेहचीतोर✡9:34 7:13; 9:22; 12:42; 19:38; 20:19; 3 योहन 10.

35 परुसिर पुटगुडिन पलत पेहचीतोर इनजोरे, येसुह्‌क इद पोल्‍लो एर्का आता. अस्के ओन पर्ह्‌किसि कलियतस्के, येसु इतोग़, “बह निमा माने-मन्कना नडुम पुटटोन नमिह्‌निना?” इन्जि ताल्ह्‌कतोग़. 36 “ए गूरु, नना ओन नमना इन्जि, ओग़ बोग़ आंदोग़, नाक वेहा,” इन्जि ओग़ येसुन इतोग़. 37 अस्के येसु ओन इतोग़, “निमा इतेक ओन ऊळतिन, नीवा संगे इंजेक वळ्ह्‌कवानन, ओनन ननाने,” इतोग़. 38 “ए सामि, नना नमिह्‌नन,” इह इन्जि ओग़ येसुन दंडुम अरतोग़.✡9:38 मत्याल 8:2; 28:17; बळयिर 10:25; तोहचीतव पोल्‍लोङ 22:8†9:38 बेव पका पाळ्नाङ मोदुल काग्देह्‌कने इद वचन दोर्को. 39 “नना लोकुरा पापम तोहतलाहि इद बूमते वातन. बोर लोकुर माट गुडिरा लेह्‌का ईकळते ताकिह्‌नोम इनजोर पुन्ह्‌तोर, ओरिह्‌क देवुळता वेह्‌च दिसग़ा,✡9:39 लूकाल 4:18-19 इदिनेनाह्‌क इद बूमते वातन. ओसो बोर तोवयह्‌नोम इन्ह्‌तोर, ओर निटमे तमा बुदते गुडिर इन्जि नना तोहतकन,✡9:39 व्यवस्थाविवरण 29:4; यिर्मयाह 5:21; यहेजकेल 12:2; मत्याल 13:13” इन्जि येसु इतोग़.

40 अस्के अगा मतोर उय्तुर परुसिर इदिन केंजिसि, “बह माट वने बुदते गुडिरोम इनजोर इह्‌निरा?” इतोर. 41 अस्के येसु ओरिन इतोग़, “ ‘माट गुडिरा लेह्‌का ईकळते ताकिह्‌नोम, (मति तोवयलाह, देवुळताहि कग़यलाह माक गिर्दा मन्ह्‌ता,’) इद्रम मीट इन्ज मतेके, मीवा कसुर मनो आवालि, (देवुळि मीक मापि केवालि).✡9:41 15:22,24 मति माट तोवयह्‌नोम, (पूरा पुतोरोम) इनजोर इह्‌निर.✡9:40-41 रोम सहरतोर 2:19 अदिह्‌के मीवा पापम अहे मन्ह्‌ता, (देवुळि मीक मापि केवो,)✡9:41 बुदताङ पोल्‍लोङ 26:12; याकुब 4:17” इनजोर इतोग़.