11
येसु पार्तना कीयनद काग़्हतह्तोग़
(मत्याल 6:9-13; 7:7-11)
1 उंद दिया येसु पार्तना कीसोर मतोग़, ओग़ पार्तना कीयनद मारतापया, ओनाङ कग़यवाल ओर्वोग़ इद्रम इतोग़, “गूरु! देवुळता पेदिरते एग़ मीहवाल योहन, तनाङ कग़यवालोरिन काग़्हतप लेह्का, माक वने पार्तना बेद्रम कीयना इनजोर काग़्हच ईम,” इतोग़. 2 अस्के येसु ओरिन इतोग़, “मीट पार्तना कीयह्पा, इद्रम वळ्ह्काटु:
‘जोहर सामि, देवुळबाबानिन, सबेटोर नीवा पेदिरतुन मान ईयिर.
इद बूमते नीवा राजेम निल्पिह कीमु.
3 मावा दिनमता तिंडि दिनम ईसोर मनु.
4 ओसो बेद्रम माटु मावा अडम मतोर कसुरतोरिन मापि कीतोम,
अद्रम मावाङ कसुर्किन वने मापि कीमु.
ओसो माकु बेरा कंदाता वेलाते पापमते अरयलाह एमा.’
इद्रम पार्तना कीम्ह्टु.
5-6 “इंजेके मियग्डाहि ओर्वोग़ मन्कल, नग़्का तना तोळतोनगा अन्जि, ‘ए गोतया उंजतिरा? नावा ओर्वोग़ गोतयाल इंजेकेन वातोग़ रा, ओन्क अटिस ईयलाहि नयगा बाताले इले. नियगा रेंड आरिङ मतेक नाक ईकिन रा?’ इनजोर ताल्ह्केग़. 7 मति ओग़ लोप्पाडाहि ‘अग़दुन केहच नना टेटेम अरतन रा, इंजेक नाक कयर केमा! नावा संगे नावाङ पेकोर वने उंजतोर. अदिनेनाह्क इंजेक तेदिस बाताले नीक ईया पग़वोन,’ इनजोर इनेग़.
8 “नना मीक वेहतह्नन, नावा गोततोग़ ताल्ह्किह्तोग़ इनजोर तेद वसवेकाय, ओग़ गोंडगोंड आस्तोग़ इनजोर, निटम तेदिस ओन्क ईयनोग़. 9 अदिनेनाह्क नना वेहतह्नन, ताल्ह्कसोर मन्ह्टु, देवुळ मीक ईयग़ा. पर्ह्कसोर मन्ह्टु, दोर्कग़ा. कोह्कसोर मन्ह्टु, तेल्पतुन तेग़यग़ा. 10 बाराह्क इतेके बोग़ ताल्ह्किह्तोग़, ओन्क ईयग़ा. बोग़ पर्ह्किह्तोग़, ओन्क दोर्कग़ा. बोग़ कोह्किह्तोग़, ओन्क तेग़यिस ईयग़ा. 11-12 तपेनु तना मग़ि आरि ताल्ह्कतेके, ओन्क बंडातुन ईयनोग़ा? मीन ताल्ह्कतेके, ओन्क तरसतुन ईयनोग़ा? इलवेक इसि मेन्ज ताल्ह्कतेके, ओन्क मिचोतुन एवाल, इद्रमतोग़ बोग़ाय तपे मियगा मन्ह्तोग़ा? 13 मीट पापमतोरिर मन्ज तेला, मीवाङ पिलाङ-पेकोरिह्क बेसता मादुन ईयलाह पुह्निर इतेके, देवुळदीपतोग़ बाबाल तन्क ताल्ह्कवालोरिह्क, तना पवित्र जीवा बह एवोग़?” इनजोर वेहतोग़.
येसुनगा देवुळता लाव मन्ह्ता
(मत्याल 12:22-30; मार्कल 3:22-27)
14 पया ओर्वोग़ मन्कन देयम पोस मता, अदिनेनाह्क ओग़ मन्कल वळ्ह्क पुनवा मूकाल आस मतोग़. पया येसु अद देयमतुन ओनग्डाहि पेसिह कीतोग़. अस्के ओग़ मूकाल वळ्ह्क बोटटोग़. इदिन ऊळिसि, अगा मता मुलु पका बामतोर. 15 मति ओरग्डाहि उय्तुर बारा, “वेग़ बेल्जेबुब इनदनद देयह्कना मुक्याना साय्तातेने, देयह्किन मन्कलोरग्डाहि पेसिह कीस्तोग़ रा!” इनजोर इतोर.
16 ओसो उय्तुर बार, (येसु निटम देवुळतग्डाह वातोग़ुया बहु इनजोर) सेतेम ऊळलाह, ओन इतोर, “अले! माक देवुळता लावता बेदाय सीना तोहचीम,” इतोर. 17 मति येसु ओरा बुदतुन पुन्जि, इद्रम इतोग़, “बेदाय राजेमते तमाय नडुमि कोंटेङ पुटटेके, अद राजेम लेङिह्ता, अहे बेदाय लोतगा वने कोंटेङ पुटटेके अद लोन निलो. 18 नाक देयह्कना मुक्याना साय्ताते देयह्किन पेसिह कीस्तोग़ इनजोर इह्निर. देयह्कना मुक्याल तनाय तोळताङ देयह्किन बाराह्क पेसिह केवालि? अद्रम देयह्कना मुक्याल ओसो ताना तोळताङ देयह्क, तमा तमा विरुद आतेके, अविस्कना राजेम बेद्रम नितग़ा? 19 अले नना देयह्कना मुक्याना साय्ताते देयह्किन पेसिह कीतेके, मीवोर पया बेदिना साय्ताते देयह्किन पेसिह कीस्तोर?✡11:19 बळयिर 19:13 इद्रम मीवाङ विचर्क चुकताङ इन्जि, ओर तमाय तोहतनुर! 20 मति नना देवुळता जीवाता लावते देयह्किन पेसिह कीय्ह्नन इतेके, मियगा देवुळता राजेम वाता, इदिन पुन्ह्टु.
21 “(इदिन पुन्पिह कीयलाह, नना मीक उंद पोल्लो वेहतह्नन:) ओर्वोग़ पळ्योग़ कसेह्क-मग़्स्क पोसि, तना लोतुन राका कीसोर मतेक अचोन, ओना मालसोम बेस मन्ह्ता. 22 मति ओन्काय एक्वा लावतोग़ पळ्योग़ वासि, ओन उकिस आरे कीस्तोग़. कीसि लोतुन राका केवाल मन्कल बर्वस तासतव कसेह्क-मग़्स्किन ओनग्डाहि ऊंदिह्तोग़, ओसो तना लूटे कीतद मालसोमतुन वने, तना गोततोरा संगे तूसिह्तोग़.*11:22 देयह्कना मुक्याना मालसोम इतेके, बोर ताना कय इळ्न मन्ह्तोर, ओर लोकुर आंदुर.(अद्रमलेह्का देयह्कना मुक्यान आरे कीताह्के, नना देयह्किन पूंड पग़यह्नन.)
23 “बोग़ नावा संगे गोतते मनोग़, ओग़ नावा विरुद मन्ह्तोग़, ओसो बोग़ नावा संगे लोकुरिन जमा कीयलाह तोळ आयोग़, ओग़ ओरिन बिरोबटो कीस्तोग़.
देवुळताह जेक आतोना तिपलि
(मत्याल 12:43-45)
24 “उंद देयमि बोग़ाय मन्कनग्डाहि पेसिस अतस्के, अद तन्क मनदलाह, इके-अके मेटाङ-मेटाङ वेलियिस, जागाङ पर्ह्किस ऊळिह्ता, मति अद्रमता जागा बेगान दोर्को. अस्के अद आलिह कीस्ता, ‘नना पेसिस वातन, अद नावा पाळ्ना लोतगान मल्स दाकन,’ इद्रम इन्ह्ता. 25 पया अन्ज ऊळिह्ता अस्के, अद मुनेता लोनु रिकम आतदु, सिरसिर नेहतदु, ऊसतदु, इद्रम तान्कु बेस दिसिह्ता. 26 अस्के पया अद मल्स अन्जि, तन्काय लाग्वव एळुङ देयह्किन तना संगे गोत कीस ततह्ता. अस्के अवु ओग़ मन्कना लोप्पा नेङिस जागा आस्ताङ. पया ओना इंजेटा गोसा, मुनेतदिह्काय वेल्ला करबता आस्ता,”✡11:26 2 पत्रु 2:20 इनजोर येसु वेहतोग़.
27 येसु इव पोल्लोङ वेहतस्के, मुडग्डाहि उंद आंचाळ जोरते केयिस इद्रम इता इतेके, “नीक पुटिह कीसि, पाल ऊहतद आंचाळ बेरा देय्वाता आंदु,” इता. 28 इतस्के येसु इतोग़, “आयो, देवुळता पोल्लोतुन केंजिसि, अद्रम ताकवालोरे बेरा देय्वातोर आंदुर,” इतोग़.✡11:28 मत्याल 7:24; योहन 13:17; याकुब 1:25; तोहचीतव पोल्लोङ 1:3
लोकुर येसुनु सीना तोहता वेहतह्तोर
(मत्याल 12:39-42)
29 पया मुडा मन्कलोर उचुन जमा आनेके, येसु इद्रम वेहता बोटटोग़: “इद पीळतोर लाग्वोर मन्कलोरु, नावा कयदे सीना ऊळकोम इन्ह्तोर. मति देवुळता कबुरतोग़ योनाल इनवाह्क बह बह आता, अदे सीनातुन ओरिह्क तोहतकन. तान विळ्सिसि बेदे सीना नना तोहवानन आयोन.✡11:29 मार्कल 8:12 30 बेद्रम निनवे सहरतोर लोकुरिह्क योनाल सीना आतोग़, अद्रमे इद पीळतोरेनाह्क वने, माने-मन्कना नडुम पुटटोनन सीना आयकन.†11:30 योनाल बेरा मीनता पोटातगा मूंड दियाङ मन्जि, ओसो पलते पेसिस वातोग़ (योनाल 1:17). निनवे सहरतोरिह्क योनाल तोहतद सीना अदे मता. अद्रमे येसु वने हातापया, मूंड दियाङ गुमयाता लोप्पा मन्जि, ओसोवने तेग़्कनद सीनाता लोप्पा, येसु वळ्ह्कतोग़. 31 साल्मोन राजाना बुदताङ पोल्लोङ केंजलाहि, सीबा देसेमता रानि वेल्ला जेकताहि वाता✡11:31 1 राजा 10:1-10; मति इंजेके इगा साल्मोनिह्काय वीळिस बेरा पोल्लो मियगा एवता; (तेला मति मन्कलोर अद पोल्लोतुन नमोर.) अदिनेनाह्क आक्रि नेयमता दियाते, अद रानि निचि इद पीळतोरा पोग़ोन तप तासग़ा. 32 अद्रमलेह्काने योनाना कबुरतुन निनवे सहरतोर केंजिसि, तमा पापमताहि मिळ्न्दतोर.✡11:32 योनाल 3:5 इंजेके इगा योनाह्काय वीळिस बेरा पोल्लो मियगा एवता. (मति मीट इतेके मीवा पापमताहि मलविर.) अदिनेनाह्क आक्रि नेयमता दियाते, निनवे सहरतोर निचि, इद पीळतोरिन तप तासनुर,” इतोग़.
येसुना काग़्हमुळि चिमलिलेह्काडा
(मत्याल 5:15; 6:22-23)
33 येसु ओरिन ओसो इद्रम वेहतोग़, “बोग़े चिमलि नीर्विह कीसि, तान वेह्च एवा जागाते तासनोग़ा? इलवेके डूटलोप्पा मुचिस तासनोग़ा? आयो, लोप्पा ओळियवालोरिह्क वेह्च दिसि इनजोर, बोव्लापोग़ोन तासनोग़. 34 नीवा कोंडा नीवा मेंदुदा चिमलिलेह्का आंदु. नीवाङ कोंडाङ बेस मतेक अचोन, नीवा लोप्पा पूरा वेह्च मतप आयग़ा. मति नीवाङ कोंडाङ करब मतेक अचोन, नीवा लोप्पा पूरा ईकळ आतप आयग़ा. 35 अदिनेनाह्क उसरते मन्ह्टु, देवुळ मीक ईयनद वेह्चि पिवमाकि. 36 मीवा लोप्पा इचुन वने ईकळलेवा, पूरा वेह्च मता इतेके, चिमलि नीक वेह्च ईयना लेह्का, नियगा मनदनद वेह्च बेस दींचग़ा,” इनजोर वेहतोग़.
सास्त्रमगूरुरा ओसो परुसिरा कबळ ओप्पो
37 येसु इद्रम वेहच मारिह कीतस्के, ओर्वोग़ परुसि मन्कल येसुन जावा उनडलाह, तना लोन केयतोग़. केयताह्कु येसु ओना लोन अतोग़. अन्जि लोप्पा ओळियिसि, ओना संगे जावा उनडलाह उदतोग़. 38 अस्के परुसिरा अडो माळवा, येसु कय नोग़वाये जावा उनडलाह उदतोग़. तान ऊळिस ओग़ परुसि पका बामतोग़.✡11:38 मत्याल 15:1-2; मार्कल 7:2 39 अदिन पुन्जि येसुसामि ओन इद्रम इतोग़, “इके केंजा, मीट परुसिरिर गिनेङ-बट्किन सिरप पलतेनाह तोमिह्निर. मति मीवा लोप्पाडेके इतेके, उळ्बेते लोकुरिन जाळ्पनद निंदिस मन्ह्ता.✡11:39 मत्याल 23:25 40 बुदलेवोरिर! बह पलता मेंदुदुन पंडटद देवुळि, लोप्पाडा जीवातुन वने पंडोया? 41 अदिनेनाह्क मीट लेवोरिह्क जीवा कीसि, दर्मम ईम्ह्टु. अस्के मियेनाह्क सबे पोलनुङ.
42 “ओ परुसिरिर, मीक पका गोसा आयग़ा! बाराह्क इतेके मीट पुलातगा वाटनव आकिना ओसो दुस्रा पंटाता, दहा तूस्कनग्डाहि उंद तूस देवुळतुह्क कोड ईय्ह्निर. (इचोन उड्लाङ पोल्लोन सीता कीय्ह्निर,) मति सेतेमते नेयम कीयना ओसो देवुळतुन जीवा कीयना, इद्रमताङ पोल्लोन सीता केविर. इविस्किन वने माळनाय मता, अविस्किन वने माळनाय मता.✡11:42 मत्याल 23:23
43 “ओ परुसिरिर! मीक पका गोसा आयग़ा! बाराह्क इतेके पार्तनाताङ लोह्कनगा, बेरोर उदवालोराङ जागाङ पर्ह्किह्निर. ओसो बजरतगा लोकुर मीक जोहर कीयना, इद्रमताङ बेसु.✡11:43 मत्याल 23:6-7; लूकाल 14:7; 20:46 44 मीक पका सिक्सा आयग़ा, बाराह्क इतेके मीटु सेत्तातुन गुमया केवाय मिसतद जागाता लेह्का मह्निर.‡11:44 बेद्रमलेह्का सेत्तातुन मिसतद जागा पलतेनाह बेसे दिसिह्ता, मति लोप्पा पूरा कळयिस मन्ह्ता, अद्रमलेह्काने परुसिर वने पलतेनाह बेसे दिसिंदुर, मति ओरा जीवाता लोप्पा लाग्वा बुदि निंदिस मंदु. ओसो सेत्ता मनदनद जागातग्डाह अनवालोर लोकुर कळ्वोग़ आंदुर. अद्रमे लोकुर परुसिरा काग़्हमुळतुन केंजिस लेसिंदुर. अदिनेनाह्क येसु, “सेत्तातुन गुमया केवाय मिसतद जागाता लेह्का मह्निर,” इनजोर परुसिरिन इतोग़. अगा गुमया दिसवाह्कु, अगाह्क अनवालोर पोग़ोट्क दास्तोर, मति इगा इळ्न सेत्ता मिसिस मन्ह्ता इनजोर पुनोर,” इनजोर वेहतोग़.✡11:44 मत्याल 23:27
45 अस्के ओर्वोग़ सास्त्रमगूरु येसुन इद्रम इतोग़, “गूरु, निमा इद्रमताङ पोल्लोङ वळ्ह्किस, माक वने लजा अरनाह कीय्ह्निन गोतो!” 46 इनजोर इतस्के येसु ओन इतोग़, “ओ सास्त्रमगूरुरिर! मीक पका गोसा आयग़ा! बाराह्क इतेके मीवाङ तेहता पुनवप मनदनाङ अडोङ-उतुर्कना मोतातुन, मीटु लोकुरा पोग़ोन वाटिह्निर, मति मीट इतेके अद मोतातुन कय तेला बोयिस ऊळविर.✡11:46 मत्याल 23:4; बळयिर 15:10; गलातितोर 5:1 47 मीक पका सिक्सा आयग़ा, बाराह्क इतेके मीवाङ तादोर-बाबोर मुनेतोर देवुळता कबुरतोरिन हव्कतोर. इंजेक इसि, मीट ओर कबुरतोराङ पेदिर्कने बंडाङ ओग़्सिह्निर.✡11:47 मत्याल 23:29 48 अह कीसि मीट वने मीवाङ तादोर-बाबोराङ कबस्किह्क तोळ आतिर. बाराह्क इतेके ओर बार कबुरतोरिन हव्कतोर, मीट बार ओराङ बंडाङ ओग़्सिह्निर.
49 “अदिनेनाह्क देवुळि तना बुदते इद्रम इता, ‘नना कबुरतोरिनु, ओसो बळयिरिन वने ओरगा लोहतकन. अस्के उय्तुरिन बार हव्कनुर, ओसो उय्तुरिन बार पका तिपल कीयनुर,’ इता. 50 अदिह्क बूम पुटटग्डाहि देवुळता कबुरतोरिन बेच्वुरिन हव्कतोर! ताना इसब इद पीळतोरिह्क ईया पोयग़ा. 51 मुने हाबेलिन✡11:51 पुटमुळि 4:8 हव्कतग्डाह इतेके, वेल्लाय पेग़्के मंदिरता पवित्र गूडि ओसो गर्या, इव रेंडिस्कना नडुम जकरिया बूमयान हव्कतोर.✡11:51 2 इतिहास 24:20-21§11:51 मत्याल 23:35 इद वचनता नोट ऊळाट. अगा एवनाह बेच्वुरिन हव्कतोर, ओर सबेटोरा इसब इद पीळतोरिह्क ईया पोयग़ा.✡11:49-51 मत्याल 23:34-36 52 सास्त्रमगूरुरिर, देवुळि मीक पका सिक्सा ईयग़ा. बाराह्क इतेके बुदता अग़दुन केहचीतिर; मीट वने ओळियविर, ओसो ओळियवालोरिन वने ओळियलाह एविर. (इद्रम मीट मन्कलोरिन सेतेम पोल्लोतुन पुनदलाह एविर,)” इतोग़.✡11:52 मत्याल 23:13 53-54 पया येसु अग्डाहि अतस्के, परुसिर ओसो सास्त्रमगूरुर ओना पोग़ोन पका ओङ आतोर. आसि बेदाय पोल्लोते येसुन एग़्किह कीयना इनजोर विचर कीसि, ओन वेल्लाङे पोल्लोङ ताल्ह्क बोटटोर.
✡11:19 11:19 बळयिर 19:13
*11:22 11:22 देयह्कना मुक्याना मालसोम इतेके, बोर ताना कय इळ्न मन्ह्तोर, ओर लोकुर आंदुर.
✡11:26 11:26 2 पत्रु 2:20
✡11:28 11:28 मत्याल 7:24; योहन 13:17; याकुब 1:25; तोहचीतव पोल्लोङ 1:3
✡11:29 11:29 मार्कल 8:12
†11:30 11:30 योनाल बेरा मीनता पोटातगा मूंड दियाङ मन्जि, ओसो पलते पेसिस वातोग़ (योनाल 1:17). निनवे सहरतोरिह्क योनाल तोहतद सीना अदे मता. अद्रमे येसु वने हातापया, मूंड दियाङ गुमयाता लोप्पा मन्जि, ओसोवने तेग़्कनद सीनाता लोप्पा, येसु वळ्ह्कतोग़.
✡11:31 11:31 1 राजा 10:1-10
✡11:32 11:32 योनाल 3:5
✡11:38 11:38 मत्याल 15:1-2; मार्कल 7:2
✡11:39 11:39 मत्याल 23:25
✡11:42 11:42 मत्याल 23:23
✡11:43 11:43 मत्याल 23:6-7; लूकाल 14:7; 20:46
‡11:44 11:44 बेद्रमलेह्का सेत्तातुन मिसतद जागा पलतेनाह बेसे दिसिह्ता, मति लोप्पा पूरा कळयिस मन्ह्ता, अद्रमलेह्काने परुसिर वने पलतेनाह बेसे दिसिंदुर, मति ओरा जीवाता लोप्पा लाग्वा बुदि निंदिस मंदु. ओसो सेत्ता मनदनद जागातग्डाह अनवालोर लोकुर कळ्वोग़ आंदुर. अद्रमे लोकुर परुसिरा काग़्हमुळतुन केंजिस लेसिंदुर. अदिनेनाह्क येसु, “सेत्तातुन गुमया केवाय मिसतद जागाता लेह्का मह्निर,” इनजोर परुसिरिन इतोग़.
✡11:44 11:44 मत्याल 23:27
✡11:46 11:46 मत्याल 23:4; बळयिर 15:10; गलातितोर 5:1
✡11:47 11:47 मत्याल 23:29
✡11:51 11:51 पुटमुळि 4:8
✡11:51 11:51 2 इतिहास 24:20-21
§11:51 11:51 मत्याल 23:35 इद वचनता नोट ऊळाट.
✡11:51 11:49-51 मत्याल 23:34-36
✡11:52 11:52 मत्याल 23:13