1 उंद दिया सिद्‌वा एनवालोर ओसो यहुदिराङ अडोन नोमवोर पापिर येसुनाङ पोल्‍लोङ केंजलाहि ओनगा जमा आतोर. 2 इदिन ऊळिस परुसिर ओसो सास्त्रमगूरुर येसुन मुयोग़ आसोरे, “वेग़ मन्कल पापिरिन बेस-नेह्‌ना तनगा केयिस उदिह कीस्तोग़ ओसो ओरा संगे तिनदना-उनडना कीस्तोग़,” इतोर. 3 ओर इनदनदिन केंजिसि येसु ओरिन उंद पुन्पिह कीयनद पीटो वेहतोग़, 4 “ओर्वोग़ मन्कनगा नूर गोरेङ मताङ, अविस्किन मेहनेक-मेहनेके, अग्डाहि उंद गोरे लेसता. पया अव पिसतवु उंद कमि नूर गोरेनु, बटटगा मंदा कीसि, अद उंद लेसतद गोरेतुन दोर्कनाह्‌जोम पर्ह्‌कलाहि ओग़ दास्तोग़. 5 पया अद गोरे दोर्कतस्के तान गिर्दाते तना अटाते कांजिस पोस वास्तोग़. 6 पया लोन वासि, तना गोततोरिनु ओसो एरे-गूरेतोरिन केयिसि, ‘नावा लेसिस मतद गोरे नाक दोर्कता. नावा संगे गिर्दा कीम्ह्‌टु,’ इनजोर इन्ह्‌तोग़. 7 नना मीक वेहतह्‌नन अद्रमे देवुळतुन माळवालोर 99 मन्कलोरु ‘माकु पापमता अग़दाहि मलयना गर्ज इले’ इनदनुर. मति ओरिह्‌कायि, ओर्वोग़ पापि मन्कल तना पापमता अग़दाहि मलतेक अचोन, ओनेनाह्‌के देवुळदीपतगा पका गिर्दा आयग़ा.

8 “ओसो उंद पीटो वेहतह्‌नन, केंजाट. उंद आंचानगा वेंडटाङ दहा कोताङ मताङ.*15:8 उंदि वेंडटा कोता इतेके, अद तूकने उंदि दियाता कूलि, इचोन मता. अग्डाहि उंद कोता लोने बेगायो अरस मायता. अस्के अद आंचाळ चिमलि पोतिह कीसि, दोर्कनाह्‌जोम बेस-नेह्‌ना वियेग़ नेहचि पर्ह्‌किह्‌ता. 9 पया कोतातुन दोर्किह कीसि, तना गोतताङ आस्किनु, एरे-गूरेताङ आस्किनु केयिसि ‘नावा पोवस मतद वेंड कोता दोर्कता रि, नावा संगे गिर्दा कीम्ह्‌टु,’ इनजोर इन्ह्‌ता. 10 नना मीक वेहतह्‌नन, अद्रमे पापमता अग़दाहि मलवाल ओर्वोग़ पापि मन्कनेनाह्‌कु देवुळदीपतगा देवुळि तनाङ देवतुल्कना संगे गिर्दा कीयग़ा,” इनजोर वेहतोग़.

11 पया येसु ओसो उंद पुन्पिह कीयनद पीटो वेहतोग़, “ओर्वोग़ मन्कल मतोग़, ओन्क इर्वुर मग़्क मतोर. 12 उंद दिया उड्‌लोग़ मग़ि तना तपेनगा वासि, ‘बाबा! मालसोमतग्डाहि बेचोन नावा तूस मन्ह्‌ता, अद नाक तूसिस ईम,’ इतोग़. इतस्के तपे तना मालसोमतुन इर्वुर मग़्किरिह्‌क तूसिस ईतोग़. 13 पया वेल्‍ला दिया आयवाय मता, ओग़ उड्‌लोग़ मग़ि तना मालसोमतुन पूरा ओपे कीसि, लोतोरग्डाह एग़िस वेल्‍ला जेकता देसेमते अतोग़. अनजि अगा तना मालसोमतुन बेदे कबळतुह्‌क अरवाहु, लाग्वाङ कबस्कने इके-अके उगसिन पोहतोग़. 14 इद्रम ओग़ पूरा मालसोम मारिह कीतोग़. पया अद देसेमतगा बेरा दुकळ अरता. अस्के ओनगा बाताले इले आस मता. 15 अदिनेनाह्‌क पया ओग़ अद देसेमतोग़ ओर्वोग़ मन्कनगा कबळ कीयलाह अतोग़. अतस्के ओग़ मन्कल ओन तना पोलमते पदिङ मेहतलाह लोहचीतोग़.†15:15 यहुदि लोकुरिह्‌क पदिङ मेहतना इतेके सबेट्‌काय पका लजाता पोल्‍लो आंदु. ओसो यहुदिर पदिङ तितेके, इटटेके कळ्वोग़ आस्तोर (लैव्यव्यवस्था 11:7). 16 पया अगा ओग़ पेकाल, अव पदिङ तिनदनद कोग़्मतुन आय तिन्ज पोटा निहेनन इनजोर विचर कींदोग़. मति अद कोग़्मि वने ओन्क बोग़े एवोग़.

17 “अद्रम आनेके पया ओग़ पेकाह्‌क सीता वाता. अस्के तन-तनाय इद्रम विचर कीतोग़: ‘नावा बाबानगा इतेके बेच्वुरो ओर्युलतोर मन्ह्‌तोर, ओरिह्‌क तितेक वने मारो. मति नना इसि इगा कग़्विह्‌क हासोर मह्‌नन. 18 आयो, नना इंजेके इग्डाह बाबानगा अनजि, बाबा नना देवुळता अडम ओसो नीवा अडम पापम कीतन. 19 इंजेके नीवा मग़ि इनदलाह वने ओप्पोन. मति नाक ओर्वोग़ नीवा ओर्युलतोना लेह्‌का नियगा तासा, इनदकन,’ इनजोर विचर कीतोग़. 20 कीसि ओग़ पेकाल अग्डाहि तपेनके दायलाह पेसतोग़. पया लोता एरे एवनेके तपे ओन ऊळतोग़. ओन ऊळिसि तपेह्‌क पका मान वसता. पया तपे वितिस ओन गळ्म ओग़्ङिस लोंडटोग़. 21 अस्के ओग़ पेकाल, ‘बाबा! नना देवुळता अडम ओसो नीवा अडम पापम कीतन. इंजेके नीवा मग़ि इनदलाह ओप्पोन,’ इतोग़.

22 “मति तपे ओन लोन तचि, तनाङ ओर्युलतोरिन, ‘अलेट रा! पका बेसता जगा तचि, वेन्क केग़पिह कीम्ह्‌टु. वेळ्न्जतगा उंद मुदा केग़पिह कीम्ह्‌टु ओसो एल्पुस्क केग़पिह कीम्ह्‌टु. 23 ओसो बेस मेंदुल आतद कुरा पियो हव्काट! अदिन तिनजि माट गिर्दा कीकल. 24 वेग़ नावा मग़ि डोलिस मतोग़, इंजेक जीवा अरतोग़. लेसिस मतोग़, मति वेग़ दोर्कतोग़,’ इनजोर वेहतोग़. इद्रमलेह्‌का ओर गिर्दा कीयलाह बोटटोर.

25 “पया बह आता इतेके, गळ्क मनेके बेरोग़ मग़ि पोलमतेनाह लोन वातस्के, पाटाङ ओयनदु, एंदनदु आल्का ओग़ केंजतोग़. 26 केंजतस्के ओर्वोग़ तमा ओर्युलतोन केयिसि, ‘लोन बाताल आयलाह आता रा?’ इनजोर ताल्ह्‌कतोग़. 27 अस्के ओग़ु, ‘नीवा तमोग़ सुकमते बेस-नेह्‌ना लोन मल्स वातोग़. अदिनेनाह्‌क मिय्मल पका बेस मेंदुल आतद पियोतुन अस्कलाह वेहतोग़!’ इनजोर इतोग़.

28 “इदिन केंजिस बेरोग़ मग़ि पका ओङ आतोग़. लोन लोप्पा ओळियोग़. अस्के तपे पलते वासि, ओन गूनम कीयलाह ऊळतोग़. 29 मति मग़ि तपेन इद्रम इतोग़, ‘इचोक वर्साङ ओर्युलतोना लेह्‌का मनजि, नना नीवा सेवा साकुर कीयलाह आतन. ओसो नीवाङ सबे पोल्‍लोन केंजिस ताकतन. मतिंगा नावा गोततोरा संगे कलियिस गिर्दा कीयलाह, बेस्के उड्‌ला बोक्ळा पियो वने एविन. 30 मति वेग़ नीवा मग़ि, पूरा मालसोमतुन साट्याल कबळते बूळे कीतोग़. ओनेनाह्‌क कोनि बेस पका मेंदुल आतद कुरा पियोतुन अस्कलाह वेहतिन अय!’ इतोग़. 31 इतस्के तपे ओन इतोग़, ‘बाबा! निमा इतेके अमेसा नावा संगे मह्‌निन, नयगा बाताल-बाताल मन्ह्‌ता, अद सबे नीवाय आंदु. 32 मति वेग़ नीवा तमोग़ डोलिस मतोग़, इंजेक जीवा अरतोग़. लेसिस मतोग़, ओसो वने दोर्कतोग़. अदिनेनाह्‌क माट गिर्दा आयना गावले’ इतोग़,” इनजोर येसु इद्रम पीटो वेहच मारिह कीतोग़.