1 उंद दिया येसु तनाङ कग़यवालोरिन वेहतोग़, “पापम कीयनाह तेग़्हतनव पोल्‍लोङ मनदनुङे! मति बोग़ मीकु पापमतेके ओसीस्तोग़, ओन्क देवुळ पका सिक्सा ईयग़ा. 2 बोग़ आयि उड्लोर पेकोरा लेह्‌का नाक नमवालोरग्‍डाहि बोन आय वग़ोनु, पापम कीयलाह तेग़्हतना मुने, ओना वेळेटगा पका पूहतद जेता बंडातुन दोहचि, ओन सम्दुरतगा वाटिस ईतेकतेला बेसे आयग़ा. 3 अदिनेनाह्‌क मीवा ताकमुळते उसर मन्ह्‌टु.

“मीवा तोळतोग़ गल्ति कीतेके ओन तेर्हाटु. ओग़ तना कीता गल्तिताह मलतेके, ओना गल्तितुन मापि कीम्ह्‌टु. 4 ओग़ उंदिय दिया एळुङ मल्काङ मीवा विरुदते पापम कीसि, ओसो वने एळुङ मल्काङ मियगा वासि ‘नना चुकतन, इंजेक अद्रम केवोन,’ इनजोर इतेके, ओन मापि कीम्ह्‌टु,” इनजोर वेहतोग़.

5 इदिन पया केंजिस, “मावा विस्वसतुन बेर्सिह कीसीम सामि,” इनजोर बळयिर येसुसामिन इतोर. 6 इतस्के येसुसामि इतोग़, “मीवा विस्वस नूङमेटा मतेके वने, मीट इद बेरा ताळ मरातुन, ‘कुळ्ह वासि, सम्दुरतगा निल्म’ इनजोर वेहतेके, अद मीवा पोल्‍लोतुन केंजग़ा.

7 “इंजेके मियग्डाहि बोना तेला लोतगा ओर्युलतोग़ मनदनोग़, ओग़ पूहतलाह आयि, इलवेक इसि कोंदानके आय अनेग़. अनजि तना कबळतेनाह लोन मल्स वातस्के, ‘वाता वावाय गाटो तिनदलाह उदा रा’ इनजोर माल्काल ओन इनोग़ आयनोग़. 8 मति ‘नयेनाह्‌क गाटो अटा, जगा केग़्स नना तिनाह्‌जोम नाक वांटिस ईम. ताना पया निमा तिन’ इनजोर इनदनोग़. 9 ओसो नना वेहतद कबळतुन कीतोग़ इनजोर ओर्युलतोन ‘बेस कीतिन!’ इनजोर इनोग़ आयनोग़. 10 अद्रमे मीटवने देवुळ वेहतद पूरा कबळतुन मारिह कीतस्के, ‘माटु मान दोर्कना मुर्तिय लायक आयोम! माक बेद कबळ कीयनद मता, अदे कबळतुन कीतोम,’ इनजोर इन्ह्‌‌टु,” इनजोर येसु वेहतोग़.

11 पया येसु येरुसलेमतके दायह्‌पा सामरिया ओसो गालिल इव पटिना नडुमतुह्‌क अनजोर मतोग़. 12 अस्के येसु बेदो उंद नाटेनगा दायह्‌पा, अग़दुह्‌क उचुन अबर मोंडरोगमतोर दहा मन्कलोर निच मतोर. 13 ओर येसुन ऊळिस जोरते केयतोर, “ए येसु! सामि! माक ऊळिस जीवा लोपा,” इतोर.*17:13 यहुदि लोकुर मोंडरोगम आतोर मन्कलोरिन कळ्वोग़ आतोर इनजोर जेक कीन्दुर ओसो ओरिन नाटुह्‌क अबर तासिंदुर. 14 येसु ओरिन ऊळिस इतोग़, “अले मीट इंजेक इग्डाह अनजि, मीवाङ मेंदुस्किन बूमयालोरिह्‌क तोहाट,†17:14 बोर मोंडरोगमताहि सव्रेम आंदुर, ओरिह्‌कु बूमयानगा अनजि माट सव्रेम आतोम इनजि तोहता पोयन्दु, अस्के बूमयालोरु मीवा कळ्वोग़ एडटा इनजि वेहन्दुर, ओर वेहतस्केन मोंडरोगमतोरिह्‌क लोकुरा संगे कलियलाह पोलिंदु (लैव्यव्यस्था 14:1-32).” इनजोर इतोग़. इतस्के ओर अतोर. अनेक-अनेकेन ओरा मोंडरोगम मायता. 15 पया ओर दहा मन्कलोरग्डाहि ओर्वोग़ मन्कल तना सव्रेम आतदिन ऊळतोग़. अस्के ओसोवने येसुनगा मल्स वासि, जोर-जोरते केयिस देवुळतुन जोहर कीया बोटटोग़. 16 ओसो ओग़ येसुनाङ काल्क अरसि ओन जोहर कीतोग़. ओग़ मन्कल सामरि जाततोग़ु, इतेके उड्‌ला जाततोग़ मतोग़.‡17:16 सामरि जाततोरिन यहुदि जाततोरु विटळ तासिन्दुर. 17 अस्के येसु इतोग़, “कतमतोर सव्रेम आतोर इसि. पया नव मन्कलोर बेगाडुर? 18 वेग़ यहुदि आयवोग़ दुस्रा जाततोन विळ्सिसि ओरग्डाह बोग़े बह देवुळतुन जोहर कीयलाहि मल्स वावोग़ गोतो!” इतोग़. 19 ओसो ओन, “तेदिस अन! निमा नाक विस्वस कीतिन, अदिनेनाह्‌क सव्रेम आतिन,” इतोग़.

20 उंद दिया परुसिर येसुनु, “देवुळि तना राजेमतुन माक बेस्के दिसिह कीयग़ा?” इनजोर ताल्ह्‌कतोर. ताल्ह्‌कतस्के येसु वेहतोग़, “देवुळ राजेम कीयनद कोंडाह्‌क दिसो आयग़ा. 21 देवुळि मीवा नडुम राजेम कीस्ता. अदिनेनाह्‌क ‘इदु! देवुळि इगा राजेम कीस्ता. अदु! अगा राजेम कीस्ता,’ इनजोर लोकुर वळ्ह्‌कोर आयनुर,” इनजोर वेहतोग़. 22 ओसो वने कग़यवालोरिन इद्रम इतोग़: “माने-मन्कना नडुम पुटटोनन, नना राजाल आसि वायनद दियातुन ऊळलाह विचर कीकिर, मति मीट ऊळ पग़विर आयकिर, इद्रमता वेला वायग़ा. 23 अस्के इगा मन्ह्‌तोग़, अगा मन्ह्‌तोग़, इनजोर लोकुर मीकु इनदनुर, अगा मीट अनमाटु, ओरा संगे कलियमाटु.✡17:23 मत्याल 24:23; मार्कल 13:21 24 पोग़ोन उंद बाजेतके मिळ्स्कतेके दुस्रा बाजेतके वेह्‌च आस्ता. अद्रमलेह्‌काने माने-मन्कना नडुम पुटटोनन नना आक्रि दियाते वायकन अस्के कतमतोर नाक ऊळनुर.✡17:24 मत्याल 24:27 25 मति ताना मुने नना पका तिपल आयकन. इद पीळतोर मन्कलोर नाक पास्कनुर.

26 “नोहा मुय्तोना वेलाते बेद्रम आता, अद्रमे माने-मन्कना नडुम पुटटोनन नना वायह्‌पा आयग़ा.✡17:26 मत्याल 24:37 27 नोहा मुय्तोग़ ओडातगा नेङनाह्‌जोम लोकुर तिनदना-उनडना कींदुर, मुतेस्क तन्दुर, मुजोह्‌क अन्दुङ. पया बेरा उड्रा वासि ओर कतमतोरिन बूळे कीता.✡17:27 मत्याल 24:37-39

28 “ओसो लोटना वेलाते वने अद्रमे आता. लोकुर तिनदना-उनडना, असना, वमना, वीतना, लोह्‌क पंडना कींदुर. 29 मति लोट सोदोम सहरताहि पेसतस्के, पोग़ोटा बूमताहि मळ्गनव किसतळ्मिङ अरताङ, अस्के नाग़मेटोर कतम बूळेम आतोर. 30 अद्रमलेह्‌काने माने-मन्कना नडुम पुटटोनन नना दिसनद दिया वने आयग़ा. 31 अदिनेनाह्‌क अद दिया बोग़ाय लोता पोग़ोन मतेके, लोतगा मनदनद सामनतुन ततलाह इळ्न रेगनद आयो. अद्रमे बोग़ाय मन्कल पोलमते मतेक वने ओग़ मल्स वायनद आयो.✡17:31 मत्याल 24:17-18; मार्कल 13:15-16 32 लोटना मुते देवुळता पोल्‍लोतुन केंजवा, सोदोम सहरतुन मिळ्न्दिस ऊळतस्के, तान्क बह आता, अदिन सीता कीम्ह्‌टु.✡17:32 पुटमुळि 19:26

33 “ओसो बोग़ इद बूमतगा आपुना जीवातुन पिसिह कीयलाह ऊळनोग़, ओग़ तना जीवातुन पोहतनोग़. ओसो बोग़ नयेनाह्‌क आपुना जीवातुन पोहतनोग़, ओन्क पूना जीवा दोर्कग़ा.✡17:33 मत्याल 10:39 34 नना मीक वेहतह्‌नन, नना वायह्‌पा नग़्का इर्वुर मन्कलोर उंदिय कटुदगा उंजिस मंदनुर. मति देवुळि ओर्विन बार तना संगे मनदलाह ओयग़ा, ओर्विन बार सिक्सा आयलाह अगान विळ्सिस ईयग़ा. 35 ओसो रेंड आस्कु जेताते पिंड नोग़सोर मतेके, देवुळि उंदतुन बार तना संगे ओयग़ा, उंदतुन बार अगान विळ्सिस ईयग़ा.✡17:35 मत्याल 24:41 [ 36 इर्वुर मन्कलोर पोलमतगा मतेके, देवुळि ओर्विन बार तना संगे ओयग़ा, ओर्विन बार अगान विळ्सिस ईयग़ा,” इतोग़.]§17:36 उचुक युनानि काग्देह्‌कनगा इद वचन इले. ✡17:36 मत्याल 24:40

37 अस्के कग़यवालोर येसुन, “इव पोल्‍लोङ बेगा आयनुङ सामि?” इनजोर ताल्ह्‌कतोर. अस्के, “बेगा हातद सेत्ता मंदग़ा, अगा गीदस्क जमा आयनुङ,”*17:37 तेना अर्तम, बेगा जन्वर्क डोलिह्‌ताङ अगाने गीदस्क जमा आस्ताङ, अद्रमलेह्‌काने देवुळता जीवा लेवोर दुनियामेटोरा पोग़ोन देवुळता नेयम उदग़ा. इनजोर येसु इतोग़.✡17:37 मत्याल 24:28