5
1 अस्के पया अद मांदतुन ऊळिसि, येसु गुड्रापोग़ोन अतोग़, अन्जि काग़्हतलाह उदतोग़. ओग़ उदतस्के, ओनाङ कग़यवालोर ओनगा वातोर. 2 पया येसु ओरिन काग़्हता बोटटोग़.
देवुळता देय्वाताङ पोल्लोङ
(लूकाल 6:20-23)
3 “बोर माट पापमतोरोम इन्जि देवुळतुन पर्ह्किह्तोर, ओर देवुळता देय्वातोर. देवुळबाबाल अद्रमतोरिह्के राजाल आस्तोग़.
4 “बोर दुकमते अळयह्तोर, ओर देवुळता देय्वातोर. देवुळि ओरिन मानेह कीयग़ा.
5 “बोरु माट उड्लोरोम इन्ह्तोर, ओर देवुळता देय्वातोर. देवुळ पूना बूम पुटिह कीयग़ा अस्के, ओरिह्के आयग़ा.
6 “देवुळता सेतेमते ताकलाह बोरु उनडा वसतप अहे कग़्विह्क आतप मन्ह्तोर, ओर देवुळता देय्वातोर. देवुळि ओरिन पंजिह कीयग़ा.
7 “बोरु दुस्रोरिन जीवा लोपतप मन्ह्तोर, ओर देवुळता देय्वातोर. ओरिन इंका देवुळ जीवा लोपतप मनदग़ा.✡5:7 याकुब 2:13
8 “बोरु तमाङ जीवाङ देवुळतगाने तासिह्तोर, ओर देवुळता देय्वातोर. बेस्काय उंद दिया ओरु देवुळतुन ऊळनुर.✡5:8 तोहचीतव पोल्लोङ 22:4
9 “बोरु लोकुरा कोंटेतुन माय्पिह कीसि, गूनम कीयलाह ऊळिह्तोर, ओर देवुळता देय्वातोर. ओरिन देवुळि नावाङ मग़्क-मयास्कनिर इनदग़ा.✡5:9 रोम सहरतोर 8:14
10 “बोरिह्कु देवुळता सेतेमते ताकनेनाह्क दुस्रोर तिपल कीस्तोर, ओर देवुळता देय्वातोर.✡5:10 याकुब 5:11; 1 पत्रु 3:14 देवुळबाबाल अद्रमतोरिह्के राजाल आस्तोग़.
11 “नावा पेदिर मीक अरताह्कु लोकुर बेस्के मीकु पास्कनुर, तिपल कीयनुर, अहे मीवा अडम मताङ-लेवाङ जोल कूदिङ वळ्ह्कनुर, अस्के मीट देवुळता देय्वातोरिर.✡5:11 1 पत्रु 4:14 12 अवटे मीट गिर्दाते एंदना-पाग़ना कीम्ह्टु, बाराह्क इतेके देवुळदीपते देवुळि मीकु बेरा इनम ईयग़ा.✡5:11-12 पिलिपितोर 1:29; इब्रितोर 10:34 मीवा मुनेतोर देवुळता कबुर वेहवालोर पेदल्किह्कु अद्रमलेह्काने विरुद वाता,✡5:12 2 इतिहास 36:15-16; मत्याल 23:31,37; बळयिर 7:52; 1 तिसलुनितोर 2:15 ओरा पोग़ोन वने देवुळि गिर्दा आंदु.✡5:10-12 10:22; 24:9; मार्कल 13:13; लूकाल 21:12,17; योहन 15:18-21; 16:33; 17:14; बळयिर 5:41; रोम सहरतोर 5:3; 2 तिमोति 3:12; याकुब 1:2; 1 योहन 3:13
बूमता ओवुरि, दुनियाता वेह्चि
13 “(इह केंजाट, मीटु ओवुर तिंडटगा वाटटाह्के मिटस आस्ता, ओसो अद अवो वने. अद्रमे) मीटे इद बूमता ओवुरलेह्का आंदिर. (दुनियातोरा लाग्वा बुद वीळनदायो इन्जि, मीट सेतेमताङ कबस्क कीम्ह्टु.) मति ओवुरता मिटस अतु बार इतेके, अद ओवुर मुनेतलेह्का ओसो आयग़ाया? पया अदिन पलते पोहचीतस्के, मन्कलोर काल्कने ओय्कना-विह्कना कीतस्के, ताना बातय कबळ अरवो. ✡5:13 मार्कल 9:50; लूकाल 14:34-35
14 “मेटापोग़ोन उदता सहर नग़्का-पियल सबेटोरिह्क दिसिह्ता, मको, अद्रमलेह्का मीटे इद दुनियाता वेह्चलेह्का आंदिर. 15 चिमलि नीर्विह कीसि, बह डूटलोप्पा तासिह्तोरा? आयो, तान बोव्लापोग़ोन तासतस्के, लोन अंता वेह्च आस्ता.✡5:15 मार्कल 4:21; लूकाल 8:16 16 इद्रमलेह्का मीवाङ सेतेम कबस्क लोकुरा मुनेह वेह्चलेह्का दिसिङ. अस्के ओर अव कबस्किन ऊळिसि, देवुळदीपते मनवाल मीवा बाबान मान ईयनुर.✡5:16 योहन 15:8; 2 कुरिंततोर 9:12-13; पिलिपितोर 2:15; 2 तिसलुनितोर 1:12; 1 पत्रु 2:12
अडोना लोप्पा काग़्हमुळि
17 “मोसानाङ अडोनु, अहे देवुळता कबुरतोरा सास्त्रमतुन, पाय्पिह कीयलाह नना वातन, इद्रम मीटु मुर्तिय विचर केमाटु. नना इतेक पाय्पिह कीयलाह आयो, मति सास्त्रमतुन पूरा करल कीयलाह वातन.✡5:17 रोम सहरतोर 3:31 18 इह केंजाट, नना सेतेम वेहतह्नन, पोग़ोटा बूमि, इळ्ता बूमि बूळेम आनाह्जोम, पूरा सास्त्रम करल आयवालेवा, अडोना सास्त्रमते रासतविनग्डाहि उंद गीता,*5:18 गीता इतेके रेसा. उंद सुनेतेला मायो आयग़ा. 19 अदिह्कु बोराय इचीटा अडोतुन माळोर, ओसो दुस्रोरिन वने अहे तमा मतप काग़्हतह्तोर, ओरु देवुळ राजेम कीयना लोकुरगा, सबेटोरिह्क उड्लोर आयनुर.✡5:19 याकुब 2:10 मति बोर इव अडोनु माळिह्तोर, ओसो अहे काग़्हतह्तोर, ओरु देवुळ राजेम कीयना लोकुरगा बेरोर आयनुर. 20 इंजेके सास्त्रमगूरुर, परुसिर देवुळता पोल्लोतुन कर्तुळते नोमिह्तोर इह्निर बहे. मति नना मीकु वेहतह्नन इतेके, वेरिह्काय वीळिस मीट देवुळता पोल्लोतुन माळवालेवा, मीकु देवुळ राजेम कीयना लोकुरगा जागा दोर्को आयग़ा.
ओङता लोप्पा काग़्हमुळि
21 “ ‘निमा बोने हव्कनायो.✡5:21 पेसमुळि 20:13; व्यवस्थाविवरण 5:17 हव्कवाल नेयम जोकना सिक्सातगा अरयनोग़,’ इद्रम देवुळि मुनेतोर पेदल्किन वेहच मता, तेन मीट पुतिरे. 22 मति इंजेके नना मीक वेहतह्नन, बोग़ तना ऐंगेटोनु [उगसे†5:22 उगसे इद पोल्लो सबेट्क पाळ्नाङ मोदुल काग्देह्कने वावो.] ओङ कीस्तोग़, ओग़ वने देवुळता नेयम जोकना सिक्सातगा अरयनोग़. ओसो बोग़ तना ऐंगेटोना कदर रेहतह्तोग़, ओग़ु यहुदि जाततोराङ पेदल्कना बेरा कोरटटगा दांड निहतनोग़. ओसो बोग़ दुस्रोनु ‘एय, पिसा-बय्तळि!’ इद्रम इन्ह्तोग़, ओग़ु देयह्कना मळ्गना किसबटटा सिक्सातुह्क ओजनोग़.✡5:22 याकुब 1:20; 3:6; 1 योहन 3:15
23-24 “अदिनेनाह्कु ओकावेला निमा नीवा कोडि मंदिरता गर्यातगा वाटलाह ओय्ह्निन, अस्के बोग़ विस्वसि नीवा अडम गुरागुरा मन्ह्तोग़ इन्जि, अगा तेना सीता बार नीक वाता इतेके, नीवा कोडि गर्यामुनेह अगाने अहे तासा, अह कीस पेसिस अन. मुने नीवा अडमतोग़ विस्वसिना संगे ईनाह-आनाह कलियिसि, गूनम आम्ह्टु. पया अग्डाह मल्स वासि, नीवा कोड वाटा.
25 “निमा नीक कसुर ओपवाल बार नेयम केवानके अनेकेन, अस्केने ओना ओङतुन रेहतलाहि, ओग़ बाताल ताल्ह्कनोग़, आतल कीम. अह केविन इतेके, ओग़ कसुर ओपवाल नीक नेयम केवाना कयदे ईयनोग़, वेग़ पया नीकु पोलिसना कयदे ईयनोग़, अहे निमा जेललोप्पा दाकिन. 26 इह केंजा, नीक सेतेम वेहतह्नन, निमा आक्रिते कोतातुह्क कोता जोळे केवालेवा, अग्डाहि मुर्तिय पलते पेस पग़विन आयकिन.
सिंड्रि-साट्याल वेरा लोप्पा काग़्हमुळि
27 “साट्याल कबळ कीयनद आयो,✡5:27 पेसमुळि 20:14; व्यवस्थाविवरण 5:18 इद्रमता अडो मीट मोसा मुय्तोना सास्त्रमताह केंजतिर. 28 नना मात्रम मीक वेहतह्नन, बोग़ाय बेदे आंचानके साट्याल विचरते ऊळिह्तोग़, ओग़ु तना जीवाते तान कवतोग़े. 29 अदिनेनाह्क नीवा विचरतगा, कोंडाते ऊळिस पापम कीयलाह आतेके, कोंडातुन बोग़ाय पेग़्हचीतेक आवालि, इद्रम निमा पापम आयमाकि इन्जि जिद कीमु. बाराह्क इतेके नीवा पूरा मेंदुलि, देयमदीपता अमेसाता सिक्सातगा दायना वाटो, नीवा मेंदुदा उंदि कोंडा बूळेम आयना, इद नीके पाय्दाता. 30 अद्रमे नीवा विचरते कयदे बार पापम कीयलाह आतिन इतेके, कयदुन बोग़ाय डायिस पोहचीतेक बेस आवालि, इद्रम निमा पापम आयमाकि इन्जि, जिद कीमु. बाराह्क इतेके नीवा पूरा मेंदुलि, देयमदीपता अमेसाता सिक्सातगा दायना वाटो, नीवा मेंदुदा उंदि कय बूळेम आयना, इद नीके पाय्दाता.
मुतेन देहचीयना
31 “बोग़ तना मुतेन विळ्सिसीस्तोग़, ओग़ु तान्क कळ्पाकग़ देहतनद सीटि रासिसीयना,✡5:31 व्यवस्थाविवरण 24:1 इद्रम मोसानाङ अडोने वेहतद मन्ह्ता. 32 नना मात्रम मीक वेहतह्नन, मुते दुस्रोन कववालेवा, बोग़ाय तना मुतेनु देहचीस्तोग़, तेला मति देवुळता मुनेह, अदु ओना मुते इंका मन्ह्ताये. अदिह्कु अदु दुस्रोन्क आतेके, ओर इर्वुर आसि देवुळता मुनेह सिंड्रि-साट्याल आतोरे. इद्रमि आंचाना मुनेतोग़ मुजो तान देहचीतस्के, तान सिंड्रि आनाह कीस्तोग़.✡5:32 मार्कल 10:11-12; लूकाल 16:18; 1 कुरिंततोर 7:10
किरियाङ-कोस्क
33 “देवुळता मुनेह कीतद किरियातुन माग़्ङमा, मति तान करल कीमु,✡5:33 लैव्यव्यवस्था 19:12; गिनती 30:2; व्यवस्थाविवरण 23:21 इन्जि मुनेतोर पेदल्किन मोसानाङ अडोने वेहतद मता, तेन ओसो मीट केंजतिर. 34 नना मात्रम मीक वेहतह्नन, किरिया ओतनाय आयो! देवुळदीपता वने किरिया ओतमाटु, बाराह्क इतेके देवुळ अगा राजेम कीयलाह उदिह्ता. 35 अहे बूम आयि इनजोर, बूमतुन बह ओतमाटु, बाराह्क इतेके अदु देवुळ राजेम कीयना लोकुर मनदना जागा आंदु. येरुसलेमतुन वने ओतमाटु, बाराह्क इतेके अद बेह्रा देवुळराजाना सहर आंदु. 36 किरिया इनजोरे तलातुन बह इटमा, बाराह्क इतेके निमा उंदाय नीवा तलाता केदुन पिळ्से केलु, कार्यल केलु कीयाय पग़विन, सबे देवुळताये कयदे मन्ह्ता. 37 इतेके मीवा वळ्ह्कमुळि इंगो इतेक इंगो, आयो इतेक आयो, कीयना मतेके इंगो कीकन इनु, कीयना लेवेक इसि केवोन इनु, इचोने मनदना गावले. इविस्किह्क वीळिस एक्वा पोल्लोङ (किरियाङ-कोस्क, ओतना) देयह्कनाङ‡5:37 देयह्कनाङ मोदुल कागिदते “लाग्वदिनाङ”. आस्ताङ.✡5:34-37 याकुब 5:12
कोदा पोयतना
(लूकाल 6:29-30)
38 “बोग़ाय नीवा कोंडातुन पेग़्हतेके, ओना कोंडातुन पेग़्हतनदु, बोग़ाय नीवा पदुन ओग़्हतेके, ओना पदुन ओग़्हतनदु,✡5:38 पेसमुळि 21:24; लैव्यव्यवस्था 24:20 इह वेहतदिन मीट मोसानाङ अडोने केंजतिर. 39 नना मात्रम मीक वेहतह्नन, बोग़ नीक कोंटे कीस्तोग़, ओना अडम दायनायो. बोग़ाय नीवा तिनळ बुकातुन चापुळ ईतेके, दावळ बुकातुन वने चापुळ ईयलाह ईमु. 40 बोग़ाय नीक कचिरतगा ओसि, नेयम देहवाना मुनेह नीवा केग़ता आङतुन ओयकन इनदनोग़, ओन्कु निमा नीवा केग़ता कोटजगातुन वने ओयलाह ईमु. 41 अद्रमे बोग़ सीपय नीक बीगर पोग़्सिह कीसि, वेळेटुन पोसि, दोबेङ-नूकेङ कीसोरे कोसमेंड ओतेके, ओना संगे निमा रेंड कोस्क जागा अनु. 42 बोग़ाय नीक बातालाय ताल्ह्कतेके, ओन्कु अद ईमु. अहे बोग़ाय नियग्डाहि करा ताल्ह्कनोग़, ओन्क ईयलाह निमा पेग़्के-मुनेह आयमा.
कोटुलतोरा नडुमि गूनम तोहतना
(लूकाल 6:27-28,32-36)
43 “नीवा ऐंगेटोनु जीवा कीम,✡5:43 लैव्यव्यवस्था 19:18 कोटुलतोन बार अडम ऊळा, इद्रम मीक काग़्हवालोर वेहचि, तेन मीट केंजतिरे. 44 मति नना मीक वेहतह्नन, मीट मीवाङ कोटुलतोरिन वने जीवा कीम्ह्टु, ओसो बोर मीक तिपल कीस्तोर, ओर बेस पिसिर इनजोरे, देवुळतुन कोळ्व कीसोर ताल्ह्काटु.✡5:44 रोम सहरतोर 12:14,20-21; 1 कुरिंततोर 4:12; 1 तिसलुनितोर 5:15; 1 पत्रु 3:9; 1 योहन 4:21 45 बाराह्क इतेके मीवा देवुळबाबाल तना पोळ्द पेहचि, नेह्नोरिह्क, लाग्वोरिह्क, सबेटोरिह्क वेह्च ईस्तोग़. अहे सेतेमतोरिह्क, पापमतोरिह्क, तना पेग़ अर्ह्चीस्तोग़.✡5:45 अय्यूब 5:10; देवुळताङ पाटाङ 65:10-13; बळयिर 14:17 अद्रमलेह्का मीट वने ओना लेह्का, मीवा कोटुलतोरिन जीवा कीतेके, मीवा पोग़ोटोग़ बाबानाङ मग़्क-मयास्क आय्ह्निर इन्जि, सबेटोरिह्क दिसकिर.✡5:45 पिलिपितोर 2:15 46 बोर मीक जीवा कीस्तोर, सिरप ओरिने मीट जीवा कीतिर इतेके, मीक देवुळि बाताल इनम ईयग़ा? सिद्वा एनवालोर मुळ्हेर वने अहे कीस्तोरा, केवोर? 47 मीटु सिरप मीवाङ गोततोरा संगे बेस तिरियतिर इतेके, विस्वस केवोरा, मीवा परक पया बाताल? देवुळतुन पुनवोर वने अहे कीस्तोरा, केवोर? 48 अदिह्क बेद्रम मीवा देवुळदीपतोग़ बाबाल पूरा सेतेम मन्ह्तोग़, अद्रम मीट वने पूरा सेतेमते ताकाटु.✡5:48 इपिसुसतोर 5:1
✡5:7 5:7 याकुब 2:13
✡5:8 5:8 तोहचीतव पोल्लोङ 22:4
✡5:9 5:9 रोम सहरतोर 8:14
✡5:10 5:10 याकुब 5:11; 1 पत्रु 3:14
✡5:11 5:11 1 पत्रु 4:14
✡5:12 5:11-12 पिलिपितोर 1:29; इब्रितोर 10:34
✡5:12 5:12 2 इतिहास 36:15-16; मत्याल 23:31,37; बळयिर 7:52; 1 तिसलुनितोर 2:15
✡5:12 5:10-12 10:22; 24:9; मार्कल 13:13; लूकाल 21:12,17; योहन 15:18-21; 16:33; 17:14; बळयिर 5:41; रोम सहरतोर 5:3; 2 तिमोति 3:12; याकुब 1:2; 1 योहन 3:13
✡5:13 5:13 मार्कल 9:50; लूकाल 14:34-35
✡5:15 5:15 मार्कल 4:21; लूकाल 8:16
✡5:16 5:16 योहन 15:8; 2 कुरिंततोर 9:12-13; पिलिपितोर 2:15; 2 तिसलुनितोर 1:12; 1 पत्रु 2:12
✡5:17 5:17 रोम सहरतोर 3:31
*5:18 5:18 गीता इतेके रेसा.
✡5:19 5:19 याकुब 2:10
✡5:21 5:21 पेसमुळि 20:13; व्यवस्थाविवरण 5:17
†5:22 5:22 उगसे इद पोल्लो सबेट्क पाळ्नाङ मोदुल काग्देह्कने वावो.
✡5:22 5:22 याकुब 1:20; 3:6; 1 योहन 3:15
✡5:27 5:27 पेसमुळि 20:14; व्यवस्थाविवरण 5:18
✡5:31 5:31 व्यवस्थाविवरण 24:1
✡5:32 5:32 मार्कल 10:11-12; लूकाल 16:18; 1 कुरिंततोर 7:10
✡5:33 5:33 लैव्यव्यवस्था 19:12; गिनती 30:2; व्यवस्थाविवरण 23:21
‡5:37 5:37 देयह्कनाङ मोदुल कागिदते “लाग्वदिनाङ”.
✡5:37 5:34-37 याकुब 5:12
✡5:38 5:38 पेसमुळि 21:24; लैव्यव्यवस्था 24:20
✡5:43 5:43 लैव्यव्यवस्था 19:18
✡5:44 5:44 रोम सहरतोर 12:14,20-21; 1 कुरिंततोर 4:12; 1 तिसलुनितोर 5:15; 1 पत्रु 3:9; 1 योहन 4:21
✡5:45 5:45 अय्यूब 5:10; देवुळताङ पाटाङ 65:10-13; बळयिर 14:17
✡5:45 5:45 पिलिपितोर 2:15
✡5:48 5:48 इपिसुसतोर 5:1