11
1 अस्के येसु माक कग़यवालोरिन, बारा मांतुन इव अडोङ वेहतनाङ मारिह कीतस्के, माक लोहतोग़. लोहचि, ओग़ अग्डाहि पेसिस अग्डाङ नाह्कने देवुळता कबुर वेहचोरे, काग़्हचोरे अतोग़.
योहनिना लोप्पा येसुनाङ गोटिङ
2-3 देवुळता पेदिरते एते मीहवाल योहन जेलते मनेके देवुळ लोहतोग़ येसुराजानाङ कबस्किन केंजतोग़. केंजिसि वेग़ तनाङ कग़यवालोरिन “येसुनगा अनजि इद्रम ताल्ह्किस वाटु, ‘बोग़ देवुळ लोहवाल पिसिह केवाल राजाल वावाल मतोग़, ओग़ बह निमानेया? बार माटु दुस्रोना अग़ ऊळकोमा?’ ” इनजि येसुनगा लोहतोग़. 4 वेर कग़यवालोर येसुनगा वासि अह ताल्ह्कतस्के, येसु वेरिन इतोग़, “मीट बाताङ केंजिह्निर, ऊळिह्निर, अविने मल्स अनजि योहनिह्क वेहाटे: 5 नाक देवुळ ईतद लावते गुडिर तोवयलाह आतोर, कूटालोर ताकलाह आतोर, मोंडरोगमतोर सव्रेम आस्तोर, एव्डालोर वेंदलाह आतोर, हातोर बार तेग़्किह्तोर, गरिबतोरिह्क बेसता कबुर केंजलाह दोर्किह्ता. 6 नना देवुळ लोहतोग़ पिसिह केवानन आंदन इनजि बोर उन्क-मन्क आयोर, ओर देय्वातोरु,” इनजि वेहतोग़.
7 योहननाङ कग़यवालोर अग्डाहि पेसिस अनेके येसु मुडोरा संगे पया योहनना लोप्पा वेहता बोटटोग़, “पेळ्ह्कल बूमते मीटु योहननाङ केंजलाह अतिर अस्के बेद्रमता मन्कन ऊळलाह अनजि? वळ्यते ऊङनद काग़रोंडालेह्का तना पोल्लोतुन मिळ्हच-मिळ्हच वेहवान ऊळलाह अनजिया? 8 अद्रमतोन आयवेके पया बोन ऊळ अन्ज मतिर? रेसेम गेंदेङ उहतोग़ मन्कनुया? केंजाटु, रेसेम गेंदेङ उहतोर मन्कलोर पेळ्ह्कल बूमतगा मनोर, राजमिदेनगा मन्ह्तोर. 9 पया बाराह्क अन्ज मतिर, रा? देवुळता कबुरतोन ऊळलाह, आयोया? मीक नना वेहतह्नन, मुनेतोर देवुळता कबुरतोरा सेवातुह्क वीळिस योहनना सेवा मता, अद्रमतोने मीट ऊळलाह अनजि. 10 ओनाय लोप्पा देवुळि मुने नाक वेहच मता,
‘ऊळा, नना नावा बळयिनोन नीवा मुने लोहतह्नन.
निमा लोकुरा जीवातगा वायना इनजि नीवा अग़दुन ओग़ तीर्ह्कनोग़.’✡11:10 मलाकी 3:1
इदे सास्त्रमते रासतद मन्ह्ता. ओग़ बळयिनोग़ इतेके योहनिये, देवुळि ओन नावा मुने लोहता. 11 इह केंजाट, नना वेहतह्नन इतेके, देवुळताङ पाळ्नाङ अडोने ताकवालोरगा, देवुळता पेदिरते एग़ मीहवाल योहनिह्काय वीळिस बोग़े बेरोग़ पुटोग़ आसि. मतिंगा बोराङ जीवानगा देवुळ राजेम कीस्ता, ओरग्डाहि सबेटोरिह्क उड्लोग़ वने योहनिह्काय बेरोग़. 12 देवुळता पेदिरते एग़ मीहवाल योहन कबुर वेहचोर वाताङ दियानाहि नेंड एवनाह्जोम देवुळ तना राजेमतुन जोरतेने निल्पिह कीसोर मन्ह्ता, अह आसि लोकुर तान पोयतलाह दकाङ-बूकाङ ईसोरे लोप्पा नेङिह्तोर.*11:12 मोदुल कागिदतुन ऊळतेके, इद अर्तमवने अरयह्ता: देवुळता पेदिरते एते मीहवाल योहन कबुर वेहचोर वाताङ दियानाहि नेंड एवनाह्जोम देवुळता राजेमता अडमि लळय आसोर मन्ह्ता, अहे लळय केवालोर तान एहतलाह ऊळिह्तोर. 13 इतेके योहन वानाह्जोमु, देवुळता सबे कबुरतोरा सास्त्रम ओसो मोसानाङ अडोङ मुनेने देवुळ लोहवाल राजाल वायनदिना लोप्पा वेहच मताङ. 14 मुनेतोर कबुरतोर बेस्के ‘देवुळ लोहवाल राजाना मुने एलियाल कबुरतोग़ इद बूमते मल्स वायनोग़,’ इनजोर इंदुर, अस्के ओरु योहनिना लोप्पाने वेहन्दुर. इदिन पुनदलाह मीवा विचर मन्ह्ता इतेके पुन्ह्टु: योहन इतेके एलियललेह्काडोग़े! 15 मियग्डाहि बोरिह्कु पुनदलाह गिर्दा मन्ह्ता, नावा पोल्लोतुन बेस केंजाटु!
16-17 “मीट योहननाङ केंजवोरिर, नावाङ इंका केंजवोरिर, मीट बातोरिर इनदना, तेन केंजाट. बोर पेकोर बजरतगा कग़्सलाह उदिसि तमाङ गोतयालोरिन केयतोर. केयसोर ओर इन्ह्तोर,
‘मीक इनजोर माटु तुरुस्कने गिर्दाते पाटाता रेगा ऊरतोम तेला मति मीट एंदविर.
पया माट हामुर रेगाताङ पाटाङ ओतोम,
तेला मति मीट मोरो-मोरो इनजोरे,
अळसोरे अर्युल पायविर.’
नावाङ कबस्किन ऊळतोरिर मीट इद्रमलेह्काने मह्निर. 18 अद्रमे योहन लोकुरा संगे उदसोर बेस तिनजोर-उनजोर वावोग़, अदिह्क इसि ‘ओनगा देयम मन्ह्ता,’ इद्रम ओन इन्ह्तोर. 19 मति माने-मन्कना नडुम पुटटोनन बेस तिनजोर-उनजोर वाताह्कु इसि नाक वळ्ह्किह्तोर, ‘ओन ऊळाट, ओग़ उळ्बे, ओचे, सिद्वा एनवालोरा, पाप्यहलोरा गोतयाल!’ इद्रम नाक इन्ह्तोर. योहन अह मताह्क वने मीक अरवोये, नना इह मताह्क वने मीक अरवोये. मति बोर देवुळता बुदते ताकिह्तोर, ओराङ कबस्क सेतेम दिसनुङ. अदिह्क योहनना अहे नावा लोप्पा सेतेमताङ विचर्क कीम्ह्टु.”
येसुन केंजवोराङ नाह्किह्क दुकमि
(लूकाल 10:13-15)
20 पया बेव नाह्कने येसु तनाङ बेह्रा डीसाताङ वेल्लाङ कबस्क कीतोग़, अग्डोरु पापमताहि मिळ्न्दवह्कु ओरिन ओग़ु इहलेह्का तप तोहता बोटटोग़: 21 “ए कोराजिन नाटेनोरिर! ए बेत्सेदा नाटेनोरिर! देवुळि मीक सिक्सा ईयग़ा. बाराह्क इतेके मियगा बेव बेरा डीसाताङ कबस्क कीतन, अवु सोर, सिदोन इव लाग्वाङ नाह्कने कीस मतेके अग्डोरु अस्केन बेस्कोटे निटमे केंजेर; पोता-गेंदेङ उहचि, तलातगा नेग़ दोसिसि ओरु ‘मावा पापमताहि मिळ्न्दतोम,’ इनजि तोहेर. मति मीट इतेक अह केविर! 22 करल इदे मन्ह्ता, सोर, सिदोन इव नाह्िकह्काय वीळिसि मीक नेयमता आक्रि दियाते देवुळि वेल्ला सिक्सा ईयग़ा. 23 ओसो ए कापेर्नाटेनोरिर! मीट देवुळदीपतगा पोग़ोन एवयकोम इह्निरा? आयो, देवुळि मीक इळ्ने हानादीपतगा पोहचीयग़ा! मियगा नना बेव बेरा डीसाताङ कबस्क कीतन, अव कबस्क सोदोम नाटे तेला कीस मतेके अद नाटेनोर तमा पापमताहि मिळ्न्देर, अह आसि सोदोम नेंड एवनाह्जोम पिसालि, देवुळि तान बूळे केवो आवालि. मति मीट इतेक मीवा पापमताहि मिळ्न्दविर! 24 नना मीक वेहतह्नन, सोदोमतुह्काय वीळिसि मीकु नेयमता आक्रि दियाते देवुळि वेल्ला सिक्सा ईयग़ा.”
मोतातोरिह्कु आरम
(लूकाल 10:21-22)
25 अस्के येसु तना बाबान जोहर कीस इतोग़, “हे देवुळबाबा! इळ्ता-पोग़ोटा बूमता सामिनिन! नना नीक जोहर कीय्ह्नन, बाराह्क इतेके निमा इव सेतेम पोल्लोन ‘बुदतोरोम, पका तेळियतोरोम,’ इनवालोरिह्क तोहवालेवा, ‘उड्लोरोम, बुद लेवोरोम,’ इनवालोरिह्क तोहतिन. 26 निटमे बाबा, नीवा विचर इद्रमे कीयनद मता.”
27 पया येसु इतोग़, “नावा बाबाल नाकु सबे पुनदलाह ईतोग़.†11:27 मोदुल कागिदते “नावा बाबाल नावा कयदे कतमे ईतोग़.” देवुळबाबान विळ्सिस बोग़े बार देवुळता मग़िन पुनोग़. ओसो बाबान सिरप नना, ओना मग़नन, पुह्नन, ओसो बाबान तोहतलाह बोरिन नना आचिह्नन, ओरवने बाबान पुंदनुर.
28 “एय कह्टेम केवालोरिर, मीवाङ गूरुर वेहतव अडोङ-उतुर्कना मोता कांजतोरिर, मीट सबेटोरिर नयके वाटु, अस्के नना मीवाङ जीवाह्कु आरम ईकन. 29 नना पेदातनम केवानन आयोन, ओसो जीवाते कुलुल मह्नन इनजि मीटु मीवाङ गूरुरा जुवातुन पोहचि नावाये जुवा कांजाटु, ओसो नावाङ कग़याटु, अहे कीम्ह्टु, अस्के मीवाङ जीवाह्कु आरम दोर्कग़ा. 30 बाराह्क इतेके नावा जुवा पुहो, नावा मोता अल्को मन्ह्ता!”