16
येसु परुसिरा, सदुकिरा तप तोहतह्तोग़
1 पया पेग़्के “निमा देवुळदीपताहि वातिन इनजि माक उंदि सीना तोहा,” इनजोरे सदुकिर, परुसिर, वेर रेंड तुंगानोर उय्तुर येसुना पट ऊळलाहि ओनगा वासि ओन ताल्ह्कतोर. ओग़ कीया पग़वोग़ इतेके जोल केवाल माक दोर्कनोग़, इनजि वेरा विचर मता. 2 अस्के येसु वेरिन इतोग़, “मीटु पोग़ोन मोयुलतके ऊळिसि नेह्ना, लाग्वा दिया पुनदलाह उसर मह्निर. नुल्पे इह्निर, ‘कम्कल मोयुल मन्ह्ता अस्के नाळताह पेग़ वावो, उगळ आयग़ा.’ 3 ओसो नग़्कम डुंगा पंडलेह्काडा मोयुलताङ कोकिन ऊळिसि मीट इह्निर, ‘नेंड गंगा पोयता, दूंद-मुर्गम आयग़ा.’ मीटु पोग़ोटा मोयुलतुन गंता कीस पुह्निर, मति इद कालमते देवुळ बाताल कीस्ता, ताना अर्तम मीट पुनदा पग़विर! 4 लाग्वोरु, देवुळतुन केंजवोरु, नावाङ बेरा डीसाताङ कबस्किन ऊळतोरु इद पीळतोरु सीना ताल्ह्किह्तोर. मति योनाल इनवाल देवुळता कबुरतोन्क बह-बह आता, सिरप अदे सीना नना ओरिह्क तोहतकन, तान विळ्सिस दुस्रा सीना तोहोन,” इनजि येसु ओरिन वेहतोग़. पया ओग़ माट कग़यवालोरोम बार ओरिन विळ्सिस अतोम.*16:4 इद बेद्रमता सीना मन्ह्ता इनजि मत्याल 12:39-40, इगा ऊळाटु.
5 सम्दुरतुन वेंडिसि अबर बाजे अतस्के, “अरे! माट आरिन ततलाह माग़्ङतल, रा,” इनजि माट कग़यवालोरोम सीता कीतोम. 6 अस्के येसु माक वेहतोग़, “परुसिर, सदुकिर, वेरा ओयता पिंडटा लोप्पा उसरते मन्ह्टु, ताना अग़दुह्क आयमाट,” इनजि इतोग़. 7 “माट आरिङ तवाह्के बहे गूरु माक वेग़्हतह्तोग़,” इनजि माट माटे वळ्ह्किंदोम. 8 तेन पुनजि येसु इतोग़, “एय विस्वस लेवोरिर, मीट आरिङ इलवाह्कु बाराह्क इचोन आलिह कीय्ह्निर? 9 नाकु आरिना पर्वा इले इनजि मीट इंका पुनविरा? मुने नना वेट एयुङ आरिने एयुङ अजर्क (5000) मन्कलोरिह्क तिहतन अस्के तिंदलाह अचोन मयतप मता इतेके वेल्लाङ डालाने पिसतविन गुम कीतिर, तेना सीता मन्ह्ताया? 10 अद्रमे नना वेट एळुङ आरिने नालुङ अजर्क (4000) मन्कलोरिह्क तिहतन अस्के बेचोक डालाङ आरिङ पिसिसि, तेना तेला सीता मीक इले? 11 नना आरिना लोप्पा वळ्ह्कोन आंदन, इदिन मीट बह पुनविर? मति नना ओसो वेहतह्नन, परुसिर, सदुकिर, वेरा ओयता पिंडटा एरेत्क आयमाटु,” इनजि येसु माक इतोग़. 12 अस्के गूरु आरिङ पंडनद ओयतद पिंडटा लोप्पा वळ्ह्कोग़ आंदोग़, मति परुसिर, सदुकिर, वेराङ गलत काग़्हतना लोप्पा नमनायो इनजि गूरु वेहतह्तोग़ इद्रम माट पुतोम. इतेके बेद्रम इचुने ओयता पिंडि वेल्ला पिंडटुन ओय्पिह कीस्ता, अद्रमे वेरा गलत काग़्हमुळि वेल्लाटोर लोकुरिन लेसिह कीस्ता.
येसु बोग़ मन्ह्तोग़ इनजि पत्रु पुन्ह्तोग़
(मार्कल 8:27-30; लूकाल 9:18-21)
13 माटु केसरिया-पिलिपि इनदनद नाग़ एरे वातस्के “लोकुर माने-मन्कना नडुम पुटटोनु बार इनजोर मंदनुर कोनि?” इनजि येसु माक ताल्ह्कतोग़. 14 अस्के माट इतोम, “गूरु, निमा मुनेतोग़ बोग़ो कबुरतोग़ जीवा अरस मंदनोग़ इनजि लोकुरा विचर मन्ह्ता. अहे नीक वेल्लाटोरे इन्ह्तोर, ‘एते मीहवाल योहन मंदनोग़.’ ओसो उय्तुर इन्ह्तोर, ‘एलियाल कबुरतोग़ मंदनोग़.’ ओसो इन्ह्तोर, ‘यिर्मयाल कबुरतोग़ मंदनोग़,’ अद्रमे ओसो ‘बोग़ ओर्वोग़ देवुळता कबुरतोग़ मुनेतोग़ मंदनोग़,’ इद्रम इन्ह्तोर.” 15 “इंगो, मति मीट पया नना बोनन इनजोर नाक इह्निर?” इनजि येसु ताल्ह्कतोग़. 16 अस्के सिमोन पत्रु इतोग़, “सामि, निमा इतेके जीवात मनदनद देवुळता मग़निन, अहे अद किरिया कीस वेहतपु मावा इस्रयेलतोरा पिसिह केवानिन,” इह इतोग़.
17 येसु सिमोनिन इतोग़, “सिमोन, योनाना मग़निन, देवुळ नीवा पोग़ोन गिर्दा आस्ता, बाराह्क इतेके मन्कना बुदते इदिन निमा पुनविन, मति नावा देवुळदीपतोग़ बाबाल, ओग़े नीक पुनाह कीतोग़. 18 नीवा पेदिर पत्रु (इतेके बंडाये) नना तासिह्नन. बेद्रम आदतगा दोहतद लोन डिङ इनाह मन्ह्ता, अद्रमलेह्का नावा मुडा जोता निमाने मंदकिन, अस्के हामुरवने नावा मुडुन आरे कीया पग़वो आयग़ा.†16:18 मोदुल कागिदते: हानादीपता दर्वजावने नावा मुडुन गेल्सो आयग़ा. 19 अहे लोकुर देवुळता राजेमते नेङना इनजि नना नीवा कयदे तालम कय्क ईतपु, अद अग़दुन तेग़यलाह नीक अदिकर ईकन. ओसो निमा ‘इद पोलिह्ता,’ ‘अद पोलो,’ इनजि वेहतेके, नीवा वेहतद पोल्लोतगा देवुळता अदिकरवने मंदग़ा.” 20 पया “बोग़ देवुळ लोहवाल पिसिह केवाल वावाल मतोग़, ओग़ ननाने, इदिन बार इंजेके बोने वेहमाट बहा,” इनजि येसु माक कग़यवालोरिन उकुम ईतोग़.
येसु तना वायना हामुरतुन पुनाह कीस्तोग़
(मार्कल 8:31; 9:1; लूकाल 9:22-27)
21 अस्केडाहि येसु माक कग़यवालोरिह्कु वेहता बोटटोग़, “नाकु येरुसलेम सहरते दायाय पोयतह्ता. अग्डोर पेदल्कु, पेर्मालोर, सास्त्रमगूरुर नाकु वेल्लाय तिपल कीयनुर, हव्कनुर, ताना पया मूंड दियाने नना तेग़्ककन, इव करलि, अद्रम आयनुङे!” इन्ज वेहतोग़. 22 अस्के देवुळ लोहतोग़ राजाल बेस्केन हायनदायो, इद्रम विचर कीसि, पत्रु येसुन बाजेते अबर ओसि इतोग़, “गूरु, अद विचरे केमा निमा! अह मुर्तिय आयमाकि,” इनजि येसुना वेहतद पोल्लोता अडम वळ्ह्कतोग़. 23 अस्के येसु पत्रुनके मल्स ऊळिस इतोग़, “एय देयमता बुदते वळ्ह्कवनिन, अद्रमता बुदतुन पोहचीम! निमा नाकु कटळ वाटटप एग़्कुळ आय्ह्निन. नीवा विचरि मन्कना विचरतेह मन्ह्ता, मति देवुळता विचरतके इले,” इनजोर इतोग़.
24 पया येसु माक कग़यवालोरिन इतोग़, “बोर नावाङ कग़यलाह वायना विचर कीस्तोर, ओर तमा हव्कनागुटा कांजतप, तमाये कुसितुन पोहचि नावा अग़दे ओरिह्क ताक पोयतग़ा. 25 बोर इद बूमते तमा कुदता जीवातुन पिसिह कीयलाह ऊळिह्तोर, ओर आक्रिते बूळेम आयनुर. मति बोर नयेनाह्कु सबे पोहतह्तोर, ओरिह्क देवुळि पूना जीवा ईयग़ा. 26 मन्कल पूरा दुनियातुन गेल्सतोग़ तेला मति तना कुदता जीवातुन पिववद किसबटटगा लेसिह कीतोग़ इतेके ओन्क बाताल पाय्दा आयग़ा? नीवा जीवा लेसता इतेके ताना बद्लातुह्क बातय ईया पग़विन! 27 केंजाटु, माने-मन्कना नडुम पुटटोनन, नना नावा बाबाना डीसाते, नावाङ देवतुल्कना संगे वायकन. अद तूकने नना सबेटोराङ, बोना ओना कबळतुन ऊळिसि, नेयह्क कीकन, कीसि तमा जीवातुन लेसिह कीतोरिनु वेल्ला सिक्सा ईकन. 28 इह केंजाट, नना वेहतह्नन, माने-मन्कना नडुम पुटटोनन इद दुनियाते राजेम कीयलाह वायकन अस्के मियग्डाहि उय्तुर नावा संगे मनवालोरिर हायना मुनेन नाक ऊळकिर.”