22
मर्म-कुळ्पता पुन्पिह कीयनद पीटो
(लूकाल 14:16-24)
1 येसु ओसोवने लोकुरिह्कु पुन्पिह कीयनाङ पीटोङ वेहता बोटटोग़. 2 ओग़ इतोग़, “देवुळताङ राजेम कीयनव अडोङ इहलेह्का आंदुङ. वग़ोग़ राजाल मतोग़, तना मग़ना मर्मिह्कु उंद कुळ्प तासतोग़.✡22:2 तोहचीतव पोल्लोङ 19:7 3 ओग़ु मर्म-कुळ्पतुह्क वायलाह, बोन-बोन मुने वेहच मतोग़, ओन-ओन केयिस ततलाह इन्जि, तनाङ ओर्युलतोरिन लोहतोग़.✡22:3 तोहचीतव पोल्लोङ 19:9 मति ओर केयता मुलु ‘माट वावोम!’ इनजोर इतोर.
4 “वावोम इनजोर इताह्कु, पया ओसो उय्तुर ओर्युलतोरिन राजाल इह इन्ज लोहतोग़, ‘ऊळाट, मियेनाह्कु नना कुळ्प तयर कीतन. नावाङ असलताङ कुरा-पियोङ ओसो कोंदाङ हव्कतन, पुला बाताल वेस तयरे मन्ह्ता. जावा उनडलाह मीट मात्रम दटु इन्जि, केयता मुडुन वेहाटु,’ इनजोरे राजाल ओर्युलतोरिन लोहतोग़. 5-6 मति वेर इचोन वेहचाय, राजाना पोल्लोतुन पर्वा केवालेवा, उय्तुर तमाङ पोलह्कनके अतोर, उय्तुर बारा दंदातुह्क अतोर, ओसो उय्तुर बारा राजाना ओर्युलतोरिन पोसि, ओरिन उस्किस-पास्किस, नल्हचि हव्कतोर. 7 इदिन ऊळिसि राजाह्क पका ओङ वाता, पया तनाङ सीपय्किन लोहचि, ओर हव्कतोरिनु कतम बूळे कीसि, ओरा नाटुन ओग़िसीतोग़.
8 “अस्के राजाल तनाङ ओर्युलतोरिन इतोग़, ‘मर्म-कुळ्प इतेक तयरे मन्ह्ता, मति केयता मुल कोनि इद कुळ्पतुह्क ओप्पोर. 9 अदिह्क मीटु अग़िनगा, गोटुस्कनगा, बजर्कनगा अन्जि, बेच्वुर दोर्किह्तोर, अच्वुरिन मर्म-कुळ्प तिनदलाहि केयिस ताट.’ 10 पया ओर्युलतोर अहे कीतोर; अग़िनगा अन्जि, नेह्नोर-लाग्वोर बेच्वुर ओरिह्क दोर्कतोर, अच्वुरिन सबेटोरिन जमा कीसि ततोर. अस्के तिनवालोर मर्म-मंडामेंड तुत्ने आतोर.
11 “पया राजाल वेर वाता मुडुन ऊळ वातोग़, अस्के मर्मतेनाह्क बेसताङ गेंदेङ केग़वोग़, वग़ोग़ मन्कल ओन्क दिसतोग़. 12 ‘इंगो रा तमो, मर्मिह्क बेसताङ गेंदेङ केग़वा, निमा मर्म-मंडातगा बह नेङतिन, डा?’ इन्जि राजाल वेन ताल्ह्कतोग़. अह इतस्के वेना मोकम एग़ रेगता. 13 राजाल पया तनाङ आजोङ आयवालोरिन केयिस इतोग़, ‘वेनाङ कय्किन-काल्किन दोहचि, वेन पलत मुर्गंगाते पोहचीम्ह्ट. अगा मनवालोर अळयना-केयना, मुडुर-मुडुर पल्क कोग़्कना, इह कीसोर मनदनुर,’ इन्जि इतोग़.
14 “इद पुन्पिह कीयनद पीटोता अर्तम इह मन्ह्ता. देवुळि तना राजेमता बर्कत ईयलाह केयतोरु वेल्लाटोरे मन्ह्तोर. मति (तानाङ पोल्लोङ केंजिसि तानक्के वावालोरु इतेके) देवुळि आचतोरु उय्तुरे मन्ह्तोर.”✡22:14 2 पत्रु 1:10; तोहचीतव पोल्लोङ 17:14
राजाह्कु सिद्वा ईयनदा, एवदा?
(मार्कल 12:13-17; लूकाल 20:20-26)
15 पया परुसिर अग्डाह पेसिसि, कतमतोर उंद जागाते कलियिसि, येसुन बह कीस तेला, ओना वळ्ह्कनद पोल्लोते, ओन एग़्किह कीसि तप तोहतकल इन्जि, आय्डा कीतोर. 16 अह कीसि, ओर तमाङ कग़यवालोर ओसो एरोद राजाना तुंगातोर उय्तुरिन येसुन ताल्ह्कलाह लोहतोर. “गूरु, निमा सेतेम मन्कनिन आसि, देवुळता अग़ सेतेमते तोहतह्निन इनजोर, माट पुह्नोम. निमा बोर बाताल इनदनुर इनजोर आल्सविन, लोकुरा मोकम ऊळिस वळ्ह्कविन, इद माक एर्काये. 17 अह इतेक माक उंद पोल्लो वेहा. रोम सर्करतुह्क सिद्वा दोहतनद मावाङ अडोना अडम मन्ह्ताया, इलेया? नीवा विचर बह मन्ह्ता?” इन्जि येसुन वेर ताल्ह्कतोर.*22:17 रोम सर्करतोर लळय कीसि, मावा देसेमतुन ऊंदतोर इन्जि, यहुदिर ओरिन कोंटे कींदुर. मति एरोद राजाल बार, रोम सर्करता तोळ आंदोग़. येसु सिद्वा दोहचीम्ह्टु इतेके, यहुदिरा अडमतोना लेह्का आवेग़. मति सिद्वा दोहमाटु इतेके, एरोदिना तुंगातोर सर्करतगा ओना रिपोट एवेर. इद्रमलेह्का परुसिर येसुन एग़्किह कीयलाह ऊळिंदुर.
18 वेरा कोंटेतनमतुन पुन्जि, येसु वेरिन इतोग़, “ए सोङ केवालोरिर, नाक बाराह्क एग़्किह कीयलाह ऊळिह्निर? 19 नाक सिद्वा दोहतनद उंद रुप्या-बंडि तोहाट.” अस्के वेर उंदि रुप्या-बंडि तोहतलाह ततोर.†22:19 इद रुप्या-बंडटा चित्र लूकाल 20:24 अगा दोर्किह्ता. 20 तचीतस्के येसु वेरिन ताल्ह्कतोग़, “इद बंडटगा बोना पोटो ओसो पेदिर रासतद मन्ह्ता?” 21 ओर इतोर, “कय्सर राजानाये!” इदिन केंजिसि येसु इतोग़, “अह इतेके, बेद रोम राजेमता कय्सर राजाना मन्ह्ता, अद ओन्के दोहचीम्ह्टु. मति बेदिन देवुळ ताल्ह्किह्ता, अदिन देवुळतुह्क दोहचीम्ह्टु.”✡22:21 रोम सहरतोर 13:7; 1 पत्रु 2:17
22 येसु वळ्ह्कतद इद पोल्लोतुन केंजिसि, वेर बयल आतोर. अह कीसि येसुनग्डाह पेसिस अतोर.
जीवा अरयनदिना लोप्पा गोटिङ
(मार्कल 12:18-27; लूकाल 20:27-40)
23-24 (यहुदिरगा सदुकिर इनवालोर उंद तुंगातोर मतोर; मन्कलोर हासि मल्स जीवा अरवोर इन्जि वेर इंदुर). अदे दिया उय्तुर सदुकिर येसुन एग़्किह कीयलाह, ओनगा वासि ताल्ह्कतोर, “गूरु, मोसानाङ अडोङ वेहतपु, बोग़ाय मग़मियाळ लेवाय हातोग़ इतेके, ओना रांडे मुतेना संगे ओना तमोग़ जोळेम आसि, तमदादाना लोता लोन निल्पिह कीयना.✡22:23-24 व्यवस्थाविवरण 25:5 25 ऊळा, मयगा तमोग़ एळवुर मतोर. मुनेतोग़ उंद मुते ततोग़, मति मग़मियाळ आयवाये हातोग़, पया ओना मुते ओना तमिह्क आता. 26 इद्रमलेह्का मनेक मनेक वेग़ वन तमोग़ मग़मियाळ आयवाये हातोग़, हातस्के ओसो ओर्वोग़ तमोग़ तान जोळेम आतोग़. ओग़ वने हातोग़, इद्रमलेह्का तमोग़ एळवुर आसि, ताना संगे जोळेम आसि हातोर. 27 कतमतोर हातापया, अद आंचाळ वने हाता. 28 इंजेक माक वेहा, हातोर मल्स जीवा अरयनद वेलाते, ओर जीवा अरतस्के, तमोग़ एळवुरग्डाहि अद आंचाळि बोना मुते आयग़ा? अद इतेके कतमतोराय मुते आस मता कोनि!” इन्जि सदुकिर इतोर. (हामुरताहि जीवा अरयनदिन बय्तळ लोकुरे नमिह्तोर इन्जि तोहतलाह, वेर इह ताल्ह्कतोर.)
29 अस्के येसु ओरिन इतोग़, “हामुरताहि जीवा अरयना लोप्पा, देवुळता सास्त्रम बाताङ वेहतह्ता, अविन मीट पुनविर, ओसो हामुरताहि तेग़्किह कीयलाह देवुळता लावतुन वने पुनविर, अदिह्क मीटु गंगाते लेसतप मह्निर. 30 हातोर मल्स जीवा अरयनुर अस्के, ओरु जोळजंतुर आयोर वने, ओसो जोळजंतुर कीस एवोर वने. ओर मात्रम देवुळदीपताङ देवतुल्कना लेह्का मर्मिङ आयवाय मनदनुर. 31 मति हातोर मल्स जीवा अरयनुर, ताना लोप्पा देवुळि सास्त्रमते वेहच मता, अदिन मीट अर्विसि, ताना अर्तम बेस्केन पुनविरा? 32 (मावोर मुनेतोर पेदल्क अब्रहममुय्तोग़, इसकमुय्तोग़, याकुबमुय्तोग़, वेर हातापया वेल्लाङे दियाने) देवुळि इह वेहच मता, ‘अब्रहम, इसक, याकुब वेर मोळ्कनद देवुळतन ननान आंदन!’✡22:32 पेसमुळि 3:6,15; बळयिर 3:13; 7:32 देवुळतुन हातोर मोळ्कोर, मति जीवात मनवालोरे मोळ्किह्तोर, (इतेके देवुळि अह इनदनस्के, ओर मुवुर हातोराङ जीवाङ मंदुङे,) इद मीक तेळियोया?” इन्जि येसु सदुकिरिन इतोग़.
33 येसु इचोन वळ्ह्कतस्के, अगा सर्ने मता लोकुर ओनाङ काग़्हतनाङ पोल्लोन केंजिसि बामतोर.
सबेट्क बेरा अडो बेदु?
(मार्कल 12:28-31; लूकाल 10:25-28)
34 येसु सदुकिरिन मेसेह्ने कीस मतोग़ इन्जि, वेर परुसिरिह्क तेळियताह्कु, जमा आसि येसुनके अतोर. 35-36 ओरग्डोग़ ओर्वोग़ सास्त्रमगूरु येसुना पट ऊळलाहि ओन ताल्ह्कतोग़, “मोसानाङ अडोना सास्त्रमतगा सबेट्क बेरा अडो बेद आंदु, गूरु?” 37 येसु इतोग़, “देवुळि नीवा सामि इनजोर, तान निमा पूरा बुदताहि, पूरा जीवाताहि, पूरा विचरताहि जीवा कीमु.✡22:37 व्यवस्थाविवरण 6:5 38 इदे अडो सबेट्क बेरा ओसो मोदुल अडो आंदु. 39 ओसो तेनाय लेह्का दुस्रा अडो इदु: निमा कुदतुन जीवा कीतपु, दुस्रोरिन वने जीवा कीम.✡22:39 लैव्यव्यवस्था 19:18✡22:37-39 1 योहन 4:21 40 इव रेंड अडोङ इतेके, मोसानाङ सबे अडोना ओसो देवुळता कबुरतोरा पूरा काग़्हमुळता मोदुल आस्ता,”✡22:39-40 रोम सहरतोर 13:8-9; गलातितोर 5:14 इन्जि येसु इतोग़.
दाविदना पुळ्गतोग़, ओना सामि
(मार्कल 12:35-37; लूकाल 20:41-44)
41-42 पया परुसिर येसुना सर्ने जमा आतस्के, येसु ओरिन ताल्ह्कतोग़, “देवुळ लोहवाल किर्स्तु इनवाल पिसिह केवाल, वेना लोप्पा मीवा विचर बह मन्ह्ता? वेग़ बोना पुळ्गतोग़, रा?” “दाविद राजाना पुळ्गतोग़,” इन्जि वेर इतोर. 43 “अह इतेके दाविदिह्क देवुळता जीवा दळ्म अर्स वेहताह्कु,✡22:43 1 कुरिंततोर 12:3 वेग़ पिसिह केवानु ‘सामि’ इनजोर ओग़ इह बह इतोग़? 44 दाविद सास्त्रमते इह रासिस तासतोग़, सीता मन्ह्ताया?
देवुळि नावा सामिन इता,
‘बेचानाह नना नीवा कोटुलतोरिन, नीवाङ काल्कना इळ्न तच एवोन,
अचानाह नावा तिनळ बाजेता राजगादेतगा उदिस मन,’ इता ✡22:44 देवुळताङ पाटाङ 110:1; बळयिर 2:34-35; 1 कुरिंततोर 15:25; इब्रितोर 1:13
45 दाविद कुदि ओनु ‘सामि’ इन्ह्तोग़ इतेके, ओग़ सिरप दाविदना पुळ्गतोग़ बह आया पग़यनोग़?” इन्जि येसु ताल्ह्कतोग़. 46 अस्के ओनु यहुदिरा पेदल्कनाहि बोन्के, उंद पोल्लो वने मल्हतलाह वावो. अद दियाताहि येसुन इंका ओसोवने बाताङाय ताल्ह्किसि एग़्किह कीयलाहि, बोग़े बह दीरा केवोग़.
✡22:2 22:2 तोहचीतव पोल्लोङ 19:7
✡22:3 22:3 तोहचीतव पोल्लोङ 19:9
✡22:14 22:14 2 पत्रु 1:10; तोहचीतव पोल्लोङ 17:14
*22:17 22:17 रोम सर्करतोर लळय कीसि, मावा देसेमतुन ऊंदतोर इन्जि, यहुदिर ओरिन कोंटे कींदुर. मति एरोद राजाल बार, रोम सर्करता तोळ आंदोग़. येसु सिद्वा दोहचीम्ह्टु इतेके, यहुदिरा अडमतोना लेह्का आवेग़. मति सिद्वा दोहमाटु इतेके, एरोदिना तुंगातोर सर्करतगा ओना रिपोट एवेर. इद्रमलेह्का परुसिर येसुन एग़्किह कीयलाह ऊळिंदुर.
†22:19 22:19 इद रुप्या-बंडटा चित्र लूकाल 20:24 अगा दोर्किह्ता.
✡22:21 22:21 रोम सहरतोर 13:7; 1 पत्रु 2:17
✡22:23-24 22:23-24 व्यवस्थाविवरण 25:5
✡22:32 22:32 पेसमुळि 3:6,15; बळयिर 3:13; 7:32
✡22:37 22:37 व्यवस्थाविवरण 6:5
✡22:39 22:39 लैव्यव्यवस्था 19:18
✡22:39 22:37-39 1 योहन 4:21
✡22:40 22:39-40 रोम सहरतोर 13:8-9; गलातितोर 5:14
✡22:43 22:43 1 कुरिंततोर 12:3
✡22:44 22:44 देवुळताङ पाटाङ 110:1; बळयिर 2:34-35; 1 कुरिंततोर 15:25; इब्रितोर 1:13