1-2 इव कतम काग़्हतनाङ पोल्‍लोङ मारतस्‍के येसु माक कग़यवालोरिन इतोग़, “रेंड दियाना पया आवना पोल्वा मन्ह्‌ता इनजोर मीट पुह्‌‍निरे. अस्‍के माने-मन्‍कना नडुम पुटटोनु हव्‍कनागुटातगा वेळ्‍ह्‌च हव्कलाहि पोसीयनुर,” इनजि वेहतोग़.

3 अद तूकने कयपाल इनवाल मोदुल पेर्माना मिदेतगा पेर्मालोर ओसो यहुदिराङ पेदल्‍क मीटिङ कीतोर. 4 मीटिङ कीसि ओरु तमतमाय येसुन कुस्‍क्‍ने पोसि हव्ककल, इनजोर आय्‍डा कीतोर. 5 मति पंडुमतुह्‌क वातोर मुलु कियोग़-मोयोग़ बार आयनुर इनजि पंडुमतस्‍के ओन अह केवाल आयकल, इनजि विचर कीतोर.

6 अदे दिया बेतनि नाटे, मुने मोंडरोगमते मतोग़ सिमोन इनवाना लोते, येसु माट कग़यवालोरोम बार तिंदलाह उदिस मतोम. 7 माट अगा उदिस मतस्‍के, बेदो उंद आंचाळि बंडा-तीसाते वेल्‍ला दाराता अतर्नेय पोसि, येसुनगा वाता. अह कीसि ओन मान ईयलाह, अद नेयदुनु ओना तलापोग़ोट्क दोसिसीता.

8 इदिन ऊळिस, उय्‍तुर ओनाङ कग़यवालोर ओङ आस इतोर, “इदिन बाराह्‌कु उगस पोहता? 9 इद अतर्नेयदुन वमतेके, वेल्‍लाङे कोताङ दोर्केस्‍कु, अव कोतानु गरिब-सरिबतोरिह्‌कु ईयना आवालि,” इनजोर कट्ला कीतोर. 10 वेरा वळ्ह्‌कनदिन केंजिसि, येसु वेरिन इतोग़, “तान बाराह्‌कु कट्ला कीय्ह्‌निर, रा? अद नयेनाह्‌कु बेसतले कबळ कीता! 11 गरिब-सरिबतोर इतेके अमेसाय मियगान मंदनुर, ओरिह्‌कु बेस्‍केतेला दर्मम ईया पग़यकिर. मति नना इसि मियगा अमेसा मनोन आयकन. 12 नावा हायनद कगो एवता इनजि नावा सेत्तातुन अतर्नेय ओकतपे अद अह कीता. 13 इह केंजाट, नना वेहतह्‌नन, कतम दुनियामेंडु, बेगा-बेगा लोकुर देवुळता राजेमता बेसता कबुर वेहतनुर, अगा-अगा इद आंचाळ कीतद कबळतुन वेहतनस्‍के, इद आंचान सीता कीयनुर,” इनजोर येसु इतोग़.

14 ताना पया बार आता? केर्योत नाटेनोग़ यहुदाल इनवाल, वेग़ माट बारा कग़यवालोरग्डाहि ओर्वोग़ मन्‍ज तेला, पेर्मालोरगा अतोग़. 15 अनजि इतोग़, “नना येसुन मीवा कयदे पोसीतन इतेके, नाक मीटु बाताङ ईकिर?” अस्‍के ओरु ओन्‍क डेडा वीसा वेंटाङ कल्‍दर बंडिङ लेकिस ईतोर. 16 पया अस्‍केडाहि यहुदाल येसुन पोस ईयलाहि अग़ ऊळसोर मंदोग़.

17 ओयपिह केवद पिंडटाङ आरिङ तिनदनद पंडुमता मुनेता दिया,*26:17 यहुदिर अमेसा गोह्‌क पिंडटुनु ओय्‍पिह कीसि आरिङ पंडिस तिंदुर. मति ओयवाङ आरिना पंडुमतस्‍के, पिंडटुन ओय्‍पिह कीयलाह पोलो आंदु. ओयवाङ आरिना पंडुम वारममेंड मंदु. इद पंडुमता मुनेता दिया इतेके आवना पंडुमतुह्‌कु तयर आयनद दिया आंदु, इमा दिया ओरु आवना पंडुमतस्‍के अटिस तिंदुर. माट कग़यवालोरोम येसुनके वास ताल्ह्‌कतोम, “गूरु, इद आवना पंडुमता जावा माट बेगा एहतकोम? बेगा नीक तिंदलाह विचर वायग़ा?” 18 “येरुसलेम सहरते अनजि पलानोग़ ओर्वोग़ मन्‍कन कलियिस ओन इह वेहाटु, ‘गूरु निक ताल्ह्‌किह्‌तोग़, “नावा कगो एरे एवता. नावाङ कग़यवालोरा संगे आवना पंडुमतुन माळलाहि मियके वायकोम,” ’ इन्‍ज वेहाटु,” इनजि येसु उय्‍तुर कग़यवालोरिन वेहच लोहतोग़. 19 पया ओर लोहतोर कग़यवालोरु येसु वेहतपु अनजि, अद जागा दोर्किह कीतोर, पया अगा आवना पंडुमता जावा एहतोर.

20 पया मुलतस्‍के, येसु माट कग़यवालोरोम बारा मुडा संगे गाटो तिनदलाह उदतोम. 21 तिंदह्‌पा येसु माक इतोग़, “इह केंजाट, नना वेहतह्‌नन, मियग्‍डाहि ओर्वोग़ नाक कोंटेतोरा कयदे पोसीयनोग़.” 22 इदिन केंजिसि माट वाग़तप आतोम, अदिह्‌क ओर्विना पया ओर्वोग़ येसुन ताल्ह्‌क बोटटोम, “गूरु, ओनन नना बह आयोना?” 23 येसु इतोग़, “नावा संगे बट्‌किता पुलातगा आरिङ अह्‌चिस तिनवालोरग्‍डाहि ओर्वोग़ नाक पोसीयनोग़. 24 सास्‍त्रमते रासिस मतपु, माने-मन्‍कना नडुम पुटटोनन, नना इद दुनियाताहि पेसिस दाकन, निटमे! मति बोग़ नाक पोसीस्‍तोग़, ओना बेचोटा गोसा आयग़ा! ओग़ मन्‍कल पुटवेकेन बेस आस मनालि,” इतोग़. 25 अस्‍के बोग़ ओन पोस एवल मतोग़, ओग़ यहुदाल ओन ताल्ह्‌कतोग़, “गूरु, ओनन नना बह आयोना?” “निम इतिन, अहे!” इनजोर येसु इतोग़.

26 अस्‍के पया माट तिंदह्‌पा, येसु आरतुन पोसि, देवुळतुन जोहर कीसि, आरतुन किर्हतोग़. अह कीसि मयके आहचोर इतोग़, “इद एनाटु, तिन्ह्‌टु, इद आरतुन तिनेके नावा मेंदुदा सीता कीम्ह्‌टु, ताने नना मियेनाह्‌कु मोकि ईय्ह्‌नन.” 27 ओसो ओग़ु गिलसतद अंगुर जोमा पोयतोग़ वने, देवुळतुन जोहर कीतोग़, कीसि ओरके आहचोर इतोग़, “मीट सबेटोरिर इग्‍डाह उन्ह्‌टु. 28 इद अंगुर जोमा उननेके, नावा नेतुरता सीता कीम्ह्‌टु, देवुळ तना लोकुरा संगे कररतुनु, इद नेतुर करल कीस्‍ता.†26:28 यहुदिरा उतुरते कररतुन करल कीयना इतेके, मोक ईसि ताना नेतुरते अद गोटटुन करल कींदुर. नावा नेतुरि वेल्‍लाटोरा पापम मापि आयनेनाह्‌कु नेल वाङग़ा. 29 नना मीक निटम वेहतह्‌नन, नावा बाबाना राजेमते मीट बारा ऐंगे पया पूना रीतते अंगुर जोमा उनाह्‌जोमु, नेटाहि नना तेन पया उनोन आयकन,” इनजि येसु इतोग़. 30 माट पया देवुळतुन जोहर कीयनद पाटा ओसि, जय्‍तुन मराना मेटातगा अतोम.

31 अस्‍के येसु माक इतोग़, “केंजाट, सास्‍त्रमते देवुळि इहे इनजि रासतद मन्ह्‌ता:

33 अस्‍के पत्रु येसुन इतोग़, “सबेटोर नीक विळ्‍सिस अतेकाय, नना इतेक नीक बेस्‍केन विळ्‍सिस वितोन आयकन, गूरु.” 34 “नना नीक करल वेहतह्‌नन डा, नेंड नग़्‍का तलाकोग़ कूसनामुने, बोराय ताल्ह्‌कतस्‍के निमा मूंड मल्‍काङ ‘येसुन पुनोन’ इनजोर कैंगम आयकिन,” इनजि येसु पत्रुन इतोग़. 35 “आयो, नाक नीवाय संग हामुर वातेक तेला बेसे, मति ‘नीक पुनोन,’ इनजि नना मुर्तिय इनोन आयकन,” इनजि पत्रु इतोग़. माटवन कतमतोरोम वेनाङ केंजिस अहे इतोम.

36 येसु माट कग़यवालोरा संगे गेत्‍सेमनि इनदनद जागातगा एवतस्‍के, माक इतोग़, “नना ओके देवुळतुन ताल्ह्‌कलाह दाय्ह्‌नन, अचानाह मीटु इगान उदिस मन्ह्‌टु,” इनजि इतोग़. 37 अह इनजि ओग़ु पत्रुनु ओसो जेबेदिनाङ इर्वुर मग़्‍किरिन (इतेके याकुबिन, योहनिन) पोसि पेंडेस ओतोग़. अस्‍के नाळ नाक बेचोटा बेरा पदिस वायग़ा, तेन सीता कीसि ओग़ वाग़तप आतोग़ वने, ओना जीवा चुहेम आयो. 38 अस्‍के ओर मुवुरिन इतोग़, “नावा जीवातगा पका बेह्‌रा मोतालेह्‌का मन्ह्‌ता रा, अदिह्‌क नावा जीवा हायेङ-पिसेङ आसोर मन्ह्‌ता. मीट इगान मन्ह्‌टु, उंजवालेवा नावा संगे सीतात मन्ह्‌टु.”

39 पया ओग़ु उचुन मुनेह अनजि, कप मुळ्‍न्‍दिसि दंडुम अरतोग़, अह कीस देवुळतुन इह ताल्ह्‌कतोग़, “ए बाबा, निमा ‘इह कीकन तेला’ इन्‍ज इतेके, नाक इद गोसा आयमाकि. तेला मति इद नावा विचरते आयो, नीवाय विचर मतपु आयि.”

40 इह इनजि देवुळतुन ताल्ह्‌किसि, तनाङ मुवुर तोळतोरगा मल्‍स वास ऊळनेके, ओर उंजिस मतोर कोनि! ओर उंजतदिन ऊळिसि, येसु पत्रुन तेहच इतोग़, “ए पत्रु, मीटु गंटामेंडाय नावा संगे सीतात मनदा पग़विरा? 41 नना वेहतप कीयलाह मीवा जीवा तयरे मन्ह्‌ता, मति मीवाङ मेंदुस्‍क इतेके दीरालेवप बागतप मन्ह्‌ताङ. अदिह्‌के मीट सीताते मन्ह्‌टु, देयम मीवा पट ऊळनस्‍के मीट पापमते अरयनायो इनजि देवुळतुन ताल्ह्‌कसोर मन्ह्‌टु.”

42 पया ओग़ ओसो उंद मल्‍का अनजि, देवुळतुन पार्तना कीतोग़, “ए बाबा, इद हामुरता गोसा नाक एताय पोयतग़ा इतेके, नीवाय विचर मतपु पूरा आयि,” इनजोर ताल्ह्‌कतोग़. 43 ताल्ह्‌किसि ओसो ओर मुवुरके वास ऊळनेके, ओराङ कोंडाङ पकाय पूहतप आस मताह्‌कु ओर उंजिसिय मतोर.

44 ओरिन अगान विळ्‍सिसि ओसोवने येसु मुचा आनाहि कोळ्‍व कीयलाह अतोग़. अस्‍केवने मुनेता लेह्‌काने ताल्ह्‌कतोग़. 45 पया ओग़ तना मुवुर तोळतोरके मल्‍स वास इतोग़, “इंका उंजिसिय मह्‌निरा? इंका आरम कीसोरेन मह्‌निरा? ऊळाट, माने-मन्‍कना नडुम पुटटोनु पाप्‍यहलोरा कयदे पोसीयनद कगो एवता. 46 तेदाट, माट ओरिन कलियलाह दाकल! नाक पोस एवल इगा एरेन एवतोग़.”

47 इव पोल्‍लोङ येसु वेहचोरेन मतोग़, अचोटेने यहुदाल अगा वातोग़. माट कग़यवालोरोम बारा मुडग्‍डाहि ओर्वोग़ मन्‍ज तेला, येसुन पोयवालोरा संगे वातोग़. पेर्मालोर ओसो यहुदिराङ पेदल्‍क लोहतोर सीपय्‍कना पल्‍टन यहुदाना संगे तल्वर्क, गूटेङ-बळ्‍गाङ पोस वातोर. 48 येसुन पोस एवल ओरिह्‌क इद सीना वेहच मतोग़, “नना बोन जोहर कीस लोंडकन, ओग़े आंदोग़, ओने पोय्म्ह्‌टु,” इनजि वेहचि. 49 पया यहुदाल टीवा येसुनगा वास इतोग़, “जोहर गूरु!” इनजि ओन गोत ओग़्‍ङिस लोंडटोग़. 50 “मावोनिन, निमा बेद कबळतुह्‌क वातिन, तान कीमु,” इनजोर येसु ओन इतोग़.

इतस्‍के येसुना मुनेह मुल सर्ने आसि, ओन पोयतोर. 51 अचोटेने येसुना संगे मनवाल ओर्विनगा दाळो कसेग़ मता, ओग़ अदिन तेंडिसि मोदुल पेर्माना साकुर केवान वग़ोन हव्‍कलाह तना कसेटुन रेहतोग़, मति अद कसेग़ि ओग़ साकुर केवाना सिरप केवदुन पोडोह देगनाह दल्‍गता. 52 अस्‍के येसु ओन इतोग़, “नीवा कसेटुन दाळोतगा तोग़्का, रा! बाराह्‌क इतेके कसेग़ पोयवाल कसेटेन हायनोग़. 53 नना नावा बाबान ताल्ह्‌कतेके, इंजेकेने ओग़ नाकु बेचोको अजर्क देवतुल्‍किन नाक पिसिह कीयलाह लोहच मनेग़, बह इदिन निमा पुनविना? 54 इह आतेके सास्‍त्रमतगा नावा लोप्पा रासतव पोल्‍लोङ बह करल आयनुङ? अवटे इतेके ‘इद्रम आयनाय गावले,’ इनजि रासतद मन्ह्‌ता,” इनजोर येसु इतोग़.

55 अद वेलाते येसु पोयवालोरिन इतोग़, “ओर्विन डाकुन पोयतप, मीटु तल्वर कसेह्‌कु, टेंगाङ पोस नाक पोयतलाह वातिर अय? नना इतेके दिनम मंदिरतगा उदिसि काग़्‍हन्‍दन, तेला मति मीट नाक अस्‍के बाराह्‌क पोयविर? 56 मति मुनेतोर देवुळता कबुरतोर सास्‍त्रमते नावा लोप्पा रासतव पोल्‍लोङ करल आयना इनजि, नेंड इव गोटिङ आस्‍ताङ,” इनजि येसु इतोग़. अचोटेने माट कग़यवालोरोम कतमतोरोम ओन विळ्‍सिस पटादुळ विततोम.

57 पया येसुन पोयवालोर लोकुर ओन पोसि मोदुल पेर्माल कयपानगा ओतोर. ओना लोनु सास्‍त्रमगूरुर ओसो उय्‍तुर पेदल्कु गुम आस मतोर. 58 मति पत्रु इतेके मोदुल पेर्माना रेसातग एवनाहि मुडा पयाह-पयाह ओर्ङसोर अतोग़. पया बह-बह आयग़ा इनजि ऊळलाह रेसालोप्पा अनजि पह्‌रातोरा संगे उदतोग़.

59 अगा मतोर यहुदिराङ तग्‍वङ केवालोर, कतमतोर गूडटोर. गूडिसि, येसुह्‌कु हामुरता सिक्‍सा ईयनेनाह्‌कु, ओना अडमि बेदाय उंद जोल साक्‍सि दोर्कना इनजि, ओरु अद्रमतोरिनु जोल साक्‍सि एवालोरिन अगा पर्ह्‌किंदुर. 60-61 वेल्‍लाटोरे जोल साक्‍सितोर वास मतोर, मति हामुरता सिक्‍सातुह्‌कु ओजनद साक्‍सि ओरिह्‌क दोर्को. आक्रिते इर्वुर वास इतोर, “ ‘देवुळता मंदिरतुन विर्हचि, तान मूंड दियाने ओसो दोहतकन,’ इनजि वेग़ वेहतोग़,” इद्रमता साक्‍सि ईतोर.

62 अस्‍के मोदुल पेर्माल तेदिस येसुन इतोग़, “वेर नीवा अडम बेद्रम साक्‍सि ईस्‍तोर, ऊळा! निमा बातय बाराह्‌क वळ्ह्‌कविन?” 63 नना कसुरलेवोनन मह्‌नन, तेन पुन्ज तेला, वळ्ह्‌किस वन बातय पाय्‍दा इले इनजि येसु पुतोग़, अदिह्‌क ओग़ु बुस पोल्‍लोवन वळ्ह्‌कोग़. पया मोदुल पेर्माल ओन इतोग़, “जीवात मनदनद देवुळता किरिया पोय्‍पिह कीस नीक ताल्ह्‌किह्‌नन, निमा देवुळता मग़ि किर्स्तुनिन मतेके, माक वेहा!” 64 “निमा इतिन, अहे! मति नना मीक सबेटोरिह्‌क वेहतह्‌नन, नना माने-मन्‍कना नडुम पुटटोनन मताह्‌कु, नेटाहि बेरा डीसातद देवुळता तिनळ बाजे नना अन्‍ज उदतदिन, ओसो नना मोयुलपोग़ोन उदिस मनजि वायह्‌पा मीट ऊळकिर,” इनजि येसु ओरिन इतोग़.

65 इदिन केंजिसि, मोदुल पेर्माल पका नारज आतन, इनजि तोहतलाह, तना कोटजगातुन ओङिह्‌क अग़्हचि इतोग़, “वेग़ देवुळतुन उस्‍किस-पास्‍किस वळ्ह्‌कतोग़, ऊळाट! इंजेक माक ओसो बातातुह्‌क साक्‍सि गावले? मीट इतेक कतमतोरिर वेनाङ केंजतोरिरे! 66 वेन ओसो बाताल ऊळना?” इनजि कयपाल इतोग़. वेग़ु हामुरता सिक्‍सातुह्‌क ओजनोग़! इनजि ओर पेदल्‍क नेयम कीतोर.

67-68 अस्‍के अगा उय्‍तुर लोकुर येसुना तोडटगा उस्‍कतोर, उय्‍तुर बारा ओन नल्ह्‌तोर, ओसो उय्‍तुर ओनाङ कोंडाह्‌क दोहचि, ओन सापुस्‍क ईस इतोर, “निमा ‘देवुळ लोहतोग़ राजानन, देवुळता कबुरतोनन,’ इह्‌निन इतेके, नीक बोग़ नल्हतोग़, अदिन देवुळता जीवाते वेहा, रा!” इनजि ओन पास्कतोर.

69 इके पत्रु लोता रेसातगा उदिस मतोग़ अस्‍के उंद ओर्युल आंचाळ ओनगा वासि इता, “गालिल पटटोग़ येसुना संगे निमावन मतिन, अय?” 70 मति ओग़ु अगा मतोर सबेटोरा मुनेह इतोग़, “निमा बार इह्‌निन, नाक बातय तेळियो!” इनजोर इतोग़.

71 पया ओग़ु रेसाता अग़दगा अतोग़ अस्‍के ओसो उंद ओर्युलतदु ओन ऊळिसि, अगा मतोरिन वेहता, “ए वेग़वन नासरेत नाटेनोग़ येसुना संगे मतोग़े!” 72 अस्‍के ओग़ु ओरिनु ओसोवने इतोग़, “किरिया रा, नना ओन मुर्तिय पुनोन!”

73 गळ्क मनेके, अगा निच मनवालोर उय्‍तुर लोकुर ओनगा वास इतोर, “निमा कोन निटमे ओनाय संगेतोनिन! निमा गालिल पटटोना लेह्‌का वळ्ह्‌किह्‌निन, अदिह्‌क ओना संगेतोनिन इनजोर माट पुह्‌नोम,” इनजोर इतोर. 74 अस्‍के पत्रु इतोग़, “नना किरिया कीस वेहतह्‌नन, नावा पोल्‍लो जोल आतेके देवुळ नाक तिनि! ओन मन्‍कन नना मुर्तिय पुनोन!” इनजोर इनेकेने तलाकोग़ कूसता. 75 अस्‍के येसु पत्रुनु मुनेन इह वेहच मतोग़, “नना नीक करल वेहतह्‌नन डा, नेंड नग़्‍का तलाकोग़ कूसनामुने, निमा नाक मूंड मल्‍काङ ‘ओन पुनोन’ इनजोर कैंगम आयकिन,” इनजोर इतद पोल्‍लो पत्रुह्‌कु इंजेक सीता वाता. सीता वासि, ओग़ पलतेक पेसिसि वेल्‍ला दुकमते पका अळतोग़.