1 पया येसु अग्डाहि तना नासरेत नाग़ अतोग़, ओनाङ कग़यवालोर वने ओना संगे अतोर. 2-3 अनजि वारमता पोल्‍वादियाते अग्डा पार्तनाता लोते काग़्हता बोटटोग़. वेल्‍लाटोर लोकुर ओनाङ पोल्‍लोन केंजिसि बयल आतोर, आसि इद्रम इतोर, “वेन्‍क इव पोल्‍लोङ, इचोटा बुदि, बेग्डाह दोर्कता रा? अचोटाङ बेराङ कबस्‍क कीयनद डीसा वेन्‍क बेग्डाह दोर्कता रा? बह वेग़ मरियाना मग़ि वड्‌लल आयोग़ा? वेनाङ तमोर याकुबि, योसेपि, सिमोनि, यहुदाल वेर आयोरा? वेनाङ सबे एलास्‍क बह इगाने इलेङ?” इनजि नाटेनोर लोकुर येसुन पास्कतोर. 4 अस्‍के येसु ओरिन इतोग़, “देवुळता कबुरतोन्‍क दुनियामेंड मान दोर्किह्‌ता, मति कुदता नाटे, कुटुमते अहे लोते मात्रमि मान दोर्को. अद्रमलेह्‌काने नाक इंका मीट पास्कतिर,” इतोग़. 5 ओर येसुन नमवाह्‌कु अगा ओग़ वेल्‍लाङ डीसाताङ कबस्‍क कीया पग़वोग़. सिरप इच्‍वुरे बेमरतोरा पोग़ोन कय तासिसि ओरिन सव्रे कीतोग़. 6 पया नाटेनोर येसुन नमवाह्‌कु ओग़ बयल आतोग़. अहे पया येसु काग़्हचोरे सबे एरे-गूरेताङ नाह्‌कने तिरियतोग़.

7 उंद दिया येसु तनाङ बारा बळयिरिन केयतोग़, केयिसि इर्वुर-इर्वुरिन इद्रम जोळि कीसि सेवातुह्‌क लोहतलाह ओरिन तयर कीतोग़. कीसि मन्कलोरग्डाह देयह्‌किन पेसिह कीयलाह ओरिह्‌क अदिकर ईतोग़. 8 पया ओरिन इद्रम उकुम ईतोग़, “मीट सेवाते दायह्‌पा सिरप डुडतुन विळ्‍सिसि, गाटो, जोर्का, कोताङ इद्रम बाताङे ओयमाटु. 9 अहे ओसो एल्पुस्क केग़्स अन्‍ह्‌टु, मति रेंड-रेंड जगाङ-गेंदेङ ओयमाटु,” इतोग़. 10 ओसो वने इतोग़, “बेद लोतगा मीट दाकिर, अदे लोतगा मीट दुस्रा नाग़ अनाह्‌जोम मन्‍ह्‌टु. 11 ओसो बेद नाटेनोर लोकुर मीक रोमलाह एवोर, मीवाङ केंजोर, अग्डाहि पेसना वेलाते देवुळि ओरा पोग़ोन ओङ आता इनजोर तोहतलाहि, मीवाङ काल्‍कना दुरातुन अगाने दुल्पिसि पेसाटु,” इनजोर इतोग़. 12 अद्रमलेह्‌काने पया ओर सेवाते अनजि, “पापमता अग़दाहि मल्‍ह्‌म्‍टु” इनजोर पोकुर कीसोर तिरियतोर. 13 अद्रम तिरियिह्‌पा देयह्‌क पोस मतोर मन्कलोरग्डाह वेल्‍लाङे देयह्‌किन पेहतोर, अहे वेल्‍लाटोर बेमरतोरिन नेय ओकिसि सव्रे कीतोर.

14 पया येसुना पेदिर वेल्‍लाय पोकुर आता, अस्‍के एरोद अंतिपस राजाल वने इद पोल्‍लोतुन केंजतोग़. उय्तुर “वेग़ येसु देवुळता पेदिरते एग़ मीहवाल योहन आंदोग़ डोलिस जीवा अरतोग़, अदिनेनाह्‌क डीसाताङ कबस्‍क कीस्‍तोग़,” इनजोर इंदुर. 15 उय्तुर बार, “देवुळता कबुरतोग़ एलिया मुय्तोग़ ओसो वने वातोग़,” इंदुर. ओसो उय्तुर बार, “वेल्‍लाय मुने देवुळता कबुरतोर बोर मतोर, वेग़ अद्रमतोग़े,” इंदुर. 16 मति एरोद राजाल वने येसु कीतव कबस्‍किन केंजिसि इद्रम इतोग़, “योहनना तलातुन नना डाय वेहच मतन, ओग़े ओसो जीवा अरतोग़,” इनजोर इतोग़. 17-18 बाराह्‌क इतेके, योहनि, एरोद राजाल वेरा नडुम कट्‌लाङ इह आताङ. राजाना तमोग़ पिलिपि इनवाल जीवत मनेकेने, वेना मुते, एरोदियसि इनदनदिन राजल तना लोन तच मतोग़. अदिनेनाह्‌क योहनि राजानगा अनजि इतोग़, “नीवा तमना मुतेन तासना इद नीवा कीतद कबळ मोसानाङ अडोङ वेहतपु पोलो, महरज,” इनजोर वेहच मतोग़. अदिनेनाह्‌क अद आंचाळ वेहताह्‌कु राजाल योहनिन पोसि जेलते वाटलाह वेहच मतोग़. 19 मति एरोदियसि योहनिना विरुद आसि, ओन हव्‍कलाह ऊळिंदु, मति हव्‍क पग़वो. 20 बाराह्‌क इतेके, योहनि सेतेमतोग़ ओसो देवुळता पवित्र मन्‍कल इनजोर एरोद अंतिपस पुन्ज मतोग़. अदिनेनाह्‌क ओन रेयिंदोग़. योहनि राजाह्‌क वेहन्दोग़, अस्‍के ओना जीवा चुहेम आयवेक वने ओना पोल्‍लो केंजलाह गिर्दा आंदोग़. अदिह्‌क ओन अद आंचानग्डाहि पिसिह कीसि तासिस मतोग़.

21 पया एरोद राजाना पुटटा दिया एवता. अद दिया राजाल बेरोर मुक्यालोरिन, सीपय्किरा मुक्यालोरिन, गालिल पटटा बेरोर पेदल्‍किन केयिसि कुळ्प कीतोग़. 22 पया राजाल केयिस मता मुडा मुनेह एरोदियसिना मयळि एंदता. एंदतदिन ऊळिसि राजाल ओसो कुळ्‍पतुह्‌क वाता मुलु पका गिर्दा आतोर. पया राजाल गिर्दा आसि अद पिलातुन इतोग़, “निमा बाताल गावले अद ताल्ह्‌का अदिन नना ईकन,” इतोग़. 23 अहे ओसो “बेदाय नावा वळ्गा राजेम वने ताल्ह्‌कतेके तान नना नीक ईकन,” इनजि राजल किरिया कीस वेहतोग़. 24 किरिया कीतस्के अद पिला पलते अनजि, “नना बाताल ताल्ह्‌ककन? अवा!” इनजोर तलिन ताल्ह्‌कता. अस्‍के ताना तलोग़ इता, “देवुळता पेदिरते एग़ मीहवाल योहनिना तला ताल्ह्‌का,” इता. 25 इताहे अद पिला ओसो राजानगा वासि, “पेपि, योहनिना तला उंदि दळ्याते कीसि नाक इंजेकेन तच ईया वेहा,” इनजोर ताल्ह्‌कता. 26 ताल्ह्‌कतस्के राजाल पका नारज आतोग़, मति राजाल कुळ्पता मुडा मुनेह किरिया कीस वेहताह्‌कु अद पोल्‍लोतुन मिळ्ह्‌ता पग़वोग़. 27 अदिनेनाह्‌क पया राजाल ओर्वोग़ सीपयिन, योहनना तला डायिस ततलाह उकुम ईतोग़. 28 ईतस्‍के ओग़ जेलतगा अनजि योहनिना तलातुन डायतोग़. डायिसि उंद दळ्याते कीसि अद पिलातुह्‌क तच ईतोर. अद पिला पया तना तलिनगा ओसीता. 29 पया इद कबुर केंजिसि योहननाङ कग़यवालोर वातोर. वासि ओना सेत्तातुन ओस पोहतोर. अदिनेनाह्‌क राजाल येसुनु “योहनि जीवा अरतोग़” इनजोर इतोग़.

30 पया येसुनाङ बळयिर सेवाताह मल्‍सि येसुनगा जमा आतोर. आसि तमा बाताल-बाताल कीतोर, ओसो काग़्हतोर अदिन ओन वेहतोर. 31 अस्‍के वेल्‍लाटोर लोकुर ओरगा अनजोर वासोर मंदुर, अदिह्‌क ओरिह्‌क गाटो तिनदलाह वने अग़ दोर्को. अदिनेनाह्‌क येसु ओरिन इतोग़, “अलेट! माट बोरे लेवद जागातगा अनजि गळ्क रोमकल,” इनजोर इतोग़. 32 पया ओर ओडाते उदिस बोरे लेवद जागातगा तमाय मनदलाह अतोर.

33 मति ओर दायनदिन लोकुर ऊळतोर, ऊळिसि ओरिन पुतोर. पया सबे नाह्‌कनाहि आस्‍क-कोय्तोर नेदा अग़दुह्‌क ताकसोरे ओरिह्‌काय मुने अद दडटगा एवतोर. 34 अस्‍के येसु ओसो ओनाङ कग़यवालोर वने एवतोर. एवसि येसु ओडाताह रेगिसि अगा वेल्‍लाय मुल जमा आतदिन ऊळतोग़. ओरु गोरेकोपाल लेववु गोरेनलेह्‌का मतोर, तेन ऊळिसि येसुह्‌क ओरा मान वसता. पया येसु ओरिन वेल्‍लाङे पोल्‍लोङ काग़्हता बोटटोग़. 35 इद्रम काग़्हनेके पोळ्‍द अता. पया कग़यवालोर येसुनगा वासि इतोर, “गूरु, इद पेळ्‍ह्‌कल जागा मन्‍ह्‌ता, इंजेक पोळ्‍द वने अता. 36 वेर मात्रमि एरे-गूरेताङ नाह्‌कनगा अनजि तम्‍क तिनदलाह बाताङ आयि असिर, वेरिन लोहा,” इतोर. 37 इतस्‍के येसु उल्टा ओरिन, “अले मीटे ओरिह्‌क तिंडटा बह कोट कीम्ह्‌ट रा!” इतोग़. इतस्‍के ओर इतोर, “गूरु, इचोन मुडुह्‌क तीहतलाह आट नेलाना कूलताङ कोताङ आस्‍ताङ, अचोक कोतानाङ आरिङ असिस तीहतकोमा?” इतोर. 38 येसु इतोग़, “मियगा बेचोक आरिङ मन्‍ह्‌ताङ? अनजि ऊळाट अले,” इतोग़. अन्‍ज ऊळतोर अस्‍के “एयुङ आरिङ, रेंड मीन्‍ह्‌क मन्‍ह्‌ताङ,” इतोर. 39 अस्‍के “अलेट! सबेटोरिन रोंडातगा बतिङ-बतिङ उदिह कीम्ह्‌ट,” इनजोर ओरिन उकुम ईतोग़. 40 अद्रमे लोकुर उंद-उंद बततगा बेगा पनास बेगा नूरु इद्रम उदतोर. 41 पया लोकुर उदतस्‍के अव एयुङ आरिन ओसो रेंड मीन्‍ह्‌किन पोसि, पोग़ोन ऊळिसि, देवुळतुन जोहर कीसि आरिन किळ्‍ह्‌तोग़. अह कीसि “मुडा लोकुरिह्‌क तूसिसीम्‍ह्‌ट,” इनजोर कग़यवालोरिन वेहतोग़. अद्रमे मीन्‍ह्‌किन वने सबेटोरिह्‌क तूसिसीयलाह वेहतोग़. 42 पया वेर सबेटोर पका पंजनाह तितोर. 43 तिन्‍ज-उन्‍ज पिसतव आर किळ्‍केङ ओसो मीन्‍ह्‌क जमा कीनेके, बारा डालाङ पेसताङ. 44 तिनवालोरगा सिरप कोय्तोरे एयुङ अजर्क (5000) मतोर.

45 पया तिन्‍ज-उन्‍ज मारतस्‍के येसु कग़यवालोरिन इतोग़, “नना लोकुरिन मल्‍स लोहतलाह पयाह मह्‌नन, मीट मात्रम ओडाते उदिसि सम्‍दुरता अबर बाजे वेंडिसि बेत्‍सेदा नाग़ अन्‍ह्‌टु,” इतोग़. 46 पया येसु लोकुरिन लोहचि, तना गुड्रापोग़ोन देवुळता संगे वळ्ह्‌कलाह अतोग़. 47 पोळ्‍द अनजोरे ओडा सम्‍दुरता नडुमकसाते मता. येसु बार वग़ोग़े दडटके मतोग़. 48 पया वळ्य मुनेहतेनाह वांदु, अदिनेनाह्‌क कग़यवालोर ओडातुन वग़्हचोर-वग़्हचोर बागिस मतोर, इदिन येसु ऊळतोग़. पया येसु नग़्काडाङ मूंड-नालुङ एग़सोरे (इतेके तलाकोग़ कूसना जोक-जोक) सम्‍दुरता एता पोग़ोट्‌क ताकसोरे ओरगा वातोग़. येसु ओरिन वीळिस दायना मता. 49 मति कग़यवालोर येसु एता पोग़ोट्‌क ताकनदिन ऊळिसि, “एता मसमि वास्‍ता, रा!” इनजोर सबेटोर रेयिसि केयतोर. 50 अस्‍के तोप्नेन येसु ओरिन केयतोग़, “नना रा, रेयमाटु, दीरा कीम्‍ह्‌टु,” इनजोर इतोग़. 51 पया येसु ओरा संगे ओडातगा तग़्ङतोग़, तग़्ङतस्‍के वळ्यु बेके मायतायो, बेके मायोयो! इदिन ऊळिसि कग़यवालोर पका बामतोर. 52 बह इतेके येसु आरिङ तीहतदिन ऊळिस वने ओर ओना लावतुन पुनोर. तान पुनवाह ओरा बुदि गळ्स आस मता.

53 पया ओर सम्दुरतुन वेंडिसि गेनेसरेत एरियाते एवतोर. एवसि ओडातुन दडटगा दोहतोर. 54 येसु ओडातग्डाहि रेगताहे अग्डोर ओन पुतोर. 55 पुताह्‌कु एरे-गूरेताङ सबे नाह्‌कने कबुर वेहतलाह विततोर. पया मन्‍कलोर दुकिनोरिन कटुस्‍कने कांजिसि, येसु बेगा मन्ह्‌तोग़ इनजोर कबुर दोर्किंदु, अगा ओन्‍दुर. 56 येसु वेलियतोग़ अव सबे सहर्कनाङ, नाह्‌कनाङ, गूळानाङ बजर्कनगा दुकिनोरिन तासिसि, “गूरु, सिरप नीवा गेंदे कोङतुन मात्रम बोय ईम, अस्‍के बेस आयनुर,” इनजोर अर्जि कींदुर. बोर-बोर ओना गेंदे कोङतुन बोयिंदुर ओर सबेटोर सव्रेम आंदुर.